Eksoda 32:31 - Xitsonga (Bibele)

³¹ Kwalaho Muxe a tlhelela eka Yehovha, a ku: “Yo! Tiko leri ri dyohile ngopfungopfu loko ri tiendlele xikwembu xa nsuku.

BIBELE Mahungu Lamanene

³¹ Kutani Muxe a tlhelela eka HOSI Xikwembu, a fika a ku: “Oho, vanhu lava va endlile xidyoho lexikulu ngopfu! Va tivumberile xikwembu xa nsuku!

Eksoda 32:31 Referans Kwoze

Eksoda 20:23

Mi nga tshuki mi tiendlela swikwembu swa silivhere, ni swa nsuku ehandle ka mina.

Daniele 9:11

Kutani Vaisraele hinkwavo va tlurile nawu wa wena, va hambukile leswaku va nga ti yingisa rito ra wena; kutani ku rhuketeriwa ni ku hlambanyiseriwa leswi tsariweke enawini wa Muxe, nandza wa Xikwembu, swi cheriwile ehenhla ka hina, hikuva hi xi dyoherile.

Daniele 9:8

Hosi, eka hina ku ve tingana ta mimombo, ni ka tihosi ta hina, ni ka tindhuna ta hina, ni ka vatata wa hina, hikuva hi ku dyohele.

Eksoda 32:30

Kuteloko byi xile, Muxe a ku eka tiko: “Mi dyohile hi ku dyoha a lokukulu. Kambe sweswi ndzi ta tlhandlukela eka Yehovha, kumbe ndzi ta kuma ku rivaleriwa ka ku dyoha ka n'wina.”

Daniele 9:5

Hi dyohile, hi endlile leswo homboloka: hi endle hi vuphukuphuku ni ku tiarisa, hi hambukile ku leriseni ka wena.

Nehemiya 9:33

Loko u ri wena, u endlile hi ku lulama etimhakeni hinkwato leti humeleleke, u endlile swinene, kambe hina hi endlile leswo biha.

Ezra 9:15

Oho Yehovha, Xikwembu xa Israele, u lulamile; hina, hi lo sala hi ri lava poneke kukotisa leswi voniwaka namuntlha. Hi hina kwala, hi yimeke emahlweni ka wena hi ri ni nandzu; hikuva hi nga ka hi nga hanyi emahlweni ka wena hikwalaho ka swona.”

Eksoda 34:28

Muxe a tshama na Yehovha hi masiku ya mune wa makume, ni vusiku bya mune wa makume, a nga dyi vuswa, a nga nwi mati; kutani Yehovha a tsala emaribyeni marito ya ntwanano, ma nge marito ya khume.

Eksoda 20:4

“U nga tshuki u tiendlela xifaniso lexi vatliweke, ni loko xi ri xifaniso xihi ni xihi xa swilo leswi nga ehenhla etilweni, ni loko xi ri xa swilo leswi nga ehansi emisaveni, ni loko xi ri xa swilo leswi nga ematini, ehansi ka misava;

Nehemiya 9:18

Kute ni siku va tiendleleke rhole leri chuluriweke va ku: ‘Hi xona Xikwembu xa hina lexi hi humeseke eEgipta,’ hambi va sandza swonghasi,