Efesios 5:2 - Triqui de San Juan Copala

² ꞌO̱ ga̱a̱ ꞌe̱e̱ rá soj man tinúú soj á. Ina̱nj da̱nj quiꞌyaj Cristó, cunuu ꞌe̱e̱ rá soꞌ man níꞌ, ne̱ caꞌvej soꞌ cavi̱ꞌ soꞌ cheꞌé níꞌ, ne̱ ase vaa rasu̱u̱n rqué yuvii̱ rihaan Yaꞌanj roꞌ, taꞌngaꞌ da̱nj vaa Cristó cheꞌé níꞌ na̱nj chugua̱nj.

Efesios 5:2 Referans Kwoze

San Juan 13:34

Ne̱ nihánj me suun naca̱ aꞌnéꞌ ꞌu̱nj rihaan soj, se vaa ꞌo̱ ga̱a̱ ꞌe̱e̱ rá soj man tuviꞌ soj á. Dan me se da̱j se cunuu ꞌe̱e̱ raj niꞌya̱j man soj roꞌ, da̱nj ga̱a̱ quiꞌya̱j soj, ga̱a̱ ꞌe̱e̱ rá soj man tuviꞌ soj a.

Gálatas 2:20

Canó rcuaꞌa̱a̱n ꞌu̱nj rihaan rcutze̱ ga̱ Cristó vaa ga̱a na̱nj ado̱nj. Ya̱j me se né ꞌu̱nj me síí ya̱nj cuano̱ maꞌ. ꞌO̱ se Cristó me síí ya̱nj nimanj, ne̱ cheꞌé dan vaa iꞌna̱ꞌ ꞌu̱nj cuano̱ ado̱nj. Cheꞌé se amán rá ꞌu̱nj niꞌya̱j ꞌu̱nj man Taꞌníí Yaꞌanj roꞌ, cheꞌé dan ina̱nj nocóꞌ ꞌu̱nj man soꞌ ga̱a chéé ꞌu̱nj rihaan chumii̱ nihánj ado̱nj. Ne̱ dan me se ma̱an cheꞌé se cunuu ꞌe̱e̱ uxrá rá soꞌ mán ꞌu̱nj roꞌ, cheꞌé dan caꞌneꞌ gue̱e̱ rá soꞌ caviꞌ soꞌ rihaan rcutze̱ cheꞌé ꞌu̱nj na̱nj ado̱nj.

Colosenses 3:14

Nu̱ꞌ yoꞌ quiꞌya̱j soj, ne̱ vaa ꞌó se sa̱ꞌ doj quiꞌya̱j uún soj, ne̱ yoꞌ me se ga̱a̱ ꞌe̱e̱ ya̱ ya̱ rá soj tuviꞌ soj, ne̱ yoꞌ me quiꞌya̱j gu̱un xraan rcuaꞌa̱a̱n rá soj cuma̱n soj á.

2 Corintios 2:15

Dan me se nda̱ꞌ rá se vaa se gunꞌ da̱j, ne̱ achén yoꞌ scaꞌnúj nij yuvii̱ roꞌ, da̱nj vaa núj ga̱a ꞌyaj núj se‑su̱u̱n Yaꞌanj nataꞌ núj nana̱ sa̱ꞌ cheꞌé Cristó, ne̱ achén nana̱ yoꞌ scaꞌnúj nij síí nani̱i̱ rihaan sayuun, ne̱ achén yoꞌ scaꞌnúj nij síí caꞌa̱nj rihaan yaꞌan na̱nj á.

Tito 2:14

Ne̱ soꞌ me síí caꞌnéé nimán cavi̱ꞌ cheꞌé níꞌ, cheꞌé rej caꞌve̱e caꞌne̱ꞌ rá níꞌ ga̱ me maꞌa̱n tucuáán chiꞌi̱i̱ canocoꞌ níꞌ ga̱a rque̱, ne̱ caꞌve̱e cunu̱u sa̱ꞌ níꞌ, ne̱ gu̱un níꞌ yuvii̱ noco̱ꞌ man o̱rúnꞌ soꞌ, ne̱ gu̱un niha̱ꞌ ndoꞌo rá níꞌ quiꞌya̱j níꞌ suun sa̱ꞌ ado̱nj.

1 Corintios 16:14

Ne̱ ga̱a ꞌyaj soj nu̱ꞌ suun vaa rihaan soj, ne̱ uxrá ga̱a̱ ꞌe̱e̱ rá soj man tinúú soj á.

San Mateo 20:28

Dan me se nda̱ꞌ se Si̱j Caꞌnéé Yaꞌanj Ni̱caj Yuꞌunj man Yuvii̱ mej, tza̱j ne̱ ne caꞌna̱ꞌ ꞌu̱nj ne̱ gu̱un nij yuvii̱ mozó rihanj maꞌ. ꞌO̱ se caꞌnáꞌ ꞌu̱nj ra̱cuíj man nij yuvii̱ na̱nj ado̱nj. Ne̱ caꞌnáꞌ ꞌu̱nj nayo̱n ma̱ꞌanj rihaan yuvii̱ ne̱ cavi̱ꞌ ꞌu̱nj cheꞌé cacunꞌ ata̱ nij soꞌ, ga̱a ne̱ nani̱i̱ nij soꞌ rihaan sayuun, qui̱ꞌyáj na̱nj ado̱nj ―taj Jesús a.

1 Pedro 4:8

Ne̱ suun sa̱ꞌ noco̱o doj quiꞌya̱j soj me nihánj, ne̱ ga̱a̱ ꞌe̱e̱ uxrá rá soj man tuviꞌ soj nij síí noco̱ꞌ man Cristó, ne̱ sese ꞌe̱e̱ rá níꞌ tuviꞌ níꞌ, ga̱a ne̱ caꞌne̱e̱ noco̱o ndoꞌo níꞌ cacunꞌ xráá tuviꞌ níꞌ na̱nj ado̱nj.

2 Corintios 8:9

ꞌO̱ se a̱j neꞌen soj se vaa quiꞌyaj ndoꞌo Jesucristó Si̱j ꞌNi̱j Raꞌa man níꞌ se lu̱j ga̱ níꞌ á. Dan me se ruꞌve̱e̱ ndoꞌo soꞌ ga̱a cayáán soꞌ rej xta̱ꞌ, tza̱j ne̱ naquiꞌyaj nique̱ soꞌ man soꞌ ne̱ caꞌnaꞌ soꞌ rihaan chumii̱ nihánj cheꞌé níꞌ, ga̱a ne̱ cheꞌé se da̱nj quiꞌyaj soꞌ roꞌ, cheꞌé dan cavi̱i̱ sa̱ꞌ níꞌ doj na̱nj ado̱nj.

1 Juan 3:16

Ne̱ Cristó roꞌ, me síí caꞌvej rá cavi̱ꞌ cheꞌé níꞌ, ne̱ cheꞌé dan neꞌen níꞌ se vaa ꞌe̱e̱ rá soꞌ man níꞌ ado̱nj. Ne̱ cheꞌé dan no̱ xcúún níꞌ caꞌne̱j nimán níꞌ cavi̱ꞌ níꞌ cheꞌé tinúú níꞌ chugua̱nj.

Hebreos 9:26

ꞌO̱ se sese vaa cheꞌé quiꞌya̱j soꞌ da̱nj, ne̱ no̱ xcúún soꞌ queꞌe̱e̱ ndoꞌo quira̱nꞌ soꞌ sayuun asi̱j ga̱a quiꞌyaj Yaꞌanj chumii̱ nihánj nda̱a cuano̱ ado̱nj. Tza̱j ne̱ ya̱j roꞌ, nichrunꞌ navi̱j chumii̱ nihánj, ne̱ nda̱a ya̱j caꞌnaꞌ Cristó rihaan chumii̱ nihánj, ne̱ o̱rúnꞌ yu̱u̱n caviꞌ soꞌ cheꞌé níꞌ, ne̱ navij nu̱ꞌ cacunꞌ tumé níꞌ na̱nj ado̱nj.

Hebreos 9:14

ga̱a ne̱ táá a̱ ton man Cristó, ne̱ sa̱ꞌ doj vaa yoꞌ rihaan nu̱ꞌ nij rasu̱u̱n yoꞌ na̱nj chugua̱nj. Dan me se taj a̱ doj cacunꞌ tumé Cristó maꞌ. ꞌO̱ se nicu̱nꞌ Nimán Yaꞌanj nu̱ꞌ cachén nu̱ꞌ caꞌnaꞌ ne̱ nu̱ꞌ cavii nu̱ꞌ caꞌanj, ne̱ cayáán soꞌ ga̱ Cristó, ne̱ cheꞌé dan rqué Cristó man maꞌa̱n soꞌ rihaan Yaꞌanj chugua̱nj. Cheꞌé dan me doj a̱ cunu̱u sa̱ꞌ nimán níꞌ, quiꞌya̱j ton man Cristó, ne̱ navi̱j cacunꞌ tumé níꞌ cheꞌé se chiꞌi̱i̱ quiꞌyaj níꞌ asi̱j rque̱ doj a. ꞌO̱ se daj chiha̱a̱ míj se̱ cavii sa̱ꞌ níꞌ, quiꞌya̱j se ꞌyaj maꞌa̱n níꞌ maꞌ. Tza̱j ne̱ ya̱j roꞌ, quiꞌya̱j níꞌ nu̱ꞌ rasu̱u̱n rej rihaan níꞌ, ne̱ canoco̱ꞌ ina̱nj níꞌ man Yaꞌanj si̱j vaa iꞌna̱ꞌ ya̱j na̱nj á.

1 Timoteo 2:6

Ne̱ Cristó Jesús me se caꞌvej rá soꞌ cavi̱ꞌ soꞌ cheꞌé cunuda̱nj yuvii̱, cheꞌé rej nani̱i̱ nij yuvii̱ rihaan sayuun a. Dan me se cachrón Yaꞌanj güii cavi̱ꞌ Cristó Jesús, ne̱ güii dan caviꞌ Cristó Jesús, ne̱ tihaa̱n Cristó Jesús se vaa me uxrá rá Yaꞌanj cavi̱i̱ sa̱ꞌ cunuda̱nj yuvii̱ a.

Efesios 4:15

Ma̱an ina̱nj nana̱ ya̱ caꞌmi̱i̱ níꞌ rihaan tinúú níꞌ, cheꞌé se ꞌe̱e̱ rá níꞌ man tinúú níꞌ, ga̱a ne̱ sa̱ꞌ doj queneꞌe̱n níꞌ canoco̱ꞌ níꞌ man Cristó nu̱ꞌ se vaa quiꞌya̱j níꞌ ado̱nj. Dan me se ase vaa rii taꞌngaꞌ cúú yave̱ yuvii̱ rihaan nu̱ꞌ nee̱ man yuvii̱ roꞌ, da̱nj vaa rii taꞌngaꞌ Cristó rihaan níꞌ ado̱nj.

1 Juan 3:23

Dan me se nihánj me suun caꞌneꞌ Yaꞌanj cuno̱ níꞌ a. Me rá Yaꞌanj cuchuma̱n rá níꞌ ni̱ꞌyaj níꞌ man Taꞌníí soꞌ Jesucristó, ne̱ me rá Yaꞌanj cunu̱u ꞌe̱e̱ rá níꞌ ni̱ꞌyaj níꞌ man tuviꞌ níꞌ nda̱a vaa caꞌneꞌ Yaꞌanj suun rihaan níꞌ a.

1 Timoteo 4:12

ꞌO̱ se xnii mé so̱ꞌ, ne̱ ataa cachi̱j so̱ꞌ, tza̱j ne̱ taj se ꞌyaj yoꞌ maꞌ. Se̱ guun cata̱j yuvii̱ se vaa taj se uún so̱ꞌ maꞌ. Ma̱an se veꞌé qui̱ꞌyáá so̱ꞌ nu̱ꞌ tucuáán noco̱ꞌ níꞌ, se vaa veꞌé caꞌmi̱i̱ so̱ꞌ do̱ꞌ, veꞌé qui̱ꞌyáá so̱ꞌ do̱ꞌ, ga̱a̱ ꞌe̱e̱ rá so̱ꞌ man tinúú so̱ꞌ do̱ꞌ, ga̱a̱ nucua̱j rá so̱ꞌ man Yaꞌanj do̱ꞌ, tu̱mé so̱ꞌ mán so̱ꞌ se̱ quiꞌyáá so̱ꞌ cacunꞌ do̱ꞌ, ga̱a ne̱ xca̱j nij síí noco̱ꞌ man Yaꞌanj cuentá da̱j no̱ xcúún nij soꞌ quiꞌya̱j nij soꞌ uún ado̱nj.

1 Tesalonicenses 4:9

Dan me se taj cheꞌé cachro̱n ꞌu̱nj nana̱ rihaan yanj cartá nihánj cata̱j xnaꞌanj ꞌu̱nj rihaan soj se vaa no̱ xcúún soj ga̱a̱ ꞌe̱e̱ rá soj man tinúú soj maꞌ. ꞌO̱ se maꞌa̱n Yaꞌanj me síí tucuꞌyón man soj se vaa quiꞌya̱j soj da̱nj ado̱nj.

Efesios 4:2

Ne̱ gu̱un nij soj síí niꞌya̱nj aꞌmii, ne̱ veꞌé quiꞌya̱j soj ga̱ tinúú soj, ne̱ se̱ guun yuva̱a̱ soj man tinúú soj maꞌ. Tana̱nj cunu̱u ꞌe̱e̱ rá soj man tinúú soj, ne̱ ga̱a̱ ina̱j nimán soj ga̱ tinúú soj á.

Efesios 3:17

Ne̱ achíín ni̱ꞌyáj se vaa cuchuma̱n doj rá soj ni̱ꞌyaj soj man Cristó, ne̱ ꞌo̱ natu̱u̱ Cristó nimán soj quiꞌya̱j Yaꞌanj, ga̱a ne̱ ꞌo̱ cunu̱u ꞌe̱e̱ rá soj man ta̱ranꞌ tinúú soj ado̱nj.

Gálatas 1:4

Dan me se chiꞌi̱i̱ vaa nimán yuvii̱ ma̱n rihaan chumii̱ nihánj cuano̱, ne̱ me rá Rej níꞌ Yaꞌanj nani̱i̱ níꞌ rihaan sayuun quira̱nꞌ nij yuvii̱ yoꞌ, ne̱ cheꞌé dan caꞌvej Jesucristó Si̱j ꞌNi̱j Raꞌa man níꞌ cavi̱ꞌ ya̱ maꞌa̱n soꞌ cheꞌé cacunꞌ tumé níꞌ ado̱nj.

Apocalipsis 5:9

Ga̱a ne̱ achráá nij soꞌ chraꞌ naca̱ rihaan Matzinj Leꞌe̱j, cataj nij soꞌ a: No̱ xcúún so̱ꞌ ni̱caj so̱ꞌ yanj ne̱ caꞌne̱e̱ so̱ꞌ nij selló yánj aráán tuꞌva yanj yoꞌ á. ꞌO̱ se ticaviꞌ nii mán so̱ꞌ, ne̱ dan me se nica̱j so̱ꞌ ton mán so̱ꞌ quiránj so̱ꞌ yuvii̱ ma̱n da̱j a̱ xꞌneꞌ yuvii̱ ino̱ vaa stucua̱nj do̱ꞌ, yuvii̱ ma̱n da̱j a̱ xꞌneꞌ yuvii̱ aꞌmii ꞌo̱ ꞌo̱ xnaꞌánj do̱ꞌ, yuvii̱ ma̱n da̱j a̱ chumanꞌ do̱ꞌ, yuvii̱ ma̱n da̱j a̱ yoꞌóó noco̱o do̱ꞌ, cheꞌé Yaꞌanj ado̱nj.

Hebreos 9:23

Dan me se xa̱ꞌ nij rasu̱u̱n tamanꞌ Moisés ton rihaan, tza̱j ne̱ ase vaa nij rasu̱u̱n ma̱n rej xta̱ꞌ rej nicu̱nꞌ Yaꞌanj vaa nij rasu̱u̱n yoꞌ, ne̱ achiin ton cheꞌé rej cunu̱u sa̱ꞌ nij rasu̱u̱n yoꞌ rihaan Yaꞌanj, ne̱ cheꞌé dan aviꞌ xcuu, ꞌyaj Moisés chugua̱nj. Tza̱j ne̱ sa̱ꞌ uxrá doj vaa maꞌa̱n nij rasu̱u̱n ma̱n rej xta̱ꞌ rihaan nij rasu̱u̱n ma̱n rihaan chumii̱ nihánj, ne̱ cheꞌé dan achiin se sa̱ꞌ doj rihaan ton man xcuu yan cunu̱u sa̱ꞌ nij rasu̱u̱n ma̱n rej xta̱ꞌ ado̱nj.

Romanos 8:3

Ne gu̱un nucua̱j nee̱ man níꞌ canoco̱ꞌ yoꞌ nu̱ꞌ stucua̱nj Moisés, ne̱ cheꞌé dan se̱ guun nucua̱j níꞌ nani̱i̱ maꞌa̱n níꞌ rihaan cacunꞌ tumé níꞌ maꞌ. Tza̱j ne̱ Yaꞌanj me síí tinanii man níꞌ rihaan cacunꞌ yoꞌ, ne̱ caꞌnéé Yaꞌanj maꞌa̱n Taꞌníí Yaꞌanj rihaan chumii̱, ne̱ ase vaa nee̱ man níꞌ roꞌ, da̱nj vaa nee̱ man soꞌ uún a. Dan me se caviꞌ soꞌ cheꞌé níꞌ, ne̱ cheꞌé se taj cacunꞌ tumé maꞌa̱n soꞌ, ne̱ cheꞌé dan taj cheꞌé quiꞌya̱j níꞌ cacunꞌ ya̱j maꞌ.

Efesios 5:25

Ne̱ nij snóꞌo roꞌ, ga̱a̱ ꞌe̱e̱ uxrá rá nij soꞌ man nica̱ nij soꞌ á. Dan me se ase vaa ꞌe̱e̱ rá Cristó man xꞌneꞌ níꞌ si̱j noco̱ꞌ man soꞌ roꞌ, da̱nj ga̱a̱ ꞌe̱e̱ rá nij snóꞌo man nica̱ nij soꞌ uún ado̱nj. Neꞌen soj se vaa caꞌnéé nimán Cristó cavi̱ꞌ soꞌ cheꞌé níꞌ si̱j noco̱ꞌ man soꞌ,

1 Corintios 5:7

Cheꞌé dan me quiri̱i̱ yaníj soj nu̱ꞌ se nij ꞌni̱j scaꞌnúj soj, ga̱a ne̱ ase vaa cunj naca̱ sa̱ꞌ roꞌ, da̱nj ga̱a̱ soj, ne̱ se̱ guun qui̱ꞌnij se nij scaꞌnúj soj a̱ maꞌ. Ya̱ vaa sa̱ꞌ soj, quiꞌyaj Cristó, ne̱ dan me se a̱j caviꞌ soꞌ cheꞌé níꞌ, ne̱ ase vaa caráán matzinj rihaan sayuun cheꞌé nij yuvii̱ israelitá ga̱a naá roꞌ, da̱nj vaa caráán Cristó rihaan nu̱ꞌ sayuun cheꞌé níꞌ, ne̱ se̱ quiranꞌ níꞌ sayuun cheꞌé cacunꞌ tumé níꞌ a̱ maꞌ.

Romanos 4:25

Dan me se caꞌvej rá Yaꞌanj cavi̱ꞌ Jesús cheꞌé cacunꞌ quiꞌyaj níꞌ, ne̱ cunuu iꞌna̱ꞌ uún soꞌ, quiꞌyaj Yaꞌanj, cheꞌé yan cunu̱u sa̱ꞌ nimán níꞌ rihaan maꞌa̱n Yaꞌanj ado̱nj.

San Juan 6:51

Dan me se ꞌu̱nj me rachrúún vaa iꞌna̱ꞌ ya̱ nanij rej xta̱ꞌ, ne̱ sese cha̱ ꞌo̱ soꞌ man rachrúún nihánj, ne̱ ꞌo̱ ga̱a̱ iꞌna̱ꞌ soꞌ ado̱nj. Tza̱j ne̱ rachrúún rque̱ ꞌu̱nj cha̱ yuvii̱ roꞌ, nee̱ manj me yoꞌ ado̱nj. Ne̱ yoꞌ me qui̱ꞌyáj, ga̱a ne̱ caꞌve̱e ga̱a̱ iꞌna̱ꞌ ya̱ cunuda̱nj soj si̱j ma̱n rihaan chumii̱ nihánj na̱nj á ―taj Jesús rihaan nij síí uun chij rihaan nij yuvii̱ israelitá a.

Romanos 8:37

Tza̱j ne̱ caꞌve̱e se da̱j a̱ sayuun ranꞌ níꞌ, tza̱j ne̱ Cristó me síí ꞌe̱e̱ rá man níꞌ, ne̱ cheꞌé dan quiꞌya̱j canaán uxrá níꞌ rihaan sayuun ado̱nj.

2 Corintios 2:14

Tza̱j ne̱ taj níꞌ guun niꞌya̱j níꞌ rihaan Yaꞌanj, cheꞌé se Yaꞌanj me síí ꞌyaj se vaa ꞌyaj canaán uxrá núj rihaan Síí Chre̱e cheꞌé Cristó a. Ne̱ Yaꞌanj me síí ꞌyaj uno yuvii̱ ma̱n cunuda̱nj nij chumanꞌ nana̱ sa̱ꞌ aꞌmii núj cheꞌé Cristó, ne̱ ꞌo̱ chaꞌnuu̱ nana̱ sa̱ꞌ yoꞌ rihaan nu̱ꞌ cachra̱ꞌ chumii̱, nda̱ꞌ rá se vaa avii se gunꞌ da̱j man yâj ga̱a naxraꞌ yoꞌ roꞌ, da̱nj vaa chaꞌnuu̱ snana̱ Yaꞌanj chugua̱nj.

Efesios 1:4

Asi̱j ataa quiꞌya̱j Yaꞌanj chumii̱ nihánj me narii soꞌ man níꞌ cunu̱u sa̱ꞌ nimán níꞌ rihaan maꞌa̱n soꞌ, ne̱ se̱ tumé níꞌ cacunꞌ, rá soꞌ a̱ maꞌ. Ne̱ dan me se cunuu ꞌe̱e̱ rá soꞌ man níꞌ,

Efesios 5:15

Cheꞌé dan tu̱mé uxrá soj da̱j vaa ꞌyaj soj ga̱a chéé soj rihaan chumii̱ nihánj á. Se̱ quiꞌyaj soj se vaa ꞌyaj nij síí ne acaj cuentá maꞌ. Tana̱nj quiꞌya̱j soj nda̱a vaa ꞌyaj síí cu̱u raa̱ á.

Filipenses 4:18

Dan me se nacaj ꞌu̱nj cunuda̱nj se vaa caꞌnéé soj rihanj, ne̱ a̱ ꞌó rasu̱u̱n ne achiin manj a̱ maꞌ. Ne̱ saꞌanj caꞌnéé soj rihanj ga̱ Epafrodito me se narqué soꞌ nu̱ꞌ saꞌanj yoꞌ rihanj, ne̱ guun niha̱ꞌ rá Yaꞌanj niꞌya̱j Yaꞌanj se vaa rqué soj saꞌanj yoꞌ manj, ne̱ ase vaa se acaa rihaan chraan altar, ne̱ da̱j ndoꞌo gunꞌ yoꞌ roꞌ, da̱nj vaa saꞌanj yoꞌ niꞌya̱j Yaꞌanj ado̱nj.

Hebreos 8:3

ꞌO̱ se ta̱ranꞌ nij xrej ata̱ suun noco̱o doj ma̱n rihaan chumii̱ nihánj roꞌ, no̱ xcúún nij soꞌ rque̱ nij soꞌ rasu̱u̱n do̱ꞌ, xcuu caca̱a̱ do̱ꞌ, rihaan Yaꞌanj ado̱nj. Cheꞌé dan me nij soꞌ xrej ado̱nj. Cheꞌé dan no̱ xcúún Jesús rque̱ uún soꞌ ꞌo̱ rasu̱u̱n rihaan Yaꞌanj na̱nj á.