Marka 9:18 - Xitsonga (Bibele)

¹⁸ Hinkwako loko wu n'wi khoma, wa n'wi tlatlalata, a humesa xikhuvi, a getsela meno, kutani a omelela; ndzi komberile vadyondzisiwa va wena leswaku va wu hlongola, kambe va tsandzekile.”

BIBELE Mahungu Lamanene

¹⁸ Loko wu n'wi khoma, wa n'wi tlatlalata, a tlhutlha xikhuvi, a getsela meno, kutani a oma; ndzi komberile vadyondzisiwa va wena leswaku va wu hlongola, kambe va tsandzekile.”

Testamente Leyimpsha Xichangana

¹⁸ Loko wumukhoma, wamutlatlalata la hansi, atlhutlha khuvi, aphorhela matinyo, kutani awoma svirho; nikombelile vajondzisiwa va wena lesvaku vawuhlongola, kambe vatsandzekile.”

Marka 9:18 Referans Kwoze

Marka 11:23

Ndzi tiyisile, ndzi ri eka n'wina: Un'wana ni un'wana la nge eka ntshava leyi: ‘Suka, u ya tihoxa elwandle,’ a nga vileri embilwini ya yena, kambe a pfumela leswaku leswi a swi vulaka swi nga endleka, u ta endleriwa hinkwaswo leswi a swi vuleke, hambi yi ri yini na yini.

Marka 9:26

Kutani wu huma, wu ri karhi wu huwelela, wu khoma n'wana hi matimba, kutani n'wana a va tanihi mufi, hilaha lavo tala va nga ku: “U file.”

Marka 9:20

Kutani va n'wi yisa eka yena. Kuteloko n'wana a vona Yesu, moya wu n'wi khoma hi matimba, a wa ehansi, a vumbuluka, a ri karhi a humesa xikhuvi.

Matewu 17:16

Ndzi n'wi tisile eka vadyondzisiwa va wena, kambe a va tivanga ku n'wi hanyisa.”

Timhaka 7:54

Kuteloko va twile timhaka teto, va kariha ngopfu etimbilwini ta vona; kutani va n'wi getsenyela meno.

Pisalema 112:10

Lowo biha u vona sweswo, kutani a vilela ha swona, U getsela meno, a omelela, Ku navela ka lavo biha ku endliwa swahava.

Yuda 1:13

I magandlati lama levaka ya lwandle, lama tlhutlhaka khuvi, swi nga swisandzu swa vona; i tinyeleti leti lahlekeke, leti lunghiseriweke ntima wa munyama hilaha ku nga heriki.

Matewu 15:22

Kutani ku humelela wansati wa Kanana la humeke ematlhelweni walawo, a huwelela, a ku: “Ndzi twele vusiwana, Hosi, n'wana Davhida, n'wana wa mina wa wanhwanyana u vabya ngopfu hi mademona.”

Matewu 8:12

Kambe vana va ku fuma va ta cukumetiwa ehandle emunyameni, laha mikosi yi nga ta va kona ni ku getsela ka meno.”

Ntirho 16:9

Vukari bya yena byi ndzi handzula, byi ndzi landzelela; U ndzi getselela meno. Loyi a nga nala eka mina, u ndzi tlhava hi mahlo layo kariha.

Marka 9:17

Un'wana exikarhi ka vunyingi a hlamula, a ku: “Mufundhisi, ndzi tisile n'wana wa mina eka wena; u ni moya lowu nga vulavuriki.

Marka 9:19

Yesu a n'wi hlamula, a ku: “Ha! Rixaka leri nga pfumeriki, ndzi ta va na n'wina ku yisa kwihi? Ndzi ta mi lehisela mbilu ku yisa kwihi-ke? N'wi tiseni eka mina.”