Zakariya 11:14 - Xitsonga (Bibele)

¹⁴ Ndzi tshova ni nkhavi wa mina wa vumbirhi, ri nga vamba, ndzi ta herisa vuxaka exikarhi ka Yuda na Israele.

BIBELE Mahungu Lamanene

¹⁴ kutani ndzi tshova nhonga ya mina ya vumbirhi leyi vuriwaka “Vuxaka”, ndzi endlela ku onha xinakulobye exikarhi ka vanhu va le Yuda ni vanhu va le Israele.

Zakariya 11:14 Referans Kwoze

Esaya 9:21

Manase a dya Efrayimi na Efrayimi a dya Manase; havambirhi va wela Yuda. Hambiswiritano, vukari bya yena a byi tlhelanga, ni voko ra yena ra ha tshambulutiwile!

Yakobo 3:16

Hikuva laha ku chivirika loko biha ni ku tengisana ku nga kona, na kona, ku va ni madzolonga, ni timhaka hinkwato leta tingana.

Yakobo 3:14

Kambe loko mi chivirikela ku biha, kutani ku tengisana ku ri kona etimbilwini ta n'wina, mi nga tshuki mi tidzunisa, ni ku hemba hi ku dyohela leswinene.

Vagalatiya 5:15

Kambe, kungakuloko mi lumana ni ku dyanana, tilanguteleni leswaku mi nga hetani.

Matewu 24:10

Hikwalaho lavo tala va ta khunguvanyeka, kutani va ta hehlana ni ku vengana.

Zakariya 11:9

Kutani ndzi ku: “A ndzi nga ha mi risi! Leyi faka, a yi fe; ni leyi lovaka, a yi love; loko ti ri leti salaka, a ti dye yin'wana ni yin'wana nyama ya yin'wana.”

Zakariya 11:7

Kavaloko ndzi risa tinyimpfu leti dlayiwaka, ti ri leti tsaneke ta ntlhambi; ndzi titekela mikhavi mimbirhi, wun'wana ndzi wu thya Tintswalo, wun'wana ndzi wu thya Vamba; ndzi risa ntlhambi kutani.

Esaya 11:13

Kutani mavondzo ya Efrayimi ma ta hela, valala va yena etikweni ra Yuda va ta susiwa. Efrayimi a nga ka a nga vondzoki Yuda, Yuda, yena, a nga ka a nga ha lwi na Efrayimi.

Zakariya 11:6

Hikuva a ndzi nga ha tsetseleli vaaki va misava, ku vula, Yehovha; ndzi ta nyiketa vanhu hinkwavo, un'wana ni un'wana emavokweni ya warikwavo, ni le mavokweni ya hosi ya yena; va ta onha misava, kasi a ndzi nga va lamuleri emavokweni ya vona.”

Ezekiele 37:22

Ndzi ta endla ha vona tiko ri ri rin'we emisaveni etintshaveni ta Israele va ta fumiwa hinkwavo hi hosi yi ri yin'we va nga ha vi matiko mambirhi, va nga ha avanyisiwi hi ku fuma kumbirhi.

Marka 3:24

Na kona loko ku fuma ku hambana hi le xikarhi, ku fuma loku ku nga ka ku nga tiyi.