Tito 2:11 - Triqui de San Juan Copala

¹¹ Dan me se a̱j xcaj níꞌ cuentá se vaa quiꞌyaj ndoꞌo Yaꞌanj se lu̱j cheꞌé cunuda̱nj yuvii̱, se vaa caꞌve̱e nani̱i̱ cunuda̱nj nij yuvii̱ rihaan chrej chiꞌi̱i̱ do̱ꞌ, rihaan sayuun do̱ꞌ,

Tito 2:11 Referans Kwoze

1 Timoteo 2:4

Me rá Yaꞌanj nani̱i̱ cunuda̱nj yuvii̱ rihaan sayuun ne̱ cavi̱i̱ sa̱ꞌ nij soꞌ, ne̱ me rá Yaꞌanj nari̱ꞌ cunuda̱nj yuvii̱ nana̱ ya̱ na̱nj á.

Efesios 2:8

Dan me se xca̱j nij soj cuentá se vaa ina̱nj cheꞌé se lu̱j quiꞌyaj Yaꞌanj cheꞌé soj me nanii soj rihaan chrej chiꞌi̱i̱ do̱ꞌ, rihaan sayuun do̱ꞌ á. Dan me se ma̱an cheꞌé se amán rá soj niꞌya̱j soj man soꞌ me cavii sa̱ꞌ soj ado̱nj. Né maꞌa̱n soj me síí ꞌyaj aꞌvee avii sa̱ꞌ soj maꞌ. Ma̱an se Yaꞌanj racuíj man soj dan aꞌvee avii sa̱ꞌ soj na̱nj ado̱nj.

Hebreos 2:9

Tza̱j ne̱ niꞌya̱j níꞌ man Jesús, ne̱ nda̱ꞌ se ya̱ ya̱ si̱j noco̱ꞌ doj guun soꞌ rihaan nij se‑mo̱zó Yaꞌanj rque do̱j yoꞌ, tza̱j ne̱ ya̱j me se a̱j niꞌndaj ya̱ sa̱ꞌ cavii soꞌ, ne̱ veꞌé ndoꞌo aráj cochro̱j nii man soꞌ, quiꞌyaj Yaꞌanj a. Ne̱ da̱nj cavii sa̱ꞌ soꞌ, cheꞌé se caviꞌ soꞌ a. ꞌO̱ se sese ne cavi̱ꞌ soꞌ, ne̱ ne caꞌve̱e nayo̱n soꞌ rihaan cunuda̱nj níꞌ a̱ maꞌ. Tza̱j ne̱ ya̱j me se quiꞌyaj ndoꞌo Yaꞌanj se lu̱j cheꞌé níꞌ se vaa nayón Jesús rihaan níꞌ na̱nj ado̱nj.

Efesios 2:5

ne̱ queneꞌen Yaꞌanj se vaa a̱j quiriꞌ nu̱ꞌ nimán níꞌ cheꞌé cacunꞌ tumé níꞌ a. Ne̱ cheꞌé dan, ase vaa cunuu iꞌna̱ꞌ uún Cristó quiꞌyaj Yaꞌanj roꞌ, taꞌngaꞌ da̱nj vaa uún níꞌ cunuu sa̱ꞌ nimán níꞌ, quiꞌyaj Yaꞌanj, ne̱ cheꞌé dan caꞌve̱e ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj na̱nj ado̱nj. ꞌO̱ se ma̱an cheꞌé se lu̱j quiꞌyaj Yaꞌanj cheꞌé soj me se caꞌve̱e nani̱i̱ soj rihaan sayuun ne̱ cavi̱i̱ sa̱ꞌ soj ado̱nj.

2 Tesalonicenses 2:16

Ne̱ me rá núj nari̱ꞌ nucuaj nimán soj, quiꞌya̱j maꞌa̱n Jesucristó Si̱j ꞌNi̱j Raꞌa man níꞌ do̱ꞌ, Rej níꞌ Yaꞌanj do̱ꞌ a. Ne̱ Yaꞌanj roꞌ, me síí ꞌe̱e̱ rá man níꞌ, ne̱ quiꞌyaj ndoꞌo soꞌ se lu̱j ga̱ níꞌ se vaa naquiꞌyaj nucua̱j soꞌ nimán níꞌ nu̱ꞌ cavii nu̱ꞌ caꞌanj, ne̱ uun ya̱ rá níꞌ se vaa cavi̱i̱ sa̱ꞌ níꞌ, quiꞌya̱j uún soꞌ ado̱nj. Ne̱ me rá núj gu̱un nucua̱j soj quiꞌya̱j soj nu̱ꞌ suun sa̱ꞌ, ne̱ caꞌmi̱i̱ soj nu̱ꞌ nana̱ sa̱ꞌ, quiꞌya̱j Yaꞌanj ado̱nj.

Romanos 5:15

Dan me se neꞌen níꞌ se vaa cacunꞌ quiꞌyaj síí cuꞌna̱j Adán rihaan Yaꞌanj roꞌ, quisíj cacunꞌ yoꞌ tiriꞌ yoꞌ man nimán cunuda̱nj nij yuvii̱ ma̱n rihaan chumii̱ cuano̱, ne̱ cheꞌé dan nu̱ꞌ ꞌnaꞌ aviꞌ nimán nij yuvii̱ na̱nj ado̱nj. Tza̱j ne̱ doj a̱ nucua̱j Yaꞌanj rihaan Adán na̱nj ado̱nj. Cheꞌé dan neꞌen ya̱ níꞌ se vaa ra̱cuíj Yaꞌanj man ri̱i̱ ndoꞌo yuvii̱, ne̱ doj a̱ caꞌve̱e cavi̱i̱ sa̱ꞌ nij yuvii̱ cheꞌé se lu̱j quiꞌyaj Jesucristó cheꞌé nij soꞌ na̱nj ado̱nj.

San Juan 1:14

Ga̱a ne̱ guun snana̱ Yaꞌanj yoꞌ yuvii̱, ne̱ cayáán soꞌ scaꞌnúj níꞌ, ne̱ queneꞌen núj se vaa niꞌndaj ya̱ sa̱ꞌ veꞌé vaa soꞌ, cheꞌé se o̱rúnꞌ Taꞌníí Rej soꞌ Yaꞌanj me soꞌ a. Ne̱ soꞌ me se uxrá ꞌyaj soꞌ se lu̱j do̱ꞌ, aꞌmii soꞌ nana̱ ya̱ do̱ꞌ ado̱nj.

Hechos 11:23

Dan me se cuchiꞌ soꞌ, ga̱a ne̱ queneꞌen soꞌ se vaa quiꞌyaj ndoꞌo Yaꞌanj se lu̱j ga̱ nij síí yaníj yoꞌ, ne̱ guun niha̱ꞌ uxrá rá soꞌ a. Ne̱ narqué soꞌ chrej sa̱ꞌ rihaan nij síí yaníj yoꞌ se vaa caꞌne̱j nimán nij soꞌ ꞌo̱ canoco̱ꞌ xraan nij soꞌ man Síí ꞌNi̱j Raꞌa man níꞌ a.

Hechos 20:24

Tza̱j ne̱ a̱ doj ne chuꞌvíꞌ ꞌu̱nj sese nda̱a ticavi̱ꞌ nii mán ꞌu̱nj a̱ maꞌ. Tza̱j ne̱ veꞌé ina̱nj me raj ti̱síj suun caꞌneꞌ Jesús Si̱j ꞌNi̱j Raꞌa man níꞌ rihanj, ne̱ cheꞌé dan ꞌo̱ xraan ina̱nj taj xnaꞌanj ꞌu̱nj nana̱ sa̱ꞌ rihaan yuvii̱ cheꞌé se lu̱j ꞌyaj Yaꞌanj cheꞌé ta̱ranꞌ níꞌ a.

San Lucas 3:6

Ga̱a ne̱ queneꞌe̱n nu̱ꞌ nij síí ma̱n rihaan chumii̱ se vaa caꞌve̱e ti̱nanii Yaꞌanj man yuvii̱ rihaan sayuun na̱nj á.” Dan me nana̱ cachrón Isaías rihaan yanj ga̱a naá nana̱ taj xnaꞌanj cheꞌé Juan a.

1 Timoteo 1:14

Tana̱nj quiꞌyaj uxrá Cristó Jesús Si̱j ꞌNi̱j Raꞌa man níꞌ se lu̱j ga̱ ꞌu̱nj, se vaa cuchumán rá ꞌu̱nj niꞌya̱j ꞌu̱nj man soꞌ, ne̱ cunuu ꞌe̱e̱ raj tuvij, quiꞌyaj soꞌ ado̱nj.

Romanos 5:2

Dan me se amán rá níꞌ niꞌya̱j níꞌ man Cristó, ne̱ cheꞌé dan guun cheꞌe̱ níꞌ nacaj níꞌ se lu̱j ꞌyaj Yaꞌanj cheꞌé níꞌ, ne̱ xraan nica̱j níꞌ se lu̱j yoꞌ a. Ne̱ ya̱j roꞌ, uun niha̱ꞌ ndoꞌo rá níꞌ cheꞌé se uun ya̱ rá níꞌ se vaa vaa güii ti̱haa̱n Yaꞌanj rihaan níꞌ nu̱ꞌ se vaa niꞌndaj ya̱ sa̱ꞌ veꞌé vaa soꞌ ado̱nj.

Colosenses 1:6

Dan me se a̱j cuchiꞌ nana̱ sa̱ꞌ nihánj rihaan cunuda̱nj nij yuvii̱ ma̱n rihaan chumii̱, ne̱ doj a̱ doj a̱ vaa nij yuvii̱ cuchumán rá nana̱ sa̱ꞌ yoꞌ a. Ne̱ ꞌo̱ cuya̱a̱n quiꞌyaj nij soj ga̱ ꞌó nij síí cuno nana̱ yoꞌ, ne̱ dan me se ga̱a cuchiꞌ nana̱ nihánj rihaan soj, ne̱ cuno soj, ne̱ xcaj soj cuentá cheꞌé se lu̱j ꞌyaj Yaꞌanj cheꞌé níꞌ, ne̱ cuchumán rá soj ado̱nj.

Gálatas 2:21

Ne̱ naꞌvej rá ꞌu̱nj ta̱náj yaníj ꞌu̱nj se lu̱j quiꞌyaj Yaꞌanj cheꞌé ꞌu̱nj maꞌ. ꞌO̱ se vaa cheꞌé ya̱ quiꞌyaj Yaꞌanj se lu̱j ado̱nj. Dan me se sese caꞌve̱e ya̱ navi̱j cacunꞌ quiꞌya̱j stucua̱nj Moisés, ga̱a ne̱ caviꞌ u̱u̱n maꞌa̱n Cristó vaa ga̱a na̱nj ado̱nj.” Nu̱ꞌ nana̱ nihánj me nana̱ caꞌmii ꞌu̱nj rihaan Pedró ado̱nj.

2 Corintios 6:1

Dan me se ꞌyaj núj suun caꞌneꞌ Yaꞌanj rihaan núj, ne̱ cheꞌé dan rquee̱ núj man soj se vaa se̱ quiriꞌíj yaníj soj se lu̱j quiꞌyaj Yaꞌanj cheꞌé soj maꞌ.

Hechos 13:47

ꞌO̱ se Yaꞌanj Si̱j ꞌNi̱j Raꞌa man níꞌ me síí caꞌneꞌ suun rihaan núj quiꞌya̱j núj da̱nj ado̱nj. Dan me se cataj Síí ꞌNi̱j Raꞌa man níꞌ a: A̱j cunéꞌ ꞌu̱nj mán so̱ꞌ se vaa guún so̱ꞌ yaꞌan chuguu̱n rihaan nij síí yaníj ne̱ caꞌve̱e xca̱j nij soꞌ cuentá, qui̱ꞌyáá so̱ꞌ, ga̱a ne̱ nani̱i̱ yuvii̱ ya̱nj chumanꞌ na̱j nu̱ꞌ rihaan chumii̱ rihaan sayuun, qui̱ꞌyáá so̱ꞌ á. Nihánj me snana̱ Yaꞌanj nana̱ cataj Yaꞌanj rihaan núj na̱nj á ―taj ro̱j soꞌ rihaan nij yuvii̱ israelitá yoꞌ a.

Hechos 13:43

Ga̱a ne̱ ga̱a quisíj tucuꞌyón nij soꞌ ne̱ curiha̱nj nij yuvii̱ xeꞌ, ne̱ queꞌe̱e̱ nij síí israelitá do̱ꞌ, nij síí yaníj noco̱ꞌ xraan stucua̱nj nij síí israelitá do̱ꞌ, canocoꞌ man Pabló ga̱ Bernabé a. Ga̱a ne̱ narqué ro̱j soꞌ chrej nucua̱j man nij soꞌ se vaa ꞌo̱ canoco̱ꞌ nij soꞌ tucuáán sa̱ꞌ ga̱ se lu̱j ꞌyaj Yaꞌanj cheꞌé nij soꞌ a.

San Juan 1:9

Ne̱ yaꞌan chuguu̱n ya̱ yoꞌ roꞌ, me síí ꞌyaj chuguu̱n rihaan cunuda̱nj yuvii̱, cheꞌé rej gu̱un nucua̱j nij yuvii̱ xca̱j nij yuvii̱ cuentá a. Ne̱ caꞌnaꞌ soꞌ rihaan chumii̱ nihánj,

San Lucas 24:47

Ga̱a ne̱ vaa cheꞌé caꞌmi̱i̱ natáj nii se vaa cheꞌé se‑chuvi̱i Síí Caꞌnéé Yaꞌanj Ti̱nanii man Yuvii̱ rihaan Sayuun roꞌ, no̱ xcúún yuvii̱ ca̱nica̱j nimán yuvii̱ ne̱ ta̱náj yuvii̱ chrej chiꞌi̱i̱, ne̱ tinavi̱j Yaꞌanj cacunꞌ tumé nij soꞌ a. Asino ya̱a̱n vaa cheꞌé caꞌmi̱i̱ natáj nii chumanꞌ Jerusalén, ga̱a ne̱ caꞌmi̱i̱ natáj nii rihaan ta̱ranꞌ nij xꞌneꞌ yuvii̱ ino̱ vaa stucua̱nj ado̱nj.

San Marcos 16:15

Ga̱a ne̱ cataj Jesús rihaan nij soꞌ a: ―Caꞌa̱nj nij soj rihaan nu̱ꞌ cachra̱ꞌ chumii̱, ne̱ caꞌmi̱i̱ natáj soj nana̱ sa̱ꞌ cheꞌé ꞌu̱nj rihaan cunuda̱nj nij yuvii̱ a.

San Mateo 28:19

Cheꞌé dan caꞌa̱nj soj rihaan ꞌo̱ ꞌo̱ nij xꞌneꞌ yuvii̱ ino̱ vaa stucua̱nj, ne̱ ti̱haa̱n soj man nij soꞌ cheꞌé rej gu̱un nij soꞌ síí tucuꞌyón snana̱j, quiꞌya̱j soj á. Ne̱ cuta̱ꞌ ne soj man nij soꞌ, ne̱ cata̱ꞌ tuꞌva soj se‑chuvi̱i Réé ꞌu̱nj Yaꞌanj do̱ꞌ, se‑chu̱vií ꞌu̱nj Taꞌni̱j Yaꞌanj do̱ꞌ, se‑chuvi̱i Nimán Yaꞌanj do̱ꞌ, ga̱a cuta̱ꞌ ne soj man nij soꞌ á.

Hebreos 12:15

Ne̱ tu̱mé soj man soj, ga̱a ne̱ se̱ gaa na̱nj ta̱náj ꞌo̱ tinúú soj se lu̱j quiꞌyaj Yaꞌanj ga̱ níꞌ á. Dan me se se̱ guun nachri̱ꞌ ꞌo̱ tinúú soj ni̱ꞌyaj soꞌ tinúú soꞌ maꞌ. Ta̱dó uxrá soj cheꞌé se ꞌo̱ síí nachriꞌ niꞌya̱j tinúú roꞌ, quiꞌya̱j quiri̱ꞌ rá queꞌe̱e̱ tinúú soj na̱nj ado̱nj.

2 Timoteo 4:17

ꞌO̱ se canicunꞌ Síí ꞌNi̱j Raꞌa man níꞌ ga̱ ꞌu̱nj, ne̱ soꞌ me síí quiꞌyaj guun nu̱cuáá ꞌu̱nj natáꞌ ꞌu̱nj nu̱ꞌ snana̱ Yaꞌanj cuno cunuda̱nj nij yuvii̱ yaníj, ne̱ tinanii soꞌ manj rihaan sayuun noco̱o a.

Colosenses 1:23

Dan me se cavi̱i̱ sa̱ꞌ soj, sese ꞌo̱ canoco̱ꞌ soj stucua̱nj Cristó na̱nj ado̱nj. Raan canoco̱ꞌ soj man soꞌ á. A̱j cuno soj nana̱ sa̱ꞌ cheꞌé Cristó, ne̱ cheꞌé dan uun ya̱ rá soj se vaa cavi̱i̱ sa̱ꞌ soj, ne̱ se̱ guun cata̱j soj se vaa ne ya̱ vaa nana̱ sa̱ꞌ cuno soj maꞌ. ꞌO̱ se nana̱ caꞌmii natáj nii rihaan cunuda̱nj nij yuvii̱ ma̱n rihaan chumii̱ me nana̱ sa̱ꞌ yoꞌ, ne̱ ꞌu̱nj nihánj guun ꞌo̱ síí aꞌmii natáj snana̱ Yaꞌanj nana̱ sa̱ꞌ yoꞌ rihaan yuvii̱ na̱nj ado̱nj.

Romanos 10:18

Tza̱j ne̱ xnáꞌanj ꞌu̱nj sese ataa cuchi̱ꞌ nana̱ sa̱ꞌ rihaan nij yuvii̱ israelitá a. Ya̱ ya̱ a̱j cuchiꞌ nana̱ sa̱ꞌ rihaan nij yuvii̱ israelitá na̱nj á. Dan me se taj Danj Yaꞌanj a: A̱j cuno cunuda̱nj nij yuvii̱ ma̱n rihaan yoꞌóó snana̱ Yaꞌanj nana̱ sa̱ꞌ, ne̱ cuchiꞌ snana̱ soꞌ nda̱a nu̱ꞌ rihaan chumii̱ a. Da̱nj aꞌmii Danj Yaꞌanj á.

Hechos 17:30

’Dan me se asi̱j rque̱ me se ne quiꞌya̱j Yaꞌanj sayuun man nij síí aráj gue̱e̱ rihaan agaꞌ do̱ꞌ, rihaan yahij do̱ꞌ maꞌ. ꞌO̱ se ne caꞌve̱e xca̱j nij yuvii̱ cuentá maꞌ. Tza̱j ne̱ ya̱j me se cataj xnaꞌanj Yaꞌanj rihaan nij yuvii̱ ma̱n cunuda̱nj nij chumanꞌ na̱j rihaan chumii̱ se vaa ca̱nica̱j nimán nij yuvii̱ canoco̱ꞌ nij yuvii̱ tucuáán sa̱ꞌ ado̱nj.

2 Timoteo 1:10

Ne̱ ya̱j me se tihaa̱n Yaꞌanj rihaan níꞌ nu̱ꞌ se sa̱ꞌ nu̱u̱ nimán soꞌ, se vaa caꞌnaꞌ Cristó Jesús Si̱j Tinanii man níꞌ rihaan Sayuun, quiꞌyaj Yaꞌanj a. Ya̱j me se cheꞌé se vaa quiꞌyaj Cristó me se se̱ caꞌvee cavi̱ꞌ níꞌ maꞌ. Tana̱nj ꞌo̱ ga̱a̱ iꞌna̱ꞌ nimán níꞌ ga̱ Yaꞌanj nu̱ꞌ cavii nu̱ꞌ caꞌanj, quiꞌyaj soꞌ, taj nana̱ sa̱ꞌ cheꞌé soꞌ ado̱nj.