Marka 3:5 - Xitsonga (Bibele)

⁵ Yena a va rhalarhala hi mahlo hi ku kariha a vavisekile hi ku nonon'hwa ka timbilu ta vona; kambe a ku eka munhu loyi: “Tshambuluta voko ra wena.” A ri tshambuluta, kutani voko ra yena ri hanya.

BIBELE Mahungu Lamanene

⁵ Yesu a va rhalarhala hi mahlo a hlundzukile, a vavisekile hi ku nonon'hwa ka timbilu ta vona, kutani a ku ka munhu loyi: “Tshambuluta voko ra wena.” A ri tshambuluta, kutani voko ra yena ri tlhela ri ololoka.

Testamente Leyimpsha Xichangana

⁵ Yesu avarhalarhala hi mahlo na ahlundzukile, na avavisekile hi kunonon'hwa ka timbilu ta vona, kutani aku ka wanuna lwiya: “Tshabuluta voko ra wena.” Aritshabuluta, kutani voko ra yena ritlhela riwololoka.

Marka 3:5 Referans Kwoze

Luka 6:10

Kavaloko a va rhalarhala hinkwavo a ku eka munhu loyi: “Tshambuluta voko ra wena”; a endlisa sweswo, kutani voko ra yena ri ololoka, ri va rinene tanihi lerin'wana.

Vaefesa 4:18

volavo va nga nyamisiwa emiehleketweni ya vona, kutani va le kule ni vutomi bya Xikwembu hi ku ka va nga tivi nchumu hikwalaho ka ku nonon'hwa ka timbilu ta vona.

1 TIHOSI 13:6

Kutani hosi yi vulavula yi ku eka munhu wa Xikwembu: “Wa nga khongela Yehovha, Xikwembu xa wena, u ndzi khongelela leswaku voko ra mina ri tlhela eka mina!” Munhu wa Xikwembu a khongela Yehovha, kutani voko ra hosi ri tlhela eka yena, ri va kukotisa khale.

Varhoma 11:25

Hikuva, vamakwerhu, a ndzi swi rhandzi leswaku mi fihleriwa xihundla lexi, mi nga ti tshuka mi tiendla lavo tlhariha: swi ri leswaku ku nonon'hwa ku humelele Vaisraele hitlhelo rin'wana, ku tala ka vamatiko ku ko ku nghena;

Matewu 12:13

Kutani a ku eka munhu yeloyi: “Tshambuluta voko ra wena.” A ri tshambuluta; kutani ri hanya kukota rin'wanyana.

Nhlavutelo 6:16

Kutani va ku eka tintshava ni le ka maribye: “Hi weleni ehenhla, mi hi fihla emahlweni ka mombo wa loyi a tshameke exiluvelweni, ni le mahlweni ka vukari bya Xinyimpfana,

Vaheveru 5:9

kutani, kuteloko a hetisekile, a va n'wini wa ku kutsula loku nga heriki, eka hinkwavo lava n'wi yingisaka;

Vaheveru 3:17

A hi vona lava dyoheke, volavo mitsumbu ya vona yi nga sala emananga xana?

Vaefesa 4:30

Kutani mi nga tshuki mi khomisa Moya lowo Kwetsima wa Xikwembu tingana, wolowu mi funghiweke ha wona siku ra ku kutsuriwa ka n'wina.

Vaefesa 4:26

Kungakuloko mi kariha, mi nga tshuki mi dyoha; dyambu ri nga peleli vukari bya n'wina;

2 Vakorinto 3:14

Kambe ku anakanya ka vona ku nonon'hwisiwile; hikuva ku fika sweswi, loko va hlaya timhaka ta ntwanano wa khale, xisirhelelo lexo xa ha tshamile, a xi nga suki, hikuva xi ngo susiwa hi Kriste ntsena.

Yohane 9:7

a ku eka yena: “Famba u ya hlamba evuhlambelweni bya Silowama” (hileswaku xirhumiwa).

Luka 17:14

Kuteloko a va vonile, a ku eka vona: “Fambani mi ya tikomba eka vaprista.” Kutani loko va ri karhi va famba, va basisiwa.

Luka 13:15

Kambe Hosi yi n'wi hlamula, yi ku: “N'wamanyunyu, xana un'wana ni un'wana wa n'wina a nge tshunxi homu ya yena, kumbe mbhongolo ya yena exidyelweni hi Savata, a yi yisa eku nweni xana?

Pisalema 95:10

Ndzi phiriwa hi rixaka leri hi mune wa makume ya malembe, Ndzi ku: “I tiko leri mbilu ya rona yi lahlekeke, A va tivi tindlela ta mina,”

Nehemiya 13:8

Ndzi va ni tingana ngopfu, hikwalaho ndzi cukumeta timpahla hinkwato ta yindlu ya Tobiya ehandle ka kamara;

Vaavanyisi 10:16

Kwalaho, va tshika swikwembu swa matiko leswi ngi swi ri exikarhi ka vona, va tirhela Yehovha; Yehovha a tsetselela Vaisraele hikwalaho ka khombo ra vona.

Genesa 6:6

kutani Yehovha a vilela hi leswi a nga vumba vanhu emisaveni, a vaviseka ngopfu embilwini ya yena.

Vaheveru 3:10

Hikwalaho ndzi nga karihela rixaka lero, ndzi ku: ‘Timbilu ta vona ti hambukile hi masiku, valavo a va tivangi tindlela ta mina.’

Marka 3:4

Kutani a ku eka vona: “Loko ku ri ku endla swinene ni ku endla swo biha, ku hanyisa munhu kumbe ku n'wi dlaya, leswi lulameke ku endliwa hi Savata hi swihi xana?” Kambe va miyela.

1 SAMIELE 20:34

Kutani Yonatani a huma etafuleni hi ku kariha ngopfu, a nga dyanga swakudya siku ra vumbirhi ra n'weti le yintshwa, hi ku va a twa ku vaviseka hikwalaho ka Davhida, hi ku va tata wa yena a n'wi sandzile ngopfu.