Yoxuwa 24:20 - Xitsonga (Bibele)

²⁰ Kutakuloko mi fularhela Yehovha, mi ya tirhela swikwembu swin'wana swa matiko man'wanyana, u ta mi hundzukela, a mi endla leswo biha, a mi herisa, hambi a tshamile a mi endlela leswinene.”

BIBELE Mahungu Lamanene

²⁰ Loko mo fularhela HOSI Xikwembu, mi ya tirhela swikwembu swin'wana, xi ta mi hundzukela xi mi ba, xi mi herisa, hambileswi xi sunguleke hi ku mi endlela leswinene.”

Yoxuwa 24:20 Referans Kwoze

Timhaka 7:42

Hikwalaho Xikwembu xi va fularhela, xi va nyiketa eku gandzeleni ka mavandla ya tilo, hilaha ku tsariweke hakona ebukwini ya vaprofeta leswaku: ‘N'wina, yindlu ya Israele, xana mi ndzi humesele switlhavelo ni timhamba emananga hi malembe ya mune wa makume xana?

Ezekiele 18:24

“Kambe loko la lulameke a tshika ku lulama ka yena, e endla leswo biha, a ri karhi a landza manyala hinkwawo lama endliwaka hi lowo biha, xana u ta hanya xana? Ku lulama ka yena hinkwako loku a ku endleke ku ta rivariwa, hikuva u tinyiketile eku hombolokeni ni le manyaleni; hikwalaho ka swona, u ta fa kunene.

Yeremiya 17:13

Wena Yehovha, ku tshemba ka Israele! Lava ku tshikaka hinkwavo va ta khomisiwa tingana. Lava ndzi tshikaka va ta tswariwa emisaveni, hikuva va tshikile xihlovo xa mati lama hanyisaka, a nga Yehovha.

1 TIKRONIKA 28:9

Na wena, Solomoni, n'wananga, tiva Xikwembu xa tata wa wena, u xi tirhela hi mbilu leyi tengeke ni ku tsaka ka moya; hikuva Yehovha a kamba timbilu hinkwato, kutani a tivisisa makungu hinkwawo ya ku anakanya. Kungakuloko u n'wi lavisisa, u ta n'wi kuma; kambe loko u n'wi tshika, u ta ku cukumeta hilaha ku nga heriki.

Esaya 63:10

Kambe vona va tiarisile, kutani va vavisile moya wa yena lowo kwetsima; kutani yena u hundzuke nala wa vona, a va a lwa na vona.

Esaya 1:28

Kambe vatiarisi ni swidyohi swi ta phyandlasiwa swin'we, kutani lava tshikaka Yehovha va ta lova.

Ezra 8:22

Hikuva a ndzi ri ni tingana ku kombela vandla ra tinhenha, ni vakhandziyi va tihanci eka hosi, leswaku va hi lwela eka valala endleleni, hikuva a hi byerile hosi, hi ku: “Voko ra Xikwembu xa hina ri yimela hinkwavo lava xi lavaka, kasi matimba ni vukari bya xona byi lwa ni hinkwavo lava xi fularhelaka.”

2 TIKRONIKA 15:2

kutani a humelela emahlweni ka Asa, a ku eka yena: “Wee Asa, ni va Yuda hinkwenu, ni va Benjamini, ndzi yingiseni! Yehovha u na n'wina loko mi ri na yena; kungakuloko mi n'wi lava, u ta pfumela ku kumiwa hi n'wina; kambe loko mi n'wi tshika, u ta mi tshika.

Vaheveru 10:38

Kambe la lulameke u ta hanya hi ku pfumela, kambe kungakuloko a tlhelela endzhaku, moya wa mina a wa ha n'wi tsakeri.”

Duteronoma 4:25

“Kungakuloko u velekile vana ni vatukulu, ni loko mi akile khale etikweni, kutani mi tionha, ni loko mi tivatlela swifaniso, swi va swikombiso swa xilo xihi ni xihi, mi endla leswi biheke emahlweni ka Yehovha, Xikwembu xa wena, ku swi pfukela,

Duteronoma 4:26

ndzi vitana namuntlha tilo ni misava, ti va timbhoni ta n'wina leswaku mi ta fa hi ku hatlisa etikweni leri mi nga ta ri fuma loko mi perile Yordani; masiku ya n'wina ma nga ka ma nga lehi kona, hikuva mi ta herisiwa kunene.

Yoxuwa 24:21

Kavaloko tiko ri ku eka Yoxuwa: “E-e! Hikuva hi ta tirhela Yehovha.”

1 SAMIELE 12:15

Kambe loko mi nga yingisi rito ra Yehovha, ni loko mi arisa ku lerisa ka Yehovha, voko ra Yehovha ri ta va henhla ka n'wina kukotisa loko ingi ri va henhla ka vatata wa n'wina.

1 SAMIELE 12:25

Kungakuloko mi phikelela ku endla leswo biha, mi ta lova, n'wina, ni hosi ya n'wina.”

1 TIKRONIKA 28:8

Sweswi ndzi vulavula ndzi ri emahlweni ka Vaisraele hinkwavo, leyi nge nhlengeletano ya Yehovha, ni le tindleveni ta Xikwembu xa hina, ndzi ku: ‘Hlayisani, mi lavisisa milawu hinkwayo ya Yehovha, Xikwembu xa n'wina, leswaku mi fuma tiko lerinene leri, mi ta ri siyela vana va n'wina endzhaku ka n'wina, yi va ndzhaka ya vona hi masiku.

Pisalema 89:31

Loko va tlula milawu ya mina, Va nga hlayisi ku lerisa ka mina,