Gálatas 4:6 - Triqui de San Juan Copala

⁶ Cuano̱ nihánj me se taꞌníí ya̱ Yaꞌanj me nij soj ado̱nj. Cheꞌé dan caꞌnéé Yaꞌanj man Nimán Taꞌníí soꞌ nimán níꞌ, ne̱ cheꞌé dan me taj níꞌ a: “Ata̱j Chij, Rej núj mé so̱ꞌ á”, taj níꞌ, aguáj níꞌ, ꞌyaj Nimán Taꞌníí soꞌ a.

Gálatas 4:6 Referans Kwoze

Romanos 5:5

Cheꞌé dan se̱ guun naꞌa̱j níꞌ maꞌ. ꞌO̱ se rqué Yaꞌanj Nimán Yaꞌanj man níꞌ, ne̱ Nimán Yaꞌanj tihaa̱n man níꞌ se vaa ꞌe̱e̱ uxrá rá Yaꞌanj man níꞌ ado̱nj.

Romanos 8:9

Tza̱j ne̱ ino̱ uxrá vaa nij soj sese ya̱ ya̱nj Nimán Yaꞌanj nimán soj á. Cheꞌé dan ne ꞌyaj soj nda̱a vaa me rá nee̱ man soj quiꞌya̱j soj maꞌ. Tana̱nj ina̱nj rihaan Nimán Yaꞌanj uno soj, ne̱ dan me se sese nuviꞌ Nimán Cristó yáán nimán ꞌo̱ soꞌ, ne̱ né si̱j ꞌni̱j raꞌa Cristó man me soꞌ maꞌ.

Filipenses 1:19

ꞌO̱ se neꞌén ꞌu̱nj se vaa cavi̱i̱ sa̱ꞌ ꞌu̱nj doj vaa güii, cheꞌé nu̱ꞌ se vaa ránꞌ ꞌu̱nj nihánj ado̱nj. Cavi̱i̱ sa̱ꞌ yá ꞌu̱nj doj cheꞌé se achíín niꞌya̱j soj rihaan Yaꞌanj cheꞌé ꞌu̱nj, ne̱ cheꞌé se racuíj ya̱ Nimán Jesucristó manj ado̱nj.

Efesios 2:18

ꞌO̱ se cheꞌé Cristó me se racuíj Nimán Yaꞌanj man níꞌ, ne̱ cheꞌé dan vaa yaꞌnúj rihaan ta̱ranꞌ níꞌ cachi̱nj niꞌya̱j maꞌa̱n níꞌ rihaan Rej níꞌ Yaꞌanj ado̱nj.

2 Corintios 3:17

Dan me se da̱nj vaa ese Nimán Yaꞌanj me Síí ꞌNi̱j Raꞌa man níꞌ, ne̱ dan me se rej ya̱nj Nimán Yaꞌanj me se vaa yaꞌnúj rej yoꞌ a.

Efesios 4:30

Ne̱ se̱ guun nano̱ rá Nimán Yaꞌanj, quiꞌya̱j soj maꞌ. Cheꞌé se ya̱nj Nimán Yaꞌanj ga̱ soj roꞌ, cheꞌé dan neꞌen ya̱ soj se vaa cavi̱i̱ sa̱ꞌ soj asa̱ꞌ quisíj güii ti̱nanii Yaꞌanj man níꞌ rihaan sayuun ado̱nj.

Judas 1:20

Tza̱j ne̱ soj roꞌ, ꞌo̱ xraan canoco̱ꞌ soj stucua̱nj Yaꞌanj tucuáán gue̱e̱, tinu̱j, nocoj. Ne̱ caꞌve̱j rá soj ra̱cuíj Nimán Yaꞌanj man soj cachi̱nj niꞌya̱j soj rihaan Yaꞌanj á.

San Juan 16:7

Tza̱j ne̱ ya̱ vaa nana̱ nihánj nana̱ cata̱j xnaꞌanj ꞌu̱nj rihaan soj, se vaa cavi̱i̱ sa̱ꞌ soj doj cheꞌé se caꞌa̱nj ꞌu̱nj ado̱nj. ꞌO̱ se sese se̱ caꞌanj ꞌu̱nj, ne̱ se̱ caꞌnaꞌ Nimán Yaꞌanj síí ra̱cuíj ndoꞌo man soj maꞌ. Tza̱j ne̱ sese caꞌa̱nj ꞌu̱nj, ne̱ caꞌne̱j ꞌu̱nj man soꞌ rihaan soj ado̱nj.

San Juan 14:16

Ga̱a ne̱ cachi̱nj niꞌya̱j ma̱ꞌanj rihaan Réj Yaꞌanj, ga̱a ne̱ caꞌne̱j soꞌ ꞌó síí cuchi̱ꞌ rihaan soj, ne̱ ra̱cuíj ndoꞌo soꞌ man soj, ne̱ ca̱yáán soꞌ ga̱ soj nu̱ꞌ cavii nu̱ꞌ caꞌanj a.

San Lucas 11:13

Dan me se nda̱ꞌ se síí chiꞌi̱i̱ nimán me soj, tza̱j ne̱ neꞌen soj rque̱ soj se sa̱ꞌ cha̱ taꞌníí soj ado̱nj. Cheꞌé dan táá a̱ Rej soj síí nicu̱nꞌ xta̱ꞌ, ne̱ soꞌ me síí rque̱ ya̱ Nimán man nij síí achíín Nimán Yaꞌanj rihaan soꞌ na̱nj ado̱nj ―taj Jesús rihaan nij síí tucuꞌyón snana̱ soꞌ a.

2 Corintios 1:22

Ne̱ soꞌ me síí cataj se vaa ya̱ ya̱ taꞌni̱j soꞌ me níꞌ, ne̱ caꞌnéé soꞌ Nimán soꞌ ca̱yáán nimán níꞌ, ne̱ cheꞌé dan guun ya̱ rá níꞌ se vaa ya̱ rque̱ soꞌ se sa̱ꞌ man níꞌ, vaa güii ado̱nj.

San Juan 15:26

’Dan me se caꞌne̱j ꞌu̱nj Nimán Yaꞌanj cavi̱i̱ soꞌ rej ya̱nj Yaꞌanj caꞌna̱ꞌ soꞌ rihaan soj, ne̱ ra̱cuíj ndoꞌo soꞌ man soj, ne̱ ina̱nj nana̱ ya̱ rque̱ soꞌ man soj a. Asa̱ꞌ caꞌnaꞌ Nimán Yaꞌanj rihaan soj, ga̱a ne̱ cata̱j xnaꞌanj soꞌ rihaan nij yuvii̱ cheꞌej ado̱nj.

San Lucas 11:2

Ga̱a ne̱ caꞌmii Jesús nana̱ nihánj rihaan nij soꞌ a: ―Na̱nj cata̱j soj ga̱a cachi̱nj niꞌya̱j soj rihaan Yaꞌanj á: Ata̱j Chij, síí nicu̱nꞌ xta̱ꞌ, me rá nimán núj cara̱a̱ cochro̱j yuvii̱ mán so̱ꞌ ado̱nj. Ne̱ me rá nimán núj gu̱un chij so̱ꞌ a. Ne̱ me rá nimán núj quiꞌya̱j yuvii̱ nu̱ꞌ se vaa me rá so̱ꞌ a. Ase vaa ꞌyaj nij síí ma̱n rej xta̱ꞌ nu̱ꞌ se vaa me rá so̱ꞌ roꞌ, da̱nj ga̱a̱ quiꞌya̱j núj si̱j ma̱n rihaan chumii̱ nihánj uún á.

San Juan 3:34

Síí caꞌnéé Yaꞌanj man roꞌ, me síí aꞌmii snana̱ Yaꞌanj á. ꞌO̱ se rqué uxrá Yaꞌanj Nimán Yaꞌanj man soꞌ ado̱nj.

1 Pedro 1:11

Dan me se naquiꞌyaj cu̱u uxrá ya̱ nij soꞌ aman caꞌna̱ꞌ síí caꞌne̱j Yaꞌanj rihaan chumii̱ a. ꞌO̱ se nica̱j yuꞌunj Nimán Cristó man nij soꞌ, ne̱ maꞌa̱n Nimán Cristó cataj xnaꞌanj rihaan nij soꞌ da̱j quira̱nꞌ maꞌa̱n Cristó asa̱ꞌ caꞌnaꞌ soꞌ do̱ꞌ, cheꞌé suun niꞌndaj ya̱ sa̱ꞌ caꞌna̱ꞌ asa̱ꞌ quisíj quiranꞌ soꞌ sayuun do̱ꞌ a.

Efesios 6:18

Ne̱ niga̱nj cachi̱nj niꞌya̱j uxrá soj rihaan Yaꞌanj, ne̱ ra̱cuíj Nimán Yaꞌanj man soj nacu̱nj soj ne̱ cachi̱nj niꞌya̱j soj ado̱nj. Se̱ caꞌneꞌ rá soj maꞌ. Tana̱nj ꞌo̱ cachi̱nj niꞌya̱j uxrá soj cheꞌé ta̱ranꞌ nij síí noco̱ꞌ man Cristó na̱nj á.

Apocalipsis 19:10

Ga̱a ne̱ cayáán ru̱j ꞌu̱nj rihaan soꞌ cara̱a̱ gue̱e̱ ꞌu̱nj rihaan soꞌ a. Tza̱j ne̱ cataj soꞌ rihanj a: ―Se̱ quiꞌyáá so̱ꞌ da̱nj maꞌ. ꞌO̱ se ꞌu̱nj roꞌ, me síí nu̱u̱ rihaan Yaꞌanj ga̱ nij tinu̱j nij soj si̱j nataꞌ snana̱ Jesús rihaan yuvii̱ a. Rihaan o̱rúnꞌ Yaꞌanj cara̱a̱ gue̱e̱ so̱ꞌ á. ꞌO̱ se nu̱ꞌ nana̱ caꞌmii nij síí nataꞌ snana̱ Yaꞌanj roꞌ, me nana̱ rqué Nimán Yaꞌanj rihaan nij soꞌ, ne̱ snana̱ Jesús me nana̱ yoꞌ ado̱nj ―taj soꞌ rihanj a.

Efesios 1:13

Ne̱ vaa nij soj si̱j yaníj uún, ne̱ cuno soj nana̱ ya̱ nana̱ sa̱ꞌ taj se vaa caꞌve̱e nani̱i̱ soj rihaan sayuun ne̱ cavi̱i̱ sa̱ꞌ soj quiꞌya̱j Cristó a. Ne̱ cuchumán rá soj niꞌya̱j soj man Cristó, ne̱ cheꞌé Cristó me se caꞌnaꞌ Nimán Yaꞌanj catúj Nimán Yaꞌanj nimán soj, nda̱a vaa cataꞌ tuꞌva Yaꞌanj ga̱a naá a. Ne̱ cheꞌé se nu̱u̱ Nimán Yaꞌanj nimán níꞌ roꞌ, cheꞌé dan neꞌen ya̱ níꞌ se vaa me níꞌ taꞌníí Yaꞌanj

1 Corintios 15:45

Ne̱ Danj Yaꞌanj taj se vaa snóꞌo quiꞌyaj Yaꞌanj asino ya̱a̱n me síí cuꞌna̱j Adán, ne̱ ga̱a tiha̱j quiꞌyaj Yaꞌanj man soꞌ me se guun soꞌ síí vaa iꞌna̱ꞌ, quiꞌyaj Yaꞌanj, taj Danj Yaꞌanj a. Dan me se ase vaa síí cuꞌna̱j Adán roꞌ, da̱nj vaa síí cuꞌna̱j Cristó, tza̱j ne̱ ino̱ doj vaa Cristó, ne̱ dan me se ga̱a cunuu iꞌna̱ꞌ uún Cristó, ne̱ cunuu ino̱ nu̱ꞌ nee̱ man soꞌ, ne̱ dan me se aꞌvee vaa iꞌna̱ꞌ nda̱a maꞌa̱n níꞌ, ꞌyaj soꞌ a. Ne̱ cheꞌé dan cunu̱u iꞌna̱ꞌ uún ta̱ranꞌ níꞌ chugua̱nj.

Hechos 16:7

Ga̱a ne̱ va̱j nij soꞌ chrej nda̱a estadó cuꞌna̱j Misia, ga̱a ne̱ guun rá nij soꞌ caꞌa̱nj nij soꞌ estadó cuꞌna̱j Bitinia a. Tza̱j ne̱ ne caꞌve̱e quiꞌya̱j nij soꞌ da̱nj, quiꞌyaj Nimán Yaꞌanj maꞌ.

San Juan 7:39

Da̱nj taj Jesús, caꞌmii soꞌ cheꞌé Nimán Yaꞌanj cu̱nuû nimán nij síí cuchumán rá niꞌya̱j man soꞌ a. ꞌO̱ se ataa caꞌna̱ꞌ Nimán Yaꞌanj rihaan yuvii̱, ese ataa quisi̱j güii quina̱nꞌ Jesús rej xta̱ꞌ ne̱ niꞌndaj ya̱ sa̱ꞌ veꞌé gu̱un chij soꞌ a.

San Marcos 14:36

Dan me se cataj soꞌ a: ―Caꞌve̱e qui̱ꞌyáá so̱ꞌ cunuda̱nj, Ata̱j. Ca̱ráán raꞌá so̱ꞌ xráj, se̱ gaa na̱nj quira̱nꞌ uxrá ꞌu̱nj sayuun, tza̱j ne̱ sese ma̱ꞌán so̱ꞌ me rá qui̱ránꞌ ꞌu̱nj sayuun, ne̱ qui̱ꞌyáá so̱ꞌ nda̱a vaa me rá ma̱ꞌán so̱ꞌ, ne̱ se̱ quiꞌyáá so̱ꞌ nda̱a vaa me rá ma̱ꞌanj maꞌ ―taj Jesús, cachíín niꞌya̱j soꞌ rihaan Yaꞌanj a.

1 Tesalonicenses 4:8

Cheꞌé dan xca̱j soj cuentá se vaa síí riꞌíj yaníj man nana̱ nihánj roꞌ, né sna̱na̱ yuvii̱ me riꞌíj yaníj soꞌ maꞌ. Tana̱nj a̱ snana̱ Yaꞌanj si̱j rqué Nimán Yaꞌanj cu̱nuû nimán níꞌ me nana̱ riꞌíj soꞌ na̱nj ado̱nj.