Yoswa 1:5 - Tonga Bible 1986

⁵ Paulengevi munthu mweniyo wakaziŵanga kuma paurongo pako mu umoyo wako wose; nge ndimo ndinguŵiya pamoza ndi Mosese, ndimu ndikaŵiyanga ndi iwe, kuti ndikakujowonga cha.

Yoswa 1:5 Referans Kwoze

ŴaRoma 8:31

Viyo tikatingenji kwaku vyenivi? Asani Chiuta we kuchiri kwaku ifwe, wakumikana nafwe njani?

Mateyu 28:20

ŵakuŵasambizga kuroreze vyose vyo ndalanguliya imwe: ndipo onani, ine nde namwe mazuŵa ghose mpaka ku umari wa mgonezi wo.”

Yoswa 1:9

Asi ndakulanguliya? Uŵi wanthazi, khwima; ungopanga cha, nanga nkhufipa mtima; pakuti Ambuya Chiuta wako we pamoza nawe ko ukayanga.”

Marangu 20:4

Pakuti Ambuya Chiuta winu ndiyo waruta namwe pamoza, kwachimurwiyani kumikana ndi ŵakupindikana ŵinu kumupaskani imwe chirewa.’

2 Timote 4:17

Kweni Mbuya iyo wangumapo pamoza nane, ndipo wangundikhomeska; alinga kuti mwaku ine mumemezu wo ufiskike, ndipo kuti ŵanguvwa ŵaMitundu wose: ndipo ndingutaskika ku mlomo wa nkharamu.

Sumu 46:11

Ambuya ŵa maŵanja we pamoza nafwe; Chiuta waku Yakobe nchakudingang'amo chidu.

ŴaHebere 13:5

Nkharu yinu yingaŵanga yakwanja ndrama cha; mukhorwe ndi vyo mwe navyo; chifukwa wanguti mweneko, “Kuti ndamleka iwe cha, chingana nkhuti ndamsiya iwe cha kosekose.”

Yoswa 3:7

Ndipo Ambuya angunena ndi Yoswa, “Zuŵa lino ndambenge kukukuzga mu maso gha ŵaYisraele wose, mwakuti ŵapanikizge kuti mo ndinguŵiya ndi Mosese ndimo ndikaŵiyanga ndi iwe.

Chituwa 3:12

Iyo wanguti, “Kweni ndikaŵanga pamoza nawe; ndipo ichi chikaŵanga chisimikizgu kwaku iwe, kurongo kuti ndine ndakutuma: utakuti watuzga ŵaYisraele mu Egipiti wazamutataliya Chiuta pa phiri lenili.”

ŴaRoma 8:37

Awa! Mwaku vyenivi yose tiruskiya kupunda mwaku yo wangutanja.

Yoswa 1:17

Nge ndimo tinguvwiya Mosese mu vinthu vyose, ndimu tikavwiyanga ndi iwe; kweni Ambuya Chiuta wako pe mphanyi waŵa nawe, mo wanguŵiya ndi Mosese!

Marangu 7:24

Ndipo waperekenge ŵakaronga ŵawo mu janja linu, ndipo mumarizgenge mazina ghawo kutuwa pasi pano; pamuwuravi munthu yumoza wakuma kumikana namwe, kweni mukaŵaparghang'e wose.

Yoswa 6:27

Viyo Ambuya ŵenga ndi Yoswa; ndipo mbiri yake yinguŵa mu charu chose.

Marangu 31:23

Ndipo Ambuya angupaska mazaza Yoswa mwana munthurumi waku Nuni. Anguti, “Uŵe gwa, ndi wachiganga cheneko, pakuti ukatolenga ŵana ŵaku Yisraele mu charu cho ndingurapiya kuŵapaska. Ine ndikaŵanga pamoza nawe.”

Marangu 4:31

Pakuti Ambuya Chiuta winu ndi Chiuta walisungu, kuti wakurekeninge cha, pamwenga kumupasuwani, pamwenga chingana nkhuruwa phanganu ndi auskemwe lenilo wanguŵarapiya.

Yoswa 10:8

Ambuya angunena ndi Yoswa, “Ungawopanga cha, pakuti ndaŵapereka mu manja ghako, paŵengevi nanga njumoza wakuma paurongo pako.”

Ŵeruzgi 2:18

Penipo pose Ambuya anguŵamikiya ŵeruzgi, Ambuya ŵenga pamoza ndi mweruzgi, ndipo anguŵapozomoska ku janja la ŵakupindikana ŵawo mu mazuwa ghose gha mweruzgi yo; pakuti Ambuya angukoreka chifundu pa mitamanthu yawo chifukwa cha ŵakuŵayuzga ndi kuŵasuzga.

Ŵeruzgi 6:16

Ambuya anguti “Ine ndikaŵanga pamoza nawe, ukakosonga ŵaMidiyani ulaka ukoso munthu yumoza.”

1 Samuele 10:7

Viyo asani visimikizgu ivi vyakufikiya, ipo chitanga cho chose janja lako lingaziŵa kuchita, pakuti Chiuta we nawe.

1 ŴaKaronga 1:37

Mwenimo Ambuya ajariya ndi mbuyangu karonga, viyo so ndimu ajaliya ndi Solomoni, ndipo akuzge chitengo chake kwakuruska chitengo cha mbuyangu karonga Davidi.”

1 ŴaKaronga 6:13

Ndipo ndikajanga mukati mu ŵana ŵaku Yisraele, ndipo kuti ndikajowonga khamu langu Yisraele cha.”

1 ŴaKaronga 8:57

Ambuya Chiuta widu waŵe nafwe, nge ndimo wanguŵiya ndi auskefwe, wareke kutijowo chingana nkhutilekerezga,

1 ŴaKaronga 11:38

Ndipo asani ukavwiyanga vyose vyo nditukulanguliya, ndipo ukendanga mu nthowa zangu, kuchita chenicho nchakurunjika mu maso ghangu pakusunga marangu ghangu ndi malangulo ghangu, ulaka ndimo wanguchitiya Davidi muŵanda wangu, ndikaŵanga nawe, ndipo ndikuzengiyenge nyumba yeneko, nge ndimo ndinguzenge nyumba yeneko, nge ndimo ndinguzenge Davidi, ndipo ndikupaskenge Yisraele.

1 Mikoka 28:20

Ndipo Davidi wanguti kwaku Solomoni mwana wake. “Uŵe wanthazi ndi ukhwimi, ndi uyichiti, ungopanga chingana nkhutenthema cha chifukwa Ambuya Chiuta yo ndi Chiuta wangu we namwe. Kuti wakujowonge chingana nkhukusiya cha mpaka penipo mlimu wa nyumba yaku Chiuta wamara.

Yesaya 42:16

Ndipo ndikarongozganga ŵachiburumutiya mu nthowa yo ŵalivi kuyiziŵa, mu tunthowa to ŵalivi kutuziŵa kale ndikaŵarongozganga. Ndikasanduskanga mdima wa paurongo pa wo kuŵa ukweru, malo ghavibokuboku kuŵa ghakunyoroka. Ivi vinthu ndi vyo nkhachitanga, kuti nkhavirekanga cha.

Yeremiya 1:8

Ungopanga iwo cha, pakuti nde nawe kukutaska iwe,” atiti Ambuya.

Danyele 11:16

Kweni yo watuza kumikana nayo wachitenge mo wakhumbiya, kuŵengevi yumoza wakuma paurongo pake; wamenge mu charu cha unkhankhu, ndipo chose chiŵenge mu nthazi zake.

Chiyambo 39:2

Ambuya ŵenga ndi Yosefe ndipo wanguŵa munthu wakusakata; ndipo wenga mu nyumba ya mbuya wake mu Egipiti yo,

Marangu 20:1

“Muchiya ku nkhondo kwachimikana ndi ŵakupindikana ŵinu, ndi muchiwona ŵakavalo ndi magareta, ndi liŵanja la nkhondo likuru kwakuruska linu, mungaŵawopanga cha; pakuti Ambuya Chiuta winu we namwe pamoza, mweniyo wangukutoleni kuno kutuwa mu Egipiti.

Yoswa 21:44

Ndipo Ambuya anguŵapumuzga kosekose nge ndimo angurapiya ku auskeu; pengavi nanga njumoza wa ŵarwani ŵawo yo wangumikana nawo, pakuti Ambuya angupereka ŵakupindikana ŵawo wose mu manja ghawo.