Amosi 1:5 - BIBELE Mahungu Lamanene

⁵ Ndzi ta tshova tinyangwa ta Damaska, ndzi lovisa vaaki va Nkova wa Avene ni loyi a fumaka muti wa Beta-Edeni; vaaki va tiko ra Siriya va ta ya evukhumbini etikweni ra Kiri.” HOSI yi vula sweswo.

Xitsonga (Bibele)

⁵ Ndzi ta tshova tinghole ta Damaska, ndzi herisa lava akeke erivaleni ra Avene, ni la tamelaka nhonga ya vuhosi eBet-Edeni; kutani vanhu va Siriya va ta yisiwa evukhumbini eKiri,” ku vula Yehovha.

Amosi 1:5 Referans Kwoze

2 TIHOSI 16:9

Hosi ya le Asiriya yi amukela xikombelo xa Akazi, kutani yi kongoma muti wa Damaska, yi wu teka, yi yisa vaaki va wona le Kiri va ri mahlonga, kutani yi dlaya na Resini.

Amosi 9:7

Hosi yi vula sweswo yi ri: “N'wina Vaisraele, xana a ndzi mi teki mi fana ni vanhu va le Etiyopiya xana? Hambileswi ndzi mi humeseke etikweni ra Egipta, ndzi mi ringanisa ni Vafilista lava ndzi va humeseke eKafitoro, ni Vasiriya lava ndzi va humeseke eKiri.

Yeremiya 51:30

Masocha ya Babilona ma cukumete matlhari, ma ya tumbela emakhokholweni ya wona. Ma herile ntamu, ma fana ni vavasati; timbanti ta Babilona ti tshoviwile, tindlu ta kona ta karhi ta tshwa.

Swirilo 2:9

Timbanti ta Yerusalema ti dyiwile hi muhlwa ti wa, Xikwembu xi tshovelerile ni timhingu to goga ha tona. Mufumi wa tiko ni tindhuna ta yena va hangalakile va ya ematikweni man'wana, sweswi a ka ha ri na nawu. Hambi va ri vaprofeta va kona, HOSI Xikwembu a xa ha va kombi nchumu.

Nahume 3:13

Vona, emutini wa wena, mavuthu i vavasati ntsena. Tinyangwa ta tiko ra wena ti pfulekile swinene emahlweni ka valala va wena, timbanti ta muti wa wena ti tshwe hi ndzilo.

Yeremiya 50:36

Tinyimpi a ti wele vangoma, ti va hlanganisa tinhloko, ti wela ni masocha ya kona, ti ma heta ntamu.

Esaya 43:14

HOSI Xikwembu, Muhlawuleki wa Israele, lexi xi mi kutsuleke, xi vurisa sweswo xi ri: “Ndzi ta mi pfuna hi ku rhumela mavuthu ma ya hlasela Babilona; ma ta faya timbanti hinkwato ta muti, kutani ku yimbelela ka Vakalediya ku ta hundzuka swirilo.

Esaya 22:6

Vanhu va tiko ra Elamu va tile va hlomile matlhari, va ri ni tigolonyi ta nyimpi ni vagadi va tihanci, va le Kiri va tile va khomile switlhangu.

Ezekiele 27:23

Va le Harana ni va le Kana ni va le Edeni a va xaviselana swilo na wena, swin'we ni van'wamabindzu va le Xeba ni va le Asuru ni va le Kilimada;

2 TIHOSI 14:28

Kutani ke, mintirho leyin'wana ya Yerobuwamu, ni hinkwaswo leswi a swi endleke, ni ta vunhenha lebyi a lweke ha byona, ni ta loko a vuyisele Vaisraele emiti ya Damaska na Hamata leyi khale a yi ri ya Yuda, hinkwaswo leswi swi tsariwile eka “Buku ya Matimu” ya tihosi ta Israele.

Esaya 8:4

hikuva loko n'wana a nga si kota ku vula ku ‘tatana’, kumbe ‘manana’, rifuwo ra Damaska ni xuma xa Samariya swi ta phanghiwa swi yisiwa eka hosi ya Asiriya.”

Ezekiele 30:17

Majaha ya le Ono ni ya le Pi-Besete ma ta dlawa hi matlhari, lavan'wana hinkwavo va ta yisiwa evukhumbini.

Hosiya 10:8

Switsunga leswo hlawuleka swa le Avene swi ta herisiwa, kona exivindzini xa vudyoho bya Israele. Etialitarini ta vona ku ta mila mitwa ni mahlwehlwe. Va ta byela tintshava va ku: “Hi funengeteni!” ni le ka swintshabyana va ta ku: “Hi weleni henhla!”

Amosi 5:5

mi nga tshuki mi lava swa le Betele, hikuva muti wa Betele wu ta sala wu nga ha ri nchumu, hambi ku ri eGiligala mi nga ngheni, hikuva vanhu va Giligala va ta ya evukhumbini hakunene, ni le Berexeba, mi nga tshuki mi tsemakanyela kona.”