Filipenses 1:21 - Triqui de San Juan Copala

²¹ Vaa iꞌna̱ꞌ ꞌu̱nj cheꞌé Cristó, ne̱ sese cavi̱ꞌ ꞌu̱nj cheꞌé Cristó, ne̱ cavi̱i̱ sa̱ꞌ ꞌu̱nj doj, quiꞌya̱j soꞌ ado̱nj.

Filipenses 1:21 Referans Kwoze

Gálatas 2:20

Canó rcuaꞌa̱a̱n ꞌu̱nj rihaan rcutze̱ ga̱ Cristó vaa ga̱a na̱nj ado̱nj. Ya̱j me se né ꞌu̱nj me síí ya̱nj cuano̱ maꞌ. ꞌO̱ se Cristó me síí ya̱nj nimanj, ne̱ cheꞌé dan vaa iꞌna̱ꞌ ꞌu̱nj cuano̱ ado̱nj. Cheꞌé se amán rá ꞌu̱nj niꞌya̱j ꞌu̱nj man Taꞌníí Yaꞌanj roꞌ, cheꞌé dan ina̱nj nocóꞌ ꞌu̱nj man soꞌ ga̱a chéé ꞌu̱nj rihaan chumii̱ nihánj ado̱nj. Ne̱ dan me se ma̱an cheꞌé se cunuu ꞌe̱e̱ uxrá rá soꞌ mán ꞌu̱nj roꞌ, cheꞌé dan caꞌneꞌ gue̱e̱ rá soꞌ caviꞌ soꞌ rihaan rcutze̱ cheꞌé ꞌu̱nj na̱nj ado̱nj.

2 Corintios 5:8

Dan me se nariꞌ nucuaj nimán núj, ne̱ uun rá núj se vaa cuna̱j uxrá ga̱a̱ ta̱náj núj nee̱ man núj, ne̱ caꞌa̱nj núj ca̱yáán núj ga̱ Síí ꞌNi̱j Raꞌa man níꞌ, ne̱ sa̱ꞌ doj cavi̱i̱ núj asa̱ꞌ quiꞌyaj núj da̱nj ado̱nj.

2 Corintios 5:1

Dan me se neꞌen núj se vaa ase vaa ꞌo̱ veꞌ mantá utaꞌ u̱u̱n nii rque do̱j güii roꞌ, vaa nee̱ man núj, ne̱ ya̱nj nee̱ man núj ga̱a vaa iꞌna̱ꞌ núj rihaan chumii̱ nihánj a. Tza̱j ne̱ neꞌen núj se vaa caꞌve̱e navi̱j nee̱ man núj vaa güii, ne̱ asa̱ꞌ navij yoꞌ, ga̱a ne̱ rque̱ Yaꞌanj ꞌó nee̱ naca̱ cu̱nuû núj, ne̱ daj chiha̱a̱ míj se̱ navij nee̱ naca̱ yoꞌ a̱ maꞌ. Tana̱nj a̱ ca̱yáán núj rej xta̱ꞌ nu̱ꞌ cavii nu̱ꞌ caꞌanj ado̱nj.

Filipenses 1:23

ꞌO̱ se sa̱ꞌ cuya̱a̱n vaa ro̱j chrej chugua̱nj. Dan me se sese cavi̱ꞌ ꞌu̱nj, ne̱ quina̱nꞌ ꞌu̱nj rihaan Cristó, ne̱ sa̱ꞌ uxrá doj ga̱a̱ na̱nj ado̱nj.

Colosenses 3:4

Ne̱ Cristó me síí ꞌyaj vaa iꞌna̱ꞌ nimán soj, ne̱ vaa güii caꞌna̱ꞌ uún soꞌ rihaan chumii̱ nihánj, ne̱ niꞌndaj ya̱ veꞌé ga̱a̱ curuvi̱ꞌ soj ga̱ soꞌ na̱nj ado̱nj.

2 Corintios 5:6

Cheꞌé dan niga̱nj vaa nucua̱j nimán núj, ne̱ dan me se neꞌen núj se vaa ga̱a vaa nee̱ man núj nihánj cuano̱ roꞌ, ne̱ nuviꞌ núj yáán rej xta̱ꞌ ga̱ Síí ꞌNi̱j Raꞌa man níꞌ maꞌ.

Filipenses 1:20

Dan me se uun ya̱ raj se vaa se̱ guun naꞌa̱j ꞌu̱nj maꞌ. Dan me se asi̱j rque̱ roꞌ, xcaj ndoꞌo yuvii̱ cuentá se vaa niꞌndaj ya̱ sa̱ꞌ vaa Cristó, quiꞌyáj, ne̱ caꞌve̱e se ga̱a̱ iꞌna̱ꞌ ꞌu̱nj do̱ꞌ, caꞌve̱e se cavi̱ꞌ ꞌu̱nj do̱ꞌ, tza̱j ne̱ da̱nj ina̱nj qui̱ꞌyáj cuano̱ nihánj, rá ꞌu̱nj ado̱nj.

Apocalipsis 14:13

Ga̱a ne̱ cunó ꞌu̱nj ꞌó nana̱ cavii rej xta̱ꞌ, ne̱ nana̱ yoꞌ cataj rihanj a: ―Cachro̱n so̱ꞌ nana̱ nihánj rihaan yanj á. Cachro̱n so̱ꞌ se vaa nij síí noco̱ꞌ man Síí ꞌNi̱j Raꞌa man soj me se sese cavi̱ꞌ nij soꞌ rej rihaan ya̱j, ne̱ vaa cheꞌé gu̱un niha̱ꞌ rá nij soꞌ ado̱nj. ꞌO̱ se cavi̱i̱ sa̱ꞌ nij soꞌ na̱nj á. Ne̱ Nimán Yaꞌanj taj se vaa caꞌne̱ꞌ rá nij soꞌ ga̱ suun ꞌyaj nij soꞌ, ne̱ nara̱a̱n rá nij soꞌ a. ꞌO̱ se yu̱u̱n cheꞌe̱ cavi̱i̱ sa̱ꞌ nij soꞌ cheꞌé suun sa̱ꞌ a̱j quiꞌyaj nij soꞌ ado̱nj, cachro̱n so̱ꞌ á ―taj nana̱ cavii rej xta̱ꞌ yoꞌ a.

Gálatas 6:14

Ne̱ xa̱ꞌ ꞌu̱nj, tza̱j ne̱ daj chiha̱a̱ míj se̱ caꞌmii xta̱ꞌ ꞌu̱nj maꞌ. ꞌO̱ se guun niha̱ꞌ rá ꞌu̱nj ina̱nj cheꞌé se caviꞌ Jesucristó Si̱j ꞌNi̱j Raꞌa man níꞌ rihaan rcutze̱ cheꞌé níꞌ ado̱nj. Ne̱ xa̱ꞌ chumii̱ nihánj, tza̱j ne̱ ase vaa se caviꞌ roꞌ, da̱nj vaa chumii̱ nihánj rihaan ꞌu̱nj, ne̱ da̱nj vaa ꞌu̱nj rihaan chumii̱ nihánj ado̱nj.

1 Corintios 1:30

Dan me se Yaꞌanj me síí ꞌyaj ꞌni̱j raꞌa Cristó Jesús man soj, ne̱ cheꞌé o̱rúnꞌ soꞌ avii raa̱ níꞌ do̱ꞌ, cunuu sa̱ꞌ nimán níꞌ rihaan Yaꞌanj do̱ꞌ, guun níꞌ síí sa̱ꞌ rihaan Yaꞌanj do̱ꞌ, nanii níꞌ rihaan sayuun do̱ꞌ, quiꞌyaj Yaꞌanj á.

Filipenses 2:21

Tza̱j ne̱ ꞌó nij soꞌ roꞌ, ina̱nj cheꞌé maꞌa̱n nij soꞌ nanó rá nij soꞌ, tza̱j ne̱ ne nanó rá nij soꞌ cheꞌé se‑su̱u̱n Cristó Jesús maꞌ.

1 Corintios 3:22

Dan me se nana̱ aꞌmij do̱ꞌ, nana̱ aꞌmii Apolos do̱ꞌ, nana̱ aꞌmii Cefas do̱ꞌ, vaa yuꞌvee nó nana̱ yoꞌ rihaan soj, ne̱ rasu̱u̱n ma̱n rihaan chumii̱ nihánj roꞌ, vaa yuꞌvee nó yoꞌ rihaan soj á. Ne̱ sese vaa iꞌna̱ꞌ soj, ne̱ cavi̱i̱ sa̱ꞌ soj, cheꞌé se vaa iꞌna̱ꞌ soj a. Sese cavi̱ꞌ soj, ne̱ caꞌve̱e cavi̱i̱ sa̱ꞌ soj uún a. Ne̱ sese ranꞌ soj cuano̱ nihánj do̱ꞌ, sese quira̱nꞌ soj rej rihaan níꞌ do̱ꞌ, ne̱ nu̱ꞌ nij rasu̱u̱n yoꞌ me se vaa yuꞌvee nó rihaan soj á.

Filipenses 1:22

Dan me se sese ꞌo̱ ga̱a̱ iꞌna̱ꞌ ꞌu̱nj rihaan chumii̱ nihánj, ne̱ ga̱a̱ yaꞌnúj rihanj qui̱ꞌyáj se‑su̱u̱n Cristó, ne̱ cheꞌé dan ne neꞌenj ase sa̱ꞌ doj cavi̱ꞌ ꞌu̱nj niꞌ, ase sa̱ꞌ doj ga̱a̱ iꞌna̱ꞌ ꞌu̱nj niꞌ, ne neꞌenj da̱j qui̱ꞌyáj a̱ maꞌ.