Eklesiasta 8:17 - BIBELE Mahungu Lamanene

¹⁷ Naswona ndzi vonile ntirho hinkwawo lowu Xikwembu xi wu endlaka laha misaveni, lowu vanhu va tsandzekaka ku wu twisisa; hambiloko munhu a tikarhatela ku wu lavisisa, a nge wu kumi, na yona ntlhari leyi vulaka leswaku ya wu tiva, yi nge wu kumi.

Xitsonga (Bibele)

¹⁷ kutani ndzi vona mitirho hinkwayo ya Xikwembu, ni leswaku munhu a nga hluleka ku twisisa ntirho, hambi wu ri wun'we lowu endliwaka ehansi ka dyambu, hikuva hambi munhu a nga swi lavisisa leswaku a swi kuma, a nga ka a nga swi kumi; swi tsandza ni lowo tlhariha; a nga ku, wa swi tiva, kambe a nga ka a nga swi kumi.

Eklesiasta 8:17 Referans Kwoze

Eklesiasta 3:11

Xi endlile hinkwaswo swi va leswi fambelanaka ni minkarhi ya swona; naswona xi nyikile vanhu ku twisisa ku landzelelana ka tinguva. Hambiswiritano, matirhele ya Xikwembu ku sukela eku sunguleni ka wona ku fikela emakumo, munhu a nge ma twisisi.

Varhoma 11:33

Vukosi bya Xikwembu, ni vutlhari bya xona, ni vutivi bya xona, a hi ku enta ka swona! Makungu ya xona ma nga pimisiwa ku yini, ni tindlela ta xona ti nga twisisiwa ku yini xana?

Pisalema 73:16

Mhaka leyi yi ndzi tikele ngopfu loko ndzi yi anakanya,

Esaya 40:28

Xana a mi tivi nchumu, a mi twanga nchumu ke? HOSI Xikwembu, xona Xikwembu lexi nga kona hilaha ku nga heriki, lexi tumbuluxeke misava hinkwayo, a xi karhali, a xi heli ntamu, makungu ya xona, a ma tivi hi munhu.

Ntirho 5:9

Xona xi endla swilo leswikulu swo hlamarisa, masingita ya xona i ntsandza-vahlayi.

Eklesiasta 11:5

Tanihi leswi u nga tiviki mahungele ya timheho, ni ndlela leyi n'wana a kulaka ha yona ekhwirini ra mana wa yena, na yona mintirho ya Xikwembu Muendli wa hinkwaswo, u nge yi twisisi.

Pisalema 40:5

We HOSI Xikwembu xanga, u andzisile mintirho ya wena leyo hlamarisa, ni makungu ya wena ehenhla ka hina. Ku hava munhu loyi a nga ringanisiwaka na wena, mintirho ya wena ndzi nge yi vuli hinkwayo, i ntsandza-vahlayi!

Pisalema 104:24

We HOSI Xikwembu, mintirho ya wena a hi ku tala ka yona, hinkwayo u yi endlile hi vutlhari, misava yi tele hi leswi u swi vumbeke.

Eklesiasta 1:13

Ndzi tibohile ku tirhisa vutlhari, ndzi lavisisa ni ku kambisisa hinkwaswo leswi endliwaka hi vanhu laha misaveni. Kutani ndzi kumile leswaku mintirho leyi munhu a rhwexiwaka yona hi Xikwembu laha misaveni, ya tika swinene.

Eklesiasta 7:13

Xiyaxiya matirhele ya Xikwembu: Swilo leswi xi swi endleke swi ri leswo gombonyoka, swi nge ololoxiwi hi munhu!