Sofoniya 1:10 - Xitsonga (Bibele)

¹⁰ “Esikwini lero,” ku vula Yehovha, “ku ta twakala huwa leyi pfaka enyangweni ya tinhlampfi, ni swirilo leswi pfaka etlhelweni rin'wana ra muti, ni ku onhaka lokukulu ka le switsungeni.

BIBELE Mahungu Lamanene

¹⁰ HOSI Xikwembu xi vula sweswo, xi ri: “Esikwini rero, huwa yi ta twala eYerusalema hi tlhelo ra Nyangwa-ya-Tinhlampfi; laha ku vuriwaka ‘Ndhawu Leyintshwa’, va ta tlhava mukhosi, eswitsungeni ku ta twala mpfumawulo lowukulu wa tinyimpi.

Sofoniya 1:10 Referans Kwoze

2 TIKRONIKA 33:14

Endzhaku ka sweswo a aka rirhangu ra le handle, evupeladyambu bya muti wa Davhida, tlhelo ra Gihoni, enkoveni, ni ku fika enyangweni ya tinhlampfi, a rhendzela ntsunga ha rona, a ri tlakusa ngopfu; a veka ni tindhuna ta mavandla emitini hinkwayo ya makhokholo ya Yuda.

Amosi 8:3

Tinsimu ta yindlu ya vuhosi, ti ta hundzuka swirilo hi siku rero,” ku vula Hosi Yehovha. “Ku ta tala mitsumbu, yi ta cukumetiwa hinkwako, ku miyeriwile.”

2 TIHOSI 22:14

Kavaloko Hilkiya, muprista, na Ahikama, na Akibora na Xafani, na Asaya, va ya ka Hulida, muprofeta, nsati wa Xalumi, n'wana Tikivha, n'wana Harihasi, muhlayisi wa tinguvu, a a akile eYerusalema, etlhelweni lerintshwa ra muti, va vulavula na yena.

Nehemiya 3:3

Nyangwa ya Tinhlampfi yi akiwa hi vana va Hasena, va endla timhandze ta kona, va vehela timbanti ni swilotlela ni tinghole.

Sofoniya 1:15

Siku rolero! Siku ra vukari, i siku ra khombo ni ra nhlomulo, i siku ra ku onha ni ra ku onhaka, i siku ra munyama lowa ntima, i siku ra mapapa ni ra munyama lowa ntima!

Sofoniya 1:7

Miyelani emahlweni ka Hosi Yehovha! Hikuva siku ra Yehovha ri tshinele; hikuva Yehovha u lunghise xitlhavelo, u basisile lava a va viteke.

Yeremiya 39:2

Hi lembe ra khume na rin'we ra Sedekiyasi, hi n'hweti ya vumune, esikwini ra ntlhanu na mune ra n'hweti, rirhangu ri mbundzuxiwa.

Yeremiya 4:31

Hikuva ndzi twa nkosi wo nge i wa la velekaka, mikosi ya wansati la nga ekhombyeni ra ku veleka n'wana wa mativula; i nkosi wa nhwanyana wa Siyoni, a hefemuteka, a ri karhi a tshambuluta mavoko a ku: “Yo! Yowee! Moya wa mina wu tikeriwile hi vadlayi.”

Esaya 59:11

Hi vovola hinkwerhu kukota tibere, hi rila kukota magugurhwana; ha langutela ku lulama kasi ku hava, ni ku pona, kasi ka hi balekela.

2 TIKRONIKA 32:22

Yehovha a ponisa Hezekiya ni vaaki va Yerusalema, evokweni ra Senakeribi, hosi ya Asiriya ni le mavokweni ya hinkwavo, a va hlayisa ematlhelweni hinkwawo.

2 TIKRONIKA 3:1

Solomoni a sungula ku aka yindlu ya Yehovha eYerusalema, entshaveni ya Moriya, laha Yehovha a humeleleke eka Davhida, tata wa yena, endhawini leyi Davhida a yi lunghiseke exivuyeni xa Orinani, wa ka Yebusi.

2 SAMIELE 5:9

Davhida a aka ekhokholweni, a ri thya muti wa Davhida. Kutani a aka ematlhelweni hinkwawo, ku suka ekhokholweni, ni le ndzeni ka rona.

2 SAMIELE 5:7

Kutani Davhida a teka khokholo ra Siyoni (i muti wa Davhida).

2 TIKRONIKA 34:22

Kutani Hilkiya ni lava hosi yi va leriseleke va ya ka Hulida, muprofeta wa wansati, nsati wa Xalumi, n'wana Tokata, n'wana Hasira, muhlayisi wa tinguvu; a akile eYerusalema, etlhelweni rin'wana ra muti, va n'wi byela timhaka teto.

Nehemiya 12:39

ni le henhla ka nyangwa ya Efrayimi, ni le nyangweni ya Khale, ni le nyangweni ya Tinhlampfi, ni le khokholweni ra Hananele, ni le khokholweni ra Mea, ku ya fika eNyangweni ya Tinyimpfu, kutani va yima enyangweni ya Khotso.

Ezekiele 6:13

Kutani mi ta tiva leswaku hi mina Yehovha, loko tinkuveri ta vona ti ta wa exikarhi ka swifaniso swa swikwembu swa vona, ematlhelweni ya tialitari ta vona, ni le henhla ka switsunga hinkwaswo, ni le tinhlohlorhini hinkwato ta tintshava ni le hansi ka mirhi hinkwayo leya matluka, ni le hansi ka mikuhlu hinkwayo laha va gandzelaka kona swikwembu hinkwaswo swa vona hi magandzelo lama nun'hwelaka.