1 Bakalenga 8:36 - MUKANDA WA MYIDI MUKULU

³⁶ wewe Maweja-Nangila, mu diulu, wikale muteleje. Ubajimijile mibi yabu, bualu bena Izrayele mbantu bebe, kabidi mbena mudimu bebe. Ubalongeshe mua kukutumikila bimpe. Pashishe, ulokeshe mvula pa buloba buebe ebu, bualu uvua mumane kubupesha bena Izrayele.

Mukanda wa Nzambi Dihungila Dikulukulu ne Dihungila Dihia-dihia 2003

³⁶ ubunvuile mu diulu, ubuikidile bantu bebe, Bena Isalele, mibi yabo hawabalesha nshila muimpe udibo ne bualu bua kuendela; nunku umatshishe nvula ha buloba buebe buwakuha bantu bebe bu buhianyi buabo.

1 Bakalenga 8:36 Referans Kwoze

Misambu 27:11

Maweja-Nangila, undeje njila udi muakane, ungendeshe mu njila udi kayi njiwu, bualu baluishi banyi mbavule.

1 Samuele 12:23

Meme Samuwele, tshiena musue kuenzela Maweja-Nangila bibi to. Misangu yonsu nengikale ndomba Maweja-Nangila bualu buenu. Ndi anu nnuleja njila muimpe, mululame.

Yirmeya 6:16

Maweja-Nangila udi wamba ne: Anji imanayi mu njila. Nuele meji a bivua binuenzekele kale. Nukonke bankambua benu. Nanku nusungule njila muimpe. Nulonde njila awu bua nupete dikisha. Kadi kubengabu bamba ne: “Katuena tulonda njila muimpe to.”

Yirmeya 14:22

Ku mvidie yonsu ya patupu ya pa buloba, udi mua kulokesha mvula mvidie kaayi? Tshibuashibuashi nkayatshi katshiena mua kulokesha mvula, kadi amu wewe Maweja-Nangila. Mvidi Mukulu wetu, tudi bakutekemena, bualu amu wewe ngudi wenza malu onsu.

Misambu 94:12

Maweja-Nangila, muntu uudi ubela, ne uudi ulongesha ne mikenji yebe, udi ne disanka!

1 Bakalenga 18:45

Tshitupa tshikese, diulu kufika ne mavuba avua alua ne lupepela. Mvula mukole kutuadija kuloka. Ke mukalenga Akabe pa ditempu diende dia mvita, kupingana mu tshimenga tshia Yizreyele.

1 Bakalenga 18:1

Matuku a bungi mamane kupita, munkatshi mua tshidimu tshisatu tshia munanga, Maweja-Nangila kuambila muambi Eliya ne: — Uye kudi mukalenga Akabe, umuambila ne: Meme Maweja-Nangila nendokeshe mvula pa buloba buvua bumisha kudi munanga.

Matayi 22:16

Kutumabu balongi babu bakuabu, ne bamue ba bena Erode, bua kuambila Yezu ne: — Mulongeshi, tudi bamanye ne: wewe udi wamba malu malelela. Udi ulongesha amu patoke tshidi Mvidi Mukulu musue bua muntu enze. Kuena utshina bidi bantu bela meji, bualu kuena ukakala muntu. Kuena utshina buneme bua muntu.

Mika 4:2

Bisamba bia bungi bia bantu nebiyemu. Nebambilangane ne: “Tuyayi ku mukuna wa Maweja-Nangila, tubuelayi mu nzubu wa Mvidi Mukulu wa Yakobe. Yeye neatulongeshe tshitudi ne bua kuenza, tuetu netulonde njila udiye utuleja. Bualu dilongesha dia Maweja-Nangila didi difuma mu Siyone, bidiye wamba bidi bipatuka mu Yerushalayime.

Yirmeya 42:3

Ulombe Maweja-Nangila Mvidi Mukulu webe, atumanyishe muaba utudi mua kuya, ne tshitudi mua kuenza.

Yeshaya 35:8

Koku aku, nekuikale njila. Nebamuinyike ne: “Njila wa tshijila”. Muntu mupie mikiya kakupitshilaku to. Mutendeledi wa mvidie kakuendakanamu to. Njila awu neikale mutekela bantu ba Maweja-Nangila, patuadijabu luendu luabu.

Yeshaya 30:21

Panuakeba kuya, ku dia balume nansha ku dia bakaji, nenumvue miaku eyi ifumina kunyima kuenu, yamba ne: “Ke njila unudi ne bua kulonda ewu.”

Misambu 143:8

Ummanyishe bulenga buebe ne dinda dionsu, bualu ndi mutekemene kuudi; ummanyishe njila wa meme kulonda, bualu ndi mutume muoyi wanyi kuudi.

Misambu 119:33

Maweja-Nangila, undeje njila wa meme kulonda, nemmulonde too ne ku ndekelu.

Misambu 86:11

Maweja-Nangila, undeje njila undi mua kulonda, ndi musue kuenda mukulamate, nsumpakana amu bua bualu bumue: kukutumikila wewe.

Misambu 68:9

buloba kuzakala, mvula kuloka bikole, bionsu bikutshina wewe, Mvidi Mukulu wa Sinayi, bitshina Mvidi Mukulu wa Izrayele.

Misambu 32:8

Maweja-Nangila udi wamba ne: — Nenkulongeshe, nkuleja njila wa kulonda. Nenutangile miaba yonsu iudi uya, nkubela ne:

Misambu 25:12

Maweja-Nangila nealeje muntu udi umunemeka, njila udiye ne bua kusungula.

Misambu 25:8

Maweja-Nangila mmuena bulenga ne buakane, udi uleja bena tshibawu njila wa kulonda.

Misambu 5:8

Kadi bu muudi munnange bikole, ndi mua kubuela mu nzubu muebe, kukukukuila mu muaba webe wa tshijila.

1 Bakalenga 18:41

Ke muambi Eliya kuambila Akabe ne: — Uye, udie, unue, bualu ndi mumvue mvula ukungula.

Misambu 119:133

Mukenji webe umpeshe bukole buonsu, bualu bubi nansha bumue kabuntshimunyi.

Misambu 68:10

Wewe kulokesha mvula wa bungi, buloba buume kutota.

Yowele 2:23

Nuenu badi basomba mu Siyone, sankayi bualu bua Maweja-Nangila Mvidi Mukulu wenu, udi unulokeshila mvula mbedi unuvua nukengela, unulokeshila mvula ya bungi pa bikondu biayi, muvuaye munuenzele kale.