Gálatas 2:11 - Triqui de San Juan Copala11 Cachén do̱j güii, ga̱a ne̱ cuchiꞌ Pedró chumanꞌ cuꞌna̱j Antioquía a. Tza̱j ne̱ quiꞌyaj soꞌ do̱j se nij, ne̱ tumé soꞌ cacunꞌ cheꞌé se nij quiꞌyaj soꞌ, rá ꞌu̱nj, ne̱ cheꞌé dan caꞌmii riha̱a̱n yáj ga̱ soꞌ rihaan cunuda̱nj yuvii̱, ne̱ cataj ꞌu̱nj se vaa tumé soꞌ cacunꞌ cheꞌé se vaa quiꞌyaj soꞌ a. Gade chapit la |
Dan me se xcaj ꞌu̱nj cuentá se vaa ne xraan nocoꞌ nij soꞌ nana̱ sa̱ꞌ nana̱ ya̱ maꞌ. Dan me se caꞌmii yá ꞌu̱nj rihaan Pedró, ne̱ cuno ta̱ranꞌ nij soꞌ, ne̱ cataj ꞌu̱nj a: “Síí israelitá mé so̱ꞌ, tza̱j ne̱ ne nocóꞌ so̱ꞌ tucuáán noco̱ꞌ nij yuvii̱ israelitá maꞌ. Ma̱an se ase vaa ꞌyaj nij yuvii̱ yaníj roꞌ, da̱nj vaa ꞌyáá so̱ꞌ chugua̱nj. Me cheꞌé rqueé so̱ꞌ man nij yuvii̱ yaníj canoco̱ꞌ nij yuvii̱ yaníj tucuáán noco̱ꞌ nij yuvii̱ israelitá ga̱.
Dan me se taꞌa̱j nij síí noco̱ꞌ man Jesucristó cavii estadó Judea, ne̱ caꞌanj nij soꞌ tucuꞌyón nij soꞌ rihaan ꞌó tinúú nij soꞌ se vaa sese se̱ cataꞌ taꞌngaꞌ man ꞌo̱ soꞌ nda̱a vaa taj stucua̱nj Moisés, ne̱ daj chiha̱a̱ míj se̱ caꞌvee nani̱i̱ soꞌ rihaan sayuun ne̱ cavi̱i̱ sa̱ꞌ soꞌ quiꞌya̱j Yaꞌanj maꞌ.
Tinu̱j, nocoj, guun ndoꞌo raj cachro̱nj nana̱ rihaan yanj caꞌne̱j ꞌu̱nj rihaan soj cheꞌé da̱j vaa nanii ta̱ranꞌ níꞌ rihaan chrej chiꞌi̱i̱ do̱ꞌ, rihaan sayuun do̱ꞌ, ꞌyaj Yaꞌanj ado̱nj. Tza̱j ne̱ ya̱j me se no̱ xcúnj cachro̱nj ꞌó nana̱ rihaan yanj, ne̱ cata̱j xnaꞌanj ꞌu̱nj rihaan soj se vaa te̱rquee̱ ndoꞌo soj canoco̱ꞌ xraan soj stucua̱nj Yaꞌanj tucuáán tacuachén nij síí caꞌmii natáj nana̱ sa̱ꞌ cheꞌé Cristó rihaan soj si̱j noco̱ꞌ man Yaꞌanj a.
Ne̱ queneꞌen Jacobo do̱ꞌ, Cefas do̱ꞌ, Juan do̱ꞌ, se vaa quiꞌyaj ndoꞌo Yaꞌanj se lu̱j cheꞌé ꞌu̱nj do̱ꞌ, cheꞌé Bernabé do̱ꞌ, se vaa guun nu̱cuáá ꞌu̱nj nata̱ꞌ ꞌu̱nj nana̱ sa̱ꞌ cheꞌé Cristó rihaan yuvii̱, quiꞌyaj Yaꞌanj, ne̱ guun ya̱ nu̱ꞌ rá nij soꞌ se vaa Yaꞌanj me síí caꞌneꞌ suun rihaan núj a. Dan me se síí uun chij rihaan nij síí noco̱ꞌ man Cristó ma̱n Jerusalén me nij soꞌ, tza̱j ne̱ guun ya̱ rá nij soꞌ se vaa tuviꞌ maꞌa̱n nij soꞌ me núj, ne̱ ꞌo̱ cuya̱a̱n vaa suun vaa rihaan núj ga̱ suun vaa rihaan nij soꞌ, rá nij soꞌ a. Dan me se nata̱ꞌ nij soꞌ nana̱ sa̱ꞌ cheꞌé Cristó rihaan nij yuvii̱ israelitá, ne̱ da̱nj na̱nj núj uún, ne̱ nata̱ꞌ núj rihaan nij síí yaníj, cataj nij soꞌ a.
Dan me se Yaꞌanj me síí quiꞌyaj guun nucua̱j síí cuꞌna̱j Pedró nata̱ꞌ soꞌ nana̱ sa̱ꞌ cheꞌé Cristó rihaan nij yuvii̱ israelitá, ne̱ da̱nj quiꞌyaj gue̱e̱ Yaꞌanj ga̱ ꞌu̱nj uún, ne̱ dan me se guun nu̱cuáá ꞌu̱nj nata̱ꞌ ꞌu̱nj nana̱ sa̱ꞌ cheꞌé Cristó rihaan nij yuvii̱ yaníj, quiꞌyaj Yaꞌanj a. Cheꞌé dan me xcaj nij síí uun chij ma̱n Jerusalén cuentá se vaa ne cachi̱in doj nana̱ mán ꞌu̱nj a. Ma̱an se ase vaa ata̱ Pedró suun nata̱ꞌ rihaan nij yuvii̱ israelitá, quiꞌyaj Yaꞌanj roꞌ, da̱nj vaa atá ꞌu̱nj suun nata̱ꞌ rihaan nij yuvii̱ yaníj, quiꞌyaj uún Yaꞌanj a.
Dan me se nda̱ꞌ rá se tuꞌva ꞌo̱ síí snúú tuꞌvaj, tza̱j ne̱ maꞌa̱n soj quiꞌyaj dan tuꞌvaj da̱nj caꞌmii snu̱j ꞌu̱nj do̱j ado̱nj. ꞌO̱ se maꞌa̱n soj me síí no̱ xcúún cata̱j se vaa sa̱ꞌ ꞌyáj na̱nj ado̱nj. Nda̱ꞌ se taj yuꞌvee nó ꞌu̱nj, tza̱j ne̱ né si̱j sa̱ꞌ doj me ꞌó nij soꞌ rihanj maꞌ. Dan me se si̱j sa̱ꞌ uxrá me nij soꞌ, ne̱ maꞌa̱n nij síí cuneꞌ ya̱ maꞌa̱n Jesucristó caꞌa̱nj nata̱ꞌ snana̱ soꞌ me nij soꞌ, rá soj, tza̱j ne̱ né si̱j sa̱ꞌ doj me nij soꞌ rihanj maꞌ.
Ga̱a ne̱ canica̱j Jesús, ne̱ caꞌmii soꞌ rihaan Pedró a: ―Naxu̱u̱n so̱ꞌ mán so̱ꞌ rihanj á. Naꞌvej raj que̱neꞌenj mán so̱ꞌ maꞌ. ꞌO̱ se ase tuꞌva Síí Chre̱e roꞌ, da̱nj tuꞌvá so̱ꞌ, ne̱ aráán so̱ꞌ chrej rihanj cu̱noj rihaan Yaꞌanj na̱nj á. Da̱nj tuꞌvá so̱ꞌ, cheꞌé se ne acaj so̱ꞌ cuentá da̱j me rá Yaꞌanj ado̱nj. Ma̱an se ina̱nj acaj so̱ꞌ cuentá da̱j me rá yuvii̱ na̱nj ado̱nj ―taj Jesús rihaan Pedró a.
Dan me se cheꞌé snana̱ síí cuꞌna̱j Esteban me se quiꞌyaj ndoꞌo nii sayuun man nij síí israelitá noco̱ꞌ man Jesús a. Cheꞌé dan tanáj nij soꞌ chumanꞌ Jerusalén, ne̱ cunánj nij soꞌ caꞌanj nij soꞌ nda̱a estadó cuꞌna̱j Fenicia do̱ꞌ, nda̱a yoꞌóó ta̱j rihaan na yaꞌa̱nj cuꞌna̱j Chipre do̱ꞌ, nda̱a chumanꞌ Antioquía do̱ꞌ a. Tza̱j ne̱ ina̱nj rihaan nij yuvii̱ israelitá nataꞌ nij soꞌ snana̱ Jesús, ne̱ ne nata̱ꞌ nij soꞌ rihaan nij síí yaníj maꞌ.
Ne̱ caꞌanj nica̱j soꞌ man tinúú soꞌ rihaan Jesús, ga̱a ne̱ niꞌya̱j uxrá Jesús man Simón, ne̱ cataj soꞌ a: ―Síí cuꞌna̱j Simón mé so̱ꞌ, ne̱ taꞌníí síí cuꞌna̱j Jonás mé so̱ꞌ á. Tza̱j ne̱ rej rihaan níꞌ me se Cefas cuꞌna̱j so̱ꞌ á ―taj Jesús rihaan soꞌ a. Ne̱ nana̱ Cefas me raj cata̱a Pedró ꞌó xnaꞌánj a.