2 Bakalenga 3:18 - MUKANDA WA MYIDI MUKULU

¹⁸ Kadi, bualu ebu mbualu bukese kudi Maweja-Nangila. Yeye neafile kabidi ditunga dia bena Mowabe mu bianza bienu.

Mukanda wa Nzambi Dihungila Dikulukulu ne Dihungila Dihia-dihia 2003

¹⁸ Kadi bualu ebu budi anu bualu bukese ku mesu kua Yehowa; yeye neafile Bena Moaba mu bianza bienu kabidi.

2 Bakalenga 3:18 Referans Kwoze

Luke 1:37

Bualu kakuena tshidi mua kukolela Mvidi Mukulu.

Yirmeya 32:27

— Meme Maweja-Nangila Mvidi Mukulu wa bantu bonsu badi pa buloba, ndi mua kuenza bionsu bindi musue.

Yirmeya 32:17

— Eyi, Maweja-Nangila Mvidi Mukulu, uvua muleje bukole buebe ne meji ebe, pauvua mufuke diulu ne buloba. Wewe udi mua kuenza bionsu biudi musue.

2 Bakalenga 20:10

Izkiya kuandamuna ne: — Bua mundidimbi kuya kumpala pa bidiatshilu dikumi, mbualu bukese. Nanku, ndi musue bua upingane panyima.

Efeze 3:20

Mvidi Mukulu udi ne bukole bua kuenza bipite ne bitudi tulomba, nansha ne bitudi tuelela meji. Bualu, bukole budiye ukuata nabu mudimu munda muetu mbupite.

Marke 10:27

Yezu kubatangila, kubambila ne: — Bantu kabena mua kubuenza nansha, kadi Mvidi Mukulu udi wenza. Bualu ku bionsu kakuena tshidi mua kukolela Mvidi Mukulu nansha.

Yeshaya 49:6

Yeye kungambila ne: “Kabiena bikumbana bua wikale muena mudimu wanyi anu bua kujula tshisamba tshia Yakobe, ne bua kupingaja kundi bena Izrayele badi bashale ne muoyi. Kadi ndi mukuteke kabidi butoke bua bukua bisamba, bua umone mua kupandisha bantu too ne ku ntengu ya buloba.”

Yezekiyele 8:17

Mvidi Mukulu kunkonka ne: — Yezekiyele, udi mumone bionsu ebi anyi? Kadi bena Yuda kabena benza bibi bindi mubenge amu muaba ewu to. Badi bakengesha bantu nabu mu ditunga dijima. Tangila mudibu bampenda muabu muonsu. Badi badiela tshisosa nkayabu mu diulu.

1 Bakalenga 20:13

Ke muambi kampande kuya kudi Akabe, mukalenga wa bena Izrayele, umuambila ne: — Maweja-Nangila udi wamba ne: “Udi mumone musumba munene wa bena mvita! Ndi mbafila mu bianza biebe anu lelu, bua wewe kumanya ne: meme ndi Maweja-Nangila.”

1 Bakalenga 3:13

Ndi musue kukupa kabidi bubanji ne butumbi, biudi kuyi mulombe to. Matuku onsu autshidi ne muoyi, newikale ne butumbi, mupite bakalenga bonsu.

Yeshaya 7:13

Nanku Yeshaya kumuamba ne: — Wewe Akaze ne bena diku diebe, ndelanganyi ya Davide, ntelejayi. Nudi nusuya bantu bikole, nudi basue kusuya kabidi ne Mvidi Mukulu wanyi anyi?

1 Bakalenga 20:28

Muambi wa Mvidi Mukulu kuya kabidi kudi Akabe, mukalenga wabena Izrayele, umuambila ne: — Maweja-Nangila udi wamba ne: “Bu mudi bena Siriya bamba ne: meme Maweja-Nangila ndi anu Mvidi Mukulu wa ku mikuna, tshiena wa mu mpata, ndi mfila bena mvita babu bonsu mu bianza biebe, bua wewe kumanya ne: meme ndi Maweja-Nangila.”

1 Bakalenga 16:31

Kawa muenze anu malu mabi bu avua Yerobowame, muana wa Nebate muenze to. Uvua musele kabidi Yezabele, muana wa Etbale, mukalenga wa bena Sidone. Uvua uyakukukuila kabidi mvidie Baale, umutendelela.

2 Samuele 7:19

Kadi wewe Maweja-Nangila, udi mumone ne: bionsu biudi mutuenzele kabiena bianji kukumbana. Nanku, utshidi anu ulaya bena nzubu wanyi, bua kubenzela bimpe. Kabidi udi ummanyisha bionsu ebi, meme muntu patupu.

1 Bakalenga 20:21

Ke muvua mukalenga wa bena Izrayele muluishe Benadade. Uvua mubutule nyama ya tubalu yonsu, munyangakaje matempu a mvita onsu, mushipe bena mvita ba bena Siriya bapite bungi.