San Mateo 23:19 - Triqui de San Juan Copala

¹⁹ Dan me se ase vaa síí tuchri̱i vaa soj ado̱nj. Me cheꞌé ne neꞌen soj se vaa sa̱ꞌ doj vaa chraan altar yoꞌ rihaan xcuu ta̱j rihaan yoꞌ ga̱. ꞌO̱ se cheꞌé maꞌa̱n chraan altar roꞌ, cheꞌé dan nuu gue̱e̱ xcuu yoꞌ rihaan Yaꞌanj na̱nj á.

San Mateo 23:19 Referans Kwoze

San Mateo 23:17

Ase vaa síí niꞌyo̱n do̱ꞌ, ase vaa síí tuchri̱i do̱ꞌ, vaa soj ado̱nj. Me cheꞌé ne neꞌen soj se vaa nuvií noco̱o me se sa̱ꞌ doj vaa yoꞌ rihaan agaꞌ oró míí nu̱u̱ rque nuvií yoꞌ ga̱. ꞌO̱ se neꞌen soj se vaa cheꞌé maꞌa̱n nuvií noco̱o yoꞌ roꞌ, nuu gue̱e̱ agaꞌ oró míí yoꞌ rihaan Yaꞌanj ado̱nj.

San Mateo 23:18

Ne̱ taj uún soj se vaa sese utaꞌ ꞌo̱ soꞌ raa̱ chraan altar acaa xcuu rqué yuvii̱ rihaan Yaꞌanj se vaa ya̱ vaa nana̱ aꞌmii soꞌ, ne̱ taj se ꞌyaj sese aꞌmii ne̱ soꞌ maꞌ, taj uún soj a. Tza̱j ne̱ sese utaꞌ soꞌ raa̱ xcuu ta̱j rihaan chraan altar yoꞌ, ne̱ no̱ xcúún soꞌ quiꞌya̱j soꞌ nu̱ꞌ nda̱a vaa taj soꞌ, taj uún soj a.

San Mateo 23:20

Cheꞌé dan sese utaꞌ ꞌo̱ soꞌ raa̱ chraan altar yoꞌ, ne̱ né ra̱a o̱rúnꞌ chraan altar yoꞌ me se utaꞌ soꞌ raa̱ maꞌ. ꞌO̱ se utaꞌ soꞌ raa̱ chraan altar do̱ꞌ, raa̱ nu̱ꞌ se ta̱j rihaan chraan altar yoꞌ do̱ꞌ ado̱nj.