Pisalema 52:2 - Xitsonga (Bibele)

² Ririmi ra wena ri luka ku onha ntsena, I rikari leri lotiweke leri vulaka mavunwa ntsena.

BIBELE Mahungu Lamanene

² We mukanganyisi, ririmi ra wena i mukwana lowo kariha, ri kanela makungu yo herisa van'wana.

Pisalema 52:2 Referans Kwoze

Swivuriso 18:21

Ku fa ni ku hanya swi kota hi ririmi, Lava ri rhandzaka va ta dya mihandzu ya rona.

Pisalema 57:4

Moya wa mina wu le xikarhi ka tinghala; Ndzi etlele exikarhi ka valala lava hlantaka ndzilo, Exikarhi ka vanhu lava meno ya vona ma nga matlhari ni miseve, Lava tindzimi ta vona ma nga mabanga layo kariha.

Swivuriso 12:18

La vulaka swahava wa tlhava kukota tlhari; Kambe nomu wa lowo tlhariha wa hanyisa.

Pisalema 59:7

Waswivo, milomu ya vona yi halata leswo biha, Matlhari ma le milon'wini ya vona. Hikuva va ri: “I mani la hi yingisaka?”

2 Vakorinto 11:13

Hikuva vanhu lavo tano, i vaapostola vo hemba, vatirhi va mano lava ambalaka nghohe ya vaapostola va Kriste.

2 Vakorinto 4:2

kambe hi lahlile swilo leswi fihliweka, leswa tingana; kutani a hi fambi hi mano, a hi pfanganyeti rito ra Xikwembu; kambe hi ku veka erivaleni ntiyiso, hi tiendlela ku yimeriwa etimpfalweni ta vanhu hinkwavo, emahlweni ka Xikwembu.

Timhaka 24:5

Hi kumile munhu loyi, a nga ntungu, u pfuxe madzolonga exikarhi ka Vayuda hinkwavo, lava akeke emisaveni hinkwayo; i nhloko ya dyondzo leyi hambukeke ya Vanazarene.

Timhaka 24:1

Masiku ya ntlhanu, loko ma hundzile, ku ta Ananiya, muprista lonkulu, a ri ni vakulukumba van'wana ni muvulavuri un'wana loyi va nge i Tertulo; kutani va ya eka hosi ku hehla Pawulo.

Matewu 26:59

Kutani vaprista lavakulu, ni huvo hinkwayo ya Sanedri va lava vumbhoni bya mavunwa ehenhla ka Yesu leswaku va ta n'wi dlaya;

Yeremiya 18:18

Va ri karhi va ku: “Tanani, hi endla makungu ku lovisa Yeremiya; hikuva nawu wu nga ka wu nga heri eka muprista, ni ku tsundzuxa ku nga ka ku nga heri eka la tlhariheke, ni loko ri ri rito eka muprofeta. Tanani, a hi n'wi tlhaveni hi ririmi, kutani hi nga anakanyi ku vulavula ka yena, ni kun'we.”

Swivuriso 30:14

Rixaka ri kona ra meno laya kotaka mafumu, Ra tinhlaya leti fanaka ni mikwana, Ku dya va nhlomulo emisaveni, Ni ku heta vapfumari exikarhi ka vanhu.

Pisalema 120:2

Yehovha, lamulela moya wa mina enon'wini wa muhembi, Eririn'wini leri kanganyisaka.

Pisalema 109:2

Hikuva nomu wa lowo biha, ni nomu wa muxisi Wu ndzi ahlamele ku lwa na mina, Va vulavula na mina hi ririmi ra vunwa,

Pisalema 50:19

“U nyiketa nomu wa wena eku biheni, Ni ririmi ra wena ri luka ku kanganyisa ntsena.

Nhlavutelo 12:10

Kutani ndzi twa rito lerikulu etilweni, ri ku: “Sweswi, ku fikile ku hlayiseka, ni matimba, ni ku fuma ka Xikwembu xa hina; ni matimba ya Kriste wa xona; hikuva muhehli wa vamakwerhu, loyi a nga va hehla emahlweni ka Xikwembu xa hina vusiku ni nhlekanhi, u cukumetiwile.

1 SAMIELE 22:9

Kutani Dowege, wa Edomu, la yimeke swin'we ni malandza ya Sawulo, a hlamula a ku: “Ndzi vonile n'wana Yese a ta eNobo eka Ahimeleke, n'wana Ahituba.