Yeremiya 2:7 - Xitsonga (Bibele)

⁷ Ndzi mi tisile etikweni ra ndzalo, leswaku mi ta dya mihandzu ya rona ni mafurha ya rona, kambe mi nghenile, kutani mi dyuhata tiko ra mina, ni ndzhaka ya mina mi yi endla manyala.

BIBELE Mahungu Lamanene

⁷ Kutani ndzi mi fikisile etikweni leri noneke, leswaku mi tidyela mihandzu ya rona mi tiphina ha yona; kambe mi lo na nghena, mo nyamisa tiko ra mina, mi onhetela ndzhaka ya mina.

Yeremiya 2:7 Referans Kwoze

Yeremiya 16:18

Kambe, eku sunguleni, ndzi ta va rihisela kambirhi ku homboloka ka vona ni ku dyoha ka vona, hikuva va nyamisile tiko ra mina hi manyala ya vona, kambe va tatile ndzhaka ya mina hi mitsumbu ya swikwembu swa vona leswi sandzekaka.”

Tinhlayo 13:27

Va byela Muxe timhaka, va ku: “Hi yile etikweni leri u hi rhumeke eka rona; kunene i tiko leri pfelelaka hi ntswamba ni vulombe, mihandzu ya kona hi leyi.

Ezekiele 36:17

“N'wana wa munhu, va yindlu ya Israele, loko va ha tshamile etikweni ra vona, va ri nyamisile hi tindlela ta vona ni swiendlo swa vona; swiendlo swa vona, emahlweni ka mina, a swi fana ni thyaka ra wansati.

Yeremiya 3:9

Hi vuoswi lebyi twakaleke bya yena, Israele u nyamisile misava. Kambe u oswanile ni ribye ni murhi.

Yeremiya 3:1

Va te: “Kungakuloko wanuna, a tshika nsati wa yena, kutani nsati yeloyi a suka eka yena, a ya tekiwa hi nuna un'wana, xana nuna wa yena a nga tlhela a n'wi teka xana? Tiko leri ri nga ka ri nga nyamisiwi hi ku endla sweswo-ke? Loko u ri wena, u tinyiketile vuoswi ni swigangu leswo tala xana u ta tlhelela eka mina-ke?” ku vula Yehovha.

Mikiya 2:10

Pfukani, fambani! Hikuva laha, mi nga ka mi nga wisi kona, hikwalaho ka thyaka le ri humesaka ku onhaka, ku onhaka loku chavisaka.

Ezekiele 20:6

“Hi siku lero ndzi yimise voko ra mina eka vona, ku va humesa etikweni ra le Egipta, va ta etikweni leri ingi ndzi ri hlawulele vona, leri nga ni ntswamba ni vulombe, lero saseka exikarhi ka matiko hinkwawo.

Nehemiya 9:25

Va teka miti ya rirhangu ni tiko leri noneke va fuwa tindlu leti teleke xuma xa tinxakaxaka hinkwato ni swihlovo leswi ceriweke, ni tivhinya ni mitlhwari, ni mirhi yo tala leyi vekaka mihandzu, va dya, va xurha va nona, kutani va hanya eku tsakeni hinkwako hi tintswalo ta wena letikulu.

Duteronoma 21:23

ntsumbu wa yena wu nga tshuki wu hundza vusiku wu ri emutini; u ta n'wi lahla hi siku rolero, hikuva la hayekiweke, wa yila eka Xikwembu, kambe u nga tshuki u nyamisa tiko ra wena leri Yehovha, Xikwembu xa wena, a ku nyikaka rona leswaku yi va ndzhaka ya wena.

Duteronoma 6:18

U ta endla leswo lulama ni leswinene emahlweni ka Yehovha leswaku u tsaka, ni leswaku u ya nghena etikweni lerinene, leri Yehovha a ri hlambanyeleke vatata wa wena, u va u ri fuma,

Yeremiya 3:2

“Tlakusa mahlo ya wena eswitsungeni, u languta; xana hi kwihi laha u nga etleriwangiki kona xana? U tshamele swona etindleleni tanihi Muarabu la nga emananga kambe u nyamisile misava hi vuoswi bya wena ni ku biha ka wena.

Yeremiya 32:23

Va vuya va ta ri fuma; kambe a va yingisangi rito ra wena, a va fambanga hi milawu ya wena, a va endlanga swilo hinkwaswo leswi u va leriseke swona, leswaku va swi endla; hilaha u va humeseleke makhombo lawa hinkwawo!

Yeremiya 32:30

“Hikuva vana va Israele ni vana va Yuda va endlile leswo biha emahlweni ka mina ka ha ri evuntshweni bya vona; hikuva vana va Israele va ndzi pfukile ntsena hi ku endla ka mavoko ya vona, ku vula Yehovha.

Ezekiele 20:28

Ndzi va yise etikweni leri ingi ndzi yimise voko ra mina, ndzi ku, ndzi ta va nyika rona, kutani kona va vona switsunga hinkwaswo leswo tlakuka, ni mirhi hinkwayo leyo tlhuma; kona, va tlhava magandzelo, va humesa timhamba ta vona leti ndzi karihisaka. Kambe va hisa mirhi ya risuna, va chela kona magandzelo ya swakunwa.

Hosiya 9:3

Va nga ka va nga hlweri etikweni ra Yehovha; Efrayimi u ta tlhelela eEgipta, ni le tikweni ra Asiriya, va ta dya leswa thyaka.

Duteronoma 32:9

Hikuva ku averiwa ka Yehovha, i tiko ra yena; Yakobo, i ku averiwa ka ndzhaka ya yena. U n'wi kumile mananga, Emananga ya ku huwelela loku chavisaka.

Nehemiya 9:26

“Hambiswiritano va tiarisile va ku hundzukela, va cukumeta milawu ya wena endzhaku, va dlaya vaprofeta va wena lava nga endla vumbhoni exikarhi ka vona, leswaku va va hundzuluxela ka wena, kambe va ku sandza ngopfu.

Esaya 19:25

Yehovha wa tinyimpi u ta va katekisa, a ku: “Ku katekile Egipta, tiko ra mina, na Asiriya, ntirho wa mavoko ya mina, na Israele, ndzhaka ya mina.”

Ezekiele 20:24

hikuva va nga ka va nga endli hi milawu ya mina, na swona, va tshikile ku lerisa ka mina, va nyamisile Tisavata ta mina, kutani mahlo ya vona ma landzele swifaniso swa vatata wa vona.

Ezekiele 23:35

“Hikwalaho ka swona, ku vula Hosi Yehovha: Leswi u ndzi riveleke, u ndzi cukumeteke ndzhaku ka nhlana wa wena, hikwalaho-ke, rhwala u ri wena, nandzu wa vuhava bya wena ni wa vuoswi bya wena.”