Levhitika 17:6 - Xitsonga (Bibele)

⁶ Muprista u ta chela ngati ealitarini ya Yehovha, enyangweni ya tabernakela ya nhlengeletano, kutani u ta hisa mafurha ri va risuna eka Yehovha.

BIBELE Mahungu Lamanene

⁶ Kutani muprista ú ta fika a teka ngati, a xuva hi yona alitari ya HOSI Xikwembu enyangweni ya Ntsonga lowo Hlawuleka; a teka ni mafurha, a humesa ha wona magandzelo lama hisiwaka, lawa ku nun'hwela ka wona ku nga ta tsakisa HOSI Xikwembu.

Levhitika 17:6 Referans Kwoze

Tinhlayo 18:17

Kambe mativula ya tihomu ni mativula ya tinyimpfu, ni mativula ya timbuti, u nga ka u nga ma kutsuli, ma hlawulekile. U ta halata ngati ya wona ealitarini, kutani u ta hisa mafurha ya wona; i gandzelo leri hisiwaka, leri nun'hwelaka eka Yehovha.

Levhitika 3:2

U ta tlhandleka voko ra yena enhlokweni ya nhlengo wa yena; va ta tlhava xifuwo enyangweni ya Tabernakela ya nhlengeletano, kutani vaprista, vana va Aroni va ta halatela ngati ealitarini, ematlhelweni hinkwawo.

Levhitika 4:31

Muprista u ta susa mafurha hinkwawo hi mukhuva lowu va susaka mafurha ya magandzelo ya ku khensa kutani a ma hisa ealitarini, ri va risuna eka Yehovha. Muprista u ta phahlela munhu loyi mhamba, kutani u ta rivaleriwa.

Levhitika 3:16

Muprista u ta swi hisa ealitarini, swi ri swakudya swa mhamba leyi hisiwaka, ni risuna ro nun'hwela. Mafurha hinkwawo i ya Yehovha.

Levhitika 3:13

U ta tlhandleka voko ra yena enhlokweni ya yona; va yi tlhava emahlweni ka tabernakela ya nhlengeletano, kutani vana va Aroni va ta halatela ngati ya yona ealitarini, ematlhelweni hinkwawo.

Levhitika 3:11

Muprista u ta swi hisa ealitarini, swi ri swakudya swa mhamba leyi hiseriwaka Yehovha.

Levhitika 3:8

U ta tlhandleka voko ra yena enhlokweni ya xifuwo; va ta xi tlhava emahlweni ka tabernakela ya nhlengeletano, kutani vana va Aroni va ta halatela ngati ya xona ealitarini ematlhelweni hinkwawo.

Levhitika 3:5

Vana va Aroni va ta swi hisa ealitarini, ehenhla ka holokosta leyi vekiweke tihunyini leti va tshiveleke ndzilo ha tona, yi ta va mhamba leyi hisiwaka leyi nga ni risuna eka Yehovha.

Eksoda 29:18

kutani u hisa khuna hinkwaro ealitarini; i gandzelo ra Yehovha leri nun'hwelaka swo nandziha; i gandzelo leri hiseriwaka Yehovha.

Eksoda 29:13

U ta teka mafurha hinkwawo lama pambelaka marhumbu ni mpambana wa xivindzi, ni tinswo timbirhi, ni mafurha ya tona, u swi hisa ealitarini.

Levhitika 17:5

Hi leswaku vana va Israele va tisa timhamba leti va ti tlhavaka emananga eka muprista, emahlweni ka Yehovha, enyangweni ya tabernakela ya nhlengeletano, kutani va ti humesela Yehovha, ma ri magandzelo ya ku khensa.

Ezekiele 44:15

“Loko va ri vaprista va Valevhi, vana va Sadoki, lava hlayiseke milawu ya vukwetsimelo bya mina, loko vana va Israele va ndzi hambukele, vona va ta tshinelela emahlweni ka mina ku tirha ntirho wa mina, va ta yima emahlweni ka mina, va ndzi humesela mafurha, ni ngati, ku vula Hosi Yehovha.