1 SAMIELE 3:19 - Xitsonga (Bibele)

¹⁹ Samiele a a kula, kutani Yehovha a a ri na yena; kambe a nga tshikanga rito rin'we ra marito hinkwawo ya yena ri wa ehansi.

BIBELE Mahungu Lamanene

¹⁹ Kutani Samiele a kula, HOSI Xikwembu xi ri na yena, xi nga tshiki marito ya xona ma wela hansi.

1 SAMIELE 3:19 Referans Kwoze

Genesa 39:2

Kutani Yehovha a va na Yosefa; a a ri munhu wa nkateko; a tshama endlwini ya n'wini wa yena.

1 SAMIELE 9:6

Kutani nandza a ku eka yena: “Waswivo, munhu wa Xikwembu u kona emutini lowu, kambe i munhu la dzuniwaka. Hinkwaswo leswi a swi vulaka swi humelela. Sweswi, a hi yeni kona, kumbe u ta hi tivisa ndlela leyi hi nga ta famba ha vona.”

1 TIHOSI 8:56

“A ku dzunisiwe Yehovha la nyikeke tiko ra yena ra Israele ku wisa, hilaha a vuleke hakona! A ku wanga ni rito rin'we ra marito hinkwawo layo saseka lawa a nga ma vula hi Muxe, nandza wa yena.

Luka 2:52

Loko a ri Yesu, a kula eku tlhariheni, ni le ku leheni, ni le tintswalweni, emahlweni ka Xikwembu ni vanhu.

2 Timotiya 4:22

Hosi Yesu Kriste a yi ve ni moya wa wena! Tintswalo a ti ve na n'wina!

1 SAMIELE 2:21

Kuteloko Yehovha a endzele Hana, a tika nyimba, kutani a veleka vana vavanuna vanharhu ni vanhwanyana vambirhi. Kambe wandzisanyana Samiele a a kulela emahlweni ka Yehovha.

2 Vakorinto 13:11

Eku heteleleni, vamakwerhu, ndzi ri: Titsakeleni, tilaveleni ku hetiseka, mi chavelelana; mi va ni ku anakanya kun'we; mi tshama hi ku rhula; kutani Xikwembu xa rirhandzu ni xa ku rhula xi ta va na n'wina.

Luka 2:40

Loko a ri n'wana, a kula, a tiya matimba emoyeni, a tala vutlhari; ni tintswalo ta Xikwembu ti tshama eka yena.

Luka 1:80

Kutani n'wana a kula, a tiya matimba emoyeni; kutani a tshama emananga ku ko ku fika siku leri a humeleke ha rona eka Israele.

Esaya 43:2

Loko u pela mati, ndzi ta va na wena, ni milambu yi nga ka yi nga ku nwerisi. Loko u famba endzilweni u nga ka u nga tshwi, ni langavi ri nga ka ri nga ku hisi.

1 SAMIELE 18:14

Davhida a a endla hi vutlhari etimhakeni hinkwato, kutani Yehovha a a ri na yena.

Matewu 1:23

“Maswivo, wanhwana u ta tika nyimba, u ta veleka n'wana wa wandzisanyana vito ra yena, u ta churiwa Emanuwele”; loko va hlamusela hileswaku: “Xikwembu xi na hina.”

Esaya 44:26

Kambe ndzi tiyisa rito ra nandza wa mina, ndzi hetisa makungu ya tintsumi ta mina; ndzi vula ehenhla ka Yerusalema, ndzi ku: ‘Vanhu va ta hanya kona,’ ni le henhla ka miti ya Yuda: ‘Yi ta akiwa kambe kutani ndzi ta pfuxa marhumbi ya yona.’

Genesa 21:22

Enkarhini wolowo, Abimeleke na Pikolo, ndhuna ya nyimpi ya yena, a vulavula na Abrahama a ku: “Xikwembu xi na wena eswilweni hinkwaswo leswi u swi endlaka.

Luka 1:28

Ntsumi, kuteloko yi fike eka yena, yi ku: “Avuxeni, mutsetseleriwa, Hosi yi na wena; u katekile exikarhi ka vavasati.”

Vaavanyisi 13:24

Kutani wansati a veleka wandzisanyana, a n'wi thya vito ra Samsoni; n'wana a kula, Yehovha a n'wi katekisa.

Genesa 28:15

Kutani waswivo, ndzi na wena, ndzi ta ku hlayisa hinkwako laha u yaka kona, ndzi va ndzi ku tlherisela etikweni leri; hikuva ndzi nga ka ndzi nga ku tshiki ndzi nga si endlisisa leswi ndzi ku byeleke swona.”

1 SAMIELE 12:2

sweswi hosi leyi nga ta famba emahlweni ka n'wina hi yoleyi; loko ndzi ri mina ndzi dyuhele, ndzi basile misisi, kutani vana va mina hi lava exikarhi ka n'wina. Loko ndzi ri mina, ndzi fambile emahlweni ka n'wina ku suka evutsongwaneni bya mina ku fika namuntlha.

1 SAMIELE 16:18

Un'wana wa malandza ya yena a hlamula, a ku: “Waswivo, ndzi vonile n'wana un'wana wa Yese wa Betlehema, la tivaka ku yimba haripa; i nhenha leyi hlomaka, wa vulavula swinene, u ni miri lowo saseka, kambe Xikwembu xi na yena.”

Genesa 39:3

Kutani n'wini wa yena a vona leswaku Yehovha a a ri na yena, ni leswaku hinkwaswo leswi a swi endlaka, Yehovha a a n'wi katekisela swona evokweni ra yena.

Duteronoma 18:22

Kungakuloko muprofeta a vulavula hi vito ra Yehovha, kutani mhaka leyi, loko yi nga humeleli, hi rona rito leri Yehovha a nga ri vulangiki; muprofeta u ri vurile hi ku tikukumuxa; u nga ka u nga n'wi chavi.

Yoxuwa 21:45

A ku wanga na rito rin'we ra marito hinkwawo yo saseka lawa Yehovha a ma byeleke yindlu ya Israele: hinkwaswo swi humelele.

1 SAMIELE 2:26

Loko a ri wandzisanyana Samiele, a kula, a tsakisa Yehovha ni vanhu.

1 SAMIELE 10:7

Kutakuloko swikombiso leswi swi ku humelela, u ta endla leswi nga ta va emahlweni ka wena, hikuva Xikwembu xi na wena.

1 SAMIELE 18:5

Kutani Davhida a huma a famba hinkwako laha Sawulo a n'wi rhumaka kona; kambe a a tlharihile; kutani Sawulo a n'wi veka ndhuna ya vanhu va nyimpi; kutani a a tsakisa tiko hinkwaro, hambi ma ri malandza ya Sawulo.

1 SAMIELE 18:12

Kutani Sawulo a chava Davhida, hikuva Yehovha a a ri na Davhida, kambe a sukile eka yena.

2 TIHOSI 10:10

Tivisisani leswaku a ku na rito rin'we ra marito ya Yehovha lawa a nga ma vula ehenhla ka yindlu ya Akabu, leri nga ta wa ehansi; Yehovha u endlile hinkwaswo leswi a nga swi vula hi nandza wa yena Eliya.”

2 TIHOSI 15:12

Hi rona rito ra Yehovha leri a ri byeleke Yehu loko a ku: “Vana va wena va ta tshama exiluvelweni xa Israele, ku fika erixakeni ra vumune”; swi va tano.

2 TIHOSI 22:16

Ndzi ta tisa khombo endhawini leyi ni le henhla ka vaaki va yona, hi marito hinkwawo ya buku leyi hosi ya Yuda yi yi hlayeke.

Esaya 55:11

swi tano ni rito ra mina, le ri humaka enon'wini wa mina: Ri nga ka ri nga tlheleri eka mina ri nga si tirha nchumu, ri nga si endla ku rhandza ka mina, ri nga si hetisa makungu ya mina.