Genesa 47:9 - Xitsonga (Bibele)

⁹ Yakobo a ku eka Faro: “Masiku ya ku hanya ka mina i malembe ya dzana ni makume manharhu, kambe masiku ya ku hanya ka mina ma komanyanile, ma vuya ma biha; a ndzi fikanga emasikwini ni le malembeni ya vatatana, emikarhini ya ku hanya ka vona.”

BIBELE Mahungu Lamanene

⁹ Yakobo a hlamula hosi Faro a ku: “Sweswi swi endla malembe ya 130 ndzi ri karhi ndzi hanya hi ku tsendzeleka laha misaveni. Ndzi hanyile malembe matsongo, kambe ndzi vonile maxangu layo tala; malembe lawa a ma ringani ni lawa vatatana va hanyeke wona va ri karhi va tsendzeleka laha misaveni.”

Genesa 47:9 Referans Kwoze

Pisalema 39:12

“Yehovha, yingisa xikhongelo xa mina, rhiyela ku huwelela ka mina ndleve! U nga miyeli loko ndzi rila; Hikuva ndzi muendzi eka wena, Ndzi muluveri kukota vatata wa mina hinkwavo.

Genesa 35:28

Masiku ya Isaka a ma ri malembe ya 180.

Pisalema 39:5

Waswivo, u pimile masiku ya mina, ma ringana xandla ntsena, Ni ku hanya ka mina a hi nchumu emahlweni ka wena. Kunene munhu un'wana ni un'wana la yimaka i hika ntsena.

Ntirho 14:1

“Munhu la velekiweke hi wansati U ni masiku ma nga ri mangani; u xurha makhombo;

Yoxuwa 24:29

Endzhaku ka timhaka teto, Yoxuwa, n'wana Nuni, nandza wa Yehovha, a fa, a ri ni malembe ya 110.

Duteronoma 34:7

Muxe a a ri ni malembe ya 120 loko a fa; mahlo ya yena ma nga tsananga, ni matimba ya yena ma nga helanga.

Eksoda 7:7

Muxe a a ri ni malembe ya 80; na Aroni a a ri ni malembe ya 83, loko va vulavula na Faro.

Eksoda 6:4

Kambe ndzi tiyisile ntwanano wa mina na vona ku va nyika tiko ra Kanana, tiko ra ku luvela ka vona.

Genesa 50:26

Kavaloko Yosefa a fa, a ri ni malembe ya dzana na khume rin'we; va n'wi phutsela, va n'wi veka enkaxeni, le Egipta.

1 Petro 2:11

Varhandziwa, ndza mi khongotela hi laha mi nga vaendzi ni valuveri, ndzi ku: Alelani ku navela ka nyama loku lwaka ni moya,

Yakobo 4:14

n'wina vanhu lava nga ti tiviki swa mundzuku; hikuva vutomi bya n'wina i yini-ke? I hunguva leyi vonakaka hi nkarhi wu nga ri wungani, kutani yi hangalaka.

Pisalema 119:54

Timfanelo ta wena ti ndzi humesela tinsimu, Endlwini ya vuendzi bya mina.

Pisalema 119:19

Ndzi muendzi emisaveni; U nga ndzi fihleri ku lerisa ka wena!

Genesa 47:28

Yakobo a hanya etikweni ra Egipta hi malembe ya 17; kambe masiku ya Yakobo, ni malembe ya ku hanya ka yena, a ma ri malembe ya 147.

Genesa 11:11

kuteloko Xeme a velekile Aripakixada, a hanya malembe ya 500, a veleka vana va xinuna ni va xisati.

Vaheveru 13:14

Hikuva kwala, a hi na muti lowu tiyeke, kambe hi lava lowu nga ta humelela.

1 TIKRONIKA 29:15

Hikuva hi valuveri emahlweni ka wena ni vaendzi, kukotisa vatata wa hina hinkwavo, masiku ya hina ma fana ni ndzhuti emisaveni, kutani ku tshemba a ku kona.

Genesa 5:27

Masiku hinkwawo ya Metuxela a ma ri malembe ya 969; kutani a fa.

2 Vakorinto 5:6

Ku tshemba ka hina loku tiyeke hi masiku ku kona, kutani ha swi tiva leswaku loko ha ha akile emirini, a hi le kaya, hi le kule ni Hosi,

Genesa 47:8

Faro a ku eka Yakobo: “Masiku ya ku hanya ka wena i mangani xana?”

Pisalema 39:13

Wa nga ndzi fularhela leswaku ndzi tlhela ndzi kuma ku tsaka, Ndzi nga si tifambela, kutani ndzi nga ha vi kona.”