Yoswa 7:6 - Tonga Bible 1986

⁶ Sono Yoswa wanguparuwa vyakuvwara vyake, ndipo wanguwa pasi kavunama paurongo pa bokosi la Ambuya mpaka mazulo iyo pamoza ndi ŵaraŵara ŵa ŵaYisraele; ndipo ŵangujidiya fuvu ku mitu yawo.

Yoswa 7:6 Referans Kwoze

Chiyambo 37:29

Po Rubene wanguweriyako ku zenje lo ndipo wanguwona kuti Yosefe mulivi mu zenje, wanguparuwa vyakuvwara vyake

Chiyambo 37:34

Sono Yakobe wanguparuwa vyakuvwara vyake ndi wanguvwala vigudulu mu chiunu mwake, ndipo wangutenjere mwana wake mazuŵa ghanandi.

Chitenje 2:10

Ŵaraŵara ŵamu msumba waku Zioni, ŵateka pasi chisisi; ŵajidiriya fuvu pa mitu yawo ndi ŵavwara chigudulu; ŵamwali ŵaku Yerusalemu ŵakotamiya pasi mitu yawo.

2 Samuele 13:31

Penipo karonga wangusoka, wanguparuwa maraya ghake, wangugona pa dongo; ndipo ŵateŵeti ŵake wose wo ŵanguma, pafupi nayo ŵanguparuwa maraya ghawo.

Maŵerengedu 14:6

Ndipo Yoswa mwana waku Nuni ndi Kalebe mwana waku Yefune, wo ŵenga ŵamoza ŵaku wo ŵangamuskora charu cho, ŵanguparuwa vyakuvwara vyawo,

Chivumbuzi 18:19

Ndipo ŵangujifunthuliya fuvu pa mitu yawo uku ŵabongo ndi kuliya ndi kutenje, ŵakuti, “Owe! Owe! Msumba ukuru wo, mwenimo wose ŵa zingaraŵa zamu nyanja ŵangusambaskikiya chifukwa cha uromba wake! Mu ora limoza wapopeskeka.

Machitidu gha Ŵakutumika 14:14

Kweni ŵachivwa ŵakutumika wo Barnaba ndi Paulo, ŵanguparuwa minjirira yawo, ndipo ŵanguzininikiya mu mzinda wo, ndi kukambura kuti,

Jobu 2:12

Ndipo ŵanguti wamuwona patali kuti ŵangumziŵa cha, ŵangukwezga mazu ghawo ndi ŵanguliya; ŵanguparuwa minijirira yawo, ndi kuthibuwa fuvu kuchanya kuwiya pa mitu yawo.

Jobu 1:20

Penipo Jobu wangusoka ndi wanguparuwa munjirira wake ndi wangumeta sisi la mutu wake, ndi kuwa pasi ndi kuromba,

Estere 4:1

Mordikayi wanguti waziŵa vyose vyo vinguchitika wanguparuwa vyakuvwara vyake, wanguvwara chigudulu ndi wangujidiriya vyoto, wangutuwa mu msumba kuliya ndi kubangura pachanya kwa kuŵaŵa mtima,

2 Samuele 12:16

Viyo Davidi wanguŵeyere Chiuta chifukwa cha mwana; wangufunga kurgha, wangusere ndipo wangugona pasi pa waka usiku wose.

2 Samuele 1:12

ndipo ŵangutenje ndi kuliya ndi kukana kurgha mpaka mazuru chifukwa chaku Sauli ndi mwana wake Jonafani ndi khamu lose la Ambuya ndi nyumba yaku Yisraele, chifukwa wangubayika ndi lipanga.

1 Samuele 4:12

Munthu waku Benjamini wakuthaŵa ku nkhondo, wanguza pa Shilo zuŵa leniliya, wakuŵa ndi vivwalo vyakuparuka ndi fuvu ku mutu wake.

Ŵeruzgi 21:2

Ndipo ŵanthu ŵanguza ku Betele, ŵanguja pasi mpaka ku mazulo paurongo paku Chiuta, ŵangusoska mazu ndi ŵangutenje kwakuŵaŵa.

Ŵeruzgi 20:26

Sono ŵaYisraele wose, liŵanja lose la nkhondo, ŵangukwera ŵanguza ku Betele, ŵangutenje, ŵanguja pasi paurongo pa Ambuya, ŵangufunga kurgha zuŵa lose liya mpaka mazulo, ŵangupaska mipasku yakocha ndi mipasku ya chimangu paurongo pa Ambuya.

Ŵeruzgi 20:23

Ndipo ŵaYisraele ŵangukwera ndi ŵanguliliya paurongo pa Ambuya mpaka ku mazulo, ŵangufumbiriya ku Ambuya, “Kumbi tikanderenga so kufupi kwachirwana nkhondo ndi ŵebali ŵidu ŵaBenjamini?” Ambuya anguti, “Rutani karwaneni nawo.”

Maŵerengedu 16:45

“Tuwani mukati mu wumba uwa, alinga kuti ndiŵamare wose.” Ndipo anguwa kavunama.

Maŵerengedu 16:22

Ndipo ŵanguwa kavunama, ŵanguti, “Owe Chiuta, Chiuta wa mizimu ya ŵanthu wose asani walakwa munthu yumoza, kumbi mukakalipiyanga wumba wose?”

Yoswa 7:7

Ndipo Yoswa wanguti, “Owe, Ambuya Chiuta, na chifukwa nchine mwambuska ŵanthu yaŵa pa Yordane, kuzachitipereka mu manja gha ŵa Amori, kutimara? Kwenga kwamampha tatinge tikhorwenge kuja kusirgha ku Yordane!

2 Samuele 1:11

Penipo Davidi wanguko, ndi kuparuwa vivwalo vyake; ndipo wose ŵakuŵa nayo pamoza ŵanguchita ichi;

2 ŴaKaronga 22:11

Ndipo penipo karonga wanguvwa mazu gha buku la dangu, wanguparuwa vivwalo vyake.

2 Mikoka 34:19

Ndipo kunguŵa kuti, karonga wanguti wavwa mazu gha marangu wanguparuwa byakuvwara vyake.

Jobu 42:6

chifukwa ichi nditijisuska, ndipo ndajiwezga mu fuvu ndi mu choto.”

Ŵeruzgi 11:35

Wanguti wamuwona wanguparuwa vyakuvwara vyake, wakuti, “Owe ine nane, mwana wangu! Wandisiskiya pasi ukongwa, wasanduka wakundisosomole suzgu yikuru; pakuti ndajuriya mlomo wangu ku Ambuya, ndipo kuti ndingawezga rapu langu cha.”

2 Samuele 1:2

ndipo pa zuŵa la chitatu, wonani, munthu wanguza kutuliya ku ugoŵi waku Sauli, ndi vyakuvwara vyakuparuka ndi fuvu ku mutu wake. Wanguti wafika kwaku Davidi, wanguwa pasi wangumulambiya.

2 Samuele 13:19

Ndipo Tamara wangudira vyoto pa mutu wake, wanguparuwa laya lo wanguvwara; ndi wanguŵika manja ghake pa mutu wangwenda ndi kuliya kukuru wachiruta.

Ezra 10:1

Po Ezra wanguromba ndi kuzomera uheni, kuliya ndi kuwa pasi paurongo pa myumba yaku Chiuta, unguwungana kwaku iyo mzinda ukuru wa ŵanthurumi ndi ŵanthukazi ndi ŵana chifukwa ŵanthu ŵanguliya ukongwa.

Nehemiya 9:1

Sono pa zuŵa la machumi ghaŵi ndi ghanayi la mwezi wenuwu, ŵaYisraele ŵanguwungana ndi kufunga ndi kuvwara vigudulu ndi dongo pa mitu yawo.

Estere 4:3

Ndipo mu chigaŵa chose cha charu mo mungufika dangu la karonga ndi langulu lake mwenga chitenje mukati mu ŵaYuda ndi kukana kurgha ndi kuliya masozi ndi kubongo; ŵanandi ŵangugona mu vyoto.