Eksoda 15:11 - BIBELE Mahungu Lamanene

¹¹ “We HOSI, i mani loyi a fanaka na wena exikarhi ka swikwembu, xana? Wena la nga ni matimba lama kwetsimaka, wena wa mintirho leyo chavisa, wena u endlaka swihlamariso, ku hava la fanaka na wena!

Xitsonga (Bibele)

¹¹ “I mani la fanaka na wena, Yehovha, exikarhi ka swikwembu! I mani la kwetsimaka, la tengeke kukotisa wena, La fanelaka ku dzunisiwa hi tinsimu, U endle masingita!

Eksoda 15:11 Referans Kwoze

1 TIHOSI 8:23

“Wena HOSI, Xikwembu xa Israele, a ku na xikwembu ni xin'we lexi fanaka na wena, ehenhla matilweni, hambi hansi emisaveni: U hlayisa ntwanano wa wena, u komba ni rirhandzu ra wena eka malandza ya wena lama tinyiketaka hi mbilu ku hanya etindleleni ta wena.

1 SAMIELE 2:2

A ku na la kwetsimaka tanihi HOSI; ehandle ka yona, ku hava xin'wana Xikwembu; a ku na ribye leri tiyeke kukota Xikwembu xa hina.

2 SAMIELE 7:22

Hikokwalaho, u nkulukumba, wena HOSI N'wini wanga, naswona ku hava la fanaka na wena; ehandle ka wena, ku hava Xikwembu xin'wana, hikuva hinkwaswo leswi hi swi tweke swi seketela mhaka leyi.

Nhlavutelo 4:8

Xin'wana ni xin'wana xa swivumbiwa leswi hanyaka leswi swa mune, a xi ri ni timpapa ta 6 leti nga tala hi mahlo hinkwako, endzeni ni le handle. Kutani vusiku ni nhlekanhi swi yimbelela swi nga miyeli, swi ku: “Wa kwetsima, wa kwetsima, wa kwetsima, loyi a nga Hosi ya matimba hinkwawo, loyi a a ri kona, loyi a nga kona, loyi a taka.”

Esaya 6:3

Tintsumi a ti hlamulana ti ku: “Wa kwetsima, wa kwetsima, wa kwetsima loyi a nga HOSI ya matimba hinkwawo, misava hinkwayo yi tele hi ku dzuneka ka yena.”

Duteronoma 3:24

‘We HOSI N'wini wanga, leswi u ndzi kombeke swona i masungulo ntsena ya mintirho leyikulu yo hlamarisa leyi u lavaka ku yi endla. A ku na xikwembu xin'wana etilweni ni laha misaveni lexi kotaka ku endla mintirho ya matimba ku fana na wena!

Pisalema 86:8

Exikarhi ka swikwembu, ku hava lexi fanaka na wena we N'wini wanga, hambi mintirho ya wena a yi pimanisiwi na yin'wana.

Pisalema 77:14

Hi wena Xikwembu lexi endlaka mahlori, u komba matimba ya wena exikarhi ka vamatiko.

Nhlavutelo 15:4

I mani la nga ta ka a nga ku chavi, we Hosi, i mani la nga ta ala ku twarisa vito ra wena ke? Hi wena ntsena loyi a kwetsimeke, kutani vamatiko hinkwavo va ta ta va ta nkhinsama emahlweni ka wena, hikuva mintirho ya wena leyo lulama yi le rivaleni!”

Esaya 40:25

Muhlawuleki wa vutisa, ú ri: “Xana ú kona loyi mi nga ndzi ringanisaka na yena, loyi ndzi fanaka na yena, xana?”

Duteronoma 33:26

“N'wina va ka Yexuruni, ku hava Xikwembu xin'wana ehandle ka lexi, xi tsemakanya matilo ni mapapa, xi ta xi ta mi pfuna hi vukulu bya xona.

Pisalema 77:19

U boxile ndlela ya wena exikarhi ka lwandle, u tsemakanyile hi le swidziveni, kutani ku hava loyi a voneke minkondzo ya wena.

Esaya 40:18

Xana ú kona munhu loyi mi nga n'wi ringanisaka ni Xikwembu, kumbe swi kona leswi mi nga swi fanisaka na xona, xana?

Pisalema 35:10

Ndzi ta vula hi mbilu ya mina hinkwayo, ndzi ku: A ku na la fanaka na wena we HOSI, hikuva u kutsula swisiwana eka lava va swi xanisaka, u lwela vapfumari eka lava va va tekelaka swa vona.

Eksoda 8:10

Kutani Faro a ku: “Mundzuku!” Muxe a ku: “Swi ta va hilaha u vulaka hakona, u ta tiva leswaku ku hava loyi a fanaka na HOSI Xikwembu xa hina.

Pisalema 66:5

Tanani mi ta hlalela mintirho ya Xikwembu: Xi endlile swilo leswo hlamarisa laha misaveni.

Yeremiya 49:19

“Hakunene ndzi ta hatla ndzi hangalasa va le Edomu, ku fana ni nghala leyi humaka exihlahleni xa Yordani, yi hangalasa tinyimpfu leti nga madyelweni ya rihlaza; kutani etikweni ra vona ndzi ta veka loyi ndzi n'wi rhandzaka. Xana i mani loyi a ringanaka na mina, ndzi lerisiwa hi mani xana? I murhangeri wihi la nga lwaka na mina ke?

Esaya 57:15

Xikwembu xa le henhla-henhla, xona lexi nga kona minkarhi hinkwayo, lexi vito ra xona xi nga Muhlawuleki, xi vurisa sweswo xi ri: “Mina ndzi tshama ehenhla laha ku hlawulekeke, kambe ndzi kumeka ni le xikarhi ka lava khunguvanyekeke, lava titsongahataka; ndzi nyika lava titsongahataka matimba, lava khunguvanyekeke emoyeni, ndza va tiyisa.

Pisalema 145:17

Tindlela ta HOSI Xikwembu hi leto lulama hinkwato, rirhandzu ra xona ra vonaka emintirhweni ya xona hinkwayo.

Yeremiya 10:16

Xikwembu xa va ka Yakobo a xi fani ni swikwembu leswi: Hi xona xi vumbeke swilo hinkwaswo, kutani Vaisraele i vanhu va xona va xiviri. Vito ra xona i HOSI ya matimba hinkwawo.

Pisalema 119:120

Ndza rhurhumela emahlweni ka wena hikuva ndza ku chava, ndzi chava ni leswi u swi boheke.

Luka 12:5

Ndzi ta mi komba loyi mi fanelaka ku chava yena; chavani loyi a nga ni matimba ya ku lovisa munhu, a n'wi hoxa eTiheleni. Ina, ndzi ri ka n'wina, yena yoloye, n'wi chaveni!

Pisalema 90:11

Xana i mani la anakanyaka matimba ya vukari bya wena xana? La tsundzukaka ku hlundzuka ka wena loku chavisaka i mani ke?

Levhitika 19:2

ku ya tivisa ntshungu hinkwawo wa Vaisraele marito ya xona lama nge: “Hlawulekani, hikuva ndzi hlawulekile mina HOSI, Xikwembu xa n'wina.

Esaya 30:11

tshikani leswi mi swi endlaka, mi nga ha tirhi ntirho lowu, mi nga ha hi byeli nchumu hi ta Muhlawuleki wa Israele.’ ”

Pisalema 89:18

Mufumi wa hina, a nga loyi a hi sirhelelaka, ú le mavokweni ya wena we HOSI Muhlawuleki wa Israele.

Nhlavutelo 13:4

Vanhu va gandzela dragona hikuva yi nyikile xivandzana ematimba ya yona, va gandzela xivandzana va ku: “Loyi a fanaka ni xivandzana i mani, naswona i mani loyi a nga lwaka na xona xana?”

Eksoda 3:20

Hikokwalaho, ndzi ta tirhisa matimba ya mina, ndzi ba vanhu va Egipta hi swihlamariso hinkwaswo leswi ndzi nga ta swi endla exikarhi ka vona; endzhaku ka swona, hosi ya Egipta yi ta mi tshika mi famba.

Eksoda 9:14

Makhombo hinkwawo lawa ndzi nga ta ma rhumela sweswi, ndzi ta ma rhumela eka wena, ni le ka malandza ya wena, ni le ka vanhu va wena, u ta tiva leswaku emisaveni hinkwayo a nga kona la fanaka na mina.

Eksoda 18:11

Sweswi ndza swi tiva leswaku HOSI Xikwembu xi tlula swikwembu hinkwaswo, hikuva xi ponisile Vaisraele eka Vaegipta lava a va va khomile hi tihanyi.”

Eksoda 20:3

“U nga tshuki u gandzela swikwembu swin'wana, kambe gandzela mina ntsena.

2 TIKRONIKA 2:5

Yindlu leyi ndzi nga ta yi aka, yi ta va leyikulu hikuva Xikwembu xa hina i xikulu ku tlula swikwembu hinkwaswo.

2 TIKRONIKA 6:14

a ku: “Wena HOSI, Xikwembu xa Israele, a ku na Xikwembu ni xin'we lexi fanaka na wena, ematilweni ni laha misaveni; u hlayisa ntwanano wa wena, u komba ni rirhandzu ra wena lero tshembeka eka malandza ya wena lama tinyiketaka hi mbilu ku hanya etindleleni ta wena.

Pisalema 22:23

“N'wina lava chavaka HOSI Xikwembu, xi dzuniseni, xi tlangeleni, n'wina hinkwenu va ka Yakobo, mi xi komba xichavo, n'wina hinkwenu Vaisraele,

Pisalema 113:5

Xana HOSI Xikwembu xa hina xi nga ringanisiwa na mani xana? Vutshamo bya xona byi le henhla-henhla;

Pisalema 136:4

Ú endle swihlamariso leswikulu a ri yexe. — Rirhandzu ra yena hi leri nga heriki —

Mikiya 7:18

We HOSI, xana xi kona xikwembu xin'wana lexi fanaka na wena xana? Vanhu lava nga masalela ya ndzhaka ya wena, wa va rivalela milandzu ya vona, a wu hlayeli leswaku va tiarise kangani. Loko u hlundzukile, vukari bya wena byi hatla byi rhelela, hikuva u tsakela ngopfu ku hi komba tintswalo ta wena leto tshembeka.

Eksoda 8:6

Hiloko Aroni a tlakusela voko ra yena ehenhla ka mati ya Egipta, kutani mintlambya yi huma yi tata tiko hinkwaro.

Duteronoma 1:30

HOSI Xikwembu xa n'wina lexi xi mi rhangeleke emahlweni, hi xona xi nga ta mi lwela, ku fana ni leswi xi mi endleleke swona etikweni ra Egipta, mi ri karhi mi swi vona.

Duteronoma 4:34

Ku hava xikwembu ni xin'we lexi nga tshama xi ringeta ku ya tihumesela vanhu va xona exikarhi ka rixaka rin'wana, hi ku tirhisa mintungu, ni swikombiso, ni mahlori, ni tinyimpi, hi ntamu lowukulu ni mintirho ya matimba leyi chavisaka ngopfu. I HOSI Xikwembu xa n'wina ntsena lexi endleke swilo leswi hinkwaswo etikweni ra Egipta, mi ri karhi mi swi vona.

1 TIKRONIKA 16:25

HOSI Xikwembu i xikulu, xi dzuneka ngopfu, xi fanele ku chaviwa ku tlula swikwembu swin'wana hinkwaswo.

Pisalema 60:2

U tsekatsekisile misava yi kondza yi handzuka, kutani sweswi pfala timfa ta yona, hikuva a ya ha tiyanga.

Pisalema 77:11

We HOSI, ndzi anakanya mintirho ya wena, ndzi tsundzuka mahlori lawa u ma endleke khale.

Pisalema 86:10

Wena u nkulukumba, naswona u endla swilo leswo hlamarisa. Hakunene, hi wena ntsena u nga Xikwembu.

Esaya 46:9

Tsundzukani ni leswi humeleleke eminkarhini ya khale; Xikwembu hi mina, ku hava xin'wana, mina ndzi Xikwembu, a ku na loyi a fanaka na mina.