Yirmeya 10:3 - MUKANDA WA MYIDI MUKULU

³ Ditendelela dia bantu ba bisamba bikuabu didi anu lupepele, kadiena ne mushinga to. Badi bakosa mutshi mu ditu, muntu usonga nawu lupingu.

Mukanda wa Nzambi Dihungila Dikulukulu ne Dihungila Dihia-dihia 2003

³ bualu bua bilele bia kutendelela kua bantu aba bidi hatuhu. Bidi bu mutshi udi muntu utaha muitu, udi mudimu wa muena tshisui udiye wenza ne bianza biandi.

Yirmeya 10:3 Referans Kwoze

Lewitiki 18:30

“Nenku Meme Maweja-Nangila Mvidi Mukulu wenu, ndi ngamba ne: ‘Nutumikile mikenji yanyi, anu bu mundi munupayi. Kanuenji malu mabi, avuabu benza kudi bantu bavua badianjile kuasa mu ditunga edi. Nudilame bua kanupi mikiya.’ ”

1 Petro 1:18

Nudi bamanye muvuabu banupikule ku nsombelu wa patupu, uvua bankambua benu banushile. Ki mbanupikule ku bintu bia lupitapita, bu mudi tshiamu tshia mpawungi, nansha tshiamu tshitoke tshia mushinga mukole.

Rome 1:21

Bualu badi bamanye Mvidi Mukulu, kadi kabena bamunemeka. Kabena bamuela tuasakidila mudibu ne bua kuela Mvidi Mukulu nansha. Kadi meji abu adi matatakana. Mioyi yabu ya bupote idi miwule tente ne miidima.

Yirmeya 10:8

Bantu bonsu badi anu bidingidingi. Tshidi mvidie ya mitshi mua kubalongesha ntshinyi?

Matayi 6:7

— Panudi nutendelela, kanuambi meyi mapite bungi, bu mudibu benza kudi bantu ba bisamba bikuabu. Badi bela meji ne: bua Mvidi Mukulu atuteleje, anu tuetu bambe meyi mavule.

Yeshaya 45:20

Nuenu bena matunga makuabu, bavuabu kabayi bashipe, semenayi, nudisangishe, nusemene popamue. Bonsu bavua bafike ne mpingu yabu ya mitshi, nansha badi batendelela mvidie udi kayi mua kubasungidila, kabena ne lungenyi to.

Yirmeya 2:5

Maweja-Nangila udi unukonka ne: Bankambua benu bavua bammone ne bualu bubi kaayi? Bakandekela bua tshinyi? Bakambenga amu bua kutendelela mvidie ya tshianana. Nanku bobu kabidi badi bantu ba tshianana!

Bienzedi 19:26

Kadi nudi bamone, badiumvuile kabidi tshidi muntu ewu Polu wenza. Udi ujadika ne: nwidie idi bantu benza ki mmvidie menemene to. Ukadi muitabijije bantu ba bungi, ki amu munu mu Efeze, kadi ne miaba kana yonsu ya mu Aziya.

Misambu 115:4

Kadi mvidie yabu mmienza ne tshiamu tshitoke tshia mushinga mukole nansha ne mpawungi. Idi bintu bienza kudi bantu.

Yirmeya 1:16

Nennyoke bena ditunga nanku, bilondeshile mushindu undi mukose tshilumbu tshiabu, bua malu mabi onsu adibu benze. Bantu aba bavua bambenge meme, baye kulambula milambu kudi mvidie mikuabu. Bavua batendelele mvidie, mvidie ivuabu badienzele!

Yirmeya 14:22

Ku mvidie yonsu ya patupu ya pa buloba, udi mua kulokesha mvula mvidie kaayi? Tshibuashibuashi nkayatshi katshiena mua kulokesha mvula, kadi amu wewe Maweja-Nangila. Mvidi Mukulu wetu, tudi bakutekemena, bualu amu wewe ngudi wenza malu onsu.

Yirmeya 16:19

— Maweja-Nangila, wewe udi umpesha bukole. Wewe udi undama. Mu tshikondu tshia dikenga, ndi mua kunyemena kuudi. Bantu ba bisamba bikuabu nebafike kuudi wewe, bafuma ku nshikidilu wa buloba. Diba adi nebambe ne: “Bankambua betu bavua anu ne mvidie ya dishima. Mvidie yabu ivua anu lupepele, kayivua mua kuambuluisha muntu nansha umue.