Estere 3:12 - Xitsonga (Bibele)

¹² Hi laha vatsari va hosi va vitaniwaka hi siku ra khume na manharhu ra n'hweti yo sungula; ku tsaleriwa hinkwako hilaha Hamani a leriseke hakona; ku tsaleriwa tindhuna ta hosi, ni vafumi va tiko rin'wana ni rin'wana, ni tihosana ta vanhu van'wana ni van'wana; ku tsaleriwa tiko rin'wana ni rin'wana hi matsalele ya rona, ni vanhu van'wana ni van'wana hi ku vulavula ka vona; matsalwa ma tsariwa hi vito ra hosi Ahasuwerusi, kutani ku tiyisiwa hi xingwavila xa hosi.

BIBELE Mahungu Lamanene

¹² Hi siku ra vu-13 ra n'hweti yo sungula, vamatsalani va hosi va vitaniwa, kutani va tsala nawu hilaha Hamani a va leriseke hakona va nga siyi nchumu, wu rhumeriwa vayimeri va vuhosi eswifundzheni, ni vafambisi va swona hinkwaswo, ni tihosana ta vanhu va swona va tinxaka-xaka; xifundzha xin'wana ni xin'wana xi nyikiwa nawu lowu wu tsariwile hi ririmi ra vanhu va kona ni matsalele ya vona, wu humesiwile hi vito ra hosi Ahasuwerusi ni ku funghiwa hi xingwavila xa yona.

Estere 3:12 Referans Kwoze

1 TIHOSI 21:8

Kavaloko a tsala mapapila hi vito ra Akabu, a ma nameka hi mfungho wa yena; kutani a rhuma mapapila lawa eka vakulukumba ni ka tindhuna leti akeke na Naboto emutini wa yena.

Estere 1:22

A rhumela matsalwa ematikweni hinkwawo ya hosi, etikweni rin'wana ni rin'wana hi matsalele ya rona, ni vanhu van'wana ni van'wana hi ku vulavula ka vona, va ku, wanuna un'wana ni un'wana a a ve hosi endlwini ya yena, kutani a vulavula hi ririmi ra varikwavo.

Daniele 6:15

Kambe vavanuna valavo va ta eka hosi hi huwa leyikulu, va ku eka hosi: “Tiva, hosi, leswaku hi nawu wa Vameda ni Vaperesi, ku lerisa, hambi wu ri nawu lowu vekiweke hi hosi, a wu na ku hundzuka.”

Daniele 6:12

Kutani va tshinelela, va vulavula emahlweni ka hosi hi nawu lowu endliweke hi yona, va ku: “Xana a ku tsalanga nawu lowu nge: Munhu, hambi a ri mani na mani, la nga ta khongela xikwembu xin'wana, kumbe munhu un'wana hi masiku ya makume manharhu, loko a nga ri wena, hosi, u ta hoxiwa ekheleni ra tinghala-ke?” Hosi yi angula, yi ku: “I mhaka leyi tiyeke, i nawu wa Vameda ni Vaperesi, wu nga nawu lowu nga riki na ku hundzuka.”

Daniele 6:8

Kutani, hosi, wa nga tiyisa ku lerisa loku, kutani u tsala nawu leswaku wu nga hundzuki, kukotisa nawu wa Vameda ni Vaperesi, wu nga nawu lowu nga riki na ku hundzuka.”

Estere 9:27

Vayuda va kanela, kutani va tihlawulela, va hlawulela ni vatukulu va vona ni hinkwavo lava nga va namarhelaka, leswaku va nga ka va nga tshiki ku hlawula masiku walawo mambirhi, elembeni rin'wana ni rin'wana, hi nawu wa kona lowu tsariweke, ni nkarhi lowu vekiweke;

Estere 8:2

Hosi yi humesa xingwavila xa yena lexi ingi a xi tekerile Hamani, a xi nyika Mordekayi; kutani Estere a veka Mordekayi n'wini wa yindlu ya Hamani.

Ezra 8:36

Kambe va nyika tindhuna ta hosi ni vafumi va hase ka nambu, ku lerisa ka hosi, kutani valavo va yimela tiko ni yindlu ya Xikwembu.

Estere 3:11

Kutani hosi yi ku eka Hamani: “Mali leyo yi nyikiwile wena, u nyikiwile ni vanhu valavo, u ta endla ha vona hilaha u rhandzaka hakona.”

Daniele 3:10

Wena, hosi, u vekile ku lerisa leswaku un'wana ni un'wana la yingisaka mpfumawulo wa mhalamhala, ni wa xitiringo, ni wa ritaninga, ni wa haripa ni wa psalteri, ni wa gupu, ni wa leswi yimbiwaka hinkwaswo, a khinsama a gandzela xifaniso xa nsuku;

Daniele 6:25

Kutani hosi Dariyosi a tsala a ku: “N'wina va tinxaka hinkwato, ni va matiko hinkwawo, ni va tindzimi hinkwato lava akeke emisaveni hinkwayo a mi tateriwe hi ku tsaka!