Daniele 8:11 - BIBELE Mahungu Lamanene

¹¹ Hi ku tikurisa ka rona, ri fika ri lwa ni Mufumi wa swivumbiwa swa le tilweni, ri n'wi tekela magandzelo lawa a a fanele ku hiseriwa wona siku rin'wana ni rin'wana, ri herisa ni xivandla lexo hlawuleka xa yena.

Xitsonga (Bibele)

¹¹ Kutani ri tlakuka ku yisa endhuneni ya mavandla, ri yi tekela gandzelo ra masiku, kutani yindlu ya vukwetsimelo bya yona yi mbundzuxiwa.

Daniele 8:11 Referans Kwoze

Daniele 12:11

Vanhu va ta siveriwa ku humesa magandzelo ya siku rin'wana ni rin'wana ku ringana masiku ya 1 290. Enkarhini wa kona, ku ta nghenisiwa eTempeleni xilo xa manyala lexi onhetelaka.

Daniele 11:31

Masocha lama rhumiweke hi yena ma ta fika ma onha Tempele ni khokholo ra kona, ma sivela ni vaprista ku humesa magandzelo ya siku rin'wana ni rin'wana; kutani ma ta nghenisa xilo xa manyala eTempeleni, lexi onhetelaka hinkwaswo.

Daniele 8:25

Ú ta humelela etindleleni ta yena ta vuxisi, a tikurisa swinene embilwini ya yena, a juma lavo tala a va dlaya; kambe leswi a nga chavangiki ku lwa ni Xikwembu, Mufumi wa vafumi, eku heteleleni ú ta tshoviwa hi xona, ku nga ri hi voko ra munhu.

Ezekiele 46:14

Mixo wun'wana ni wun'wana loko a ndzi humesela xinyimpfana xexo, ú ta humesa ni mapa yo ringana xintewana xin'we, a chela ni mafurha yo ringana xikhudza ni hafu; lowu i nawu lowu tiyeke wa minkarhi hinkwayo.

Nhlavutelo 17:14

Ti ta lwa ni Xinyimpfana, kambe Xinyimpfana xi ta ti hlula, hikuva i Hosi ya tihosi, ni Mufumi wa vafumi; ni malandza ya xona lama vitaniweke, lama hlawuriweke ni lama tshembekaka, xi ta ma nyika ku hlula.”

Esaya 37:23

Xana loyi u n'wi sandzaka ni ku n'wi rhuketela, i mani xana? Xana i mani loyi u n'wi huweleleke, ni ku n'wi langutela hansi eku tikuriseni ka wena, xana? Hi mina Muhlawuleki wa Israele!

Vaheveru 2:10

Hikuva a swi fanela leswaku Xikwembu, lexi swilo hinkwaswo swi hanyelaka xona ni ku hlayisiwa hi xona, loko xi fikisa vana va xona lavo tala eku kwetsimeni, xi endla leswaku murhangeri wa ku ponisiwa ka vona a va loyi a hetisekeke, hi mhaka ya ku vaviseka ka yena.

Luka 21:24

Va ta dlawa hi fumu, va ta yisiwa va ri mahlonga ematikweni hinkwawo; kutani muti wa Yerusalema wu ta kandziyeriwa hi vamatiko ku kondza loko minkarhi ya vona yi ta va yi herile.

Daniele 8:12

Magandzelo ya siku rin'wana ni rin'wana, ni swivumbiwa swa le tilweni, swi nyiketiwa eka rimhondzo leri, loko ri ri karhi ri dyoha; kutani hambileswi ri wiseleke vukhongeri bya ntiyiso ehansi, rimhondzo ri ya emahlweni ri kateka eka leswi ri swi endlaka.

Daniele 7:25

Hosi ya kona yi ta sandza Loyi a nga henhla-henhla, vahlawuriwa va yena, yi ta va xanisa, yi hundzuluxa milawu ya minkhuvo ya vona, kutani va ta wela emavokweni ya yona nkarhi wo ringana malembe manharhu na hafu.

Daniele 5:23

U tikurisile ngopfu emahlweni ka Xikwembu Hosi ya matilo; swibya swa le ndlwini ya xona, swi tisiwile eka wena; kutani wena ni tindhuna ta wena ni vasati va wena lavakulu ni lavatsongo, mi le ku nweni ka vhinyo hi swibya leswi, mi dzunisa swikwembu swa n'wina swa silivhere, ni swa nsuku, ni swa koporo, ni swa nsimbhi, ni swa timhandze, ni swa maribye. Swikwembu leswi a swi voni, a swi twi, a swi tivi nchumu! Kambe Xikwembu lexi tameleke ku hefemula ka wena ni makungu hinkwawo ya vutomi bya wena, a wu na mhaka na xona, a wu xi dzunisi.

Yeremiya 48:42

Tiko ra Mowabu ri ta herisiwa ri nga ha vi na vanhu, hikuva ri tikurisile ri lwa na mina HOSI.

Yeremiya 48:26

Leswi tiko ra Mowabu ri tikurisaka ri lwa na HOSI Xikwembu, ri fanele ku nwisiwa vhinyo, ri ko ri khuguka ri wela emahlanteni ya rona, kutani ri hundzuka xihlekiso na rona.

Esaya 37:29

Kutani ke, leswi u ndzi kariheleke, ni leswi ku titshemba ka wena ku fikeke etindleveni ta mina, ndzi ta ku boxa nhompfu, ndzi ku hulela muhalo, ndzi ku nghenisa ni matomu enon'weni, kutani ndzi ta ku tlherisela ekaya, hi ndlela leyi u teke ha yona.’

Tinhlayo 28:3

U ta va byela leswaku siku rin'wana ni rin'wana hilaha ku nga heriki, va ta tlhava swinyimpfana swimbirhi swa makhuna swa lembe rin'we leswi nga solekiki, va ndzi humesela magandzelo lama hisiwaka;

2 Vatesalonika 2:4

Munhu loyi ú lwa ni hinkwaswo leswi vuriwaka leswaku swi ni vukwembu, kumbe leswi gandzeriwaka, kutani a tikurisa ehenhla ka swona, a ko a ya tshama eTempeleni ya Xikwembu, a ri karhi a tivula leswaku yena hi yena Xikwembu.

Daniele 8:24

Munhu loyi ú ta va nhenha leyo chavisa (kambe ku nga ri hi matimba ya yena n'winyi), kutani hinkwako ú ta vanga mpfilumpfilu. Eka hinkwaswo leswi a nga ta swi endla, ú ta humelela; ú ta dlayetela tinhenha tin'wana, a dlaya ni vahlawuriwa va Xikwembu.

Daniele 9:25

Tiva mhaka leyi u yi twisisa: Ku ta rhanga ku hundza nkarhi wa malembe ya 7 lama hlayiwaka ka 7, ku sukela loko ku humile xileriso xa ku aka muti wa Yerusalema hi vuntshwa, ku fikela loko mufambisi lontshwa a ta vekiwa hi ku cheriwa mafurha enhlokweni. Endzhaku ka sweswo, magondzo ya muti ni rirhangu ra wona swi ta va eku pfuxiweni nkarhi wa malembe ya 7 lama hlayiwaka ka 62. Minkarhi ya kona yi ta va leyo tika swinene.

Daniele 11:22

Ú ta hlula mavuthu lama n'wi hlaselaka a ma hangalasa, a dlaya ni murhangeri wa vanhu va Ntwanano.