Apocalipsis 4:11 - Triqui de San Juan Copala

¹¹ No̱ xcúún ndoꞌo so̱ꞌ Yaꞌa̱nj Si̱j ꞌNi̱j Raꞌa man núj cata̱j núj se vaa niꞌndaj ya̱ sa̱ꞌ veꞌé vaa so̱ꞌ do̱ꞌ, cara̱a̱ cochro̱j núj mán so̱ꞌ do̱ꞌ, gu̱un chij ndoꞌo so̱ꞌ do̱ꞌ á. ꞌO̱ se so̱ꞌ me síí quiꞌyaj cunuda̱nj rasu̱u̱n, ne̱ ma̱an cheꞌé se guun rá so̱ꞌ cuma̱n nij rasu̱u̱n yoꞌ roꞌ, cheꞌé dan guun cunuda̱nj nij rasu̱u̱n, quiꞌyáá so̱ꞌ ado̱nj taj ico̱ caꞌa̱nj nij síí uun chij yoꞌ rihaan Yaꞌanj a.

Apocalipsis 4:11 Referans Kwoze

Apocalipsis 5:12

Ne̱ nucua̱j ndoꞌo caꞌmii nij se‑mo̱zó Yaꞌanj yoꞌ, cataj nij soꞌ a: No̱ xcúún ndoꞌo Matzinj Leꞌe̱j ticaviꞌ nii man gu̱un nucua̱j ndoꞌo soꞌ do̱ꞌ, ni̱caj soꞌ nu̱ꞌ rasu̱u̱n sa̱ꞌ do̱ꞌ, ni̱caj ndoꞌo soꞌ cuentá do̱ꞌ, gu̱un chij ndoꞌo soꞌ do̱ꞌ, caꞌmi̱i̱ cochro̱j ta̱ranꞌ níꞌ cheꞌé soꞌ do̱ꞌ, cata̱j níꞌ se vaa niꞌndaj ya̱ sa̱ꞌ vaa soꞌ do̱ꞌ, veꞌé uxrá caꞌmi̱i̱ níꞌ cheꞌé soꞌ do̱ꞌ ado̱nj taj nij se‑mo̱zó Yaꞌanj niꞌya̱j nij soꞌ Matzinj Leꞌe̱j yoꞌ a.

Apocalipsis 10:6

ne̱ cutaꞌ soꞌ raa̱ Yaꞌanj si̱j ca̱yáán nu̱ꞌ cavii nu̱ꞌ caꞌanj síí quiꞌyaj rej xta̱ꞌ ga̱ nu̱ꞌ se ma̱n rej xta̱ꞌ, síí quiꞌyaj chumii̱ ga̱ nu̱ꞌ se ma̱n rihaan chumii̱, síí quiꞌyaj na yaꞌa̱nj ga̱ nu̱ꞌ se ma̱n rque na yaꞌa̱nj, ne̱ cataj soꞌ a: ―Se̱ caꞌvee gu̱un ra̱a̱n a̱ doj a̱ maꞌ.

Apocalipsis 14:7

Ga̱a ne̱ dan me se nucua̱j ndoꞌo caꞌmii soꞌ, cataj soꞌ a: ―Cara̱a̱ cochro̱j uxrá nij soj rihaan Yaꞌanj, ne̱ veꞌé caꞌmi̱i̱ soj cheꞌé soꞌ á. ꞌO̱ se a̱j quisíj orá caꞌne̱ꞌ soꞌ cacunꞌ cheꞌé yuvii̱ na̱nj ado̱nj. Dan me se cara̱a̱ gue̱e̱ soj rihaan soꞌ, cheꞌé se soꞌ me síí quiꞌyaj rej xta̱ꞌ do̱ꞌ, yoꞌóó do̱ꞌ, na yaꞌa̱nj do̱ꞌ, rej avii na do̱ꞌ a ―taj se‑mo̱zó Yaꞌanj yoꞌ cunoj a.

Apocalipsis 5:9

Ga̱a ne̱ achráá nij soꞌ chraꞌ naca̱ rihaan Matzinj Leꞌe̱j, cataj nij soꞌ a: No̱ xcúún so̱ꞌ ni̱caj so̱ꞌ yanj ne̱ caꞌne̱e̱ so̱ꞌ nij selló yánj aráán tuꞌva yanj yoꞌ á. ꞌO̱ se ticaviꞌ nii mán so̱ꞌ, ne̱ dan me se nica̱j so̱ꞌ ton mán so̱ꞌ quiránj so̱ꞌ yuvii̱ ma̱n da̱j a̱ xꞌneꞌ yuvii̱ ino̱ vaa stucua̱nj do̱ꞌ, yuvii̱ ma̱n da̱j a̱ xꞌneꞌ yuvii̱ aꞌmii ꞌo̱ ꞌo̱ xnaꞌánj do̱ꞌ, yuvii̱ ma̱n da̱j a̱ chumanꞌ do̱ꞌ, yuvii̱ ma̱n da̱j a̱ yoꞌóó noco̱o do̱ꞌ, cheꞌé Yaꞌanj ado̱nj.

Hebreos 1:10

Ne̱ taj uún Danj Yaꞌanj a: Asino ya̱a̱n so̱ꞌ me síí cuneꞌ man chumii̱ nihánj, Señor. Ne̱ ma̱ꞌán so̱ꞌ raꞌa yá so̱ꞌ quiꞌyáá so̱ꞌ nu̱ꞌ se ma̱n rej xta̱ꞌ ado̱nj.

Romanos 11:36

Dan me se maꞌa̱n Yaꞌanj quiꞌyaj cunuda̱nj rasu̱u̱n, ne̱ cheꞌé maꞌa̱n Yaꞌanj mán rasu̱u̱n rihaan chumii̱, ne̱ se rásuun Yaꞌanj me cunuda̱nj rasu̱u̱n a. Veꞌé uxrá caꞌmi̱i̱ cunuda̱nj yuvii̱ cheꞌé Yaꞌanj nu̱ꞌ cavii nu̱ꞌ caꞌanj ado̱nj. Veé da̱nj ga̱a̱ ya̱ ado̱nj.

Efesios 3:9

Ne̱ me rá Yaꞌanj nata̱ꞌ yá ꞌu̱nj rihaan yuvii̱ nu̱ꞌ nana̱ sa̱ꞌ yuve̱ cheꞌé se vaa quiꞌya̱j soꞌ cheꞌé nij yuvii̱ a. Dan me se Yaꞌanj me síí quiꞌyaj nu̱ꞌ rasu̱u̱n, tza̱j ne̱ ne nata̱ꞌ ya̱ soꞌ nana̱ sa̱ꞌ yuve̱ yoꞌ rihaan yuvii̱ nu̱ꞌ cavii nu̱ꞌ caꞌnaꞌ maꞌ.

Hechos 14:15

cataj ro̱j soꞌ a: ―Se̱ guun quiꞌya̱j nij soj da̱nj maꞌ. ꞌO̱ se cuya̱a̱n yuvii̱ me níꞌ, ne̱ nihánj me se ꞌnaꞌ núj nata̱ꞌ núj snana̱ Yaꞌanj nana̱ sa̱ꞌ rihaan nij soj, cheꞌé rej ta̱náj soj tucuáán niꞌyo̱n rmaꞌa̱n noco̱ꞌ soj cuano̱ nihánj ne̱ ca̱nica̱j soj canoco̱ꞌ soj Yaꞌanj síí vaa iꞌna̱ꞌ ya̱ na̱nj á. Ne̱ soꞌ roꞌ, me síí quiꞌyaj nu̱ꞌ rej xta̱ꞌ do̱ꞌ, nu̱ꞌ rihaan yoꞌóó do̱ꞌ, nu̱ꞌ na yaꞌa̱nj do̱ꞌ, ne̱ nu̱ꞌ rasu̱u̱n quiꞌyaj soꞌ ado̱nj.

Hechos 17:24

’Dan me se Yaꞌanj roꞌ, me yaꞌanj quiꞌyaj nu̱ꞌ chumii̱ do̱ꞌ, nu̱ꞌ rasu̱u̱n ma̱n rihaan chumii̱ do̱ꞌ, ne̱ se̱ caꞌvee gu̱un tucua̱ soꞌ veꞌ uneꞌ yuvii̱ ca̱yáán soꞌ, cheꞌé se soꞌ me Síí ꞌNi̱j Raꞌa nu̱ꞌ rej xta̱ꞌ nu̱ꞌ yoꞌóó nu̱ꞌ a.

Apocalipsis 5:2

Ga̱a ne̱ queneꞌén ꞌu̱nj ꞌo̱ se‑mo̱zó Yaꞌanj síí nucua̱j ndoꞌo, ne̱ nucua̱j ndoꞌo xnáꞌanj soꞌ, cataj soꞌ a: ―Me síí no̱ xcúún caꞌne̱e̱ nij selló no̱ aráán tuꞌva yanj ne̱ nuxra̱ꞌ soꞌ yanj ga̱ ―taj soꞌ, xnáꞌanj soꞌ a.

Hebreos 1:2

Tza̱j ne̱ ya̱j ga̱a nichrunꞌ caꞌa̱nj niꞌya̱ chumii̱ nihánj me se cataj xnaꞌanj maꞌa̱n ya̱ Taꞌníí Yaꞌanj snana̱ Yaꞌanj rihaan níꞌ, quiꞌyaj Yaꞌanj, ne̱ Taꞌníí Yaꞌanj me síí cuneꞌ Yaꞌanj man se vaa gu̱un siꞌya̱j soꞌ man cunuda̱nj rasu̱u̱n vaa güii, ne̱ soꞌ me síí quiꞌyaj nu̱ꞌ chumii̱ ga̱ xta̱ꞌ, quiꞌyaj Yaꞌanj ado̱nj.

Apocalipsis 1:6

Ne̱ cuneꞌ soꞌ man níꞌ gu̱un níꞌ síí nica̱j suun rey ne̱ gu̱un níꞌ xrej nu̱u̱ rihaan Rej soꞌ Yaꞌanj a. Ne̱ ꞌo̱ cata̱j yuvii̱ se vaa niꞌndaj ya̱ sa̱ꞌ veꞌé vaa soꞌ ne̱ veꞌé gu̱un chij soꞌ nu̱ꞌ cavii nu̱ꞌ caꞌanj ado̱nj. Veé da̱nj ga̱a̱ ya̱ ado̱nj.

Apocalipsis 19:1

Veé dan, ga̱a ne̱ cunó ꞌu̱nj nana̱ caꞌmii nucua̱j ri̱i̱ uxrá yuvii̱ nicu̱nꞌ rej xta̱ꞌ, ne̱ cataj nij yuvii̱ a: Cara̱a̱ gue̱e̱ níꞌ rihaan Yaꞌanj á. Taꞌanj níꞌ roꞌ, soꞌ me síí tinanii man níꞌ rihaan sayuun, ne̱ cara̱a̱ cochro̱j níꞌ rihaan soꞌ do̱ꞌ, niꞌndaj ya̱ sa̱ꞌ veꞌé ga̱a̱ soꞌ do̱ꞌ, gu̱un chij ndoꞌo soꞌ do̱ꞌ ado̱nj.