Yoshua 18:16 - MUKANDA WA MYIDI MUKULU

¹⁶ Umuka muaba awu, udi upueka kuinshi kua mukuna udi utangila tshibandabanda tshia Inome, tshidi ku mutu kua tshibandabanda tshia bena Refayime. Pashishe mukalu awu uvua ulonda tshibandabanda tshia Inome, upueka kuinshi kua kakuna ka bena Yebusa, utungunuka upueka amu kupueka too ne ku Ene-Rogele.

Mukanda wa Nzambi Dihungila Dikulukulu ne Dihungila Dihia-dihia 2003

¹⁶ mukalu wakahueka tô ne kunfudilu kua mukuna udi ku mpala kua tshibanda tshia muana mulume wa Hinoma, mu tshibanda tshia Bena Lefa ku nôde; wakahueka ku tshibanda tshia Hinoma ku luseke lua Bena Yebuse ku Sude, wakahueka kabidi tô ne ku Ene-logela;

Yoshua 18:16 Referans Kwoze

2 Bakalenga 23:10

Yoshiya kunyangakaja tshioshelu tshivua ku Tofete, mu tshibandabanda tshia Inome, bua bantu kabayi kuoshilapu kabidi bana babu ba balume, nansha ba bakaji bua kulambula mulambu ku mvidie Moleke.

Yeshaya 30:33

Mbamane kulongolola tshioshelu kale. Mbalongolole muaba udibu ne bua kuoshela mukalenga wa bena Ashure. Tshioshelu etshi tshidi tshinene, kabidi tshile. Bavua belamu nkunyi ya bungi. Nanku, Mueyelu wa Maweja-Nangila udi utemeshamu kapia. Nkunyi eyi idi bu kapia ka mu tshingoma kadi katema.

Yirmeya 32:35

Bavua bateka mu tshibanda tshia Inome miaba ya kutendelela mvidie Baale, bua kulambulamu mvidie Moleke bana ba balume ne ba bakaji. Meme tshivua mubalombe bua benza nanku to. Tshivua nansha muele meji ku bualu bua nanku to. Kadi pa kuenza malu mabi aa, bavua basaka bena Yuda bua benze pabu malu andi mubenge.

Yirmeya 19:11

Neubambile ne: “Maweja-Nangila wa bukole buonsu udi wamba ne: nenshipe bantu aba ne tshimenga etshi, amu mudibu bashipa mulondu wa diima, kabayi mua kuufimba kabidi.” “Nebajike bantu mu Tofete, bualu kakuena muaba mukuabu wa bafue to.

Yirmeya 19:6

“Ke pandi ngamba ne: Dituku nedifike didibu kabayi binyika kabidi muaba ewu ne: ‘Tofete,’ nansha ne: ‘Tshibanda tshia Inome.’ Kadi nebawinyike ne: ‘Tshibanda tshia kushipela bantu.’

Yirmeya 19:2

Upatukile nabu bua kuya mu tshibanda tshia Inome, upitshile ku tshiibi tshia Ngesu mifue. Nenkumanyishe bualu buudi ne bua kubambila muaba awu.

2 Kulondolola 33:6

Uvua mulambule ne bana bende ba balume bu mulambu mu tshibandabanda tshia Inome. Uvua wenza majimbu a mishindu mishilangane, ubuka lubuku lua muzangu. Nanku, Menashe uvua wenza amu kuenza malu adi Maweja-Nangila mubenge, umufikisha munda.

2 Kulondolola 28:3

Uvua ulambula milambu ya manananshi mu tshibandabanda tshia Inome. Uvua mulambule bana bende ba balume bu mulambu, bilondeshile bilele bibi bia bisamba bivua Maweja-Nangila muipate bua kushila bena Izrayele ditunga.

1 Kulondolola 14:9

Bena Peleshete kufika mu tshibandabanda tshia bena Refayime, kubanga kutshinyangakaja.

1 Bakalenga 1:9

Dituku dikuabu, Adoniya kulongolola tshibilu tshinene ku “Dibue-dia-busenu,” divua pabuipi ne mpokolu wa Enrojele. Muaba awu, kulambulabu mikoku, ngombe milume, ne nyama mikuabu ya manyi. Adoniya uvua mubikidishe bana babu, bana ba mukalenga Davide, ku tshibilu atshi. Uvua mubikidishe kabidi bantu babanji bonsu ba mu buloba bua bena Yuda, bavua benzela mukalenga Davide mudimu.

2 Samuele 17:17

Yonatane, muana wa Abiyatare, ne Akimase, muana wa Sadoke, bavua basombela pabuipi ne mpokolu wa Enrojele. Ke batuangaji abu kubatumina mukaji muena mudimu bua kubamanyisha malu avuabu mua kuya kuambila mukalenga Davide. Bualu Yonatane ne Akimase kabawa mua kubuela mu Yerushalayime to, bua kabamanyi kudi bantu.

Balombodi 19:10

Kadi muena Levi kena muitabe bua kulala kabidi to. Kumataye mu njila ne mukajende, ne nyama ya mpunde ibidi, mimane kusuika biseba bua kusomba. Kufikabu ku Yebusa, mmumue ne ku Yerushalayime.

Balombodi 1:21

Ndelanganyi ya Binyamine kupangila mua kuipata bena Yebusa bavua basomba mu tshimenga tshia Yerushalayime. Nanku bena Yebusa ne bena Binyamine badi basomba pamue mu Yerushalayime too ne ku mpindiewu.

Balombodi 1:8

Bena Yuda kuluisha tshimenga tshia Yerushalayime, kutshikuata. Kushipabu bantu, kuosha ne tshimenga.

Yoshua 18:28

Sela, Elefe, tshimenga tshia bena Yebusa, mmumue ne: Yerushalayime, Ngibeya ne Kiriyate. Bimenga bionsu bivua dikumi ne binayi, tusangishe ne misoku ivua mutumba. Ke buloba bua bena Binyamine bilondeshile muvua meku abu.

Yoshua 15:63

Ndelanganyi ya Yuda kayiwa mua kuipata bena Yebusa bavua base mu Yerushalayime. Nanku too ne ku lelu bena Yebusa badi basomba mu Yerushalayime muaba umue ne bena Yuda.

2 Samuele 5:18

Bena Peleshete kufika mu tshibandabanda tshia mu Refayime.