Amosi 3:5 - BIBELE Mahungu Lamanene

⁵ Xana xinyanyana xi nga ya phatsama entlhan'wini, ku nga ri na ndzhoho ke? Xana ntlhamu wu ngo na swi pfuketana wo wachuka, wu nga wachutiwanga ke?

Xitsonga (Bibele)

⁵ Xana xinyanyana xi nga wela erisingeni leri nga ehansi, ku nga ri na xilo lexi rhiyiweke? Xana ntlhamu lowu vekiweke ehansi wu nga wachuka, wu nga phasi nchumu xana?

Amosi 3:5 Referans Kwoze

Eklesiasta 9:12

Munhu a nga wu tivi nkarhi wa ku fa ka yena; tanihi leswi tinhlampfi ti phasiwaka hi tinkoka, ni tinyanyana ti welaka entlhan'wini, munhu na yena ú ta humeleriwa hi khombo enkarhini wa rona, ri n'wi wela hi xitshuketa.

Daniele 9:14

Hikokwalaho, we HOSI, u tilulamisele ku hi vangela maxangu lawa, kutani ma hi fikele. Wena HOSI Xikwembu xa hina, minkarhi hinkwayo u endla leswi lulameke ntsena kambe hina a hi yingisi rito ra wena.

Yeremiya 31:28

Eminkarhini leyi nga hundza, a ndzi tiyimiserile ku va tsuvula ni ku va handzulela, ndzi va mbundzumuxa ni ku va herisela makumu, ndzi va vangela makhombo; kambe sweswi ndzi tiyimisele ku va aka ni ku va simeka; ndzi vula sweswo mina HOSI.

Pisalema 140:5

Vanhu lava va manyunyu va ndzi tumbelerile va lava ku ndzi phasa, endleleni ya mina va rhiyile mintlhamu, va veka ni swirimbana.

Amosi 3:4

Xana nghala yi nga bonga exihlahleni, yi nga kumanga lexi yi nga xi khomaka ke? Hambi n'wana wa nghala, xana wa vomba ebakweni, loko a nga vuyanga na nchumu xana?

Amosi 3:6

Xana loko ku biwa nyandayeyo emutini, vanhu va nga tshika ku tsemeka nhlana xana? Khombo rona, xana ri nga wela muti, loko ri nga rhumeriwanga hi HOSI ke?