Efesios 1:7 - Triqui de San Juan Copala

⁷ Ne̱ cheꞌé ton cayanj man Cristó ga̱a caviꞌ soꞌ cheꞌé níꞌ roꞌ, cheꞌé dan navij cacunꞌ xráá níꞌ, cheꞌé se sa̱ꞌ uxrá vaa rá Yaꞌanj niꞌya̱j Yaꞌanj man níꞌ a.

Efesios 1:7 Referans Kwoze

1 Pedro 2:24

Cacunꞌ tumé níꞌ roꞌ, nataꞌ xráá Cristó ga̱a caviꞌ soꞌ rihaan rcutze̱, cheꞌé rej caꞌne̱ꞌ rá níꞌ ga̱ suun ꞌyaj cacunꞌ ne̱ ina̱nj tucuáán sa̱ꞌ canoco̱ꞌ níꞌ a. Ne̱ cheꞌé se goꞌ nii cuartá xráá soꞌ roꞌ, cheꞌé dan nahuun sa̱ꞌ nimán soj a.

Romanos 3:24

ꞌO̱ se ma̱an cheꞌé se cunuu ꞌe̱e̱ rá Yaꞌanj man cunuda̱nj yuvii̱ ne̱ quiꞌyaj maꞌa̱n Yaꞌanj se lu̱j cheꞌé nij yuvii̱ me caꞌvee tinavij Yaꞌanj cacunꞌ tumé nij yuvii̱ ado̱nj. Dan me se caꞌnéé Yaꞌanj man Cristó Jesús rihaan chumii̱, cheꞌé rej caꞌne̱e̱ soꞌ cacunꞌ xráá nij síí amán rá niꞌya̱j man soꞌ,

Colosenses 1:14

ne̱ cheꞌé Taꞌníí soꞌ navij cacunꞌ tumé níꞌ, ne̱ ti̱nanii Taꞌníí soꞌ man níꞌ rihaan sayuun ado̱nj.

Hebreos 9:22

Dan me se ina̱nj ton me se vaa achiin cheꞌé rej nahu̱un sa̱ꞌ queꞌe̱e̱ uxrá rasu̱u̱n rihaan Yaꞌanj, taj stucua̱nj Moisés a. Ne̱ sese nuviꞌ ton, ne̱ se̱ tinavij Yaꞌanj cacunꞌ tumé yuvii̱ maꞌ.

San Mateo 26:28

ꞌO̱ se ton manj me na nihánj, ne̱ cheꞌé ton manj roꞌ, cataꞌ tuꞌva Yaꞌanj da̱j quiꞌya̱j Yaꞌanj ga̱ soj a. Dan me se cheꞌé se caya̱nj ton manj roꞌ, cheꞌé dan me tinavi̱j Yaꞌanj cacunꞌ tumé ri̱i̱ yuvii̱ ado̱nj.

Apocalipsis 5:9

Ga̱a ne̱ achráá nij soꞌ chraꞌ naca̱ rihaan Matzinj Leꞌe̱j, cataj nij soꞌ a: No̱ xcúún so̱ꞌ ni̱caj so̱ꞌ yanj ne̱ caꞌne̱e̱ so̱ꞌ nij selló yánj aráán tuꞌva yanj yoꞌ á. ꞌO̱ se ticaviꞌ nii mán so̱ꞌ, ne̱ dan me se nica̱j so̱ꞌ ton mán so̱ꞌ quiránj so̱ꞌ yuvii̱ ma̱n da̱j a̱ xꞌneꞌ yuvii̱ ino̱ vaa stucua̱nj do̱ꞌ, yuvii̱ ma̱n da̱j a̱ xꞌneꞌ yuvii̱ aꞌmii ꞌo̱ ꞌo̱ xnaꞌánj do̱ꞌ, yuvii̱ ma̱n da̱j a̱ chumanꞌ do̱ꞌ, yuvii̱ ma̱n da̱j a̱ yoꞌóó noco̱o do̱ꞌ, cheꞌé Yaꞌanj ado̱nj.

1 Juan 2:12

Dan me se achrón ꞌu̱nj nu̱ꞌ nana̱ nihánj naya̱a̱ soj xni̱i, cheꞌé se navij cacunꞌ tumé soj rihaan Yaꞌanj cheꞌé se noco̱ꞌ soj man Cristó ado̱nj.

Filipenses 4:19

Dan me se sese vaa se achiin man soj, ne̱ rque̱ Taꞌanj ꞌu̱nj nu̱ꞌ rasu̱u̱n yoꞌ rihaan soj cheꞌé se me soj síí noco̱ꞌ man Cristó Jesús, ne̱ xa̱ꞌ Yaꞌanj, tza̱j ne̱ taj va̱j rasu̱u̱n achiin rihaan Yaꞌanj maꞌ. ꞌO̱ se soꞌ me síí uun chij rihaan cunuda̱nj rasu̱u̱n ado̱nj.

Efesios 2:7

Nda̱a síj, ga̱a ne̱ nu̱ꞌ cavii nu̱ꞌ caꞌanj ti̱haa̱n Yaꞌanj man nij yuvii̱ se vaa quiꞌyaj ndoꞌo Yaꞌanj se lu̱j cheꞌé níꞌ, ne̱ dan me se queneꞌe̱n nij yuvii̱ se vaa cunuu ꞌe̱e̱ ndoꞌo rá Yaꞌanj man níꞌ cheꞌé se síí noco̱ꞌ man Cristó Jesús me níꞌ na̱nj ado̱nj.

1 Corintios 1:30

Dan me se Yaꞌanj me síí ꞌyaj ꞌni̱j raꞌa Cristó Jesús man soj, ne̱ cheꞌé o̱rúnꞌ soꞌ avii raa̱ níꞌ do̱ꞌ, cunuu sa̱ꞌ nimán níꞌ rihaan Yaꞌanj do̱ꞌ, guun níꞌ síí sa̱ꞌ rihaan Yaꞌanj do̱ꞌ, nanii níꞌ rihaan sayuun do̱ꞌ, quiꞌyaj Yaꞌanj á.

Efesios 3:16

ne̱ achíín ni̱ꞌyáj rihaan soꞌ cheꞌé soj se vaa, cheꞌé se niꞌndaj ya̱ sa̱ꞌ veꞌé vaa soꞌ ne̱ taj a̱ ꞌó se achiin man soꞌ, nari̱ꞌ nucuaj nimán soj quiꞌya̱j Nimán soꞌ ado̱nj.

2 Corintios 8:9

ꞌO̱ se a̱j neꞌen soj se vaa quiꞌyaj ndoꞌo Jesucristó Si̱j ꞌNi̱j Raꞌa man níꞌ se lu̱j ga̱ níꞌ á. Dan me se ruꞌve̱e̱ ndoꞌo soꞌ ga̱a cayáán soꞌ rej xta̱ꞌ, tza̱j ne̱ naquiꞌyaj nique̱ soꞌ man soꞌ ne̱ caꞌnaꞌ soꞌ rihaan chumii̱ nihánj cheꞌé níꞌ, ga̱a ne̱ cheꞌé se da̱nj quiꞌyaj soꞌ roꞌ, cheꞌé dan cavi̱i̱ sa̱ꞌ níꞌ doj na̱nj ado̱nj.

Romanos 2:4

Me cheꞌé nachríꞌ so̱ꞌ se vaa me rá Yaꞌanj quiꞌya̱j sa̱ꞌ Yaꞌanj cheꞌé so̱ꞌ ga̱. Ne̱ me rá uún Yaꞌanj cunu̱u ꞌe̱e̱ rá Yaꞌanj mán so̱ꞌ ado̱nj. Naꞌvej rá Yaꞌanj quiꞌya̱j Yaꞌanj sayuun mán so̱ꞌ maꞌ. Ne neꞌén so̱ꞌ se vaa Yaꞌanj me síí ꞌe̱e̱ rá niꞌya̱j mán so̱ꞌ a. Ne̱ me rá Yaꞌanj nuchra̱nꞌ nimán so̱ꞌ ca̱nocóꞌ so̱ꞌ man soꞌ ado̱nj.

1 Juan 2:2

Ne̱ soꞌ me síí caviꞌ cheꞌé rej caꞌve̱e navi̱j cacunꞌ tumé níꞌ ado̱nj. Tza̱j ne̱ né cheꞌe̱ ma̱an do̱j se‑cacu̱nꞌ níꞌ me caviꞌ soꞌ maꞌ. Caviꞌ soꞌ cheꞌé cacunꞌ tumé cunuda̱nj nij yuvii̱ ma̱n rihaan chumii̱ ado̱nj.

Tito 2:14

Ne̱ soꞌ me síí caꞌnéé nimán cavi̱ꞌ cheꞌé níꞌ, cheꞌé rej caꞌve̱e caꞌne̱ꞌ rá níꞌ ga̱ me maꞌa̱n tucuáán chiꞌi̱i̱ canocoꞌ níꞌ ga̱a rque̱, ne̱ caꞌve̱e cunu̱u sa̱ꞌ níꞌ, ne̱ gu̱un níꞌ yuvii̱ noco̱ꞌ man o̱rúnꞌ soꞌ, ne̱ gu̱un niha̱ꞌ ndoꞌo rá níꞌ quiꞌya̱j níꞌ suun sa̱ꞌ ado̱nj.

Hechos 2:38

Ga̱a ne̱ cataj Pedró rihaan nij soꞌ a: ―Ca̱nica̱j nimán cunuda̱nj soj ta̱náj soj chrej chiꞌi̱i̱, ne̱ cata̱ꞌ ne soj cheꞌé se‑chuvi̱i Jesucristó Si̱j Caꞌnéé Yaꞌanj, ne̱ tinavi̱j Yaꞌanj cacunꞌ tumé soj a. Ne̱ rque̱ Yaꞌanj Nimán Yaꞌanj catu̱u̱ soꞌ nimán soj ado̱nj.

San Mateo 20:28

Dan me se nda̱ꞌ se Si̱j Caꞌnéé Yaꞌanj Ni̱caj Yuꞌunj man Yuvii̱ mej, tza̱j ne̱ ne caꞌna̱ꞌ ꞌu̱nj ne̱ gu̱un nij yuvii̱ mozó rihanj maꞌ. ꞌO̱ se caꞌnáꞌ ꞌu̱nj ra̱cuíj man nij yuvii̱ na̱nj ado̱nj. Ne̱ caꞌnáꞌ ꞌu̱nj nayo̱n ma̱ꞌanj rihaan yuvii̱ ne̱ cavi̱ꞌ ꞌu̱nj cheꞌé cacunꞌ ata̱ nij soꞌ, ga̱a ne̱ nani̱i̱ nij soꞌ rihaan sayuun, qui̱ꞌyáj na̱nj ado̱nj ―taj Jesús a.

1 Juan 4:10

Ne̱ vaa cheꞌé xca̱j níꞌ cuentá se vaa ne cara̱a̱ cochro̱j níꞌ rihaan Yaꞌanj asino ya̱a̱n maꞌ. Tana̱nj asino ya̱a̱n me se cunuu ꞌe̱e̱ rá Yaꞌanj niꞌya̱j Yaꞌanj man níꞌ, ga̱a ne̱ caꞌnéé soꞌ man Taꞌníí soꞌ cheꞌé rej cavi̱ꞌ Taꞌníí soꞌ yan tinavi̱j Taꞌníí soꞌ cacunꞌ tumé níꞌ a.

Hechos 20:28

’Dan me se ase vaa tumé yuvii̱ man daán yuvii̱ matzinj roꞌ, da̱nj quiꞌya̱j soj, tu̱mé soj man maꞌa̱n soj do̱ꞌ, man xꞌneꞌ nij síí noco̱ꞌ man Cristó do̱ꞌ á. Dan me se Nimán Yaꞌanj me síí cuneꞌ man soj gu̱un soj síí tu̱mé sa̱ꞌ rihaan Yaꞌanj man xꞌneꞌ yoꞌ, xꞌneꞌ quiránj Jesús ga̱ ton cavii man maꞌa̱n soꞌ ado̱nj.

1 Pedro 3:18

Tza̱j ne̱ Cristó me se nda̱ꞌ se taj cacunꞌ tumé soꞌ, tza̱j ne̱ ga̱a cachéé soꞌ rihaan chumii̱ nihánj, ne̱ quiranꞌ ndoꞌo soꞌ sayuun cheꞌé cacunꞌ tumé níꞌ si̱j tumé cacunꞌ, cheꞌé rej caꞌve̱e cuchi̱ꞌ níꞌ rihaan Yaꞌanj chugua̱nj. Dan me se caviꞌ nee̱ man Cristó, tza̱j ne̱ cunuu iꞌna̱ꞌ nimán soꞌ ado̱nj.

Efesios 3:8

Nda̱ꞌ se síí nica̱ꞌ doj rihaan ta̱ranꞌ nij síí noco̱ꞌ man Yaꞌanj mej, tza̱j ne̱ quiꞌyaj Yaꞌanj se lu̱j yoꞌ rihanj, ne̱ caꞌneꞌ soꞌ suun rihanj nata̱j nana̱ sa̱ꞌ rihaan nij soj si̱j yaníj se vaa niꞌndaj uxrá ya̱ se sa̱ꞌ vaa quiꞌyaj Cristó cheꞌé níꞌ ado̱nj.

Hechos 10:43

Ne̱ cunuda̱nj nij síí nataꞌ snana̱ Yaꞌanj ga̱a naá roꞌ, cataj xnaꞌanj nij soꞌ cheꞌé Jesús yoꞌ, ne̱ cataj nij soꞌ se vaa cheꞌé se‑chuvi̱i soꞌ me se tinavi̱j Yaꞌanj cacunꞌ tumé cunuda̱nj nij síí amán rá niꞌya̱j man Jesús a ―taj Pedró rihaan nij tuvi̱ꞌ Cornelió a.

San Juan 20:23

Ne̱ sese cata̱j soj se vaa navij cacunꞌ tumé me maꞌa̱n yuvii̱, ne̱ navi̱j nu̱ꞌ cacunꞌ tumé soꞌ a. Ne̱ sese cata̱j soj se vaa se̱ navij cacunꞌ tumé me maꞌa̱n yuvii̱, ne̱ veé da̱nj ga̱a̱ quita̱j nu̱ꞌ cacunꞌ tumé soꞌ xráá soꞌ nu̱ꞌ cavii nu̱ꞌ caꞌanj uún a ―taj Jesús rihaan nij síí tucuꞌyón snana̱ soꞌ a.

San Marcos 14:24

Ga̱a ne̱ cataj Jesús rihaan nij soꞌ a: ―Ton manj me na nihánj, ne̱ cheꞌé ton manj roꞌ, cataꞌ tuꞌva Yaꞌanj rihaan soj da̱j quiꞌya̱j Yaꞌanj ga̱ soj a. Dan me se caya̱nj ton manj cheꞌé rej tinavi̱j Yaꞌanj cacunꞌ cheꞌé ri̱i̱ yuvii̱ ado̱nj.

Tito 3:6

Dan me se ma̱an cheꞌé Jesucristó Si̱j Caꞌnéé Yaꞌanj, Si̱j Tinanii man níꞌ rihaan Sayuun me rqué ndoꞌo Yaꞌanj Nimán soꞌ nimán níꞌ na̱nj ado̱nj.

1 Timoteo 2:6

Ne̱ Cristó Jesús me se caꞌvej rá soꞌ cavi̱ꞌ soꞌ cheꞌé cunuda̱nj yuvii̱, cheꞌé rej nani̱i̱ nij yuvii̱ rihaan sayuun a. Dan me se cachrón Yaꞌanj güii cavi̱ꞌ Cristó Jesús, ne̱ güii dan caviꞌ Cristó Jesús, ne̱ tihaa̱n Cristó Jesús se vaa me uxrá rá Yaꞌanj cavi̱i̱ sa̱ꞌ cunuda̱nj yuvii̱ a.

Colosenses 2:13

Ga̱a naá ga̱a ataa queneꞌe̱n soj si̱j yaníj man Cristó, ne̱ quiꞌyaj ndoꞌo soj cacunꞌ, ne̱ taj taꞌngaꞌ cutaꞌ nii man nee̱ man soj maꞌ. Tza̱j ne̱ tinavij u̱u̱n Yaꞌanj nu̱ꞌ cacunꞌ ta̱j xráá soj, ne̱ ase vaa cunuu iꞌna̱ꞌ uún Cristó ga̱a caviꞌ soꞌ roꞌ, da̱nj vaa soj, ne̱ ꞌo̱ cunuu sa̱ꞌ nimán soj, quiꞌyaj Yaꞌanj na̱nj á.

Colosenses 2:2

ꞌO̱ se me ndoꞌo rá ꞌu̱nj nari̱ꞌ nucuaj nimán soj ne̱ ꞌo̱ cu̱nuû se sa̱ꞌ nimán soj cuma̱n soj ga̱ tuviꞌ soj, ne̱ ꞌo̱ nari̱ꞌ ndoꞌo soj nda̱a gu̱un ya̱ ya̱ rá soj nana̱ sa̱ꞌ yuve̱ tihaa̱n Yaꞌanj se vaa maꞌa̱n Cristó me nana̱ naca̱ yoꞌ na̱nj á.

Colosenses 1:27

Dan me se guun rá Yaꞌanj xca̱j cunuda̱nj níꞌ si̱j noco̱ꞌ man soꞌ cuentá cheꞌé nana̱ sa̱ꞌ yuve̱ nihánj nana̱ tihaa̱n naca̱ Yaꞌanj se vaa niꞌndaj ya̱ sa̱ꞌ quiꞌyaj Yaꞌanj cheꞌé soj si̱j yaníj na̱nj ado̱nj. Dan me se yuvii̱ yaníj me soj, tza̱j ne̱ ya̱nj Cristó nimán soj, ne̱ cheꞌé dan uun ya̱ rá níꞌ se vaa niꞌndaj ya̱ cavi̱i̱ sa̱ꞌ soj ga̱ Yaꞌanj vaa güii na̱nj ado̱nj.

Efesios 2:4

Tza̱j ne̱ cunuu ꞌe̱e̱ ndoꞌo rá Yaꞌanj man níꞌ,

Romanos 9:23

cheꞌé rej ti̱haa̱n Yaꞌanj rihaan nij yuvii̱ nu̱ꞌ nda̱a vaa quiꞌya̱j soꞌ cheꞌé ꞌó nij yuvii̱ a. Ne̱ ꞌó nij soꞌ me se a̱j guun rá Yaꞌanj se vaa gu̱un chij nij soꞌ ga̱ soꞌ, ne̱ cheꞌé dan cunu̱u ꞌe̱e̱ rá soꞌ man nij soꞌ, ga̱a ne̱ xca̱j cunuda̱nj nij yuvii̱ cuentá se vaa síí niꞌndaj ya̱ sa̱ꞌ veꞌé uun chij me Yaꞌanj na̱nj ado̱nj.

Hechos 3:19

’Cheꞌé dan ca̱nica̱j nimán soj canoco̱ꞌ soj chrej sa̱ꞌ, ga̱a ne̱ caꞌve̱e tinavi̱j Yaꞌanj cacunꞌ tumé soj á. Ga̱a ne̱ caꞌve̱e quisi̱j güii cunu̱u cui̱j rá ta̱ranꞌ níꞌ si̱j israelitá, quiꞌya̱j Síí ꞌNi̱j Raꞌa man níꞌ a.

San Lucas 24:47

Ga̱a ne̱ vaa cheꞌé caꞌmi̱i̱ natáj nii se vaa cheꞌé se‑chuvi̱i Síí Caꞌnéé Yaꞌanj Ti̱nanii man Yuvii̱ rihaan Sayuun roꞌ, no̱ xcúún yuvii̱ ca̱nica̱j nimán yuvii̱ ne̱ ta̱náj yuvii̱ chrej chiꞌi̱i̱, ne̱ tinavi̱j Yaꞌanj cacunꞌ tumé nij soꞌ a. Asino ya̱a̱n vaa cheꞌé caꞌmi̱i̱ natáj nii chumanꞌ Jerusalén, ga̱a ne̱ caꞌmi̱i̱ natáj nii rihaan ta̱ranꞌ nij xꞌneꞌ yuvii̱ ino̱ vaa stucua̱nj ado̱nj.

San Lucas 1:77

ne̱ so̱ꞌ quiꞌya̱j xca̱j nij síí canoco̱ꞌ man Yaꞌanj cuentá se vaa caꞌve̱e navi̱j cacunꞌ tumé nij soꞌ, ne̱ caꞌve̱e nani̱i̱ nij soꞌ rihaan sayuun a.

Apocalipsis 14:4

Ne̱ ne quiꞌya̱j nij soꞌ cacunꞌ ga̱ chana̱ rihaan Yaꞌanj maꞌ. ꞌO̱ se síí vaa sa̱ꞌ ina̱nj me ta̱ranꞌ nij soꞌ na̱nj ado̱nj. Ne̱ síí canocoꞌ xcó Matzinj Leꞌe̱j me rej maꞌa̱n va̱j soꞌ me uún nij soꞌ a. Ne̱ nij soꞌ me nij síí táá ya̱a̱n rihaan ta̱ranꞌ ꞌó nij síí ma̱n rihaan chumii̱ síí cunuu sa̱ꞌ rihaan Yaꞌanj do̱ꞌ, rihaan Matzinj Leꞌe̱j do̱ꞌ, ga̱a caviꞌ Matzinj Leꞌe̱j yoꞌ a.

Efesios 1:6

Da̱nj quiꞌyaj soꞌ cheꞌé yan veꞌé caꞌmi̱i̱ níꞌ ni̱ꞌyaj níꞌ man Yaꞌanj, ne̱ cata̱j níꞌ se vaa veꞌé ndoꞌo quiꞌyaj soꞌ se lu̱j cheꞌé níꞌ, cheꞌé se noco̱ꞌ níꞌ man Cristó síí ꞌe̱e̱ rá soꞌ niꞌya̱j soꞌ man na̱nj ado̱nj.

San Mateo 6:12

Ti̱navíí so̱ꞌ cacunꞌ tumé núj, da̱j se vaa aráj xꞌnaa núj cheꞌé cacunꞌ quiꞌyaj tuviꞌ núj rihaan núj na̱nj ado̱nj.

Romanos 3:25

ne̱ dan me se caꞌnéé Yaꞌanj man Jesús nayo̱n Jesús rihaan yuvii̱ tumé cacunꞌ, ne̱ cuchuma̱n rá nij síí tumé cacunꞌ se vaa caviꞌ Jesús cheꞌé nij soꞌ, ne̱ nani̱i̱ nij soꞌ rihaan sayuun na̱nj ado̱nj. Dan me se neꞌen níꞌ se vaa tinavij Yaꞌanj cacunꞌ tumé yuvii̱, ne̱ xcaj níꞌ cuentá se vaa vaa nica̱ rá Yaꞌanj ga̱a tinavij Yaꞌanj cacunꞌ tumé nij yuvii̱ cayáán ga̱a naá a. Yuvii̱ cayáán ga̱a naá roꞌ, ne quira̱nꞌ nij soꞌ sayuun cheꞌé cacunꞌ tumé nij soꞌ maꞌ.

Efesios 1:8

Ne̱ Yaꞌanj roꞌ, me síí quiꞌyaj ndoꞌo se lu̱j cheꞌé níꞌ se vaa rqué ndoꞌo soꞌ nana̱ cu̱u man níꞌ, ne̱ xcaj ndoꞌo níꞌ cuentá, quiꞌyaj soꞌ ado̱nj.

Efesios 1:14

ne̱ ya̱ rque̱ ndoꞌo Yaꞌanj se sa̱ꞌ man níꞌ vaa güii na̱nj ado̱nj. Dan me se rqué Yaꞌanj Nimán Yaꞌanj rihaan níꞌ tihaa̱n Yaꞌanj se vaa ya̱ naca̱j Yaꞌanj man níꞌ vaa güii, ne̱ nani̱i̱ níꞌ rihaan sayuun, cheꞌé rej cata̱j níꞌ se vaa niꞌndaj ya̱ sa̱ꞌ veꞌé vaa Yaꞌanj a.

Efesios 1:18

Dan me se sa̱ꞌ doj xca̱j soj cuentá, ne̱ queneꞌe̱n soj me cheꞌé nacúún Yaꞌanj man soj, ne̱ queneꞌe̱n soj nu̱ꞌ se vaa quiꞌya̱j Yaꞌanj cheꞌé soj, ne̱ gu̱un ya̱ rá soj se vaa vaa cheꞌé ndoꞌo nocoꞌ soj man Cristó ado̱nj. Queneꞌe̱n soj se vaa niꞌndaj ya̱ sa̱ꞌ vaa se quiꞌya̱j Yaꞌanj cheꞌé ta̱ranꞌ níꞌ si̱j noco̱ꞌ man soꞌ,