2 Samuele 22:3 - Mukanda wa Nzambi Dihungila Dikulukulu ne Dihungila Dihia-dihia 2003

³ Nzambi, dibue dianyi, nengeyemene kudiye, ngabu wanyi, ne lusengu lua luhandu luanyi, tshibumba tshianyi tshile ne tshinyemenu tshianyi, musungidi wanyi, udi usungila ku malu makole onso.

MUKANDA WA MYIDI MUKULU

³ Mvidi Mukulu wanyi udi lubuebue luanyi, muaba undi musokome tshiyi mua kupeta njiwu. Udi ngabu udi mundame, muaba mukole undi nyemena bua kupanda. Ndi nkeba mua kusokoma pabuipi nende, bua ansungidile ku malu makole onsu.

2 Samuele 22:3 Referans Kwoze

Misambu 9:9

Nunku Yehowa neikale tshibumba tshile kudi bantu badi bakengeshibua. Neikale tshibumba tshile kudi bantu mu tshikondo tshia ntatu.

Yeshaya 12:2

Mona, Nzambi udi luhandu luanyi; nemmueyemene, ne tshiena ntshina nansha; bualu bua Yehowa, Yehowa mene, udi bukole buanyi ne musambu wanyi, ne yeye wakulua luhandu luanyi.

Nsumuinu 18:10

Dina dia Yehowa didi tshibumba tshikole; mundi muakane udi unyemenaku, udi uhanduka.

Nsumuinu 30:5

Di dionso dia Nzambi diakutetshibua ne, Didi dia bushuwa; yeye udi ngabu kudi badi banyemena kudiye.

Misambu 46:11

Yehowa wa misumba udi nʼetu; Nzambi wa Yakoba udi tshinyemenu tshietu.

Misambu 18:2

Yehowa udi dibue dianyi, musoko wanyi wa ngumbu ya nvita, ne musungidi wanyi. Udi Nzambi wanyi, dibue dianyi mundi nnyemenamu. Udi ngabu wanyi, ne lusengu lua luhandu luanyi, tshibumba tshianyi tshile.

Dielulula 33:29

Bena Isalele, nuenu nudi ne disanka, banganyi badi bu nuenu basungidibue kudi Yehowa! Yeye udi bu ngabu wa dikuatshisha dienu; udi bu muele wa nvita unudi nutamba nʼau bakuabo! Bantu badi nʼenu lukuna nebanukokele, nuenu nenudiate mikuna yabo mu makasa enu.

Genese 15:1

Hakashika malu a, dî dia Yehowa diakalua kudi Abalama mu tshilota ne, Abalama kutshinyi, meme ndi ngabu webe ne difutu diebe ditambe bunene.

Ebrewu 2:13

Ne udi wamba kabidi ne, Meme nengikale mu eyemena. Ne udi wamba kabidi ne, Ke meme eu ne bana bakumpabo kudi Nzambi.

Luke 1:69

Yeye wakutubishila lusengu lua luhandu Mu tshiota tshia muanʼandi Davidi,

Misambu 144:2

Yeye udi mundeshi wa luse lujalame, ne musoko wanyi mukoleahibue ne ngumbu, udi tshibumba tshianyi tshile, ne muhandishi wanyi. Udi ngabu wanyi ne ndi mpeta tshinyemenu kudiye. Yeye udi ukokesha bantu banyi ku nyima kuanyi.

Misambu 59:16

Kadi meme hanyi nengimbe bua bukole buebe, nengimbe ne dî dikole mu dinda bualu bua luse luebe lujalame. Bualu bua wewe wakumana kuikala tshibumba tshianyi tshile ne tshinyemenu mu dituku dia dikenga dianyi.

Misambu 14:6

Nuenu nudi basue kufuisha malu akudihangidishila muhele bundu, kadi Yehowa udi tshinyemenu tshiandi.

Yirmeya 16:19

Wewe Yehowa, bukole buanyi ne musoko wanyi mukoleshibue ne ngumbu, tshinyemenu tshianyi mu dituku dia dikenga, ba mu bisamba bia bantu nebalue kûdi, bafume kunfudilu kua buloba, bamba ne, Batatu betu bakahiana anu mashimi ne malu a hatuhu adi kâyi mua kubakuatshisha.

Yeshaya 32:2

Muntu neikale bu tshisokomenu ku tshihehele, ne tshinyemenu tshia ku tshihuhu, neikale bu misulu ya mai mu muaba mûme, bu dileshi dia dibue dinene mu buloba budi butondesha bantu.

Misambu 140:4

Yehowa, undame ku bianza bia bantu babi, undame kudi bena tshimbambila, bakuhangidisha bua kuselemusha makasa anyi.

Misambu 55:9

Mukelenge, ubutule malu adibo bahangidisha, uhandulule ndimi yabo, bualu bua ndi mmona tshimbambila ne ditandangana mu musoko.

Misambu 46:7

Yehowa wa misumba udi nʼetu; Nzambi wa Yakoba udi tshinyemenu tshietu.

Luke 1:71

Luhandu luakutuhandisheye kudi badi nʼetu lukuna ne mu bianza bia bonso badi batukina.

Misambu 140:11

Muena mukoso kajadikibu mu buloba; dikenga dibi dikebe muena tshimbambila bua kumubutula.

Misambu 140:1

Yehowa, umpandishe mu bianza bia bantu babi; undame kudi bena tshimbambila.

Misambu 86:14

Nzambi, badi badisue bakujuka bua kuntantamena, tshisumbu tshia bena tshimbambila tshiakukeba muoyo wanyi, kabakukuteka wewe ku mpala kuabo.

Misambu 84:11

Bualu bua Yehowa Nzambi udi diba ne ngabu; Yehowa udi uha bantu luse ne butumbi. Kena uhala badi benda mu buakane tshintu tshimpe tshimue.

Misambu 84:9

Mona, wewe Nzambi, ngabu wetu, utangile mpala wa muntu webe udi muedibue manyi ha mutu!

Misambu 72:14

Neuhikule mioyo yabo ku tshinyangu ne malu makole, ne mashi abo neikale tshintu tshia mushinga mukole ku mesu kuandi.

Misambu 71:7

Ndi bu muntu udi ukemesha ba bungi; kadi wewe udi tshinyemenu tshianyi tshikole.

Misambu 61:3

bualu bua wewe udi tshinyemenu tshianyi, udi tshibunda tshikole ku mpala kua badi nʼanyi lukuna.

Misambu 46:1

Nzambi udi tshinyemenu tshietu ne bukole buetu, udi dikuatshisha dietu mu makenga didi kadiyi dihanga tshiendelele.

Misambu 28:7

Yehowa udi bukole buanyi ne ngabu wanyi; mutshima wanyi wakumueyemena, ndi mukuatshishibue. Nunku mutshima wanyi udi utamba kusanka, nemmutumbishe ne musambu wanyi.

Misambu 27:5

Bualu bua halua dituku dia diakabi, yeye neansokoke mu tshisokomenu tshiandi; yeye neansokoke munda mua nsubu wandi wa ntenta, neambandishe, neanshikike ha mutu ha dibue.

Misambu 5:12

Bualu bua wewe, Yehowa, udi uvudishila muntu muakane disanka; udi amunyunguluka ne diakalengele bu mudibo benza ne ngabu.

Misambu 3:3

Kadi wewe, Yehowa, udi ngabu udi undama nseke yonso, wewe mbutumbi buanyi ne mujudi wa mutu wanyi.

2 Samuele 22:51

Yeye udi uhesha mukelenge wandi luhandu lunene, yeye udi ulesha wakeleye manyi ha mutu luse lujalame, kudi Davidi ne kudi tunkanuniuna tuandi tshiendelele.

2 Samuele 22:49

udi ungumusha kudi badi nʼanyi lukuna; e, udi umbandisha ku mutu kua bantu bakajuka bua kunduisha, wewe udi usungila mu bianza bia muntu mubuluke.

1 Samuele 2:1

Hana wakatendelela, wakamba ne, Mutshima wanyi udi utumbishibua mu Yehowa; lusengu luanyi ludi lubandishibua mu Yehowa. Mukana muanyi mudi mudiundishibua kudi bakadi nʼanyi lukuna: bualu bua meme ndi nsanka mu luhandu luebe.

Dielulula 32:37

Yehowa neambe ne, Nzambi yabo idi kudi kunyi, ne dibue diabo diakadibo batekemena didi hanyi,

Tite 3:6

wakatuitshikishila Nyuma Muimpe muvula bua Yesu Kilisto Musungidi wetu;

Tite 3:4

Kadi hakamueneka buimpe bua Nzambi, Musungidi wetu, ne dinanga diandi kudi bantu bonso;

Luke 1:47

Mutshima wanyi wakutamba kusanka mu Nzambi, Musungidi wanyi.

Yirmeya 16:9

Bualu bua Yehowa wa misumba, Nzambi wa Isalele, udi wamba ne, Monai, nendekeshe di dia tuseku ne di dia disanka, dî dia mubaki wa mukashi ne dia mukashi udiye ubaka mu muaba eu, ku mesu kuebe ne mu matuku ebe.

Yeshaya 45:21

Nuambe bienu, nuleshe malu anudi basue kutumbila: bulelela, bele tshifufu, batuleshe ne, Wakunuambila bualu ebu mu bidimu bia diambedi nganyi? Wakadianjila kuamba bualu ebu kale nganyi? Meme Yehowa tshiakuenza bualu ebu, anyi? Kakuena nzambi mukuabo muomumue nʼanyi, muakane ne Musungidi; kakuena mukuabo muomumue nʼanyi.

Misambu 32:7

Wewe udi tshisokomenu tshianyi; neundame bua tshikadi ne dikenga; neunnyunguluke ne misambu ya luhandu.

Misambu 142:4

Utangile ku tshianza tshianyi tshia balume, umone biebe; bua kakuena muntu udi mummanye; kakuena tshinyemenu tshia meme kunyemena, kakuena muntu udi ne muoyo wanyi bualu.

Dielulula 32:4

Yeye udi Dibue; mudimu wandi wonso udi muakane, bualu bua nshila yandi yonso idi milulame: Nzambi wa kalolo udi kayi ne bubi, udi ne malu makane a bushuwa.

1 Samuele 2:2

Kakuena muntu udi muakane bu Yehowa, bualu bua kakuena mukuabo udi ku mpala kuebe: kakuena dibue dikuabo didi bu Nzambi wetu.

2 Samuele 22:31

Nshila wa Nzambi udi muakane tshishiki; dî dia Yehowa didi ditetshibua; yeye udi ngabu kudi bantu bonso badi banyemena kudiye.

2 Samuele 22:47

Yehowa udi ne muoyo; dibue dianyi disankishibue, Nzambi atumbishibue, dibue dia luhandu luanyi.

2 Samuele 23:3

Nzambi wa Isalele wakamba, dibue dia Isalele diakangambila ne, Udi ukokesha bantu ne buimpe, udi ukokesha mu ditshina dia Nzambi,

Ekesode 15:2

Yehowa udi bukole buanyi ne musambu wanyi, yeye wakulua luhandu luanyi, Yeye udi Nzambi wanyi, nemmutumbishe, udi Nzambi wa tatuʼanyi, nemmunemeke.

Misambu 9:10

Badi bamanye dina diebe nebakueyemene; buala bua wewe, Yehowa, kuena muanze kulekela bantu badi bakukeba.

Misambu 46:2

Nunku katuena tutshina, nansha biandamuka buloba, nansha biatenkakana mikuna mile idi munkatshi mua mai manene;