Eksoda 4:31 - Xitsonga (Bibele)

³¹ Kutani tiko ri pfumela; va twa leswaku Yehovha u endzele vana va Israele, ni leswaku u langutile ku xaniseka ka vona; kavaloko va khinsama, va korhame hansi.

BIBELE Mahungu Lamanene

³¹ Kavaloko Vaisraele va kholwa: Loko va twisisile leswaku HOSI Xikwembu xi tile eka vona hakunene, ni leswaku xi vonile ku xaniseka ka vona, va korhamela hansi va xi gandzela.

Eksoda 4:31 Referans Kwoze

Eksoda 3:18

“Va ta yingisa rito ra wena; kutani u ta famba ni vakulukumba va Israele eka hosi ya Egipta, mi ku eka yona: ‘Yehovha, Xikwembu xa Vaheveru, u humelele eka hina; sweswi wanga hi pfumelela ku famba riendzo ra masiku manharhu emananga, hi ta gandzela Yehovha, Xikwembu xa hina hi magandzelo.’

Luka 8:13

Lava nga haxiwa emaribyeni, hi lava ingi loko va yingisile va amukela rito hi ku tsaka, kambe va pfumala timitsu, va pfumela hi nkarhi wun'wana ntsena; siku ra ndzingo, loko ri fika va tshika.

Eksoda 12:27

Mi ta ku eka vona: ‘I gandzelo ra Paseka ya Yehovha la nga hundza etindlwini ta vana va Israele eEgipta, loko a ba Egipta, a hlayisa tindlu ta hina.’ ” Kutani tiko ri korhama ri khinsama.

Eksoda 3:16

Famba, u ya hlengeleta vakulukumba va Israele, u ku eka vona: ‘Yehovha, Xikwembu xa vatata wa n'wina, Xikwembu xa Abrahama, ni xa Isaka, ni xa Yakobo, xi tikombisile eka mina,’ xi ku: ‘Ndzi mi kambile kunene; ndzi vonile leswi mi endliwaka swona eEgipta,’

Eksoda 2:25

kutani Xikwembu xi languta vana va Israele, xi va tiva.

Genesa 24:26

Kutani wanuna loyi a korhama a khinsama emahlweni ka Yehovha a ku:

1 TIKRONIKA 29:20

Davhida a ku eka nhlengeletano hinkwayo: “Dzunisani Yehovha, Xikwembu xa n'wina!” Kutani nhlengeletano hinkwayo yi dzunisa Yehovha, Xikwembu xa vatata wa vona, va korhama, va khinsama emahlweni ka Yehovha ni le mahlweni ka hosi.

Eksoda 3:7

Kutani Yehovha a ku: “Ndzi vonisisile ku xaniseka ka tiko ra mina eEgipta, ndzi yingisile ku rila ka vona hikwalaho ka lava va va xanisaka; hikuva ndzi tiva nhlomulo wa vona;

Luka 1:68

“A ku vongiwe Hosi, Xikwembu xa Israele, hikuva xi endzele tiko ra xona, xi ri kutsurile;

2 TIKRONIKA 20:18

Kavaloko Yoxafati a khinsama, a wa hi mombo, kutani va Yuda hinkwavo ni vaaki va Yerusalema, va wela emahlweni ka Yehovha, va khinsama emahlweni ka Yehovha.

Genesa 17:3

Kavaloko Abrama a wela emombyeni wa yena, kutani Xikwembu xi vulavula na yena, xi ku:

Genesa 29:32

Leya a tika nyimba, a veleka n'wana wa wanuna, a n'wi thya vito ra Rhuveni (vonani n'wana), hikuva a a ku: “Yehovha u vone ku soriwa ka mina, kambe sweswi nuna wa mina u ta ndzi rhandza.”

Genesa 50:24

Kutani Yosefa a ku eka vamakwavo: “Ndza fa; Xikwembu xi ta mi endzela kunene, xi ta mi humesa etikweni leri, xi mi yisa etikweni leri xi nga hlambanyela Abrahama, na Isaka, na Yakobo, leswaku xi ta va nyika rona.”

Eksoda 4:5

“U ta endlisa sweswo va ko va pfumela leswaku Xikwembu xa vatata wa vona, Xikwembu xa Abrahama, Xikwembu xa Isaka, Xikwembu xa Yakobo, xi tikombisile eka wena.”

Eksoda 14:31

Ku va kona Israele a vonaka matimba lamakulu ya Yehovha, lawa a ma kombiseke Vaegipta. Kutani tiko ri chava Yehovha; ri pfumela eka Yehovha ni le ka Muxe, nandza wa yena.

Eksoda 19:8

Kutani tiko hinkwaro ri hlamula swin'we ri ku: “Hinkwaswo leswi Yehovha a swi vuleke, hi ta swi endla.” Kutani Muxe a yisa marito hinkwawo ya tiko eka Yehovha.

Eksoda 19:9

Kavaloko Yehovha a ku eka Muxe: “Languta, ndzi ta ta eka wena epapeni lero tsindziyela, leswaku tiko ri switwa loko ndzi vulavula na wena ri va ri ku yingisela hi masiku.” Kutani Muxe a tshama a byela Yehovha marito ya tiko.

Eksoda 34:8

Kutani Muxe a hatlisa a khinsama ehansi, a ku:

Rhuti 1:6

Kutani a pfuka ni vingi va yena, a a sukela etikweni ra Mowabu, hikuva a a twile etikweni ra Mowabu leswaku Yehovha u endzele tiko ra yena, a ri nyike swakudya.

Nehemiya 8:6

Ezra a vonga Yehovha, Xikwembu lexikulu, kutani tiko hinkwaro ri hlamula, ri ku: “Amen! Amen!” va yimisile mavoko ehenhla, va korhama, va khinsama emahlweni ka Yehovha, va jovotela ehansi.

Sofoniya 2:7

Ri ta va tiko ra nsalo wa yindlu ya Yuda; va ta dyisela mitlhambi ya vona kona; nimadyambu, va etlela etindlwini ta Axikeloni; hikuva Yehovha, Xikwembu xa vona, u ta va endzela, a tlherisela vabohiwa va vona.

Eksoda 33:10

Vanhu hinkwavo, kakuloko va vone papa enyangweni ya yindlu va yima, va khinsama, un'wana ni un'wana enyangweni ya ntsonga wa yena.

2 TIKRONIKA 7:3

Kutani vana va Israele hinkwavo va vona ndzilo ni ku kwetsima ka Yehovha loko swi xika endlwini, kutani va korhama ehansi emaribyeni, va khinsama va dzunisa Yehovha, va ku: “Hikuva i wa vunene, hikuva tintswalo ta yena hi leti nga heriki.”

2 TIKRONIKA 32:8

Voko ra nyama ri na yena, kambe Yehovha, Xikwembu xa hina, u na hina ku hi pfuna ni ku lwa nyimpi ya hina.” Kutani tiko ri tiyisiwa hi marito ya Hezekiya, hosi ya Yuda.

Ntirho 1:20

Yobo a yima, a handzula tinguvu ta yena, a byewula nhloko, a tiwisa ehansi a khinsama, a ku: