Hebreos 13:16 - Triqui de San Juan Copala

¹⁶ Ne̱ se̱ tanáj soj suun sa̱ꞌ ꞌyaj soj do̱ꞌ, suun racuíj soj man tinúú soj síí nique̱ do̱ꞌ maꞌ. ꞌO̱ se ꞌó se sa̱ꞌ rqué níꞌ man Yaꞌanj me uún yoꞌ, ne̱ aranꞌ rá Yaꞌanj niꞌya̱j Yaꞌanj man síí ꞌyaj da̱nj ado̱nj.

Hebreos 13:16 Referans Kwoze

2 Tesalonicenses 3:13

Ne̱ xa̱ꞌ maꞌa̱n soj, tza̱j ne̱ se̱ caꞌneꞌ rá soj quiꞌya̱j soj suun sa̱ꞌ, maan tinu̱j, maan nocoj.

Romanos 12:13

Sese vaa se achiin rihaan tinúú soj síí noco̱ꞌ man Cristó, ne̱ ra̱cuíj soj man nij soꞌ a. Ne̱ veꞌé quiꞌya̱j soj caꞌve̱j soj cara̱nꞌ yuvii̱ tucuá soj do̱ꞌ, cha̱ yuvii̱ ga̱ soj do̱ꞌ á.

Gálatas 6:10

Dan me se ya̱j vaa yaꞌnúj rihaan níꞌ roꞌ, quiꞌya̱j ndoꞌo níꞌ se sa̱ꞌ cuano̱, ra̱cuíj níꞌ man cunuda̱nj yuvii̱ á. Tza̱j ne̱ doj a̱ gu̱un rá níꞌ ra̱cuíj níꞌ man nij tinúú níꞌ nij síí noco̱ꞌ man Cristó ado̱nj.

Hebreos 6:10

ꞌO̱ se né si̱j chiꞌi̱i̱ me Yaꞌanj maꞌ. Si̱j vaa nica̱ rá me Yaꞌanj, ne̱ ꞌo̱ cu̱nuû rá Yaꞌanj ta̱ranꞌ nij suun sa̱ꞌ quiꞌyaj soj ga̱a canocoꞌ soj man soꞌ na̱nj á. Ne̱ ꞌo̱ cu̱nuû rá Yaꞌanj se vaa ꞌyaj soj cheꞌé se aráj cochro̱j soj rihaan soꞌ na̱nj chugua̱nj. Dan me se quiꞌyaj uxrá soj suun racuíj man nij síí noco̱ꞌ man Cristó ga̱a rque̱, ne̱ ꞌo̱ da̱nj ꞌyaj ya̱ soj na̱nj ado̱nj.

1 Timoteo 6:18

Ma̱an se cata̱j xnaꞌanj so̱ꞌ rihaan nij síí ruꞌvee se vaa quiꞌya̱j nij soꞌ suun sa̱ꞌ, cheꞌé rej gu̱un ruꞌvee nij soꞌ rihaan Yaꞌanj, ne̱ veꞌé rque̱ nij soꞌ rasu̱u̱n achiin man tinúú nij soꞌ síí nique̱ á.

Filipenses 4:18

Dan me se nacaj ꞌu̱nj cunuda̱nj se vaa caꞌnéé soj rihanj, ne̱ a̱ ꞌó rasu̱u̱n ne achiin manj a̱ maꞌ. Ne̱ saꞌanj caꞌnéé soj rihanj ga̱ Epafrodito me se narqué soꞌ nu̱ꞌ saꞌanj yoꞌ rihanj, ne̱ guun niha̱ꞌ rá Yaꞌanj niꞌya̱j Yaꞌanj se vaa rqué soj saꞌanj yoꞌ manj, ne̱ ase vaa se acaa rihaan chraan altar, ne̱ da̱j ndoꞌo gunꞌ yoꞌ roꞌ, da̱nj vaa saꞌanj yoꞌ niꞌya̱j Yaꞌanj ado̱nj.

Efesios 4:28

Sese vaa síí itu̱u̱ ꞌni̱j scaꞌnúj soj, ne̱ caꞌne̱ꞌ rá soꞌ ga̱ suun ꞌyaj itu̱u̱ rasu̱u̱n na̱nj á. Tana̱nj veꞌé quiꞌya̱j suun maꞌa̱n soꞌ suun sa̱ꞌ, ga̱a ne̱ sese achiin rasu̱u̱n rihaan tinúú soꞌ, ne̱ gu̱un nucua̱j soꞌ rque̱ maꞌa̱n soꞌ rasu̱u̱n rihaan tinúú soꞌ á.

1 Tesalonicenses 5:15

Tu̱mé soj man soj se̱ guun quiꞌya̱j chiꞌi̱i̱ ꞌo̱ tuviꞌ soj man síí ꞌyaj chiꞌi̱i̱ man soꞌ maꞌ. Tana̱nj ina̱nj suun sa̱ꞌ quiꞌya̱j soj cheꞌé tuviꞌ soj do̱ꞌ, cheꞌé cunuda̱nj yuvii̱ do̱ꞌ á.

Hechos 10:38

Ne̱ nana̱ yoꞌ taj se vaa cuneꞌ Yaꞌanj man Jesús síí cavii chumanꞌ Nazaret, ne̱ rqué ndoꞌo Yaꞌanj Nimán Yaꞌanj man soꞌ, ne̱ rqué ndoꞌo Yaꞌanj rej nucua̱j man soꞌ a. Ne̱ dan me se cachéé Jesús, ne̱ quiꞌyaj ndoꞌo soꞌ suun sa̱ꞌ, ne̱ cunuda̱nj nij síí ranꞌ sayuun ꞌyaj Síí Chre̱e cheꞌé se quirii taꞌngaꞌ Síí Chre̱e rihaan nij soꞌ roꞌ, nahuun sa̱ꞌ nij soꞌ, quiꞌyaj Jesús a. ꞌO̱ se Yaꞌanj roꞌ, racuíj ndoꞌo man Jesús ꞌyaj soꞌ da̱nj ado̱nj.

San Lucas 18:22

Ga̱a ne̱ cataj Jesús rihaan soꞌ a: ―Da̱j o̱rúnꞌ rasu̱u̱n achiin ya̱ mán so̱ꞌ na̱nj á. Cutuꞌve̱e̱ so̱ꞌ cunuda̱nj siꞌyáá so̱ꞌ, ne̱ saꞌanj quiri̱ꞌ so̱ꞌ roꞌ, caxri̱i̱ so̱ꞌ ston nij síí nique̱, ne̱ cuma̱n ndoꞌo siꞌyáá so̱ꞌ rej xta̱ꞌ, quiꞌya̱j Yaꞌanj na̱nj ado̱nj. Ne̱ dan me se caꞌna̱ꞌ so̱ꞌ, ne̱ ca̱nocóꞌ so̱ꞌ manj, caꞌa̱nj níꞌ á ―taj Jesús rihaan soꞌ a.

3 Juan 1:11

Tinu̱j, se̱ guun qui̱ꞌyáá so̱ꞌ nda̱a vaa ꞌyaj nij síí chiꞌi̱i̱ maꞌ. Tana̱nj qui̱ꞌyáá so̱ꞌ nda̱a vaa ꞌyaj nij síí sa̱ꞌ á. ꞌO̱ se síí ꞌyaj se sa̱ꞌ roꞌ, Yaꞌanj ya̱ me Taꞌanj soꞌ ado̱nj. Ne̱ síí ꞌyaj se chiꞌi̱i̱ roꞌ, ne neꞌen soꞌ man Yaꞌanj a̱ maꞌ.

Gálatas 6:6

Dan me se síí tucuꞌyón snana̱ Yaꞌanj roꞌ, me se no̱ xcúún soꞌ rque̱ soꞌ taꞌa̱j nu̱ꞌ se sa̱ꞌ riꞌ soꞌ man síí tihaa̱n snana̱ Yaꞌanj nana̱ sa̱ꞌ rihaan soꞌ a.

Filemón 1:6

Dan me se cheꞌé se a̱j canocóꞌ so̱ꞌ stucua̱nj Jesús ga̱ ꞌó nij tinúú níꞌ, ne̱ cheꞌé dan achíín ni̱ꞌyáá ꞌu̱nj se vaa caꞌve̱e xca̱j ꞌó nij soꞌ cuentá cheꞌé nu̱ꞌ se sa̱ꞌ nica̱j nij tinu̱j nij soj qui̱ꞌyáá so̱ꞌ, ga̱a ne̱ doj a̱ caꞌve̱e cara̱a̱ cochro̱j nij soꞌ man Cristó a.

Filipenses 4:14

Tza̱j ne̱ cuna̱j uxrá quiꞌyaj soj racuíj soj manj ga̱a quiránꞌ ꞌu̱nj sayuun ga̱a rque̱ chugua̱nj.

Hechos 9:36

Dan me se chumanꞌ Jope yáán ꞌo̱ chana̱ tucuꞌyón snana̱ Jesús, ne̱ Tabita cuꞌna̱j noꞌ xnaꞌánj hebreo, ne̱ Dorcas me se‑chuvi̱i noꞌ xnaꞌánj griego a. Ne̱ chana̱ quiꞌyaj ina̱nj se sa̱ꞌ me noꞌ, ne̱ rqué ndoꞌo noꞌ rasu̱u̱n man nij síí nique̱ a.