Pisalema 104:21 - Xitsonga (Bibele)

²¹ Swinghalana swi dzuma swi lava swiharhi, Swi lava leswi swi nga dyaka swona eka Xikwembu;

BIBELE Mahungu Lamanene

²¹ Swinghalana swa bonga, swi lava nyama, swi langutela wena ku swi phamela.

Pisalema 104:21 Referans Kwoze

Ntirho 38:39

“Xana u nga dlayela ntswele ya nghala xiharhi, U nga xurhisa ndlala ya swinghalana xana?

Yuwele 1:20

Swi tsandza ni swiharhi swi huwelela eka wena, hikuva mati ya milambu, ma phyile, ni madyelo ya mananga ma tshwile.

Pisalema 34:10

Swinghalana swi nga pfumala, swi nga va ni ndlala, Kambe lava lavaka Yehovha a va nga kiyeriwi hi leswinene.

Yuwele 2:22

Mi nga chaveni, n'wina swiharhi swa nhova; hikuva madyelo ya mananga ma ta hatlisa ma endla rihlaza, hikuva murhi wu ta veka mihandzu ya wona, makuwa ni vhinya swi ta humesa matimba ya swona.

Amosi 3:4

Xana nghala yi vuvula exihlahleni, ku ri hava lexi yi nga xi handzulaka? Xana xinghalana xi nga twarisa rito ra xona ebakweni ra xona, xi nga khomanga nchumu xana?

Yuwele 1:18

A hi ku cema ka swifuwo! Mitlhambi ya tihomu a yi tivi laha yi yaka yona, hikuva a ka ha ri na madyelo, swi tsandza ni mitlhambi ya swifuwana swi le ku vavisekeni!

Esaya 31:4

Hikuva Yehovha u ndzi byerile, a ku “Kukotisa nghala, kumbe xinghalana; loko xi dzumadzumela xiharhi lexi khomiweke hi xona, xi nga chavi pongo ra varisi lavo tala lava rhambaneke, xi nga baleki hi ku tala ka vona; hi mukhuva wolowo, Yehovha wa tinyimpi u ta xika ku ya hlasela ntshava ya Siyoni ni ripala ra kona.

Pisalema 147:9

U nyika swiharhi swakudya swa swona; U phamela mavondlo ya mawukuwuku loko ma rila.

Pisalema 145:15

Mahlo ya swivumbiwa hinkwaswo ma langutile ka wena, Kutani u swi nyika swakudya hi nkarhi wa swona.

Ntirho 38:41

I mani la tsetselelaka wukuwuku hi swakudya swa rona? Loko mavondlo ya rona ma huwelela eka Xikwembu, Loko ma solovanya hala ni hala hi ku twa ndlala?