Hechos 23:15 - Triqui de San Juan Copala

¹⁵ Cheꞌé dan soj ga̱ Xꞌneꞌ Nij Síí Ata̱ Suun Noco̱o Doj roꞌ, cata̱j xnaꞌanj soj rihaan tanuu uun chij doj se vaa me rá soj caꞌna̱ꞌ uún Pabló rihaan soj cheꞌé se me rá soj xca̱j sa̱ꞌ soj doj cuentá cheꞌé Pabló, cata̱j soj rihaan tanuu uun chij doj yoꞌ a. Tza̱j ne̱ cuma̱n núj rá chrej, ca̱ráán núj chrej man Pabló, ne̱ se̱ gaa iꞌna̱ꞌ Pabló cuchi̱ꞌ Pabló rihaan soj, quiꞌya̱j núj a̱ maan ado̱nj ―taj nij soꞌ rihaan nij xrej ata̱ suun noco̱o do̱ꞌ, rihaan tuviꞌ nij soꞌ síí uun chij do̱ꞌ a.

Hechos 23:15 Referans Kwoze

Hechos 22:30

Ne̱ rangaꞌ ꞌó güii me se tanuu romanó uun chij doj roꞌ, guun ya̱ rá soꞌ xca̱j soꞌ cuentá me cheꞌé guun rá nij síí israelitá cuta̱ꞌ nij soꞌ cacunꞌ xráá Pabló a. Cheꞌé dan caꞌneꞌ soꞌ suun se vaa nache̱ nij tanuu man Pabló, ne̱ caꞌneꞌ soꞌ suun se vaa cunu̱u chre̱ꞌ nij xrej ata̱ suun noco̱o do̱ꞌ, nu̱ꞌ Xꞌneꞌ Nij Síí Ata̱ Suun Noco̱o Doj rihaan nij yuvii̱ israelitá do̱ꞌ, ne̱ quiꞌya̱j nij soꞌ juntá a. Ga̱a ne̱ catúj Pabló rej ma̱n nij soꞌ, quiꞌyaj soꞌ, ne̱ canicunꞌ Pabló tanu̱u̱ rihaan nij soꞌ a.

Hechos 25:3

cachíín niꞌya̱j nij soꞌ rihaan Festo se vaa caꞌne̱ꞌ soꞌ suun se vaa caꞌna̱ꞌ Pabló nda̱a chumanꞌ Jerusalén a. ꞌO̱ se guun rá nij soꞌ ca̱ráán nij soꞌ chrej ne̱ ticavi̱ꞌ nij soꞌ man Pabló a.

San Juan 18:12

Dan me se taꞌaa nij tanuu romanó do̱ꞌ, tanuu uun chij doj do̱ꞌ, nij tanuu nu̱u̱ rihaan nij síí uun chij rihaan nij yuvii̱ israelitá do̱ꞌ, man Jesús, ne̱ numíj nij soꞌ raꞌa soꞌ a.

Hechos 23:1

Dan me se niꞌya̱j uxrá Pabló man ta̱ranꞌ nij síí uun chij yoꞌ, ne̱ cataj soꞌ a: ―Cuno̱ nij soj caꞌmi̱j, tinu̱j. Nu̱ꞌ cavii nu̱ꞌ caꞌnaꞌ roꞌ, ina̱nj sa̱ꞌ uxrá ꞌyáá ꞌu̱nj rihaan Yaꞌanj, raj a. Taj cacunꞌ tumej maꞌ ―taj Pabló rihaan nij soꞌ a.

Hechos 23:6

Dan me se xcaj Pabló cuentá se vaa taꞌa̱j nij síí uun chij yoꞌ me síí saduceo ne̱ ꞌó taꞌa̱j nij soꞌ me síí fariseo, ne̱ cheꞌé dan caguáj soꞌ, cataj soꞌ rihaan cunuda̱nj nij soꞌ a: ―Síí fariseo mej, ne̱ taꞌníí síí fariseo mej, tinu̱j. Ne̱ nihánj me se cutaꞌ nii cacunꞌ xráj cheꞌé se ꞌu̱nj me síí naꞌvi̱j ya̱ se vaa cunu̱u iꞌna̱ꞌ uún nij síí caviꞌ vaa güii, quiꞌya̱j Yaꞌanj, tinu̱j ―taj Pabló rihaan cunuda̱nj nij soꞌ a.