Efesios 5:15 - Triqui de San Juan Copala

¹⁵ Cheꞌé dan tu̱mé uxrá soj da̱j vaa ꞌyaj soj ga̱a chéé soj rihaan chumii̱ nihánj á. Se̱ quiꞌyaj soj se vaa ꞌyaj nij síí ne acaj cuentá maꞌ. Tana̱nj quiꞌya̱j soj nda̱a vaa ꞌyaj síí cu̱u raa̱ á.

Efesios 5:15 Referans Kwoze

Colosenses 4:5

Asa̱ꞌ chéé soj ga̱ nij síí ataa cuchuma̱n rá ni̱ꞌyaj man Cristó, ne̱ sa̱ꞌ nuchru̱j ra̱a̱ soj da̱j caꞌmi̱i̱ soj ga̱ nij soꞌ, ne̱ se̱ quiriꞌ u̱u̱n tiempó quiꞌya̱j soj ga̱ nij soꞌ maꞌ.

Santiago 3:13

Sese vaa taꞌa̱j soj síí acaj cuentá ne̱ avii ndoꞌo raa̱ soj, rá soj, ne̱ veꞌé ina̱nj quiꞌya̱j soj si̱j vaa da̱nj rá rihaan tuviꞌ soj, ne̱ xca̱j tuviꞌ soj cuentá se vaa cheꞌé se avii raa̱ soj roꞌ, cheꞌé dan síí na̱j nimán me soj, ne̱ cheꞌé dan me veꞌé ina̱nj ꞌyaj soj a.

Filipenses 1:27

Veꞌé quiꞌya̱j soj ca̱yáán soj ga̱ tinúú soj, da̱j se vaa no̱ xcúún níꞌ si̱j noco̱ꞌ nana̱ sa̱ꞌ cheꞌé Cristó quiꞌya̱j níꞌ á. Da̱nj quiꞌya̱j soꞌ cheꞌé yan, caꞌve̱e se cuchi̱ꞌ ꞌu̱nj chiháán soj do̱ꞌ, caꞌve̱e se se̱ cuchíꞌ ꞌu̱nj ne̱ ina̱nj cu̱noj nana̱ cheꞌé soj do̱ꞌ, cu̱nó ꞌu̱nj se vaa xraan uxrá vaa nimán soj ꞌo̱ rcuaꞌa̱a̱n aꞌmii nacaj soj cheꞌé nana̱ sa̱ꞌ noco̱ꞌ níꞌ á.

1 Corintios 14:20

Ga̱a̱ sca̱ꞌ raa̱ nij soj, tinu̱j, nocoj. Se̱ gaa raa̱ soj ase vaa raa̱ ꞌo̱ xnii maꞌ. Dan me se ase vaa neꞌej ataa nari̱ꞌ quiꞌya̱j cacunꞌ roꞌ, da̱nj ga̱a̱ soj, tza̱j ne̱ ga̱a̱ sca̱ꞌ raa̱ soj á.

1 Timoteo 6:9

Tza̱j ne̱ xa̱ꞌ nij yuvii̱ me rá gu̱un ruꞌvee me se ne uun nucua̱j nij soꞌ canoco̱ꞌ nij soꞌ man Yaꞌanj a̱ maꞌ. Ne̱ nda̱a uun rá nij soꞌ quiꞌya̱j nij soꞌ cacunꞌ cheꞌé rej quiꞌya̱j canaán nij soꞌ rasu̱u̱n ga̱a̱ rihaan nij soꞌ, ne̱ dan me se ranꞌ ndoꞌo nij soꞌ sayuun, ne̱ síj, ga̱a ne̱ yu̱u̱n cheꞌe̱ quiri̱ꞌ nij soꞌ na̱nj ado̱nj.

1 Pedro 1:22

Dan me se uno soj snana̱ Yaꞌanj nana̱ ya̱, ne̱ cheꞌé dan cunuu sa̱ꞌ nimán soj, ne̱ cheꞌé dan no̱ xcúún soj ga̱a̱ ꞌe̱e̱ rá soj man tuviꞌ soj ado̱nj. Se̱ cataj rmaꞌa̱n soj se vaa ꞌe̱e̱ rá soj man tuviꞌ soj maꞌ. Ya̱ ga̱a̱ ꞌe̱e̱ ndoꞌo rá soj man tuviꞌ soj á.

San Mateo 10:16

’Ni̱ꞌyaj soj á. Caꞌne̱j ꞌu̱nj man soj rej ma̱n síí me rá quiꞌya̱j sayuun man soj a. Ase vaa matzinj va̱j rej ma̱n xcaꞌyanj caꞌnu̱ꞌ roꞌ, da̱nj ga̱a̱ soj ado̱nj. Cheꞌé dan ga̱a̱ cu̱u raa̱ soj á. Ase cui̱j raa̱ xcuáá roꞌ, da̱nj cui̱j ga̱a̱ raa̱ soj á. Tza̱j ne̱ ase vaa taj va̱j cacunꞌ tumé chaꞌaa̱n roꞌ, da̱nj ga̱a̱ soj, se̱ tumé soj cacunꞌ maꞌ.

1 Tesalonicenses 5:15

Tu̱mé soj man soj se̱ guun quiꞌya̱j chiꞌi̱i̱ ꞌo̱ tuviꞌ soj man síí ꞌyaj chiꞌi̱i̱ man soꞌ maꞌ. Tana̱nj ina̱nj suun sa̱ꞌ quiꞌya̱j soj cheꞌé tuviꞌ soj do̱ꞌ, cheꞌé cunuda̱nj yuvii̱ do̱ꞌ á.

San Lucas 24:25

Ga̱a ne̱ maꞌa̱n Jesús cataj rihaan ro̱j soꞌ a: ―Dan me se síí ne acaj cuentá me ro̱j so̱j, ne̱ síí ne niha̱ꞌ rá cuchuma̱n rá nu̱ꞌ snana̱ nij síí nataꞌ snana̱ Yaꞌanj ga̱a naá me ro̱j so̱j na̱nj á.

Gálatas 3:3

ꞌO̱ se síí nij snúú rmaꞌa̱n ya̱ me soj na̱nj chugua̱nj. Ga̱a guun cheꞌe̱ soj canocoꞌ soj man Cristó, ne̱ guun nucua̱j rá soj man Nimán Yaꞌanj se vaa ra̱cuíj Nimán Yaꞌanj man soj, tza̱j ne̱ ya̱j me se nucua̱j rá soj man maꞌa̱n soj se vaa cunu̱u sa̱ꞌ soj quiꞌya̱j maꞌa̱n soj na̱nj asânj.

Hebreos 12:25

Ta̱dó uxrá soj se̱ nachriꞌ soj ni̱ꞌyaj soj man Yaꞌanj si̱j narqué chrej sa̱ꞌ man soj maꞌ. ꞌO̱ se nij síí ne caꞌve̱j rá cuno̱ rihaan síí cataj xnaꞌanj snana̱ Yaꞌanj rihaan nij soꞌ rihaan chumii̱ nihánj ga̱a naá me se ne nani̱i̱ nij soꞌ maꞌ. Táá a̱ níꞌ si̱j ma̱n cuano̱, ne̱ aꞌmii síí nicu̱nꞌ rej xta̱ꞌ rihaan níꞌ, ne̱ sese nachri̱ꞌ níꞌ ni̱ꞌyaj níꞌ síí narqué chrej man níꞌ, ne̱ daj chiha̱a̱ míj se̱ nanii níꞌ a̱ maꞌ.

San Mateo 27:24

Dan me se queneꞌen Pilató se vaa taj se ꞌyáꞌ naꞌma̱a̱n rá nij yuvii̱, tana̱nj doj a̱ caꞌmaan rá nij yuvii̱, ne̱ doj a̱ quiꞌya̱j nij yuvii̱ sayuun rá Pilató a. Cheꞌé dan nica̱j soꞌ na, ne̱ naꞌyaꞌ soꞌ niꞌya̱j nij yuvii̱ a. Ne̱ cataj soꞌ a: ―Se̱ tumé ꞌu̱nj cacunꞌ sese cavi̱ꞌ síí nihánj a̱ maꞌ. ꞌO̱ se maꞌa̱n soj me síí quiꞌya̱j cavi̱ꞌ soꞌ ado̱nj ―taj Pilató a.

Apocalipsis 19:10

Ga̱a ne̱ cayáán ru̱j ꞌu̱nj rihaan soꞌ cara̱a̱ gue̱e̱ ꞌu̱nj rihaan soꞌ a. Tza̱j ne̱ cataj soꞌ rihanj a: ―Se̱ quiꞌyáá so̱ꞌ da̱nj maꞌ. ꞌO̱ se ꞌu̱nj roꞌ, me síí nu̱u̱ rihaan Yaꞌanj ga̱ nij tinu̱j nij soj si̱j nataꞌ snana̱ Jesús rihaan yuvii̱ a. Rihaan o̱rúnꞌ Yaꞌanj cara̱a̱ gue̱e̱ so̱ꞌ á. ꞌO̱ se nu̱ꞌ nana̱ caꞌmii nij síí nataꞌ snana̱ Yaꞌanj roꞌ, me nana̱ rqué Nimán Yaꞌanj rihaan nij soꞌ, ne̱ snana̱ Jesús me nana̱ yoꞌ ado̱nj ―taj soꞌ rihanj a.

San Mateo 8:4

Ga̱a ne̱ cataj Jesús rihaan soꞌ a: ―Tu̱mé so̱ꞌ mán so̱ꞌ se̱ cataj xnaꞌanj so̱ꞌ rihaan yuvii̱ cheꞌé se lu̱j quiꞌyáá ꞌu̱nj cheꞌé so̱ꞌ maꞌ. Ma̱an se cuchi̱ꞌ so̱ꞌ rihaan xrej, ne̱ ti̱haán so̱ꞌ mán so̱ꞌ rihaan xrej se vaa nahuún so̱ꞌ, ne̱ rque̱ so̱ꞌ rihaan Yaꞌanj se vaa cataj síí cuꞌna̱j Moisés ga̱a naá nda̱a vaa no̱ xcúún so̱ꞌ rque̱ so̱ꞌ rihaan Yaꞌanj á. Ga̱a ne̱ xca̱j nij xrej cuentá se vaa nahuún so̱ꞌ quiꞌyáj ado̱nj ―taj Jesús rihaan síí nahuun yoꞌ a.

Efesios 5:33

Dan me se sese snóꞌo me soj, ne̱ no̱ xcúún ꞌo̱ ꞌo̱ soj ga̱a̱ ꞌe̱e̱ rá soj man nica̱ soj, ne̱ ase vaa ꞌe̱e̱ rá soj man maꞌa̱n soj roꞌ, da̱nj ga̱a̱ ꞌe̱e̱ rá soj man nica̱ soj á. Ne̱ chana̱ roꞌ, no̱ xcúún chana̱ cara̱a̱ cochro̱j chana̱ rihaan nica̱ chana̱ uún ado̱nj.

Colosenses 1:9

Cheꞌé dan asi̱j cuno núj nana̱ cataj soꞌ rihaan núj, ne̱ niga̱nj achíín niꞌya̱j núj rihaan Yaꞌanj cheꞌé soj se vaa rque̱ Nimán Yaꞌanj nana̱ sa̱ꞌ cu̱u nimán soj, ne̱ xca̱j soj cuentá da̱j me rá Yaꞌanj quiꞌya̱j soj,

Gálatas 3:1

Síí nij snúú rmaꞌa̱n ya̱ me soj si̱j ma̱n estadó Galacia na̱nj chugua̱nj. Me cheꞌé guun rá soj ta̱náj soj tucuáán sa̱ꞌ ga̱. Vaa síí quiꞌyaj chre̱e man soj naꞌ. Né se sa̱ꞌ uxrá nataꞌ nii rihaan soj se vaa caviꞌ Jesucristó rihaan rcutze̱ cheꞌé soj a̱ naꞌ.

San Mateo 27:4

ne̱ cataj soꞌ a: ―Tumé ꞌu̱nj cacunꞌ se vaa tacuachén ꞌu̱nj man ꞌo̱ síí sa̱ꞌ ina̱nj rihaan soj na̱nj ado̱nj ―taj Judas yoꞌ a. ―Né se‑cacu̱nꞌ núj me cacunꞌ tumé so̱ꞌ maꞌ. Xca̱j ma̱ꞌán so̱ꞌ cuentá da̱j ga̱a̱ qui̱ꞌyáá so̱ꞌ na̱nj á ―taj nij soꞌ rihaan Judas a.

San Mateo 25:2

Dan me se ꞌu̱nꞌ nij chana̱ ya̱a̱n yoꞌ roꞌ, me chana̱ niꞌyo̱n, ne̱ yuꞌunꞌ nij chana̱ ya̱a̱n yoꞌ roꞌ, me chana̱ acaj cuentá a.

Efesios 5:2

ꞌO̱ ga̱a̱ ꞌe̱e̱ rá soj man tinúú soj á. Ina̱nj da̱nj quiꞌyaj Cristó, cunuu ꞌe̱e̱ rá soꞌ man níꞌ, ne̱ caꞌvej soꞌ cavi̱ꞌ soꞌ cheꞌé níꞌ, ne̱ ase vaa rasu̱u̱n rqué yuvii̱ rihaan Yaꞌanj roꞌ, taꞌngaꞌ da̱nj vaa Cristó cheꞌé níꞌ na̱nj chugua̱nj.