San Juan 8:28 - Triqui de San Juan Copala

²⁸ Cheꞌé dan cataj Jesús rihaan nij soꞌ a: ―Asa̱ꞌ quisíj naxca̱j soj mán ꞌu̱nj cano̱j rihaan rcutze̱, ga̱a ne̱ xca̱j ya̱ soj cuentá se vaa ya̱ ya̱ Si̱j Caꞌnéé Yaꞌanj Ni̱caj Yuꞌunj man Yuvii̱ mej ado̱nj. Ne̱ ne ꞌyáá ꞌu̱nj se vaa avii ina̱nj raa̱ ma̱ꞌanj maꞌ. ꞌO̱ se aꞌmii ꞌu̱nj nda̱a vaa tucuꞌyón Réj manj ado̱nj.

San Juan 8:28 Referans Kwoze

San Juan 5:30

’Dan me se a̱ doj ne uun nucua̱j ma̱ꞌanj qui̱ꞌyáj da̱nj a̱ maꞌ. Ma̱an se ase vaa taj xnaꞌanj Réj Yaꞌanj rihanj roꞌ, veé da̱nj vaa ꞌyáá ꞌu̱nj ga̱a aꞌnéꞌ ꞌu̱nj cacunꞌ cheꞌé nij yuvii̱, ne̱ ꞌo̱ nica̱ aꞌnéꞌ ꞌu̱nj cacunꞌ cheꞌé nij yuvii̱ na̱nj ado̱nj. ꞌO̱ se ne ꞌyáá ꞌu̱nj ina̱nj se me raj qui̱ꞌyáj maꞌ. Tana̱nj ina̱nj se taj xnaꞌanj síí caꞌnéé manj me se vaa ꞌyáj ado̱nj.

San Juan 5:19

Cheꞌé dan cataj Jesús rihaan nij soꞌ a: ―Dan me se cata̱j xnaꞌanj yá yá ꞌu̱nj rihaan soj a. Dan me se ase vaa xnii rihaan rej xnii roꞌ, da̱nj vaa ꞌu̱nj si̱j Taꞌni̱j Yaꞌanj nihánj rihaan Réj Yaꞌanj, ne̱ ne uun nu̱cuáá ꞌu̱nj ꞌyáá ꞌu̱nj se vaa rii nimán ma̱ꞌanj maꞌ. ꞌO̱ se ina̱nj ꞌyáá ꞌu̱nj nda̱a vaa ꞌyaj Réj Yaꞌanj neꞌenj a. Ne̱ ase vaa ꞌyaj gue̱e̱ soꞌ roꞌ, veé da̱nj vaa gue̱e̱ ꞌyáá ꞌu̱nj uún ado̱nj.

San Juan 6:38

Dan me se caꞌnáꞌ ꞌu̱nj rihaan chumii̱ nihánj, tza̱j ne̱ se̱ guun qui̱ꞌyáá ꞌu̱nj nda̱a vaa me rá ma̱ꞌanj qui̱ꞌyáj maꞌ. Tana̱nj cheꞌé rej qui̱ꞌyáá ꞌu̱nj se vaa me rá Yaꞌanj si̱j caꞌnéé mán ꞌu̱nj qui̱ꞌyáá ꞌu̱nj roꞌ, cheꞌé dan nanij ꞌu̱nj rihaan chumii̱ nihánj ado̱nj.

San Juan 3:14

Dan me se ase vaa tacavii síí cuꞌna̱j Moisés xcuáá aga̱ꞌ raa̱ chruun rej tacaan roꞌ, vaa cheꞌé da̱nj quiꞌya̱j nii manj Si̱j Caꞌnéé Yaꞌanj Ni̱caj Yuꞌunj man Yuvii̱, ne̱ ta̱cavii nii manj raa̱ ꞌo̱ chruun a.

Romanos 1:4

Da̱nj ina̱nj uún ne̱ tihaa̱n Nimán Yaꞌanj síí sa̱ꞌ ina̱nj se vaa ya̱ Taꞌníí Yaꞌanj me Jesucristó cheꞌé se cunuu iꞌna̱ꞌ uún soꞌ scaꞌnúj nij síí caviꞌ quiꞌyaj se‑nucua̱j Yaꞌanj a.

Hechos 4:4

Tza̱j ne̱ queꞌe̱e̱ ndoꞌo nij síí cuno snana̱ ro̱j soꞌ roꞌ, cuchumán rá nana̱ yoꞌ, ne̱ veé da̱nj quisíj ꞌu̱nꞌ míj snóꞌo canocoꞌ man Jesús ta̱ꞌ asuun a.

Hechos 2:41

Cheꞌé dan me nij síí cuchumán rá snana̱ soꞌ roꞌ, cataꞌ ne nij soꞌ, ne̱ güii yoꞌ me se canocoꞌ naca̱ vaꞌnu̱j míj yuvii̱ man Jesús ta̱ꞌ asuun a.

San Juan 19:18

Ne̱ ga̱a cuchiꞌ nij soꞌ rej yoꞌ, ga̱a ne̱ cachrón nij tanuu man soꞌ rihaan rcutze̱ a. Ne̱ yavíj ro̱j soꞌ cachrón uún nij tanuu rihaan yavíj rcutze̱ uún, ne̱ ꞌo̱ soꞌ roꞌ, nicu̱nꞌ rej nuva̱ꞌ Jesús, ne̱ ꞌó soꞌ roꞌ, nicu̱nꞌ rej nichru̱un Jesús, ne̱ tanu̱u̱ nicunꞌ maꞌa̱n Jesús a.

San Juan 16:10

Cheꞌé se cavi̱i̱ ꞌu̱nj quina̱nꞌ ꞌu̱nj rej ya̱nj Réj Yaꞌanj ne̱ se̱ queneꞌen soj doj manj roꞌ, cheꞌé dan ti̱haa̱n Nimán Yaꞌanj man yuvii̱ se vaa ya̱ ya̱ síí sa̱ꞌ ina̱nj mé ꞌu̱nj a.

San Juan 11:42

A̱j neꞌenj se vaa niga̱nj unó so̱ꞌ snana̱j, tza̱j ne̱ aꞌmij nana̱ nihánj cheꞌé rej cuno̱ nij yuvii̱ nicu̱nꞌ nihánj ga̱j a. ꞌO̱ se me raj cuchuma̱n rá nij yuvii̱ se vaa so̱ꞌ me síí caꞌnéé manj rihaan chumii̱ nihánj na̱nj ado̱nj ―taj Jesús, cachíín niꞌya̱j soꞌ rihaan Yaꞌanj a.

San Juan 8:24

Cheꞌé dan cataj xnaꞌanj ꞌu̱nj rihaan soj se vaa asa̱ꞌ caviꞌ soj, ne̱ ꞌo̱ quita̱j nu̱ꞌ cacunꞌ tumé soj xráá soj na̱nj ado̱nj. ꞌO̱ se sese se̱ cuchumán rá soj se vaa mé ꞌu̱nj síí a̱j cataj xnaꞌanj ꞌu̱nj rihaan soj se vaa mej, ne̱ asa̱ꞌ caviꞌ soj, ne̱ ꞌo̱ quita̱j nu̱ꞌ cacunꞌ tumé soj xráá soj na̱nj ado̱nj ―taj Jesús rihaan nij soꞌ a.

San Juan 3:11

Ya̱ ya̱ cata̱j xnaꞌanj ꞌu̱nj rihaan so̱ꞌ se vaa xa̱ꞌ núj, tza̱j ne̱ cheꞌé ina̱nj se vaa neꞌen núj aꞌmii núj ne̱ cheꞌé se vaa queneꞌen núj nataꞌ núj ado̱nj. Tza̱j ne̱ ne amán rá nij soj nana̱ aꞌmii núj maꞌ.

San Mateo 24:5

ꞌO̱ se caꞌna̱ꞌ uxrá yuvii̱ cata̱j a: “ꞌU̱nj me Síí Caꞌnéé Yaꞌanj Ti̱nanii man Yuvii̱ rihaan Sayuun”, cata̱j nij soꞌ, ne̱ dan me se tiha̱ꞌ yuꞌunj uxrá nij soꞌ man tuviꞌ nij soꞌ na̱nj á.

San Marcos 13:6

ꞌO̱ se caꞌna̱ꞌ uxrá yuvii̱ cata̱j se vaa ꞌu̱nj caꞌnéé man nij soꞌ ne̱ cata̱j nij soꞌ a: “ꞌU̱nj me síí naꞌvi̱j soj, Síí Ti̱nanii man Yuvii̱ rihaan Sayuun á”, cata̱j nij soꞌ, ne̱ dan me se tiha̱ꞌ yuꞌunj uxrá nij soꞌ man tuviꞌ nij soꞌ na̱nj ado̱nj.

San Lucas 21:8

Ga̱a ne̱ cataj soꞌ a: ―Tu̱mé ndoꞌo soj man soj se̱ gaa na̱nj tiha̱ꞌ yuꞌunj yuvii̱ man soj á. ꞌO̱ se caꞌna̱ꞌ uxrá yuvii̱ cata̱j a: “ꞌU̱nj me síí naꞌvi̱j soj, ne̱ Síí Ti̱nanii man Yuvii̱ rihaan Sayuun mej á”, cata̱j nij yuvii̱, ne̱ cata̱j uún nij yuvii̱ a: “A̱j quisíj güii caꞌa̱nj niꞌya̱ chumii̱ na̱nj á”, cata̱j uún nij yuvii̱ rihaan soj a. Tza̱j ne̱ se̱ cuchumán rá soj, ne̱ se̱ canocoꞌ soj man yuvii̱ aꞌmii da̱nj maꞌ.

San Juan 4:26

Ga̱a ne̱ canica̱j Jesús cataj Jesús rihaan noꞌ a: ―ꞌU̱nj si̱j aꞌmii ga̱ so̱ꞌ cuano̱ nihánj roꞌ, me Síí Caꞌnéé Yaꞌanj ado̱nj ―taj Jesús rihaan chana̱ yoꞌ a.

San Juan 8:27

Tza̱j ne̱ ne queneꞌe̱n nij soꞌ se vaa caꞌmii Jesús cheꞌé Rej soꞌ Yaꞌanj si̱j caꞌnéé man Jesús a̱ maꞌ.

San Juan 8:58

Ga̱a ne̱ cataj Jesús rihaan nij soꞌ a: ―Ya̱ ya̱ cata̱j xnaꞌanj ꞌu̱nj rihaan soj cuano̱ se vaa asi̱j ataa caꞌnga̱a̱ Abraham, ne̱ a̱j vaa ꞌu̱nj na̱nj ado̱nj ―taj Jesús rihaan nij soꞌ a.

San Juan 13:19

’Asi̱j cuano̱ nihánj cata̱j xnaꞌanj ꞌu̱nj rihaan soj da̱j gu̱un rej riha̱a̱n, ne̱ cuano̱ nihánj me se ataa qui̱ránꞌ ꞌu̱nj se vaa qui̱ranj, tza̱j ne̱ asa̱ꞌ quisíj quiránꞌ ꞌu̱nj yoꞌ, ga̱a ne̱ cuchuma̱n rá soj da̱j si̱j mej ado̱nj.

San Juan 18:32

Cheꞌé se caꞌmii nij soꞌ da̱nj roꞌ, cheꞌé dan quisi̱j ya̱ nu̱ꞌ snana̱ Jesús nana̱ aꞌmii cheꞌé da̱j quiꞌya̱j nii man soꞌ ticavi̱ꞌ nii man soꞌ a.