Yoxuwa 22:5 - Xitsonga (Bibele)

⁵ Ntsena tilanguteleni swinene, mi endla hi ku lerisa ni nawu lowu Muxe, nandza wa Yehovha, a mi leriseke wona, ni ku rhandza Yehovha, Xikwembu xa n'wina, ni ku famba etindleleni hinkwato ta yena, ni ku hlayisa ku lerisa ka yena, ni ku namarhela yena, ni ku n'wi tirhela hi timbilu hinkwato ta n'wina, ni mimoya hinkwayo ya n'wina.”

BIBELE Mahungu Lamanene

⁵ Vonani leswaku mi hlayisa swileriso ni milawu ya HOSI Xikwembu leyi Muxe nandza wa xona a mi leriseke yona, ku nga ku rhandza HOSI Xikwembu xa n'wina, ni ku famba etindleleni ta xona, ni ku hlayisa swileriso swa xona, ni ku xi namarhela, ni ku xi tirhela hi mbilu hinkwayo ni moya hinkwawo.”

Yoxuwa 22:5 Referans Kwoze

Matewu 22:37

Yesu a ku eka yena: “Rhandza Hosi, Xikwembu xa wena, hi mbilu ya wena hinkwayo, ni moya wa wena hinkwawo, ni ku anakanya ka wena hinkwako.

Eksoda 20:6

kambe ndzi tsetselela lava ndzi rhandzaka, lava hlayisaka milawu ya mina ku yisa erixakeni ra khume ra madzana.

Varhoma 8:28

Kambe ha swi tiva leswaku hinkwaswo swi tirhisana swin'we hi vunene eka lava rhandzaka Xikwembu, va nga lava xi va vitaneke hi makungu ya xona lama tiyeke.

Duteronoma 11:22

“Hikuva loko mi hlayisa swinene milawu hinkwayo leyi ndzi mi lerisaka yona, ni loko mi endla ha yona, mi va mi rhandza Yehovha, Xikwembu xa n'wina, mi famba etindleleni hinkwato ta yena, mi ri karhi mi n'wi namarhela,

Eksoda 15:26

“Loko u yingisa rito ra Yehovha, Xikwembu xa wena, u endla leswi lulameke emahlweni ka yena, loko u rhiya ndleve eku leriseni ka yena, kutani u hlayisa milawu ya yena hinkwayo, ndzi nga ka ndzi nga ku tiseli makhombo lama nga wela Vaegipta; hikuva hi mina Yehovha muongori wa wena.”

Yakobo 1:12

Ku katekile munhu la tiyiselaka endzingweni, hikuva, kutakuloko a ringiwile, u ta nyikiwa harhi ya vutomi, leyi Hosi yi yi tshembiseke lava yi rhandzaka.

Matewu 4:10

Kambe Yesu a ku eka yena: “Suka Satana hikuva ku tsariwile va ku: ‘U ta khinsamela Hosi, Xikwembu xa wena u tirhela xona ntsena.’ ”

Varhoma 12:9

Rirhandzu ri nga tshuki ri va ni ku kanganyisa. Vengani leswo biha, mi namarhela leswinene.

Varhoma 1:9

Hikuva Xikwembu lexi ndzi xi tirhelaka emoyeni wa mina eEvhangelini ya N'wana wa xona, hi yona mbhoni ya mina loko ndzi ku: A ndzi tshiki ku mi anakanya,

Timhaka 27:23

Hikuva ntsumi ya Xikwembu lexi ndzi nga wa xona, lexi ndzi xi gandzelaka, yi tikombisile eka mina evusikwini lebyi,

Timhaka 11:23

Kuteloko a fikile, a vona tintswalo ta Xikwembu a tsaka; kutani a va khongotela hinkwavo ku tiyisela eka Hosi hi timbilu leti chivirikaka.

Yohane 14:15

“Kungakuloko mi ndzi rhandza, hlayisani milawu ya mina.

Luka 1:74

ku hi nyika leswaku, loko hi ponisiwile emavokweni ya valala va hina, hi ta n'wi tirhela, hi nga chavi nchumu

Matewu 6:24

“A ku na munhu la nga swi kotaka ku tirhela tihosi timbirhi; hikuva u ta venga yin'wana, a rhandza yin'wanyana, kumbe u ta namarhela yin'wana, a sandza yin'wanyana. Mi nge swi koti ku tirhela Xikwembu na Mamona.

Esaya 55:2

Xana mi xavela yini hi mali, leswi swi nga riki vuswa xana? Xana mi tirhela yini, leswi nga xurhisiki xana? Ndzi yingiseni, mi ta dya leswo nandziha; mimoya ya n'wina yi ta titsakela endzalweni.

Pisalema 106:3

Ku katekile lava hlayisaka milawu, Lava endlaka swinene hi mikarhi hinkwayo!

Duteronoma 11:13

“Kungakuloko mi yingisa swinene milawu ya mina leyi ndzi mi lerisaka namuntlha, mi va mi rhandza Yehovha, Xikwembu xa n'wina, mi n'wi tirhela hi timbilu hinkwato ta n'wina, ni mimoya hinkwayo ya n'wina,

Duteronoma 11:1

“U ta rhandza Yehovha, Xikwembu xa wena, u va u hlayisa leswi a ku vekeleke swona, ti ri timhaka ta yena ni ku lerisa ka yena, ni milawu ya yena.

Duteronoma 6:17

kambe mi ta hlayisa swinene milawu ya Yehovha, Xikwembu xa n'wina, ni vumbhoni bya xona, ni ku lerisa loku xi mi leriseke kona.

Yakobo 2:5

Yingisani, vamakwerhu lava rhandziwaka: Xana Xikwembu a xi hlawulanga swisiwana swa misava leyi, leswaku va va vafuwi eku pfumeleni, ni vadyandzhaka va ku fuma loku Xikwembu xi ku tshembiseke lava xi rhandzaka xana?

Vaheveru 12:15

mi tilangutela leswaku ku nga tshuki ku va na un'we la titsonaka tintswalo ta Xikwembu, rimitsu ro bava ri nga tshuki ri mi hlukela, ri mi pfilunganya, kutani lavo tala va onhaka ha rona.

Yohane 12:26

Kungakuloko munhu a ndzi tirhela, a a ndzi landze; kutani laha ndzi nga kona la, ndzi tirhelaka, na yena u ta va kona; loko munhu a ndzi tirhela, Tatana u ta n'wi dzunisa.

Swivuriso 4:23

Hlayisa mbilu ya wena ku tlurisa leswi hlayisiwaka, Hikuva i xihlovo xa vutomi.

1 SAMIELE 12:24

Chavani ntsena Yehovha, mi n'wi tirhela hakunene hi timbilu hinkwato ta n'wina, hikuva langutani mitirho leyikulu leyi a yi endleke xikarhi ka n'wina!

1 SAMIELE 12:20

Samiele a ku eka tiko: “Mi nga chavi; mi endlile ku biha hinkwako loku, ntsena mi nga tshiki ku landza Yehovha, kambe mi tirhela Yehovha hi timbilu hinkwato ta n'wina.

1 SAMIELE 7:3

Kavaloko Samiele a byela yindlu ya Israele hinkwayo, a ku: “Ku nga ku loko mi tlhelela eka Yehovha hi timbilu hinkwato ta n'wina, susani xikarhi ka n'wina swikwembu swimbe ni va Astarte, mi tiyisa timbilu ta n'wina eka Yehovha, mi tirhela yena ntsena; hi kona a nga ta mi ponisa emavokweni ya Vafilista.”

Yoxuwa 23:8

kambe namarhelani Yehovha, Xikwembu xa n'wina, hilaha mi swi endleke hakona ku fika namuntlha.

Duteronoma 13:4

Mi ta landza Yehovha, Xikwembu xa n'wina; mi n'wi chava, mi hlayisa milawu ya yena, mi yingisa rito ra yena; mi n'wi tirhela, kambe mi n'wi namarhela.

Duteronoma 10:20

“U ta chava Yehovha, Xikwembu xa wena, u xi tirhela, u namarhela xona, u va u hlambanya hi vito ra xona.

Duteronoma 4:9

“Ntsena tivonele, u hlayisa swinene moya wa wena, leswaku u nga tshuki u rivala swilo leswi mahlo ya wena ma swi voneke; swi nga tshuki swi huma embilwini ya wena, ni siku ni rin'we ra ku hanyaka wena; u swi dyondzisa vana va wena ni vatukulu va wena.

Duteronoma 4:6

Mi ta yi hlayisa ni ku tirha ha yona, hikuva byi ta va vutlhari bya n'wina, ni ku twisisa ka n'wina, emahlweni ka matiko lawa ma nga ta yingisa milawu leyi hinkwayo, kutani ma ta ku: ‘Tiko lerikulu leri, hi rona ntsena leri nga ni vutlhari ni ku twisisa!’

Duteronoma 4:4

Kambe n'wina, lava mi namarheleke Yehovha, Xikwembu xa n'wina, ma ha hanya hinkwenu ni namuntlha.

Yeremiya 12:16

Kambe kungakuloko va dyondza swinene milawu ya tiko ra mina, leswaku va ta hlambanya hi vito ra mina, va ku: ‘Ha Yehovha la hanyaka,’ hi laha va dyondziseke tiko ra mina ku hlambanya ha Baali, ndzi ta va akisa xiharhi ka tiko ra mina.

Nhlavutelo 15:3

Va yimbelela risimu ra Muxe, nandza wa Xikwembu, ni risimu ra Xinyimpfana, va ku: “Hi leyikulu, ya hlamarisa, mitirho ya wena, Hosi, Xikwembu xa matimba hinkwawo! Oho! Hosi ya matiko, tindlela ta wena ti lulamile ti tshembekile swonghasi!

Eksoda 23:25

Tirhelani Yehovha, Xikwembu xa n'wina, kutani xi ta katekisa vuswa bya n'wina ni mati ya n'wina, kambe ndzi ta susa vuvabyi exikarhi ka n'wina.

Duteronoma 4:29

Hi kona mi nga ta lava Yehovha, Xikwembu xa n'wina, kutani, kutakuloko u xi lava hi mbilu hinkwayo ya wena, ni moya hinkwawo wa wena, u ta xi kuma.

Duteronoma 5:10

kambe ndzi tsetselela lava ndzi rhandzaka, lava hlayisaka milawu ya mina, ku yisa erixakeni ra khume ra madzana.

Pisalema 78:7

Leswaku va veka ku tshemba ka vona eka Xikwembu, Va nga tshuki va rivala mitirho ya Xikwembu, Va ta hlayisa ku lerisa ka xona,

Eksoda 23:13

Mi ta hlayisa hinkwaswo leswi ndzi mi leriseke swona. Mi nga tshuki mi vula mavito ya swikwembu swin'wana; ma nga humi emilon'wini ya n'wina.