Genese 37:8 - MUKANDA WA MYIDI MUKULU

⁸ Bakulu bende kumukonka ne: — Udi musue kushala mukalenga wetu, ututumina diyi anyi? Ke kupitabu kumufikila munda bikole bua tshilota atshi ne bua bivuaye wamba abi.

Mukanda wa Nzambi Dihungila Dikulukulu ne Dihungila Dihia-dihia 2003

⁸ Bana babo bakamuambila ne, Wewe newikale mukelenge wetu, anyi? Neutukokeshe, anyi? Bakatamba kuikala nʼandi lukuna bualu bua bilota biandi ne bua mei andi.

Genese 37:8 Referans Kwoze

Bienzedi 7:35

Bena Izrayele bavua babenga Moshe, bamuamba ne: “Udi mukuteke mfumu ne mukoshi wa nsambu yetu nnganyi?” Kadi yeye Moshe, ke muntu uvua Mvidi Mukulu mutume, bua alombole bantu bende, abapikule ku diambuluisha dia mutumibue wende, uvua mumumuenekele mu tshipuka.

1 Samuele 10:27

Kadi kuvua kabidi bantu bena buenzayi, bavua bamba ne: “Muntu ewu udi mua kutusungidila mushindu kaayi?” Nanku bantu abu bavua bapepeja Shawule. Kabawa balambula milambu. Kadi Shawule kulengulula bionsu abi.

Ebrewu 10:29

Nenku muntu udi upetula Muana wa Mvidi Mukulu, umona mashi a ndondu wa Mvidi Mukulu a wabu bamukobolola nawu bu tshintu tshia tshianana, upenda Mueyelu wa Mvidi Mukulu udi mutunange, nebamuenzele tshinyi? Nudi mua kujadika ne: badi ne bua kumunyoka bikole bipite!

Luke 20:17

Kadi Yezu ubatangila, kubakonkaye ne: — Mu Mikanda ya tshijila mbafunde ne: “Dibue divua bibaki balekela, dikadi dibue didi dishindika nzubu. Miaku eyi idi inumvuija tshinyi?

Luke 19:14

Kadi bena ditunga diabu bavua bamukina. Ke kutumabu bantu kuvuaye uya ne mukenji ne: “Katuena basue bua muntu ewu ikale mukalenga wetu to.”

Misambu 118:22

Dibue divua bibaki ba nzubu bimanshe, ndishale mpindiewu mutu wa ditumba.

1 Samuele 17:28

Kadi, Eliyabe muanabute, mukulu wa Davide, kumvua muvua Davide wakula ne bena mvita, kufikaye munda, ukonka Davide ne: — Udi mufike kuneku bua tshinyi? Mikoku yebe ayi udi mushile nganyi mu thipela? Ndi mukumanye bimpe. Udi kana ka tshianana, kena lutambishi. Uvua mufike kuneku amu bua kumona mvita!

Ekesode 2:14

Awu kuandamuna Moshe ne: — Nganyi udi mukuteke bua kutubela ne kutulumbuluisha? Udi musue kunshipa bu muuvua mushipe muena Ejipitu anyi? Moshe kumvua buowa, kudiambila ne: “Bualu ebu bakadi babumanye!”

Genese 49:26

Tatuebe udi ukuela lupemba, lupite ne luvua baledi banyi bangele meme. Neupete bintu bimpe, bidi pa mikuna ya kale. Lupemba lua kudi tatuende lupueke mu mutu mua Yozefe, bualu Yozefe udi mfumu wa bana babu.

Genese 37:4

Bana babu bamone muvua tatuabu mutambe kunanga Yozefe, kujilabu muanabu, kabayi mua kuyukila nende kakuyi matandu.

Genese 27:41

Esawu kufika munda bikole bua lupemba luvua Yakobe mumunyenge. Kuambaye ne: “Tatu mumane kufua, tuetu batangalaje madilu ende, nenshipe muakunyanyi Yakobe.”

Genese 37:9

Yozefe kulota tshilota tshikuabu, kutshiawila bana babu, ubambila ne: — Mvua mulote: diba, ngondu ne mitotu dikumi ne umue bilua kunkukuila.

Genese 42:10

Ke bobu kumuandamuna ne: — Kabiena nanku to, Mukalenga. Tuetu tudi bafike munemu anu bua kusumba biakudia.

Genese 44:18

Yuda kusemena pabuipi ne Yozefe, kumuambila ne: — Mukalenga, ndi musue kukuambila bualu. Kumfikidi munda to. Wewe udi mulongu umue ne mukalenga wa bena Ejipitu.

Genese 50:18

Bana babu ne Yozefe kuya kudiela panshi ku makasa ende, bamuambila ne: — Tudi bapika bebe.

Dielulula 33:16

Bubanji buonsu bua mu ditunga dimpe edi, diakalenga dia Mvidi Mukulu udi mu tshipuka, bipueke pa tshisamba tshia Yozefe, udi Mvidi Mukulu musungule mfumu wa bana babu.

1 Samuele 18:8

Shawule uvua ne tshiji tshikole, mufike munda bua musambu awu. Uvua udiambila munda ne: “Badi batumbisha Davide ne: mmushipe bantu binunu makumi ne makumi, meme bantumbisha anu bua tshinunu.