Eklesiasta 8:9 - BIBELE Mahungu Lamanene

⁹ Laha misaveni, ndzi xiyaxiyile swilo leswi vanhu va swi endlaka, kutani ndzi kumile leswaku lava nga ni matimba, va ma tirhisa ku xanisa vanhu van'wana.

Xitsonga (Bibele)

⁹ Ndzi swi vonile hinkwaswo swoleswo loko ndzi ri karhi ndzi anakanya mitirho hinkwayo leyi endliwaka ehansi ka dyambu, ni laha vanhu va fumaka ehenhla ka van'wana ku va endla swo biha.

Eklesiasta 8:9 Referans Kwoze

Eklesiasta 5:8

Loko u vona swisiwana swi xanisiwa etikweni, ni loko milawu leyo lulama yi nga ha landzeleriwi, u nga hlamali hi mhaka yo tano, hikuva tindhuna ti fuma hi tindhuna-kulobye, kambe hinkwato ti le hansi ka ndhunankulu.

Eklesiasta 5:13

Laha misaveni, ndzi vonile mhaka leyi tikaka ku tlula mpimo: Munhu ú tihlengeletela rifuwo kambe ri n'wi vangela maxangu.

Eklesiasta 7:25

Ndzi tinyiketile hi mbilu ya mina hinkwayo ku kuma vutlhari ni tinhlamuselo ta byona, ndzi swi kambisisa ni ku ringeta ku swi twisisa, kutani ndzi vonile leswaku ku endla leswo homboloka, i rihuhe, ni leswaku mintirho ya vuphunta a yi aki nchumu.

Eklesiasta 3:10

Mintirho leyi Xikwembu xi yi rhwexeke vanhu leswaku va yi tirha, ndzi yi xiyaxiyile:

Eklesiasta 1:14

Ndzi swi vonile hinkwaswo leswi vanhu va swi endlaka: Ndza mi byela, ku hava lexi pfunaka, vo hlongorisa moya ntsena.

Duteronoma 2:30

“Kambe Sihoni hosi ya le Hexiboni a nga pfumelanga leswaku hi tsemakanya hi le tikweni ra yena, hikuva HOSI Xikwembu xa n'wina a xi n'wi nonon'hwisile mbilu, xi endlela ku n'wi nyiketa emavokweni ya n'wina, hilaha swi nga hakona ni namuntlha.

Eksoda 14:28

Kutani mati ma vuya, ma khubumeta makalichi, ni vagadi va tihanci, ni mavuthu ya Faro hinkwawo lawa a ma nghenile elwandle ma landza Vaisraele; a ku salanga munhu ni un'we.

2 TIHOSI 25:7

Va tsema minkolo ya vana va Sedekiyasi a ri karhi a swi vona, kutani va n'wi boxa mahlo, va n'wi boha milenge hi tinketani, va n'wi yisa eBabilona.

Eklesiasta 3:16

Emisaveni, ndzi vonile na leswi: Etihubyeni, nawu a wu landzeleriwi; laha ku lavekaka leswo lulama, ku tele leswo biha.

Eklesiasta 4:1

Kutani ndzi engeta ndzi vona hilaha vanhu va xanisanaka hakona emisaveni: Langutani mihloti ya vaxaniseki, ku hava loyi a va miyetaka; a va tweriwi vusiwana, hikuva vaxanisi va ni matimba.

Eklesiasta 7:7

Loko ntlhari yi xanisa varikwavo yi hundzuka xihlekiso; yi onheka miehleketo loko yi pfumela ku xaviwa.

Eklesiasta 5:7

Milorho yo tala ni ku jakatseka a swi pfuni nchumu, kambe wena u nga rivali ku chava Xikwembu.