Hebreos 9:25 - Triqui de San Juan Copala

²⁵ Tza̱j ne̱ se̱ quiꞌyaj soꞌ nda̱a vaa ꞌyaj nij xrej ata̱ suun noco̱o doj ma̱n rihaan chumii̱ nihánj maꞌ. Nij xrej me se nica̱j nij xrej ton man xcuu atúj nij xrej rá Rej Gue̱e̱ Doj yoꞌ da̱j a̱ yoꞌ ado̱nj. Tza̱j ne̱ ne cachi̱in niga̱nj rque̱ Cristó ton man maꞌa̱n soꞌ rihaan Yaꞌanj maan ado̱nj.

Hebreos 9:25 Referans Kwoze

Hebreos 9:12

Ne̱ o̱rúnꞌ yu̱u̱n catúj soꞌ rá Rej Gue̱e̱ Doj yoꞌ, ne̱ yu̱u̱n cheꞌe̱ navij cacunꞌ tumé níꞌ nu̱ꞌ cavii nu̱ꞌ caꞌanj, quiꞌyaj soꞌ na̱nj ado̱nj. Tza̱j ne̱ né na̱nj ton man tana do̱ꞌ, ton man scúj leꞌe̱j do̱ꞌ, me nica̱j soꞌ maꞌ. Tana̱nj ton man maꞌa̱n ya̱ soꞌ nica̱j soꞌ ga̱a catúj soꞌ rihaan Yaꞌanj, ne̱ quiꞌyaj canaán ya̱ soꞌ na̱nj ado̱nj.

Hebreos 9:7

Tza̱j ne̱ rque ꞌó cuartó gue̱e̱ doj roꞌ, o̱rúnꞌ güii rque ꞌo̱ yoꞌ atúj xrej ata̱ suun noco̱o doj rá cuartó yoꞌ na̱nj ado̱nj. Ne̱ dan me se rej gue̱e̱ doj yoꞌ me se ina̱nj ton nica̱j xrej atúj xrej rej yoꞌ ado̱nj. Ne̱ ton yoꞌ me se yoꞌ me ton cheꞌé cacunꞌ tumé maꞌa̱n xrej do̱ꞌ, cheꞌé cacunꞌ quiꞌyaj nij yuvii̱ ga̱a ne xca̱j nij yuvii̱ cuentá se vaa cacunꞌ me se vaa quiꞌyaj nij soꞌ do̱ꞌ ado̱nj.

Hebreos 9:14

ga̱a ne̱ táá a̱ ton man Cristó, ne̱ sa̱ꞌ doj vaa yoꞌ rihaan nu̱ꞌ nij rasu̱u̱n yoꞌ na̱nj chugua̱nj. Dan me se taj a̱ doj cacunꞌ tumé Cristó maꞌ. ꞌO̱ se nicu̱nꞌ Nimán Yaꞌanj nu̱ꞌ cachén nu̱ꞌ caꞌnaꞌ ne̱ nu̱ꞌ cavii nu̱ꞌ caꞌanj, ne̱ cayáán soꞌ ga̱ Cristó, ne̱ cheꞌé dan rqué Cristó man maꞌa̱n soꞌ rihaan Yaꞌanj chugua̱nj. Cheꞌé dan me doj a̱ cunu̱u sa̱ꞌ nimán níꞌ, quiꞌya̱j ton man Cristó, ne̱ navi̱j cacunꞌ tumé níꞌ cheꞌé se chiꞌi̱i̱ quiꞌyaj níꞌ asi̱j rque̱ doj a. ꞌO̱ se daj chiha̱a̱ míj se̱ cavii sa̱ꞌ níꞌ, quiꞌya̱j se ꞌyaj maꞌa̱n níꞌ maꞌ. Tza̱j ne̱ ya̱j roꞌ, quiꞌya̱j níꞌ nu̱ꞌ rasu̱u̱n rej rihaan níꞌ, ne̱ canoco̱ꞌ ina̱nj níꞌ man Yaꞌanj si̱j vaa iꞌna̱ꞌ ya̱j na̱nj á.

Hebreos 10:19

Dan me se cheꞌé se cayanj ton man Jesús roꞌ, cheꞌé dan nucua̱j rá níꞌ catu̱u̱ níꞌ rá Rej Gue̱e̱ Ya̱ Doj rej ya̱nj maꞌa̱n Yaꞌanj, tinu̱j, nocoj.

Hebreos 9:26

ꞌO̱ se sese vaa cheꞌé quiꞌya̱j soꞌ da̱nj, ne̱ no̱ xcúún soꞌ queꞌe̱e̱ ndoꞌo quira̱nꞌ soꞌ sayuun asi̱j ga̱a quiꞌyaj Yaꞌanj chumii̱ nihánj nda̱a cuano̱ ado̱nj. Tza̱j ne̱ ya̱j roꞌ, nichrunꞌ navi̱j chumii̱ nihánj, ne̱ nda̱a ya̱j caꞌnaꞌ Cristó rihaan chumii̱ nihánj, ne̱ o̱rúnꞌ yu̱u̱n caviꞌ soꞌ cheꞌé níꞌ, ne̱ navij nu̱ꞌ cacunꞌ tumé níꞌ na̱nj ado̱nj.

Hebreos 10:10

Ne̱ cheꞌé se yu̱u̱n cheꞌe̱ nagoꞌ Jesucristó man maꞌa̱n soꞌ rihaan Yaꞌanj nda̱a vaa guun rá Yaꞌanj quiꞌya̱j soꞌ roꞌ, cheꞌé dan a̱j cunuu sa̱ꞌ nimán níꞌ rihaan Yaꞌanj ado̱nj.

Hebreos 9:2

Dan me se cuneꞌ nij yuvii̱ israelitá nuvií mantá, ne̱ vaa vi̱j cuartó rque nuvií yoꞌ a. Ne̱ rque cuartó atúj xrej asino ya̱a̱n roꞌ, nuû agaꞌ ta̱j agaꞌ yaꞌan do̱ꞌ, chruun mesá cutaꞌ nii rachrúún rihaan Yaꞌanj do̱ꞌ, ne̱ cuartó cuꞌna̱j Rej Gue̱e̱ me cuartó yoꞌ a.