Genesa 21:17 - Xitsonga (Bibele)

¹⁷ Kambe Xikwembu xi twa rito ra wandzisanyana, kutani ntsumi ya Xikwembu yi vitana Hagara yi ri etilweni, yi ku: “U na yini, Hagara? U nga chavi, hikuva Xikwembu xi twile rito ra wandzisanyana laha a nga kona.

BIBELE Mahungu Lamanene

¹⁷ Xirilo xa xifanyetana lexi xi fikile etindleveni ta Xikwembu, kutani ntsumi ya Xikwembu yi huwelela Hagara yi ri etilweni, yi ku ka yena: “Hagara, u karhata hi yini xana? U nga chavi hikuva Xikwembu xi twile xirilo xa xifanyetana kwale hansi ka ximudyana.

Genesa 21:17 Referans Kwoze

Genesa 16:11

Ntsumi ya Yehovha yi tlhela yi ku eka yena: “Waswivo, u ni nyimba, kutani u ta veleka n'wana wa wanuna; u ta n'wi thya vito ra Iximaele (Xikwembu xa yingisa), hikuva Yehovha u twile ku vaviseka ka wena.

Pisalema 50:15

Kutani u vitana eka mina hi siku ra mahlomulo, Ndzi ta ku lwela, kutani wena u ta ndzi dzunisa.”

Eksoda 3:7

Kutani Yehovha a ku: “Ndzi vonisisile ku xaniseka ka tiko ra mina eEgipta, ndzi yingisile ku rila ka vona hikwalaho ka lava va va xanisaka; hikuva ndzi tiva nhlomulo wa vona;

Pisalema 91:15

U ta vitana eka mina, kutani ndzi ta n'wi hlamula; Ndzi ta va na yena ekhombyeni, Ndzi n'wi kutsula ni ku n'wi dzunisa;

Marka 5:36

Kambe Yesu, kakuloko a twa leswi vuriwaka, a ku eka hosana ya sinagoga: “U nga chavi, pfumela ntsena.”

Matewu 15:32

Kutani Yesu a vitana vadyondzisiwa va yena, a ku eka vona: “Ndzi twela ntshungu lowu vusiwana, hikuva va tshamile na mina masiku manharhu, va nga ri na leswi va swi dyaka; kutani ndza tsandzeka ku va tlherisa va ri ni ndlala, leswaku kumbe va nga karhala endleleni.”

Esaya 41:10

U nga chavi, ndzi na wena. U nga tshuki hikuva ndzi Xikwembu xa wena. Ndza ku tiyisa, ndza ku lwela, ndzi ku khoma hi voko ra mina ra xinene leri hlulaka.

Esaya 22:1

Swi lo yini leswi vanhu hinkwavo va wena va tlhandlukeleke ehenhla ka tindlu,

Pisalema 65:2

Wena la yingisaka mikhongelo! Vanhu hinkwavo va ta ta eka wena!

2 TIHOSI 13:23

Kambe Yehovha a twela Vaisraele vusiwana, a va endla hi tintswalo, a va hundzukela hi mombo, hikwalaho ka ntwanano wa yena na Abrahama, na Isaka, na Yakobo a nga rhandzangi ku va heta, ni ku fika sweswi a nga va cukumetangi ekule ni mombo wa yena.

2 TIHOSI 13:4

Kutani Yowahazi a khongela Yehovha, Yehovha a n'wi yingisa, hikuva a a vonile ku xaniseka ka Vaisraele hilaha hosi ya Siriya yi va xaniseke hakona.

1 SAMIELE 11:5

Kambe Sawulo a a vuya emasin'wini a landza tihomu ta yena, kutani a ku: “Tiko leri ri rilela yini hi mukhuva lowu xana?” Kutani va n'wi ambela timhaka leti nga vuriwa hi va Yabexe.

Vaavanyisi 18:23

Kutani va huwelela eka vana va Dani valavo, va rhendzeleka, va ku eka Mika: “U dyiwa hi yini loko u tlhavile mukhosi u va hlengeleta?”

Eksoda 22:27

hikuva a nga na xifunengelo xin'wana; hi wona nkumba wa yena wo funengela, u ta funengela ha yini xana? Kutani loko a ndzi khongela, ndzi ta n'wi yingisa, hikuva ndzi ni tintswalo.

Eksoda 22:23

Loko u va xanisa, kutani va ndzi khongela, ndzi ta va yingisa kunene, kutani ndzi ta kariha, ndzi mi dlaya hi tlhari;

Eksoda 14:13

Kutani Muxe a ku eka tiko: “Mi nga chavi; yimani mi ta vona hilaha Yehovha a nga ta mi lamulela hakona namuntlha; hikuva Vaegipta lava mi va vonaka sweswi, a mi nga ha tlheli mi va vona kambe.

Genesa 46:3

Xi ku: “Hi mina Xikwembu, Xikwembu xa tata wa wena; u nga chavi ku ngirimela eEgipta, hikuva ndzi ta ku endla tiko lerikulu kona.

Genesa 16:9

Kutani ntsumi ya Yehovha yi ku eka yena: “Tlhelela eka n'wini wa wena, u tisola ehansi ka voko ra yena.”

Genesa 15:1

Endzhaku ka timhaka teto, rito ra Yehovha ri fika eka Abrama enorhweni, ri ku: “Abrama, u nga chavi. Ndzi xitlhangu xa wena ni hakelo ya wena leyikulu.”

Genesa 16:7

Ntsumi ya Yehovha yi kuma Hagara a ri ekusuhi ni xihlovo xa mati emananga, kusuhi ni xihlovo xa ndlela ya Xuru;

Genesa 22:11

Kavaloko ntsumi ya Yehovha yi n'wi vitana yi ri etilweni, yi ku: “Abrahama, Abrahama!” Yena a ku: “Hi mina loyi!”

Genesa 24:7

Yehovha Xikwembu xa tilo, la ndzi humeseke endlwini ya tatana, ni le tikweni ra matswalo ya mina, a va a ndzi byela hi ku hlambanya, a ku: ‘Ndzi ta nyika vatukulu va wena tiko leri’, yeloyi u ta rhumela ntsumi ya yena emahlweni ka wena, u ta tekela n'wananga nsati kona.

Genesa 26:24

Yehovha a tikombisa eka yena hi vusiku byebyo, a ku eka yena: “Hi mina Xikwembu xa Abrahama, tata wa wena, u nga chavi nchumu, hikuva ndzi na wena, ndzi ta ku katekisa, ndzi andzisa vatukulu va wena hikwalaho ka Abrahama, nandza wa mina.”

Eksoda 3:2

Ntsumi ya Yehovha yi humelela eka yena emalangavini ya ndzilo, exikarhi ka xihlahla; kuteloko Muxe a langutile, a vona xihlahla xi pfurha hi ndzilo, kambe xihlahla xi nga heli.

Duteronoma 26:7

Kambe hi huwelele eka Yehovha, Xikwembu xa vatata wa hina, kutani Yehovha u yingisile rito ra hina, a vona ku tsongahatiwa ka hina, ni mitirho ya hina, ni ku xaniseka ka hina.

Pisalema 6:8

Tshinelani ekule na mina, n'wina hinkwenu lava tirhaka swo biha; Hikuva Yehovha u yingisile rito ra swirilo swa mina.

Genesa 16:8

yi ku eka yena: “Hagara, khumbi ra Sarayi, u pfa kwihi, kambe u ya kwihi xana?” Yena a ku: “Ndzi balekile emahlweni ka Sarayi, n'wini wa mina.”

Pisalema 10:14

Kasi wa swi vona, hikuva u languta khombo ni ku xaniseka, Kutani u swi tekela emavokweni ya wena. La nga ekhombyeni u titshembela wena, Hi wena muyimeri wa xisiwana.