Yeremiya 18:15 - Xitsonga (Bibele)

¹⁵ Kambe tiko ra mina ri ndzi rivele va fambile va ya hisela swilo swahava magandzelo va hambukisiwile etindleleni ta vona ta khale va fambisiwa emitileni ya tindlela leti nga vandziwangiki;

BIBELE Mahungu Lamanene

¹⁵ Kambe vanhu va mina vona va ndzi rivele, kutani va hisela swikwembu swa hava emirhi ya risuna. Swikwembu leswi swi va khugula va wa, va tshika ndlela ya vona ya khale, kutani va sungula ku chochovela hi nhova ematshan'wini yo famba hi gondzo leri lulamisiweke.

Yeremiya 18:15 Referans Kwoze

Yeremiya 6:16

Yehovha u vula a ku: “Yimani etindleleni mi languta kutani mi vutisa tindlela ta khale; vutisani mi ku: ‘Ndlela leyo saseka hi yihi-ke?’ Kutani mi famba ha yona, mi ta kumela mimoya ya n'wina ku wisa. Kambe va hlamula, va ku: ‘Hi nga ka hi nga fambi kona.’

Hosiya 11:2

Kakuloko vaprofeta va va vita, ku va laha va va fularhelaka; va tlhavela va Baali, va hisela swifaniso magandzelo.

Yeremiya 2:32

Xana wanhwana a nga rivala vubombi bya yena, kumbe mutekiwa mavamba ya yena xana? Kambe tiko ra mina ri ndzi rivarile hi masiku lama nga heriki.

Esaya 57:14

Va ta ku: “Boxani, boxani, lunghisani ndlela, Susani xikhunguvanyiso xihi ni xihi endleleni ya tiko ra mina!

Malakiya 2:8

Kambe n'wina mi hambukile ndlela, mi khunguvanyise lavo tala hi nawu; mi onhile ntwanano wa Levhi, ku vula Yehovha wa mavandla.

Yeremiya 2:13

“Hikuva tiko ra mina ri dyohile kambirhi: va ndzi tshikile, mina ndzi nga nseledyana ya mati lama pfelelaka kambe va ticelele swihlovo, le swi handzukeke, leswi nga kotiki ku hlayisa mati.

Yeremiya 17:13

Wena Yehovha, ku tshemba ka Israele! Lava ku tshikaka hinkwavo va ta khomisiwa tingana. Lava ndzi tshikaka va ta tswariwa emisaveni, hikuva va tshikile xihlovo xa mati lama hanyisaka, a nga Yehovha.

Yeremiya 10:15

Swilo sweswo i vuhava, i mitirho ya ku kanganyisa; siku swi tshinyiwaka swi ta hela.

Esaya 41:29

Vonani, hinkwavo i swahava, mitirho ya vona a hi ya nchumu, swifaniso swa vona i moya wa hava ntsena!

Matewu 15:6

Kutani mi hundzurile nawu wa Xikwembu swahava hi mikhuva leyi mi yi endlaka.

Hosiya 2:13

Kutani ndzi ta n'wi tshinya hi masiku ya va Baali lawa a va hiseleke gandzelo ha wona, a vuya a landzela swigangu swa yena, a tibombisa hi swingwavila ni vuhlalu; kasi mina wa ndzi rivala, ku vula Yehovha.

Yeremiya 16:19

Oho Yehovha, matimba ya mina, ni khokholo ra mina, ni xichavelo xa mina hi siku ra mahlomulo! Matiko ma ta ta eka wena, ma huma emakumu ka misava, kutani ma ta ku: “Kunene, vatata wa hina va fuwile vunwa ni vuhava lebyi nga riki na ku pfuna nchumu.

Yeremiya 13:25

Hi kona ku averiwa ka wena, i nyiko leyi ndzi ku ringaniseleke yona, ku vula Yehovha hikuva u ndzi rivele, kutani u titshembele mavunwa.

Yeremiya 3:21

Rito ri twakala etintshaveni leti tlakukeke, i ra swirilo ni mikhongelo ya vana va Israele, hikuva va hombolokisile tindlela ta vona, va rivele Yehovha, Xikwembu xa vona.

Varhoma 14:21

Swi sasekile loko ku nga dyiwi nyama ku nga nwiwi vhinyo, ni loko ku nga endliwi xilo xihi ni xihi lexi nga khunguvanyisaka makwenu, ni ku n'wi wisa, ni ku n'wi tsanisa.

Yeremiya 44:25

Ku vula Yehovha wa mavandla, Xikwembu xa Israele, a ku: N'wina ni vasati va n'wina mi vulavurile hi milomu ya n'wina, mi va mi endla hi mavoko ya n'wina, mi ku: ‘Hi rhandza ku hetisa leswi hi swi hlambanyeleke, hi ta hisela nkosikazi ya matilo mirhi ya risuna, ni ku yi chelela swakunwa.’ Kunene sweswi mi hetisile ku hlambanya ka n'wina ni marito ya n'wina!

Yeremiya 19:5

kutani va akele Baali swivandla leswi tlakukeke ku hisa kona vana va vona endzilweni yi va holokosta ya Baali, swi nga leswi ndzi nga va lerisangiki, ndzi nga va byelangiki swona, leswi swi nga ka swi nga humi embilwini ya mina.

Esaya 62:10

Humani, humani etinyangweni! Mi lulamisa ndlela ya tiko! Boxani, boxani gondzo, susani maribye! Tlakusani mujeko ematikweni!

Esaya 9:16

Varisi va tiko leri va ri hambukisa, lava risiwaka va ya eku loveni.

Esaya 3:12

Tiko ra mina ri xanisiwa hi swihlangi, ni vavasati va ri fuma. Tiko ra mina, vafambisi va wena va ku hambukisa ndlela, va onha ndlela leyi u fambaka eka yona.

Yeremiya 2:19

U ta holoveriwa hi ku biha ka wena, u ta biwa hi ku hundzuka ka wena; u ta tiva, u va u vona leswaku ku tshika Yehovha, Xikwembu xa wena, ni ku ka u nga n'wi chavi, i mhaka leyo biha,” ku vula Hosi, Yehovha wa tinyimpi.

Esaya 65:7

swidyoho swa n'wina,” ku vula Yehovha, “swin'we ni swidyoho swa vatata wa n'wina, lava nga humesa mirhi ya risuna etintshaveni, lava ndzi sandzeke eswitsungeni; ndzi ta va pimela hakelo ya ku hanya ka vona ka khale.”

Yeremiya 7:9

I ku yini xana? Ku yiva! Ni ku dlaya! Ni ku oswa, ni ku hlambanya hi mavunwa, ni ku hisela Baali mirhi ya risuna, ni ku famba eka swikwembu swin'wana leswi mi nga swi tiviki!

Yeremiya 18:14

Xana gamboko ra Lebanoni ri nga tshika ribye ra nhova xana? Xana mati lama khulukaka lama sasekeke, lama humaka ekule, ma nga phya xana?

Yeremiya 51:18

Xilo sweswo i mavunwa, i ntirho wo soleka; nkarhi swi holoveriwaka swi ta hela.

Ezekiele 21:15

Ri lotiwele ku dlaya lokukulu; ri lotiwe ri kondza ri vangama. Kumbe hi nga tsaka hi ku: Nhonga ya n'wananga yi sola mirhi hinkwayo.

Ezekiele 36:15

ndzi nga ka ndzi nga ha ku twisi tinhlambha ta matiko, u nga ka u nga ha khomisiwi tingana hi matiko; u nga ka u nga ha heti tiko ra wena, ku vula Hosi Yehovha.”

Hosiya 2:6

“Hikwalaho, vonani, ndzi ta siva ndlela ya yena hi mitwa! Ndzi aka ribuwu kona, ku ko a nga kumi ntila va yena.

Duteronoma 32:21

Vona va ndzi pfuxele vukwele hi leswi nga riki Xikwembu, Va ndzi karihisa hi swahava swa vona; Kambe mina ndzi ta va pfuxela vukwele hi lexi nga riki tiko, Ndzi va karihisa hi tiko leri hungukeke.

Nehemiya 9:17

va ala ku twa, a va anakanyangi swihlamariso swa wena leswi u va endleleke swona, kambe va nonon'hwisa tinhamu ta vona, va tiarisa, va tivekela tihosi va ta tlhelela eku bohiweni ka vona. Kambe wena u Xikwembu lexi teleke ku rivalela ni tintswalo ni vunene, u hlwela ku kariha, u tele ku tsetselela, a ku va fularhelanga.

Yeremiya 1:16

Kutani ndzi ta vula ku avanyisa ka mina ehenhla ka ku homboloka hinkwako ka vona, hikuva va ndzi tshikile va ri karhi va hisela swikwembu swin'wana magandzelo, kambe va khinsamela mitirho ya mavoko ya vona.

Yeremiya 11:12

Swi tsandza ni miti ya Yuda ni vaaki va Yerusalema, va ta ya huwelela eka swikwembu leswi va nga swi hisela mirhi ya risuna, kambe swi nga ka swi nga va pfuni hi siku ra khombo ra vona.

Yeremiya 11:13

Hikuva, wena Yuda, nhlayo ya swikwembu swa wena yi ringana ni miti ya wena! Kambe nhlayo ya tialitari ta tingana, ti nga tialitari leti ku hiseriwaka Baali mirhi ya risuna, yi fana ni nhlayo ya mitsendzele ya Yerusalema.’

Yeremiya 11:17

Yehovha wa tinyimpi la ku byaleke u lerisile ku biha ehenhla ka wena, hikwalaho ka ku homboloka ka yindlu ya Israele, ni ka va yindlu ya Yuda, kuloku va ku endleke leswaku va ndzi karihisa hi ku hisela Baali mirhi ya risuna.