1 Pedro 1:12 - Triqui de San Juan Copala

¹² Dan me se cataj xnaꞌanj Yaꞌanj rihaan nij soꞌ se vaa né maꞌa̱n nij soꞌ me nij síí queneꞌe̱n caꞌna̱ꞌ síí caꞌne̱j Yaꞌanj maꞌ. Tana̱nj nu̱ꞌ nij soj me nij síí queneꞌe̱n man síí caꞌne̱j Yaꞌanj, asa̱ꞌ caꞌnaꞌ soꞌ, taj Yaꞌanj rihaan nij síí nataꞌ snana̱ Yaꞌanj ga̱a naá yoꞌ a. Ne̱ nihánj me se nij síí caꞌmii natáj nana̱ sa̱ꞌ cheꞌé Cristó rihaan soj ya̱j roꞌ, caꞌnéé Yaꞌanj Nimán Yaꞌanj rihaan nij soꞌ, ne̱ a̱j nataꞌ nij soꞌ nu̱ꞌ se vaa quiꞌyaj Cristó síí caꞌnéé Yaꞌanj rihaan chumii̱ nihánj cuno soj a. Ne̱ nda̱a nij se‑mo̱zó Yaꞌanj síí ya̱nj xta̱ꞌ me rá queneꞌe̱n da̱j ga̱a̱ cavi̱i̱ sa̱ꞌ níꞌ quiꞌya̱j Cristó ado̱nj.

1 Pedro 1:12 Referans Kwoze

San Juan 15:26

’Dan me se caꞌne̱j ꞌu̱nj Nimán Yaꞌanj cavi̱i̱ soꞌ rej ya̱nj Yaꞌanj caꞌna̱ꞌ soꞌ rihaan soj, ne̱ ra̱cuíj ndoꞌo soꞌ man soj, ne̱ ina̱nj nana̱ ya̱ rque̱ soꞌ man soj a. Asa̱ꞌ caꞌnaꞌ Nimán Yaꞌanj rihaan soj, ga̱a ne̱ cata̱j xnaꞌanj soꞌ rihaan nij yuvii̱ cheꞌej ado̱nj.

Efesios 3:10

Tza̱j ne̱ da̱j a̱ nij síí uun chij rej xta̱ꞌ do̱ꞌ, da̱j a̱ nij síí nica̱j suun rej xta̱ꞌ do̱ꞌ roꞌ, me rá Yaꞌanj xca̱j nij soꞌ cuentá cuano̱ se vaa ina̱nj nana̱ cu̱u sa̱ꞌ ndoꞌo avii raa̱ Yaꞌanj, ne̱ queneꞌe̱n nij soꞌ man xꞌneꞌ ta̱ranꞌ níꞌ si̱j noco̱ꞌ man Cristó, ne̱ xca̱j nij soꞌ cuentá se vaa avii ndoꞌo raa̱ Yaꞌanj ado̱nj.

1 Corintios 2:10

Tza̱j ne̱ quiꞌyaj Yaꞌanj se vaa tihaa̱n Nimán Yaꞌanj man núj cheꞌé nij rasu̱u̱n quiꞌyaj Yaꞌanj cheꞌé níꞌ si̱j aráj cochro̱j rihaan Yaꞌanj a. Dan me se nuchruj ra̱a̱ Nimán Yaꞌanj cunuda̱nj rasu̱u̱n, ne̱ sa̱ꞌ uxrá nuchruj ra̱a̱ Nimán Yaꞌanj da̱j vaa maꞌa̱n Yaꞌanj ado̱nj.

Hebreos 4:2

Ne̱ ase vaa catúj snana̱ Yaꞌanj xréé nij síí cumán ga̱a naá roꞌ, da̱nj vaa gue̱e̱ catúj snana̱ Yaꞌanj xréé maꞌa̱n níꞌ cuano̱ ado̱nj. Ga̱a cuno nij soꞌ snana̱ Yaꞌanj me se cuno u̱u̱n nij soꞌ nana̱ yoꞌ, tza̱j ne̱ taj se gúnꞌ nana̱ yoꞌ rihaan nij soꞌ cheꞌé se ne cuchuma̱n rá nij soꞌ daj chiha̱a̱ míj nana̱ yoꞌ a̱ maan chugua̱nj.

San Marcos 16:15

Ga̱a ne̱ cataj Jesús rihaan nij soꞌ a: ―Caꞌa̱nj nij soj rihaan nu̱ꞌ cachra̱ꞌ chumii̱, ne̱ caꞌmi̱i̱ natáj soj nana̱ sa̱ꞌ cheꞌé ꞌu̱nj rihaan cunuda̱nj nij yuvii̱ a.

1 Pedro 1:25

Tza̱j ne̱ daj chiha̱a̱ míj se̱ navij snana̱ Síí ꞌNi̱j Raꞌa man níꞌ maꞌ. Da̱nj taj nana̱ no̱ rihaan Danj Yaꞌanj, ne̱ snana̱ Yaꞌanj yoꞌ me nana̱ sa̱ꞌ nataꞌ núj rihaan soj ado̱nj.

Apocalipsis 5:11

Ga̱a ne̱ queneꞌen uún ꞌu̱nj, ne̱ cunó ꞌu̱nj snana̱ queꞌe̱e̱ millón se‑mo̱zó Yaꞌanj nicu̱nꞌ nu̱ꞌ anica̱j chruun xlá sa̱ꞌ do̱ꞌ, nij xcuu do̱ꞌ, nij síí uun chij do̱ꞌ a.

2 Corintios 6:6

Ne̱ tumé núj man núj cheꞌé yan se̱ quiꞌyaj núj cacunꞌ maꞌ. Ne̱ aꞌnéé nimán núj quiꞌya̱j núj se‑su̱u̱n Yaꞌanj, ne̱ núj roꞌ, ne uun yuva̱a̱ núj man tuviꞌ núj maꞌ. Tana̱nj veꞌé ꞌyaj núj rihaan tuviꞌ núj, ne̱ noco̱ꞌ núj Nimán Yaꞌanj, ne̱ ya̱ ya̱ ꞌe̱e̱ rá núj man tuviꞌ núj ado̱nj.

2 Corintios 1:22

Ne̱ soꞌ me síí cataj se vaa ya̱ ya̱ taꞌni̱j soꞌ me níꞌ, ne̱ caꞌnéé soꞌ Nimán soꞌ ca̱yáán nimán níꞌ, ne̱ cheꞌé dan guun ya̱ rá níꞌ se vaa ya̱ rque̱ soꞌ se sa̱ꞌ man níꞌ, vaa güii ado̱nj.

Romanos 15:19

Dan me se guun nu̱cuáá ꞌu̱nj ꞌyáá ꞌu̱nj da̱j a̱ nij suun sa̱ꞌ noco̱o, ꞌyaj snucua̱j Nimán Yaꞌanj a. Ga̱a ne̱ xcaj yuvii̱ ya̱nj nu̱ꞌ anica̱j chumanꞌ Jerusalén cuentá cheꞌé nana̱ sa̱ꞌ cheꞌé Cristó, ne̱ nda̱a yuvii̱ ya̱nj ꞌó nij chumanꞌ ga̱nꞌ doj nda̱a estadó cuꞌna̱j Ilírico roꞌ, xcaj cuentá cheꞌé nana̱ sa̱ꞌ cheꞌé Cristó, quiꞌyáj a.

Hechos 2:33

Cavii Jesús nda̱a xꞌnúú Yaꞌanj rej nuva̱ꞌ Yaꞌanj, ga̱a ne̱ nacaj soꞌ Nimán Yaꞌanj raꞌa Rej soꞌ nda̱a vaa cataꞌ tuꞌva Rej soꞌ a. Ne̱ rqué ndoꞌo Jesús Nimán Yaꞌanj man núj nda̱a se vaa neꞌen soj do̱ꞌ, nda̱a se vaa uno soj do̱ꞌ na̱nj ado̱nj.

Hebreos 2:4

Tihaa̱n Yaꞌanj se vaa ya̱ vaa rej nani̱i̱ níꞌ rihaan sayuun cheꞌé se rqué Nimán Yaꞌanj se nucua̱j man nij síí noco̱ꞌ man Cristó, ne̱ quiꞌyaj nij soꞌ da̱j a̱ suun sa̱ꞌ noco̱o, da̱j se me rá maꞌa̱n Yaꞌanj a.

Gálatas 1:16

ne̱ tihaa̱n soꞌ Taꞌníí soꞌ Jesucristó rihanj, cheꞌé se me rá soꞌ caꞌa̱nj ꞌu̱nj nata̱ꞌ ꞌu̱nj snana̱ soꞌ nana̱ sa̱ꞌ rihaan nij yuvii̱ yaníj na̱nj ado̱nj. Tza̱j ne̱ ꞌu̱nj me se a̱ doj ne caꞌa̱nj ꞌu̱nj xna̱ꞌanj ꞌu̱nj man yuvii̱ da̱j qui̱ꞌyáj ca̱nocoj man Yaꞌanj maꞌ.

Gálatas 1:12

Ne̱ né yuvi̱i̱ nataꞌ nana̱ yoꞌ rihanj maꞌ. Ne̱ taj síí tucuꞌyón nana̱ yoꞌ manj maꞌ. Tana̱nj maꞌa̱n ya̱ Jesucristó tihaa̱n nana̱ sa̱ꞌ yoꞌ manj ado̱nj.

Romanos 10:15

Ne̱ asa̱ꞌ cuchi̱ꞌ síí aꞌmii natáj rihaan yuvii̱, sese se̱ caꞌnéé nii man soꞌ ga̱an. Dan me se aꞌmii uún Danj Yaꞌanj, taj yoꞌ a: “Veꞌé ndoꞌo ꞌyaj síí ꞌanj caꞌmi̱i̱ natáj nana̱ sa̱ꞌ ado̱nj.” Da̱nj taj Danj Yaꞌanj a.

Romanos 1:17

Dan me se cataj snana̱ Yaꞌanj nana̱ sa̱ꞌ rihaan níꞌ se vaa caꞌve̱e cunu̱u sa̱ꞌ nimán níꞌ rihaan Yaꞌanj, quiꞌya̱j Yaꞌanj, sese amán rá níꞌ niꞌya̱j níꞌ Yaꞌanj a. Nda̱a síj, ga̱a ne̱ cuchuma̱n doj rá níꞌ ni̱ꞌyaj níꞌ man Yaꞌanj a. Veé ꞌo̱ cuya̱a̱n vaa nana̱ nihánj ga̱ nana̱ no̱ rihaan Danj Yaꞌanj, taj yoꞌ a: “Síí a̱j cunuu sa̱ꞌ nimán rihaan Yaꞌanj roꞌ, ꞌo̱ amán rá soꞌ niꞌya̱j soꞌ Yaꞌanj ga̱a vaa iꞌna̱ꞌ soꞌ ado̱nj”, taj Danj Yaꞌanj a.

San Lucas 15:10

Dan me se cata̱j ꞌu̱nj rihaan soj se vaa nda̱a se vaa guun rá chana̱ ga̱a nariꞌ noꞌ se‑saꞌa̱nj noꞌ roꞌ, da̱nj gu̱un niha̱ꞌ uxrá rá nimán nij se‑mo̱zó Yaꞌanj ni̱ꞌyaj nij soꞌ man o̱rúnꞌ síí tumé cacunꞌ ga̱a canica̱j nimán soꞌ canocoꞌ soꞌ chrej sa̱ꞌ ado̱nj ―taj Jesús rihaan nij soꞌ a.

San Mateo 11:25

Dan me se güii yoꞌ cachíín niꞌya̱j Jesús rihaan Yaꞌanj, cataj soꞌ a: ―Síí ꞌNi̱j Raꞌa xta̱ꞌ do̱ꞌ, Síí ꞌNi̱j Raꞌa chumii̱ do̱ꞌ, mé so̱ꞌ, Ata̱j. Ne̱ sa̱ꞌ uxrá quiꞌyáá so̱ꞌ caráán so̱ꞌ rihaan nij síí avii raa̱ do̱ꞌ, rihaan nij síí acaj cuentá do̱ꞌ, se vaa se̱ cuno nij soꞌ snana̱j maꞌ. Ma̱an nij síí vaa nica̱ꞌ nimán roꞌ, veꞌé cuno nij soꞌ, quiꞌyáá so̱ꞌ ado̱nj.

1 Tesalonicenses 2:9

Dan me se neꞌen soj se vaa nuvi̱i niga̱nꞌ ꞌyaj suun núj, ga̱a ne̱ riꞌ núj saꞌanj, ne̱ ránj maꞌa̱n núj rasu̱u̱n achiin rihaan núj, cheꞌé se ne caꞌve̱j rá núj rquee̱ núj rque̱ soj rasu̱u̱n man núj, maan tinu̱j, maan nocoj. Da̱nj ina̱nj quiꞌyaj núj ga̱a caꞌmii natáj núj snana̱ Yaꞌanj nana̱ sa̱ꞌ rihaan soj ado̱nj.

San Lucas 9:6

Ga̱a ne̱ caꞌanj nij soꞌ nij chumanꞌ, ne̱ caꞌmii natáj nij soꞌ snana̱ Yaꞌanj nana̱ sa̱ꞌ, ne̱ me rej maꞌa̱n va̱j nij soꞌ caꞌnéj nij soꞌ chiꞌii̱ xráá nij síí ranꞌ a.

San Lucas 2:26

ne̱ a̱j tihaa̱n Nimán Yaꞌanj man soꞌ se vaa se̱ caviꞌ soꞌ nda̱a se a̱j queneꞌe̱n ya̱ soꞌ man Síí Caꞌne̱j Yaꞌanj Si̱j ꞌNi̱j Raꞌa man níꞌ Ti̱nanii man Yuvii̱ rihaan Sayuun a.

San Mateo 16:17

Ga̱a ne̱ cataj Jesús rihaan Pedró a: ―Quiꞌyaj uxrá Yaꞌanj se lu̱j cheꞌé so̱ꞌ, Simón taꞌni̱j síí cuꞌna̱j Jonás ado̱nj. ꞌO̱ se né na̱na̱ cataj xnaꞌanj yuvii̱ rihaan so̱ꞌ me nana̱ caꞌmii so̱ꞌ cuano̱ maꞌ. ꞌO̱ se Réé ꞌu̱nj síí nicu̱nꞌ xta̱ꞌ me síí racuíj mán so̱ꞌ naríꞌ so̱ꞌ nana̱ yoꞌ na̱nj ado̱nj.

San Mateo 11:27

Canica̱j Jesús caꞌmii soꞌ rihaan nij yuvii̱, cataj soꞌ a: ―A̱j rqué Réé ꞌu̱nj Yaꞌanj cunuda̱nj rasu̱u̱n rihanj ado̱nj. Ne̱ a̱ ꞌó síí ne neꞌen da̱j vaa ꞌu̱nj; ma̱an o̱rúnꞌ Réj neꞌen a. ꞌO̱ se Taꞌníí soꞌ mej ado̱nj. Ne̱ a̱ ꞌó yuvii̱ ne neꞌen da̱j vaa Réj maꞌ. Ma̱an o̱rúnꞌ ꞌu̱nj neꞌen da̱j vaa soꞌ ado̱nj. Ne̱ sese me rá ꞌu̱nj cata̱j xnaꞌanj ꞌu̱nj rihaan ꞌó nij yuvii̱ da̱j vaa Réj, ne̱ queneꞌe̱n ꞌó nij soꞌ uún ado̱nj.

Hebreos 11:13

Dan me se ꞌo̱ amán rá ta̱ranꞌ nij soꞌ niꞌya̱j nij soꞌ Yaꞌanj nda̱a se caviꞌ ta̱ranꞌ nij soꞌ ado̱nj. Ne̱ ne quiri̱ꞌ maꞌa̱n nij soꞌ se vaa cataꞌ tuꞌva Yaꞌanj se vaa rque̱ Yaꞌanj rihaan nij tuvi̱ꞌ nij soꞌ maꞌ. Ma̱an se queneꞌen nij soꞌ se vaa vaa güii quiꞌya̱j Yaꞌanj cunuda̱nj yoꞌ, ne̱ cheꞌé dan guun niha̱ꞌ rá nij soꞌ na̱nj ado̱nj. Ne̱ cataj xnaꞌanj nij soꞌ se vaa né chiha̱nj nij soꞌ me chumii̱ nihánj maꞌ. Ma̱an se va̱j u̱u̱n nij soꞌ do̱j rihaan chumii̱ nihánj na̱nj ado̱nj.

Romanos 1:15

Cheꞌé dan niha̱ꞌ ndoꞌo raj cuchi̱j chumanꞌ Romá caꞌmi̱i̱ natáj ꞌu̱nj nana̱ sa̱ꞌ cheꞌé Cristó rihaan soj uún ado̱nj.

Hechos 16:10

Ga̱a ne̱ nu̱ꞌ naquiꞌyaa rasu̱u̱n yoꞌ rihaan Pabló, ne̱ nu̱ꞌ quiꞌyaj chuvi̱i núj caꞌa̱nj núj estadó Macedonia a. ꞌO̱ se cachríj rá ya̱ núj se vaa Yaꞌanj me síí caꞌneꞌ suun rihaan núj nata̱ꞌ núj nana̱ sa̱ꞌ cheꞌé Jesucristó rihaan nij síí ya̱nj estadó Macedonia yoꞌ a.

Hechos 10:44

Dan me se ataa a̱ doj quisi̱j caꞌmi̱i̱ Pedró nu̱ꞌ snana̱ soꞌ, ga̱a ne̱ nanij Nimán Yaꞌanj catúj soꞌ nimán cunuda̱nj nij síí cuno nana̱ yoꞌ a.

Hechos 8:25

Dan me se caꞌmii ro̱j soꞌ cheꞌé se vaa quiꞌyaj Jesús queneꞌen ro̱j soꞌ, ne̱ nataꞌ ro̱j soꞌ snana̱ Yaꞌanj Si̱j ꞌNi̱j Raꞌa man níꞌ, ga̱a ne̱ quinanꞌ ro̱j soꞌ chumanꞌ Jerusalén, ne̱ nataꞌ ro̱j soꞌ nana̱ sa̱ꞌ cheꞌé Jesús rque queꞌe̱e̱ chumanꞌ na̱j estadó cuꞌna̱j Samaria a.

Hechos 4:31

Dan me se quisíj cachíín niꞌya̱j nij soꞌ rihaan Yaꞌanj, ga̱a ne̱ quinaa̱n nu̱ꞌ rej ma̱n nij soꞌ, ne̱ caraa ndoꞌo Nimán Yaꞌanj nimán cunuda̱nj nij soꞌ, ga̱a ne̱ ne cuchuꞌvi̱ꞌ nij soꞌ caꞌmi̱i̱ nij soꞌ snana̱ Yaꞌanj maꞌ.

Hechos 4:8

Dan me se nu̱u̱ ndoꞌo Nimán Yaꞌanj nimán Pedró, ne̱ cataj Pedró rihaan nij soꞌ a: ―Cuno̱ nij soj si̱j nica̱j suun rii taꞌngaꞌ rihaan nij yuvii̱ do̱ꞌ, cuno̱ soj si̱j uun chij do̱ꞌ, nana̱ cata̱j xnaꞌanj ꞌu̱nj rihaan nij soj á.

1 Timoteo 3:16

Neꞌen cunuda̱nj níꞌ se vaa noco̱o uxrá vaa nana̱ sa̱ꞌ yuve̱ tihaa̱n naca̱ Yaꞌanj man níꞌ nana̱ canocoꞌ níꞌ, ne̱ nihánj me nana̱ yoꞌ a: Curiha̱nj Yaꞌanj rihaan chumii̱, ne̱ guun soꞌ yuvii̱ a. Veꞌé ndoꞌo quiꞌyaj soꞌ, cataj Nimán Yaꞌanj a. Queneꞌen nij se‑mo̱zó Yaꞌanj man soꞌ a. Nataꞌ nii cheꞌé soꞌ rihaan nij yuvii̱ yaníj a. Cuchumán rá taꞌa̱j nij síí ma̱n rihaan chumii̱ nihánj niꞌya̱j nij soꞌ man soꞌ a. Quinanꞌ soꞌ xta̱ꞌ, ne̱ niꞌndaj ya̱ veꞌé nacaj nij síí ma̱n xta̱ꞌ man soꞌ a. Yoꞌ me nana̱ noco̱ꞌ níꞌ a.

1 Pedro 4:6

Cheꞌé dan caꞌmii natáj ꞌo̱ soꞌ snana̱ Yaꞌanj nana̱ sa̱ꞌ nda̱a rihaan nij síí caviꞌ, cheꞌé yan xa̱ꞌ nee̱ man nij soꞌ, tza̱j ne̱ taj nii se vaa tumé nij soꞌ cacunꞌ, tza̱j ne̱ xa̱ꞌ nimán nij soꞌ, tza̱j ne̱ ca̱yáán nij soꞌ rihaan Yaꞌanj a.