Daniele 6:27 - BIBELE Mahungu Lamanene

²⁷ Xikwembu lexi xa ponisa ni ku lamulela, xi endla swikombiso ni mahlori etilweni ni la misaveni; hi xona xi lamuleleke Daniele etinghaleni ta matimba.”

Xitsonga (Bibele)

²⁷ Hi yena muponisi ni muhanyisi: xi endle swikombiso ni masingita ematilweni ni le misaveni, hi xona lexi poniseke Daniele emin'waleni ya tinghala.”

Daniele 6:27 Referans Kwoze

Timhaka 4:30

tshambuluta voko ra wena ku horisa, u endla leswaku mahlori ni swihlamariso swi va kona hi vito ra Yesu, nandza wa wena la hlawulekeke.”

Pisalema 97:10

N'wina mi rhandzaka HOSI Xikwembu, vengani leswo homboloka! HOSI Xikwembu xi sirhelela vutomi bya malandza ya xona, xi ma kutsula emavokweni ya lavo biha.

Pisalema 18:50

HOSI Xikwembu xi nyika ku hlula lokukulu eka loyi xi n'wi vekeke ku va hosi, xi komba tintswalo ta xona leto tshembeka eka Davhida muhlawuriwa wa xona, ni ka vatukulu va yena hilaha ku nga heriki.

Daniele 4:34

Nebukadnetsara a ku: “Loko nkarhi lowu vekiweke wu hundzile, mina Nebukadnetsara ndzi tlakusile mahlo ndzi languta ehenhla, kutani miehleketo ya mina yi vuya, ndzi dzunisa ni ku tlangela ni ku twarisa Loyi a nga henhla-henhla, Loyi a hanyaka hilaha ku nga heriki, ndzi ku: “Vuhosi bya yena a byi na ku hela, ni ku fuma ka yena ku ta va kona hilaha ku nga heriki.

Pisalema 35:17

We N'wini wanga, u ta hlalela swilo leswi ku fika rini xana? Ndzi ponise emavokweni ya swigevenga leswi, u ndzi kutsula emin'waleni ya tinghala leti,

Pisalema 32:7

We HOSI, ndzi tumbela eka wena, u ndzi sirhelela emakhombyeni; leswi u ndzi sirheleleke ni ku ndzi lwela, ndzi ta ba nkulungwana wa ntsako.

Pisalema 18:48

We Xikwembu, wa ndzi ntshunxa emavokweni ya valala va mina, hakunene u ndzi pfuna ku hlula lava lwaka na mina, u ndzi lamulela eka vanhu va tihanyi.

Ntirho 36:15

Loko va ri vaxaniseki, Xikwembu xi tirhisa maxangu ku va ntshunxa, xi va hlamula hi mahlomulo.

Vaheveru 2:4

Xikwembu na xona a xi ri karhi xi tiyisa vumbhoni bya kona hi ku endla swikombiso ni swihlamariso ni mahlori ya tinxaka-xaka, ni ku avela tinyiko ta Moya lowo Kwetsima hi ku rhandza ka xona.

Yohane 4:48

Kutani Yesu a ku ka yena: “Loko mi nga voni mahlori ni swihlamariso, a mi swi koti ku pfumela.”

Daniele 4:35

Vanhu hinkwavo va misava a hi nchumu emahlweni ka yena, lava akeke emisaveni, ni swivumbiwa hinkwaswo swa le tilweni, swi fumiwa hi yena. Ku hava loyi a nga n'wi sivelaka, kumbe loyi a nga n'wi vutisaka a ku: ‘U endla yini xana?’

Daniele 6:20

Kuteloko a fika ekheleni, a huwelela Daniele hi rito leri kombaka ku vaviseka, a ku: “We Daniele, we nandza wa Xikwembu lexi hanyaka, xana Xikwembu xa wena lexi u xi tirhelaka minkarhi hinkwayo, xi swi kotile ku ku lamulela etinghaleni xana?”

1 SAMIELE 17:26

Davhida a vutisa lava a va yimile kwalaho, a ku: “Va ri, ú ta nyikiwa yini munhu la nga ta dlaya Mufilista loyi, a kutsula Israele endzhukanweni lowu, xana? Swona o va mani Mufilista loyi wo ka a nga yimbanga, leswi a pfukaka mavuthu ya Xikwembu lexi hanyaka, xana?”

Pisalema 145:13

Vuhosi bya wena i bya minkarhi hinkwayo, u ta va mufumi hilaha ku nga heriki. [Marito hinkwawo ya HOSI Xikwembu ma ni ntiyiso, rirhandzu ra xona ra vonaka emintirhweni ya xona hinkwayo.]

Yeremiya 10:10

Kasi HOSI yona, hi yona yi nga Xikwembu xa ntiyiso; i Xikwembu lexi hanyaka, lexi fumaka hilaha ku nga heriki. Vukari bya xona byi tsekatsekisa misava, loko xi hlundzukile, vamatiko va nge swi tiyiseli.

Daniele 2:44

“Eminkarhini ya tihosi leti, Xikwembu xa le matilweni xi ta simeka mfumo lowu wu nga ta ka wu nga wisi hi munhu, naswona vuhosi bya wona a byi nga nyikiwi vanhu van'wana. Mfumo lowu wu ta wisetela mimfumo leyin'wana hinkwayo, wu yi herisela makumu; kutani wona wu ta va kona hilaha ku nga heriki.

Daniele 4:31

Loko hosi ya ha vulavula, ku twala rito leri humaka etilweni, ri ku: “We Nebukadnetsara, tiva leswaku vuhosi bya wena, u tekeriwile byona.