Hechos 12:3 - Triqui de San Juan Copala

³ Dan me se xcaj Herodes cuentá se vaa guun niha̱ꞌ rá nij yuvii̱ israelitá se vaa caviꞌ Jacobo, ne̱ cheꞌé dan taꞌaa nij tanuu man Pedró, quiꞌyaj uún soꞌ a. Ga̱a canuû chaꞌanj chá nij yuvii̱ israelitá rachrúún ne atúj levadura me quiꞌyaj Herodes da̱nj a.

Hechos 12:3 Referans Kwoze

Hechos 24:27

Dan me se quisíj vi̱j ya̱ yoꞌ ꞌni̱j Pabló tagaꞌ, ga̱a ne̱ xꞌnéj suun raꞌa Félix, ne̱ catúj síí cuꞌna̱j Porcio Festo a. Ne̱ guun rá Félix quiꞌya̱j soꞌ se lu̱j cheꞌé nij yuvii̱ israelitá, ne̱ cheꞌé dan tanáj soꞌ man Pabló tagaꞌ a.

San Juan 12:43

Dan me se niha̱ꞌ rá nij soꞌ doj cuno̱ nij soꞌ caꞌmi̱i̱ sa̱ꞌ yuvii̱ cheꞌé nij soꞌ, ne̱ ne cara̱yaꞌa̱nj nij soꞌ se vaa veꞌé caꞌmi̱i̱ Yaꞌanj cheꞌé nij soꞌ a̱ maꞌ.

Hechos 25:9

Dan me se guun rá Festo quiꞌya̱j soꞌ se lu̱j cheꞌé nij síí ata̱ suun rihaan nij yuvii̱ israelitá, ne̱ cheꞌé dan cataj soꞌ rihaan Pabló a: ―Caꞌve̱j rá so̱ꞌ cavi̱i̱ so̱ꞌ nda̱a chumanꞌ Jerusalén ne̱ nda̱a tiꞌyaj caꞌne̱ꞌ ꞌu̱nj cacunꞌ cheꞌé so̱ꞌ cheꞌé nij rasu̱u̱n nihánj naꞌ ―taj soꞌ, xnáꞌanj soꞌ man Pabló a.

Gálatas 1:10

Me rá ꞌu̱nj ga̱a̱ niha̱ꞌ rá yuvii̱ ni̱ꞌyaj yuvii̱ mán ꞌu̱nj, rá soj naꞌ. Taj maꞌ. ꞌO̱ se ina̱nj me rá ꞌu̱nj ga̱a̱ niha̱ꞌ rá Yaꞌanj ni̱ꞌyaj Yaꞌanj manj ado̱nj. Dan me se ga̱a rque̱ me se ina̱nj me rá ꞌu̱nj ga̱a̱ niha̱ꞌ rá yuvii̱ ni̱ꞌyaj yuvii̱ manj, tza̱j ne̱ ya̱j roꞌ, taj maꞌ. Sese ina̱nj gu̱un rá ꞌu̱nj ga̱a̱ niha̱ꞌ rá yuvii̱ ni̱ꞌyaj yuvii̱ mán ꞌu̱nj, ne̱ né si̱j ꞌyaj se‑su̱u̱n Cristó mé ꞌu̱nj a̱ maan chugua̱nj.

Hechos 20:6

Ga̱a ne̱ ga̱a cachén chaꞌanj chá nij yuvii̱ israelitá rachrúún ne atúj levadura, ne̱ cavii rój ꞌo̱ rihoo chéé rihaan na, ne̱ cavii rój chumanꞌ Filipos, caꞌanj rój, ne̱ cachén ꞌu̱nꞌ güii, ga̱a ne̱ cuchiꞌ rój rihaan nij soꞌ chumanꞌ Troas yoꞌ a. Ga̱a ne̱ guun ra̱a̱n núj ꞌó chi̱j güii chumanꞌ yoꞌ a.

1 Tesalonicenses 2:4

ꞌO̱ se guun nucua̱j rá Yaꞌanj man núj, ne̱ caꞌneꞌ soꞌ suun rihaan núj nata̱ꞌ núj nana̱ sa̱ꞌ cheꞌé Cristó, ne̱ da̱nj ꞌyaj gue̱e̱ núj ado̱nj. Ne uun rá núj cata̱j yuvii̱ se vaa veꞌé ꞌyaj núj maꞌ. Ma̱an se me rá núj gu̱un niha̱ꞌ rá Yaꞌanj ni̱ꞌyaj Yaꞌanj man núj, ne̱ Yaꞌanj me síí acaj cuentá da̱j vaa nimán núj ado̱nj.

San Juan 21:18

Cuano̱ nihánj me se cata̱j yá yá ꞌu̱nj rihaan so̱ꞌ se vaa ga̱a mé so̱ꞌ síí tachru̱u̱, ne̱ numíj ma̱ꞌán so̱ꞌ yatzéj catuún so̱ꞌ, ne̱ chéé so̱ꞌ me rej maꞌa̱n guun rá so̱ꞌ a. Tza̱j ne̱ asa̱ꞌ guún so̱ꞌ chii nga̱, ne̱ ti̱cúnꞌ so̱ꞌ raꞌá so̱ꞌ, ne̱ ꞌó soꞌ nu̱míj catuún so̱ꞌ, ne̱ ni̱caj soꞌ mán so̱ꞌ caꞌa̱nj soꞌ me rej maꞌa̱n rá soꞌ caꞌa̱nj soꞌ, ne̱ nda̱ꞌ se naꞌvej rá so̱ꞌ caꞌa̱nj so̱ꞌ, tza̱j ne̱ va̱j so̱ꞌ ado̱nj ―taj Jesús rihaan Pedró a.

San Juan 19:11

Ga̱a ne̱ cataj Jesús rihaan soꞌ a: ―Sese né Yaꞌa̱nj me síí cuneꞌ mán so̱ꞌ ca̱tá so̱ꞌ suun nihánj, ne̱ ne gu̱un nu̱cuáá so̱ꞌ qui̱ꞌyáá so̱ꞌ a̱ doj rasu̱u̱n asuun tza̱j maꞌ. Cheꞌé dan síí tacuachén manj rihaan so̱ꞌ me síí tumé doj cacunꞌ rihaan so̱ꞌ ado̱nj ―taj Jesús rihaan Pilató yoꞌ a.

San Mateo 26:17

Ne̱ güii ꞌo̱ ga̱a tiha̱j guun cheꞌe̱ Chaꞌanj Pascuá ga̱a chá nij yuvii̱ israelitá rachrúún ne atúj levadura me se cuchiꞌ nij síí tucuꞌyón snana̱ Jesús rihaan Jesús, ne̱ xnáꞌanj nij soꞌ man soꞌ, cataj nij soꞌ a: ―Me rej quiꞌya̱j chuvi̱i núj cha̱ xtiꞌno̱ níꞌ Chaꞌanj Pascuá, rá so̱ꞌ ga̱ ―taj nij soꞌ rihaan Jesús a.

Hechos 4:13

Dan me se queneꞌen nij soꞌ se vaa ne cuchuꞌvi̱ꞌ Pedró ga̱ Juan ne̱ sca̱ꞌ uxrá caꞌmii ro̱j soꞌ, ne̱ xcaj nij soꞌ cuentá se vaa né si̱j tucuꞌyón yanj me ro̱j soꞌ, tza̱j ne̱ sa̱ꞌ uxrá nariꞌ ro̱j soꞌ a. Cheꞌé dan caráyaꞌa̱nj nij soꞌ a. Ne̱ queneꞌen nij soꞌ se vaa ro̱j soꞌ me síí cachéé ga̱ Jesús a.

Hechos 2:14

Ga̱a ne̱ canicunꞌ síí cuꞌna̱j Pedró ga̱ ꞌó xa̱a̱n nij síí ata̱ suun caꞌa̱nj nata̱ꞌ snana̱ Jesús, ne̱ nucua̱j ndoꞌo caꞌmii Pedró ne̱ nataꞌ soꞌ nana̱ nihánj a: ―Soj si̱j ya̱nj estadó Judea do̱ꞌ, cunuda̱nj soj si̱j ma̱n chumanꞌ Jerusalén nihánj do̱ꞌ, nano̱ xre̱j soj nana̱ caꞌmi̱j rihaan soj, ne̱ xca̱j soj cuentá cheꞌé rasu̱u̱n nihánj á.

Hechos 12:4

Dan me se caxríj nij tanuu tagaꞌ man Pedró, ne̱ caꞌneꞌ Herodes suun rihaan xnu̱ꞌ ya̱a̱n (16) tanuu se vaa tu̱mé nij tanuu man Pedró, ne̱ caꞌa̱nj ya̱ xꞌneꞌ me nij tanuu yoꞌ a. ꞌO̱ se guun rá Herodes se vaa nda̱a cache̱n Chaꞌanj Pascuá, ga̱a ne̱ quiri̱i̱ soꞌ man Pedró ne̱ ti̱haa̱n soꞌ man Pedró rihaan nij yuvii̱ israelitá, rá soꞌ a.