Eksoda 27:21 - BIBELE Mahungu Lamanene

²¹ Aroni ni vana va yena va ta veka rivoni leri eka Ntsonga lowo Hlawuleka, ehandle ka xisirhelelo lexi sirhelelaka Areka ya Ntwanano; ri ta tshama ri pfurha emahlweni ka mina HOSI ku sukela nimadyambu ri kondza ri xa. Nawu lowu wu fanele ku hlayisiwa hi Vaisraele ni vatukulu va vona hi minkarhi hinkwayo.”

Xitsonga (Bibele)

²¹ Aroni ni vana va yena va ta ti lunghisa eTabernakeleni, ehandle ka nguvu leyi nga emahlweni ka vumbhoni, leswaku ti voninga emahlweni ka Yehovha, ku sungula nimadyambu, ku fika nimixo. I ku lerisa loku nga heriki etinxakeni ta vana va Israele.”

Eksoda 27:21 Referans Kwoze

Tinhlayo 19:21

Vaisraele va ta boheka ku landza nawu lowu, hilaha ku nga heriki. Munhu loyi a xuvaka hi mati yo basisa leswi nyameke, ú fanele ku hlantswa swiambalo swa yena; naswona munhu loyi a khumbaka mati lawa yo basisa leswi nyameke, ú ta va a nga tenganga, dyambu ri kondza ri pela.

Tinhlayo 18:23

Valevhi hi vona ntsena lava nga ta tirha mintirho ya kona, kutani hi vona lava nga ta byarha milandzu leyi kongomaneke ni Ntsonga. Wu ta va ntirho wa vona ni vatukulu va vona hilaha ku nga heriki; na vona a va nga vi na ndzhaka etikweni ra Israele.

2 TIKRONIKA 13:11

Siku rin'wana ni rin'wana nimixo, va humesela HOSI Xikwembu emagandzelo lama hisiwaka ni mirhi ya risuna, va tlhela va swi humesa nimadyambu; va veketela xinkwa xa magandzelo etafuleni ra xona lero tenga; masiku hinkwawo loko ri perile, va teka xitlhoma-timboni xa nsuku, va lumeka timboni ta kona. Hi hina hi tirhaka mintirho ya HOSI, Xikwembu xa hina; n'wina mi xi tshikile!

1 SAMIELE 3:3

Rivoni ra Xikwembu a ri nga si timiwa mpundzu wolowo, naswona Samiele a a etlele eTempeleni ya HOSI Xikwembu, laha Areka ya xona a yi ri kona.

Levhitika 16:34

Milawu leyi yi ta tirha hilaha ku nga heriki. Kan'we hi lembe, Vaisraele va ta basisiwa hikwalaho ka swidyoho swa vona hinkwaswo.” Kutani Muxe a endla hilaha HOSI Xikwembu xi n'wi leriseke hakona.

Levhitika 3:17

Hinkwako lomu mi nga ta va mi tshama kona, mi nga tshuki mi dya mafurha kumbe ngati. Nawu lowu, mi fanele ku wu landza, n'wina ni vatukulu va n'wina hilaha ku nga heriki.”

Eksoda 30:8

Ú ta tlhela a hisa swinun'hweriso leswi namadyambu, enkarhini lowu a lumekaka timboni ha wona; vatukulu va n'wina hinkwavo na vona va ta humesa magandzelo lawa ya mirhi ya risuna emahlweni ka mina HOSI, hilaha ku nga heriki.

2 Petro 1:19

Hikokwalaho, rito ra vaprofeta, hina hi ri kuma ri tiyile ku tlula ni khale. Mi ta va mi endla swona loko mi hlayisa swinene rito rero, ku fana ni rivoni leri voningaka lomu ku nga ni munyama, ku fikela loko vurhonga byi tshwuka, ni loko nyeleti ya mixo yi humelela etimbilwini ta n'wina.

Yohane 5:35

Yohane a a ri rivoni leri pfurhaka ni ku vangama; kutani n'wina mi swi nkhensile, mi tsakela hi nkarhinyana ku vonakala ka yena.

1 SAMIELE 30:25

Ku sukela siku rero, Davhida a endla leswaku mhaka leyi yi va nawu ni ntolovelo etikweni ra Israele; ni namuntlha swa ha ri tano.

Eksoda 28:43

Swiburukwana leswi swi fanele ku ambariwa hi Aroni ni vana va yena, loko va nghena eka Ntsonga lowo Hlawuleka, kumbe loko va ta kusuhi ni alitari ku ya tirha exivandleni lexo hlawuleka; loko va nga endlisi sweswo, va ta tivangela khombo, va fa. Lowu wu ta va nawu lowu bohaka Aroni ni vatukulu va yena hilaha ku nga heriki.”

Nhlavutelo 2:1

“Tsalela ntsumi ya kereke ya le Efesa, u ku: ‘Marito ya loyi a tamelaka tinyeleti ta 7 evokweni ra yena ra xinene, la fambaka exikarhi ka switlhoma-timboni swa 7 swa nsuku, hi lawa:

2 Vakorinto 4:6

Hikuva xona Xikwembu lexi nga te: “Ku vonakala a ku vangame emunyameni!” hi xona lexi nga vangamisa ku vonakala etimbilwini ta hina, hi ta tiva ku kwetsima ka xona loku vangamaka enghoheni ya Kriste.

Luka 12:35

“Tshamani mi tikhamile, ni timboni ta n'wina a ti lumekiwe,

Matewu 4:16

Vanhu lava a va ri emunyameni, va vonile ku vonakala lokukulu; lava a va tshama etikweni ra rifu ni xinyami, va fikeriwe hi ku vonakala.”

Malakiya 2:7

Hakunene ntirho wa muprista i ku dyondzisa vanhu ku tiva mina Xikwembu; vanhu va fanele ku ya kuma milawu eka yena, hikuva i murhumiwa wa mina HOSI ya matimba hinkwawo.

Pisalema 134:1

N'wina hinkwenu malandza ya HOSI, tanani mi ta yi tlangela, tanani n'wina mi rindzaka nivusiku eTempeleni ya yona.

Tinhlayo 8:9

U ta ta ni Valevhi emahlweni ka Ntsonga lowo Hlawuleka, kutani u hlengeleta ntshungu hinkwawo wa Vaisraele.

Levhitika 24:9

Swinkwa leswi swi ta va swa Aroni ni vana va yena; va ta swi dyela exivandleni lexi hlawulekeke, hikuva swi ta va xiphemu lexo hlawuleka ngopfu lexi va nga ta hamba va nyikiwa xona hilaha ku nga heriki, eka magandzelo lama humeseriwaka mina HOSI.”

Levhitika 24:3

Aroni ú ta ri veka ehandle ka xisirhelelo lexi sirhelelaka Areka ya Ntwanano eka Ntsonga lowo Hlawuleka, ri tshama ri ri karhi ri pfurha emahlweni ka mina HOSI ku sukela namadyambu ri kondza ri xa. Nawu lowu mi fanele ku wu hlayisa n'wina ni vatukulu va n'wina hilaha ku nga heriki.

Levhitika 3:8

a fika a tlhandleka voko ra yena enhlokweni ya yona, a yi tlhava emahlweni ka Ntsonga lwo Hlawuleka, kutani vana va Aroni va ta teka ngati ya yona va xuva ha yona alitari matlhelo hinkwawo.

Eksoda 40:3

Endzeni ka wona, mi ta veka Areka ya Ntwanano, mi siva Areka leyi hi xisirhelelo.

Eksoda 30:36

Xiphemu xin'wana xa wona, mi ta xi sila xi endla mapa, kutani mi teka mapanyana ya kona mi ma nyunyetela emahlweni ka Areka ya Ntwanano, endzeni ka Ntsonga lowo Hlawuleka, laha ndzi nga ta hlangana na n'wina kona. Murhi lowu wu ta va wu hlawulekile swinene eka n'wina.

Eksoda 29:44

Ndzi ta hlawulekisa Ntsonga ni alitari ya kona; na yena Aroni ni vana va yena, ndzi ta va hlawulekisa leswaku va va vaprista, va ndzi tirhela.

Eksoda 29:42

Vatukulu va n'wina hinkwavo na vona va ta ya emahlweni va humesa magandzelo lama hisiwaka lawa, ma humeseriwa enyangweni ya Ntsonga lowo Hlawuleka, emahlweni ka mina HOSI. Kona kwalaho ndzi ta hlangana na n'wina, ndzi vulavula na n'wina.

Eksoda 29:28

Aroni ni vana va yena va ta nyikiwa nyama leyi hi nawu lowu nga ta boha Vaisraele hilaha ku nga heriki, hikuva hi yona nyiko eka vaprista, leyi Vaisraele va nga ta yi pambula eka magandzelo ya vona ya xinakulobye; i mhamba ya vona leyi va yi humeselaka mina HOSI Xikwembu.

Eksoda 25:16

Endzeni ka Areka, mi ta nghenisa xitsundzuxo xa Ntwanano lexi ndzi nga ta mi nyika xona.

Eksoda 16:34

Kutani Aroni a endla hilaha HOSI Xikwembu xi leriseke Muxe hakona, a veka xibya lexi emahlweni ka Areka ya Ntwanano leswaku xi hlayiseka.

Genesa 1:8

Hiloko Xikwembu xi thya mpfhuka lowu xi ku i “Tilo”. Kutani ku va madyambu, ku tlhela ku va mixo, ri va siku ra vumbirhi.

Genesa 1:5

Kutani Xikwembu xi thya ku vonakala xi ku i “Nhlekanhi”, munyama wona xi ku i “Vusiku”. Kutani ku va madyambu, ku tlhela ku va mixo, ri va siku ro sungula.

Levhitika 24:2

“Lerisa Vaisraele leswaku va ndzi tisela mafurha layo tenga lama humaka eka murhi wa mutlhwari, leswaku rivoni ri ta lumekiwa namadyambu siku rin'wana ni rin'wana.

Tinhlayo 18:5

Wena ni vana va wena, mi ta tirha mintirho ya le xivandleni lexo hlawuleka ni ya le alitarini, leswaku Vaisraele va nga ha tlheli va wela hi vukari bya mina HOSI.

Eksoda 12:14

“Siku leri, mi fanele ku ri tsundzuka; ri ta va siku leri mi nga ta endla nkhuvo wo tlangela HOSI Xikwembu ha rona. Nkhuvo lowu wu ta va xiboho ni le ka hinkwavo lava nga ta velekiwa, hilaha ku nga heriki.

Eksoda 30:21

Va ta hlamba mavoko ni milenge, hikuva loko va nga endlisi sweswo, va ta fa. Lowu i nawu lowu nga ta ka wu nga hundzuki, eka Aroni ni vana va yena, wu ta boha hambi va ri vatukulu va yena, hilaha ku nga heriki.”

Levhitika 6:15

Un'wana wa vona ú ta teka mapa lamanene ya magandzelo ya swa le masin'wini, a ma nusa ni mafurha ya kona a tata xandla, kutani a ma hisa alitarini ni murhi hinkwawo wa risuna, swi va swo suma ha swona; ku nun'hwela ka swona ku ta tsakisa HOSI Xikwembu.

Levhitika 7:36

Esikwini leri ra ku cheriwa ka vona mafurha enhlokweni, HOSI Xikwembu xi lerisile leswaku Vaisraele va hamba va va nyika xiphemu lexi; vaprista va fanele ku nyikiwa xona hilaha ku nga heriki.”

Levhitika 10:9

“Wena ni vana va wena, mi nga tshuki mi ya nghena eka Ntsonga lowo Hlawuleka loko mi nwile vhinyo kumbe byala, hikuva mi nga fa. Nawu lowu mi fanele ku wu landzelela, n'wina ni vatukulu va n'wina, hilaha ku nga heriki.

Levhitika 17:7

Hi ndlela leyi, Vaisraele a va nga ha endli vunghwavava hi ku tlhava swifuwo swa vona, va gandzela ha swona swikwembu swa vona swa swiphongho. Naswona va fanele ku hlayisa nawu lowu, vona ni vatukulu va vona, hilaha ku nga heriki.”

Levhitika 23:14

Loko ku nga si fika siku leri mi tisaka ha rona magandzelo ya mina Xikwembu xa n'wina, mi nga tshuki mi dya swa nguva leyintshwa, xi nga va xinkwa, kumbe tindzhoho leti oxiweke, kumbe letimbisi. Nawu lowu mi fanele ku wu landza hilaha ku nga heriki, n'wina ni vatukulu va n'wina, hinkwako lomu mi nga ta va mi tshama kona.

Levhitika 23:21

Hi siku roleri, mi fanele ku vitanana, mi hlengeletana mi ndzi gandzela, mi nga tirhi ntirho na wun'we lowu tikaka. Nawu lowu, mi fanele ku wu landza hinkwako lomu mi nga ta tshama kona, n'wina ni vatukulu va n'wina hilaha ku nga heriki.

Tinhlayo 35:29

“Timhaka leti ti ta va milawu leyi nga ta boha n'wina ni vatukulu va n'wina, hinkwako lomu mi nga ta va mi ri kona.