San Juan 17:11 - Triqui de San Juan Copala

¹¹ ’Ne̱ nihánj me se nuvíꞌ ꞌu̱nj yáán rihaan chumii̱ nihánj a̱ maꞌ. Tza̱j ne̱ nij síí nihánj yáán rihaan chumii̱ nihánj ado̱nj. ꞌU̱nj me se quina̱nꞌ ꞌu̱nj rej ya̱nj so̱ꞌ na̱nj ado̱nj. Dan me se nij síí rqué so̱ꞌ manj me se qui̱ꞌyáá so̱ꞌ se ndoꞌo, ne̱ tu̱mé so̱ꞌ man nij soꞌ cheꞌé se‑chu̱vií so̱ꞌ, cheꞌé rej ꞌo̱ cuno̱ nij soꞌ rihaan so̱ꞌ, Ata̱j Chij Síí Sa̱ꞌ Ina̱nj. Ne̱ cuya̱a̱n ga̱a̱ rá nimán nij soꞌ nda̱a vaa cuya̱a̱n vaa rá nimán ro̱ꞌ á.

San Juan 17:11 Referans Kwoze

San Mateo 6:9

Cheꞌé dan asa̱ꞌ achíín niꞌya̱j soj, ne̱ nihánj cata̱j soj á: Ata̱j Chij, síí nicu̱nꞌ xta̱ꞌ, me rá nimán núj cara̱a̱ cochro̱j yuvii̱ mán so̱ꞌ ado̱nj.

Hebreos 9:24

ꞌO̱ se né nu̱vií cuneꞌ maꞌa̱n yuvii̱ me rej catúj Cristó maꞌ. ꞌO̱ se nuvií mantá yoꞌ roꞌ, ase vaa rej nicu̱nꞌ maꞌa̱n Yaꞌanj rej xta̱ꞌ vaa yoꞌ, tza̱j ne̱ né ya̱ ya̱ rej nicu̱nꞌ Yaꞌanj me yoꞌ maꞌ. Tza̱j ne̱ ya̱j me se catúj maꞌa̱n Cristó rej xta̱ꞌ yoꞌ, ne̱ cuano̱ nicunꞌ soꞌ rihaan maꞌa̱n Yaꞌanj, ne̱ achíín niꞌya̱j soꞌ rihaan Yaꞌanj cheꞌé níꞌ ado̱nj.

Efesios 4:4

Dan me se o̱rúnꞌ ya̱ yuvii̱ me níꞌ vaa, ne̱ o̱rúnꞌ ya̱ nimán níꞌ vaa, ne̱ dan me se o̱rúnꞌ ya̱ Nimán Yaꞌanj me nuû nimán ya̱ níꞌ ado̱nj. Ne̱ uun ya̱ rá ta̱ranꞌ níꞌ se vaa canacúún Yaꞌanj man ta̱ranꞌ níꞌ, ne̱ ꞌo̱ cuya̱a̱n cavi̱i̱ sa̱ꞌ ta̱ranꞌ níꞌ, quiꞌya̱j Yaꞌanj ado̱nj.

Filipenses 2:9

Cheꞌé dan guun chij ndoꞌo soꞌ doj rej xta̱ꞌ, quiꞌyaj Yaꞌanj, ne̱ rqué ya̱ Yaꞌanj ꞌo̱ se‑chuvi̱i soꞌ ne̱ noco̱o doj vaa se‑chuvi̱i soꞌ rihaan da̱j a̱ ꞌó se‑chuvi̱i yuvii̱ na̱nj ado̱nj.

San Juan 17:25

’Ata̱j Chij, sa̱ꞌ ina̱nj ꞌyáá so̱ꞌ ado̱nj. Tza̱j ne̱ ne neꞌen nij síí noco̱ꞌ se‑chre̱j chumii̱ nihánj mán so̱ꞌ maꞌ. Tza̱j ne̱ ꞌu̱nj me se queneꞌenj mán so̱ꞌ, ne̱ queneꞌen nij síí nihánj se vaa caꞌnéé so̱ꞌ manj rihaan chumii̱ nihánj a.

San Juan 13:1

Dan me se ga̱a ataa ca̱nuû Chaꞌanj Pascuá, ne̱ queneꞌen Jesús se vaa nichrunꞌ quisi̱j orá ta̱náj soꞌ chumii̱ nihánj ne̱ quina̱nꞌ soꞌ rihaan Rej soꞌ Yaꞌanj a. Dan me se ꞌe̱e̱ rá soꞌ man nij síí cachéé ga̱ soꞌ rihaan chumii̱ nihánj, ne̱ ꞌo̱ ꞌe̱e̱ rá soꞌ man nij soꞌ nda̱a se caviꞌ soꞌ a.

Hebreos 1:3

Ne̱ ase vaa maꞌa̱n Yaꞌanj roꞌ, da̱nj vaa soꞌ chugua̱nj. Dan me se ga̱a niꞌya̱j níꞌ man soꞌ, ne̱ xcaj níꞌ cuentá se vaa niꞌndaj ya̱ sa̱ꞌ veꞌé vaa Yaꞌanj, ne̱ xcaj ya̱ níꞌ cuentá da̱j vaa maꞌa̱n Yaꞌanj ado̱nj. Ne̱ cheꞌé se si̱j nucua̱j ndoꞌo me soꞌ roꞌ, cheꞌé dan ma̱an nana̱ avii u̱u̱n tuꞌva soꞌ, ne̱ ꞌo̱ mán chre̱ꞌ nu̱ꞌ rasu̱u̱n ꞌyaj soꞌ a. Ga̱a quisíj tinavij soꞌ cacunꞌ tumé níꞌ, ga̱a ne̱ caꞌanj ca̱yáán soꞌ rej xta̱ꞌ ndoꞌo rej xꞌnu̱j Yaꞌanj, ne̱ rej nuva̱ꞌ Yaꞌanj rej sa̱ꞌ doj yáán soꞌ cuano̱ ado̱nj.

San Juan 16:33

Nu̱ꞌ nana̱ nihánj caꞌmij rihaan soj, cheꞌé se me raj ga̱a̱ xe̱j nimán soj cheꞌé se noco̱ꞌ soj manj a. Quira̱nꞌ soj sayuun rihaan chumii̱ nihánj, tza̱j ne̱ vaa cheꞌé gu̱un niha̱ꞌ rá soj, ne̱ gu̱un ya̱ ya̱ rá soj se vaa ꞌu̱nj nihánj quiꞌyaj canaán ya̱ rihaan chumii̱ nihánj na̱nj ado̱nj ―taj Jesús rihaan nij síí tucuꞌyón snana̱ soꞌ a.

San Juan 14:20

’Asa̱ꞌ queneꞌen soj manj ne̱ queneꞌe̱n soj se vaa cuya̱a̱n vaa rá ꞌu̱nj ga̱ Réj, ne̱ cuya̱a̱n ga̱a̱ rá soj ga̱ ꞌu̱nj, ne̱ cuya̱a̱n ga̱a̱ rá ꞌu̱nj ga̱ soj na̱nj ado̱nj.

Judas 1:1

ꞌU̱nj roꞌ, me síí cuꞌna̱j Judas nu̱u̱ rihaan Jesucristó, ne̱ tinúú Jacobo mej a. Cachro̱nj nana̱ nihánj rihaan yanj caꞌne̱j ꞌu̱nj rihaan soj si̱j canacúún Yaꞌanj man canoco̱ꞌ man soꞌ a. Dan me se ꞌe̱e̱ rá Rej níꞌ Yaꞌanj man soj, ne̱ nica̱j yuꞌunj Jesucristó man soj se̱ gaa na̱nj ta̱náj soj snana̱ Yaꞌanj a.

1 Juan 5:19

Ne̱ neꞌen níꞌ se vaa síí caꞌngaa naca̱ nimán quiꞌyaj Yaꞌanj me níꞌ ado̱nj. Tza̱j ne̱ cunuda̱nj nij yuvii̱ ma̱n rihaan chumii̱ nihánj roꞌ, ꞌni̱j raꞌa Síí Chre̱e man nij soꞌ na̱nj ado̱nj.

Santiago 4:4

Ne̱ ase vaa chana̱ otoj ga̱ ꞌó snóꞌo roꞌ, da̱nj vaa soj, ne̱ ne nocoꞌ ya̱ nimán soj man Yaꞌanj a̱ maꞌ. Xca̱j soj cuentá se vaa síí me rá cavi̱i̱ sa̱ꞌ ina̱nj rihaan chumii̱ nihánj roꞌ, soꞌ me síí ta̱j riꞌyunj man Yaꞌanj ado̱nj. Ya̱ uxrá á.

Hechos 3:21

Cuano̱ nihánj me se vaa cheꞌé ca̱yáán soꞌ rej xta̱ꞌ nda̱a se quisi̱j güii naquiꞌya̱j sa̱ꞌ Yaꞌanj nu̱ꞌ nij rasu̱u̱n nda̱a rá se vaa nij rasu̱u̱n asi̱j naá ndoꞌo nda̱a vaa cataj xnaꞌanj nij síí sa̱ꞌ síí nataꞌ snana̱ Yaꞌanj ga̱a naá a.

San Juan 13:3

Ne̱ a̱j queneꞌen Jesús se vaa quisíj guun chij maꞌa̱n soꞌ rihaan cunuda̱nj rasu̱u̱n, quiꞌyaj Yaꞌanj, ne̱ a̱j queneꞌen soꞌ se vaa si̱j cavii rej ya̱nj Yaꞌanj me soꞌ ne̱ quina̱nꞌ uún soꞌ rihaan Yaꞌanj a.

Apocalipsis 4:8

Ne̱ vaa vata̱nꞌ scache̱e ꞌo̱ ꞌo̱ nij xoꞌ ta̱j xráá nij xoꞌ, ne̱ ase vaa scache̱e xtâj vaa scache̱e nij xoꞌ a. Ne̱ nu̱ꞌ xráá xoꞌ nu̱ꞌ rque xoꞌ nu̱ꞌ mán rlij rihaan xoꞌ ado̱nj. Ne̱ nuvi̱i niga̱nꞌ ne aꞌneꞌ rá nij xoꞌ ga̱ suun taj nana̱ nihánj a: Síí sa̱ꞌ ina̱nj uxrá me Yaꞌanj Si̱j ꞌNi̱j Raꞌa man níꞌ Síí Uun Nucua̱j ꞌYaj Cunuda̱nj a. Ne̱ soꞌ me síí nicu̱nꞌ ya̱j do̱ꞌ, síí nicu̱nꞌ asi̱j naá do̱ꞌ, síí cuchi̱ꞌ do̱ꞌ ado̱nj, taj caꞌa̱nj nij xcuu yoꞌ a.

1 Pedro 1:5

Nucua̱j ndoꞌo Yaꞌanj, ne̱ cheꞌé se amán rá soj niꞌya̱j soj man Cristó, cheꞌé dan tumé Yaꞌanj man soj, cheꞌé rej caꞌve̱e nani̱i̱ soj rihaan sayuun ne̱ cavi̱i̱ sa̱ꞌ soj asa̱ꞌ quisíj güii caꞌa̱nj niꞌya̱ chumii̱ nihánj ne̱ queneꞌe̱n níꞌ nu̱ꞌ se vaa quiꞌya̱j soꞌ cheꞌé níꞌ ado̱nj.

Gálatas 3:28

Ne̱ se̱ cataj soj se vaa taꞌa̱j soj me yuvii̱ israelitá ne̱ ꞌó taꞌa̱j soj me yuvii̱ yaníj maꞌ. Ne̱ se̱ cataj soj se vaa taꞌa̱j soj me mozó ne̱ ꞌó taꞌa̱j soj, né si̱j uun mozó me ꞌó taꞌa̱j soj, cata̱j soj maꞌ. Ne̱ se̱ cataj soj se vaa taꞌa̱j soj me snóꞌo ne̱ ꞌó taꞌa̱j soj me chana̱ maꞌ. ꞌO̱ se tana̱nj ase vaa o̱rúnꞌ yuvii̱ vaa ta̱ranꞌ soj, ne̱ ꞌo̱ cuya̱a̱n vaa ta̱ranꞌ soj cheꞌé se noco̱ꞌ soj man Cristó Jesús na̱nj á.

1 Corintios 1:10

Dan me se cuno̱ soj caꞌmi̱j, tinu̱j, nocoj. Ne̱ cheꞌé se‑chuvi̱i ya̱ Jesucristó Si̱j ꞌNi̱j Raꞌa man níꞌ roꞌ, rqueé ꞌu̱nj ya̱j rihaan nij soj se vaa ꞌo̱ cuya̱a̱n ga̱a̱ rá nimán ta̱ranꞌ soj do̱ꞌ, ꞌo̱ cuya̱a̱n caꞌmi̱i̱ soj do̱ꞌ, ꞌo̱ rcuaꞌa̱a̱n ga̱a̱ soj do̱ꞌ, raj chugua̱nj.

Romanos 12:5

Dan me se a̱j canocoꞌ cunuda̱nj níꞌ man Cristó, ne̱ cheꞌé dan ase vaa nu̱ꞌ nee̱ man ꞌo̱ yuvii̱ roꞌ, da̱nj vaa nu̱ꞌ níꞌ, ne̱ ino̱ vaa suun vaa rihaan ꞌo̱ ꞌo̱ níꞌ, tza̱j ne̱ racuíj tuviꞌ níꞌ,

Romanos 9:17

Ne̱ rihaan Danj Yaꞌanj nó nana̱ caꞌmii Yaꞌanj rihaan síí cuꞌna̱j Faraón ga̱a cataj Yaꞌanj a: “Guún so̱ꞌ síí nica̱j suun, quiꞌyáj, ga̱a ne̱ queneꞌe̱n yuvii̱ da̱j qui̱ránꞌ so̱ꞌ, qui̱ꞌyáj, ne̱ chaꞌnu̱u̱ nana̱ rihaan nu̱ꞌ chumii̱ se vaa Yaꞌanj si̱j nucua̱j uxrá mej ado̱nj.” Da̱nj cataj Yaꞌanj rihaan Faraón ga̱a naá a.

San Juan 16:28

Dan me se cavii ꞌu̱nj rihaan Réj Yaꞌanj, ne̱ caꞌnáꞌ ꞌu̱nj rihaan chumii̱ nihánj a. Ga̱a ne̱ cavi̱i̱ uún ꞌu̱nj rihaan chumii̱ nihánj, ne̱ nucui̱ꞌ uún ꞌu̱nj rihaan Réj Yaꞌanj ado̱nj ―taj Jesús rihaan nij síí tucuꞌyón snana̱ soꞌ a.

San Juan 7:33

Cheꞌé dan cataj Jesús a: ―Do̱j güii ca̱yáán ꞌu̱nj ga̱ nij soj, ne̱ cavi̱i̱ ꞌu̱nj quina̱nꞌ ꞌu̱nj rihaan síí caꞌnéé manj caꞌna̱ꞌ ꞌu̱nj na̱nj ado̱nj.

San Mateo 10:16

’Ni̱ꞌyaj soj á. Caꞌne̱j ꞌu̱nj man soj rej ma̱n síí me rá quiꞌya̱j sayuun man soj a. Ase vaa matzinj va̱j rej ma̱n xcaꞌyanj caꞌnu̱ꞌ roꞌ, da̱nj ga̱a̱ soj ado̱nj. Cheꞌé dan ga̱a̱ cu̱u raa̱ soj á. Ase cui̱j raa̱ xcuáá roꞌ, da̱nj cui̱j ga̱a̱ raa̱ soj á. Tza̱j ne̱ ase vaa taj va̱j cacunꞌ tumé chaꞌaa̱n roꞌ, da̱nj ga̱a̱ soj, se̱ tumé soj cacunꞌ maꞌ.

San Mateo 5:48

Cheꞌé dan sese né si̱j tihaꞌ yuꞌunj do̱ꞌ, si̱j yaníj do̱ꞌ, me soj, ne̱ no̱ xcúún soj gu̱un soj síí vaa sa̱ꞌ ina̱nj nimán ado̱nj. Ne̱ ase vaa síí sa̱ꞌ ina̱nj me Yaꞌanj roꞌ, da̱nj ga̱a̱ maꞌa̱n soj, síí sa̱ꞌ ina̱nj gu̱un soj ado̱nj.

Apocalipsis 19:12

Ne̱ ase vaa yaꞌan chuguu̱n vaa rlij rihaan soꞌ, ne̱ queꞌe̱e̱ ndoꞌo cachriin nuû raa̱ soꞌ a. Ne̱ nó se‑chuvi̱i soꞌ xráá soꞌ, tza̱j ne̱ dan me se o̱rúnꞌ soꞌ me síí neꞌen da̱j cuꞌna̱j soꞌ a.

Apocalipsis 15:4

Señor, me síí se̱ caꞌvej rá cara̱a̱ cochro̱j rihaan so̱ꞌ ga̱. Veꞌé caꞌmi̱i̱ cunuda̱nj yuvii̱ ni̱ꞌyaj nij yuvii̱ mán so̱ꞌ a. ꞌO̱ se o̱rúnꞌ so̱ꞌ me síí sa̱ꞌ ina̱nj, ne̱ caꞌna̱ꞌ cunuda̱nj nij yuvii̱ ma̱n rihaan chumii̱, ne̱ cara̱a̱ gue̱e̱ nij yuvii̱ rihaan so̱ꞌ na̱nj á. ꞌO̱ se queneꞌen nij soꞌ nu̱ꞌ nij suun nica̱ quiꞌyáá so̱ꞌ ado̱nj. Na̱nj taj chraꞌ cachráá nij síí quiꞌyaj canaán yoꞌ a.

Judas 1:24

Cara̱a̱ cochro̱j soj rihaan síí uun nucua̱j ca̱ráán rihaan soj se̱ quiꞌyaj soj cacunꞌ do̱ꞌ, síí uun nucua̱j tu̱mé man soj nda̱a güii ca̱yáán soj rihaan soꞌ rej niꞌndaj ya̱ veꞌé vaa do̱ꞌ á. Rej yoꞌ me se ga̱a̱ nica̱ nimán soj, ne̱ ga̱a̱ niha̱ꞌ uxrá rá nimán soj ado̱nj.

1 Juan 3:12

Dan me se se̱ quiꞌyaj níꞌ nda̱a vaa quiꞌyaj síí cuꞌna̱j Caín ga̱a naá maꞌ. ꞌO̱ se si̱j noco̱ꞌ stucua̱nj Síí Chre̱e me soꞌ, ne̱ ticaviꞌ ya̱ soꞌ tinúú soꞌ ado̱nj. Ne̱ me cheꞌé quiꞌyaj soꞌ da̱nj, rá soj ga̱. ꞌO̱ se nu̱ꞌ rasu̱u̱n quiꞌyaj soꞌ me se ina̱nj chiꞌi̱i̱ ndoꞌo quiꞌyaj maꞌa̱n soꞌ, ne̱ tinúú soꞌ me se sa̱ꞌ ina̱nj vaa rasu̱u̱n quiꞌyaj tinúú soꞌ, ne̱ cheꞌé dan guun xco̱j ruva̱a̱ rá soꞌ niꞌya̱j soꞌ tinúú soꞌ ado̱nj.

San Juan 17:6

’Ne̱ xa̱ꞌ nij síí rqué so̱ꞌ manj síí cavii rihaan chumii̱ nihánj, tza̱j ne̱ cataj xnaꞌanj ꞌu̱nj snana̱ so̱ꞌ rihaan nij soꞌ a. Ne̱ si̱j cuno rihaan so̱ꞌ me nij soꞌ, ne̱ rqué so̱ꞌ man nij soꞌ rihanj, ne̱ a̱j quiꞌyaj nij soꞌ nda̱a vaa taj snana̱ so̱ꞌ na̱nj á.

San Juan 17:23

Dan me se ca̱yáán ꞌu̱nj ga̱ nij soꞌ nda̱a vaa yáán so̱ꞌ ga̱ ꞌu̱nj, cheꞌé rej ga̱a̱ cuya̱a̱n nu̱ꞌ nimán ta̱ranꞌ nij soꞌ á. Nda̱a síj, ga̱a ne̱ queneꞌe̱n nij síí noco̱ꞌ se‑chre̱j chumii̱ nihánj se vaa ma̱ꞌán so̱ꞌ caꞌnéé mán ꞌu̱nj, ne̱ queneꞌe̱n nij soꞌ se vaa ꞌe̱e̱ rá so̱ꞌ man nij síí rqué so̱ꞌ mán ꞌu̱nj da̱j se vaa ꞌe̱e̱ rá so̱ꞌ mán ꞌu̱nj ado̱nj.