Eksoda 10:22 - BIBELE Mahungu Lamanene

²² Hiloko Muxe a tlakusela voko ra yena ehenhla, kutani ku va ni xinyami lexo chavisa masiku manharhu, etikweni hinkwaro ra Egipta.

Xitsonga (Bibele)

²² Muxe a tlakusa voko ra yena ehenhla, kutani munyama lowa ntima wu va kona etikweni ra Egipta hi masiku manharhu.

Eksoda 10:22 Referans Kwoze

Pisalema 105:28

Xikwembu xi vanga munyama wu funengeta tiko hinkwaro, kambe Vaegipta va ala ku yingisa swileriso swa xona.

Nhlavutelo 16:10

Ntsumi ya vuntlhanu yi chululela swa nkambana wa yona exiluvelweni xa xivandzana; hiloko mfumo wa xona wu funengetiwa hi munyama, vanhu va tiluma tindzimi hi ku twa ku vaviseka;

Amosi 4:13

Tivani leswi: Loyi a vumbeke tintshava, a tumbuluxeke ni mheho, loyi a tivisaka makungu ya yena eka vanhu, loyi a hundzulaka nhlekanhi wu va vusiku, loyi a famba-fambaka eswivandleni leswi tlakukeke swa misava, vito ra yena i HOSI, Xikwembu xa matimba hinkwawo.

Yuwele 2:31

Dyambu ri ta fihliwa hi munyama, ni n'weti wu ta tshwuka ku fana ni ngati, siku lerikulu ro chavisa ra mina ri nga si fika.

Yuwele 2:2

Siku ra kona ri to va ra munyama, ri to khwìxìì! ri ta va siku ra mapapa ni hunguva! Ku ni vanhu lavo tala va matimba, lava khubumeteke tintshava ku fana ni xinyami; vo fana na vona a va si tshama va voniwa, naswona endzhaku ka vona a ku nga ha voniwi vo tano, hilaha ku nga heriki.

Duteronoma 5:22

“Marito lawa hinkwawo, HOSI Xikwembu xi mi byerile wona loko mi hlengeletanile hinkwenu entshaveni, laha xi vulavuleke na n'wina hi rito leri tlakukeke, xi ri exikarhi ka ndzilo, epapeni ra ntima lowukulu. Eka leswi xi swi vuleke, a xi engetelanga nchumu, xi lo swi tsala emaribyeni mambirhi ya swiphepherhele, xi ndzi nyika wona.

Duteronoma 4:11

Kutani mi tshinerile, mi fika mi yima ehansi ka ntshava leyi a yi pfurha ndzilo; malangavi ya wona a ma dliva tilo, ku va ni papa ra ntima ni munyama.

Eksoda 20:21

Kutani Vaisraele va sala va yimile kule, Muxe yena a tshinela kusuhi ni papa ra ntima leri Xikwembu a xi ri endzeni ka rona.

Amosi 4:7

“Ndzi tlhele ndzi mi tsona mpfula, loko mavele ma nga si vupfa emasin'wini, ndzi nisela muti wun'wana empfula, wun'wana ndzi nga wu niseli; masimu man'wana ma yi kuma, kambe masimu lawa ma nga yi kumangiki, ma tshwa.

Ntirho 5:14

Dyambu ri va pelela ka ha ri nhlekanhi, va gugurhuteka onge i vusiku.

Esaya 8:22

va languta ni le hansi, kambe va to vona gome, ni munyama, ni nhlomulo lowukulu; va ta khubumetiwa hi munyama lowo chavisa.

Ezekiele 32:7

Siku ndzi ku herisaka, ndzi ta pfala tilo hi xinyami, ndzi tima ni tinyeleti; ndzi ta siva dyambu hi mapapa, n'weti a wu nga ha voningi.

Ezekiele 32:8

Ndzi ta tima timboni hinkwato ta le tilweni, ndzi funengeta tiko ra wena hi munyama. Ndzi vula sweswo mina HOSI N'wini wa hinkwaswo.